Mic 2 | XteSC | STEP | Ware nesala do yuma, sundi tali kankan kunge nesala tep, ikin keca dopra, sun nong deikipu derirum nesala yuma tep nengeda, sunda bicaue. Allahdi sun tep, ila di wenepkamsere. Lukunda mapkunge taru di, ‘Nimi yuk neng tep ikin keca deipkamepe,’ pepra upu sisingmanganen, berekrepa ipna taruda, adipapu asisingmangetopu, ikin keca dopra, sun kankan kunge nesala nong deiki derinunge. Ada, sun anengdi deiyo kepra upu puto di talepmanga deiki di kununge. Sunda, ila deiyo neng kununga cadi, tali kankan dakunge nesala yuma tep, ikin keca weik, sun nong deiki dopra derinunge.

Micah 2

Ila isomka nengdi, kankan kunge nesala tep, ‘Nun tenepmepe kecapu dipmepepa, ikin pel domengepa, bunga weik doronkamepe,’ tenenunga tep wenepu upu

1 Ware nesala do yuma, sundi tali kankan kunge nesala tep, ikin keca dopra, sun nong deikipu derirum nesala yuma tep nengeda, sunda bicaue. Allahdi sun tep, ila di wenepkamsere. Lukunda mapkunge taru di, ‘Nimi yuk neng tep ikin keca deipkamepe,’ pepra upu sisingmanganen, berekrepa ipna taruda, adipapu asisingmangetopu, ikin keca dopra, sun kankan kunge nesala nong deiki derinunge. Ada, sun anengdi deiyo kepra upu puto di talepmanga deiki di kununge. Sunda, ila deiyo neng kununga cadi, tali kankan dakunge nesala yuma tep, ikin keca weik, sun nong deiki dopra derinunge.

2 Sun amali keca kunge nengdi, kankan kunge nesala yuma, sun wa tenpu peamenge nge tep, ‘Nun dipapu upula doropkamape’ tenen, sisingmange ngeda, men tamnunge. Adipapu kunumna gum di, kwepdana upula doronunge. Utopu sun malipu tenenung nengdi, kankan kunge nesaladi, tenpu peamenge wai dam tep, ‘Dalupra doproptepe’ tenen, puto-puto kununge. Ange utopu, akankan kunge nesala, sun ati tenpunge peda, ‘Adipapu dalupra dopropkamepe,’ tenenunge. Uteneramenganen, mok upu penunga deiki cap, sun akati nesala yuma popmengedi, kankan kunge nesala, sun ati neitamai deiamenge keca yuma, sun mali kunge nesaladi tali dalupra upula doronunge.

Ware nesala do yuma, yuk tali dakunge nesala, sun ati cap, sun ati deiamenge keca cap, sun ati kikiman kuramenge nesala cap yumada, ‘E, nun bungsilip cap, nun talenup keca capda, teleppu kunkamre,’ men tenenunge. Sun mali deiyo nengdi, tali kankan kunge nesala talenge keca yumada, upula dalupra doronunge. Sun upula don nengdi akeca yuma dopropmengepa, sun akati kuramenge nesala yumadi, kange telep kange men doununge. Sun anesala yumadi, ‘Uo’ tenen, mali kange doupra kununge.

3 Sun mali kun keca deiyopu talepra kunge neng cap, ‘Nunda puto neng kunupa,’ tenenung neng cap, pio mali weik kununga tep nengeda, Allah er si Yahwehdi aupu peserure.

Gume, sun pio mali-mali weik kuruma tep nengeda, nedi sun wenemna tep, sun nong deiki ila ikin keca derinkamsene. Aikin keca, sun nong deiki deipkamne taruda, sundi lyepdamumdi, ton men benkamrume. Sundi men lyepdatume. Sundi kankan kunge nesala yuma tep, ikin keca sun nong deiki deriramrumtopu, nedi sun nong deiki peda, ila ikin keca deipkamsene.

Sun mali kurumu nesala yumada, ikin kecapu doronkamrume. Ila kange mun keca karepsene pangeda, amenda taru yumada, sun kange dipru eremna deiki, sal nong-nong kupra embarumutopu, ka di ton cap pio men kunkamrume. Sun mali kurumu nesala yumada, mali kange doupra, ali dangnapu kurumudi kunkamrume.

4 Sun sal nong-nong kuna deiki di kuramrumanen, nedi ila ikin keca, sun nong deiki deipsenepa, doproprumyopda, yuk nesaladi upenkamsenge.
“Gume, sunda telep kupra kuramidi, sal nong-nong kamami neng dinin, ukutaruda, ikin keca doropmenge,” pepra, yap-yap pesengedi, malya pepra autunkamsenge.

Ton ngeda, sun autunkamseng nesaladi, sun mali kurum neng tep, amut penkamenge.
“Sun mali weik kurami nesalada, Allah Yahweh er ila puto deiki di, sun kurami mutu yuma dopropu.
Ange utopu, sundi talepra kurami keca yumada, dalupra dopropu.
Sun kurami mutu cap, sun talepra kurami keca cap, dalupra dopropudi, sun tep ikin keca deipsei neng tep, sun deiki karepupa, ukutaruda sun mali neng taleami keca yumada, yuk nesaladi talenunge.
Allahdi ukupka deiki di, sun mali weik kurami nesalada, ila ikin keca, sun nonge deiki derirure.

Upepra pepmengedi, sun kankan kunge nesaladi, sun isomka neng tep, amut pepra pepsengedi, autunkamsenge.

5 Ange tep nengeda, Allah Yahweh erdi tenepu taru konum kupre pangeda, sun anesaladi taleamrumdi, isomka kepra taleamrumdi kuramrum mutuda, yuk nesaladi bokrapmengedi, yuk mutu nesala tep karenkamenge. Menop taruda, Allah Yahwehdi, weiamseu nesalapu kuramrum dinino, amenda taruda, Allah er nyapudi, sun taleamrum mutu tu bokrapmengedi, yuk nesala tep karenkamenge. Allah er nyapudi sun tep men makunkamsenge.

Ukuprepa, sun mali kuramrum nesalada, Allah er nyapu sisa di sun melimna tep, upu tenpunge peda, ton men penkamenge. Yuk nesala sundi atu cap, amutu neitamai yuma cap, bokra karepkamenge. Ukupmengepa, sun mali kuramrum nesala amenda taru kunkamrum mutuda, sundi, “Telepnge ace, malinge ace,” pepra men kunkamrume. Sunda dimpepnapu kunkamrume.

Mok upu lap pena neng cap, tek sisi upu lap pena neng cap tep, pepu upu

6 Nimi yumadi, ne nabi Mika tep upenenunge. “Gume aupuda, nun damai lap pepra peteremna gume. ‘Amenda taru, nun wenemna tep, Allahdi ila ikin keca, nun nong deiki derinkamsere,’ pepra peteremna yaprume. Aupu utopu upu yumada, nun damai tupa lap pepra nungna gume. Kandi peteremsememdi, apesemem keca yumada, tek sisi nun damai pio men yankamsere. Ikin keca, nun damai weik men kupkamsere. Akange mun keca yumada, nun damai men kuserepa, nundi ali men kunkamsere. Apesemem ngeda men kupmanto,” penenunge.

7 Sun Israel nesaladi, aupu penmanerumtopu, pena gume. Ware nesala do yuma, sun mali kurum keca utopu kupmengopda, Allah Yahweh erdi, sun ato nesala yuma tep, men wipdongopkamre do? Allahdi, sun anesalada mali kupmenga peda, anesala tep, ‘Dakwapye’ tenen, ‘Men wenepkamne,’ tenen, tali kaukemkamser do? Gume, angeda men kupmanto. Tonda Allahdi, ‘Dortaru ukupkamne,’ teneramre ngeda, ton men lumdonongrure.

Tonda, sun mali kurum nesala yumada, telep kupra dumsisipu kutumopda, nedi penmasen upu tep, ‘E, Mikadi tek sisi telep upu peteremserur,’ tenen, moupra kael keamtume. Allah erdi dumsisi teleppu kupra kunung neng tep, perur upu yumada, sun anesala tep, telep upupu pepra derirure. Aupu pepra derirur ngeda, sundi moupra men kael keamrum do?

8 Dinino, Allahdi upeserure. Gume, nedi wepra deiamsi nesala kunung dinino, sun adipapu, ne sun nai bo Allah tep, balila kupmengedi, ‘Er upu men gekepkamepe,’ tenen, yanitamnenunge. Israel nesaladi, sun kayapu neng kenengmenge opkal peda, upula doronunge. Sun kayapu nengdi, ‘Gume, sun Israel nesaladi nun tep, teleppu kunkamsenge. Sundi nun tep men poryakankamsenge,’ tenen, teka teneramsei dinino, ukutaruda, tali kunmange nesala tep, sun podan neng pepra, wareng yakarume.

Ukupmantoda, mar podanai benmanganen, tamupra yakange taruda, sun opkal yuma gwelepmarenge cap, bental bapmarenge cap, malinge cappu kenekra yakanunge. Ange utopu, sun mali kumum nesaladi, Allah erdi wepra deiamu nesala, sun opkalda, upula dororumpa, mali-mali opkalpu kenengnunge.

9 Tonda ange utopu, ‘Ne nyapu sisa kunga kan-kan kunkameng’ tenen, wepra deipsi nerapuda, sundi yana domdongorume. Sun anerapudi kange deipra kunung ati yuma, sundi dalupra dororume. Tonda, anerapudi deringe nyapu tep, ‘Nun nyapu tep, nun talepe keca karenkamepe’ tenen, ketenepra deiaminge yuma peda, sun mali kurum nesaladi, upula dalupra dororume.

10 Amali-mali weik kurum keca yumada, ukuruma tep nengeda, ukutaruda sun akurumu mutu neitamai yumada, tapra bendopkurume. Ada, sun mali kumum keca menenga tep, sun kuramrum mutu yumada, konum dopropsene. Amutu neitamai kange deipra kuramrum dinino, ukutaruda amutu tep, “Nun mutu sisa aca,” men penkamrume. Ada, mesum tep men pepsene. Sun pio mali kuruma deiki di, amutu neitamai yumada, ila mali keca weik derirume.

Ada, ne upu yaniramneruma deiki di, sun kurum mutu yumada, sundi konum mali kudiramrume. Atep nengeda, sunda amutu neitamaida, pio men kunkamrume. Amutu tep, ‘Nun mutu sisa aca,’ pepra, tupa men penkamrume. Ne Allahdi, amutu dalupra dopropkamsena tep pepsene. Ukupkamsen taruda, kange mun kange doupra kunkamrume.

11 Tonda, sundi tenerumu ngeda ake. ‘Gume, Allahdi er upu peiprepa, lap penung neng, nabi-nabidi mok upu deiki di peteremsenge upuda telepe,’ tenemumdi, ‘Tek sisi pena upuda nun songe,’ tenerume. Tonda, mok upu pen nabi-nabi nengdi, “Amutupu kupedi, anggur me kange yawaramrenge cap, yuk yu me cap, telep peramrenge yuma weika di jenada telepe pua,” pepra pepsetengopda, sun mali kurumu nesaladi, amok upu pena neng tep, kange deiptume.

‘Mok upu penge nabi-nabi nengda, nun kange telepe,’ tenemumdi, ato neng tep kange derirume. Ukuruma tep, amutu di tapra, yuk mutu bendopkamrume pepsene. Allahdi upeipupa, nabi Mika gekepudi, seku.

Allahdi pedina upu deiki di, “Amenda taru, Israel yala nesalada lyepropkamne,” pepu upu

12 Allah Yahwehdi, aupu ton cap dukdongopra pepu. Uo, ne nyapu sisa Israel nesalao, sunda weika di wenepsenepa, nimi weika di depkamrum dinino, sun kan-kanda, nimi yambulanunpu gawal tapsenepa, gam tupa kunkamrum nesalada, nedi lyepropnedi bulupra, tenpu mutu neitamai deipkamsene. Ukupmantoda, domba bisam peina deiyo nengdi, sun domba bisam dopra, tenpai bupra deipmengedi, beilya pumbon wipra dongoramengtopu, nedi sun tep angetopu kupkamsene.

Ukupsenyopda, ukupmanto ngeda, domba bisamda telep mutmuta paramyai bena deipmengepa, kange deipmengedi, mutmuta jeramengtopu, nedi lyepropsenyopda, telep kupra deipsenepa, kunkamrume. Amenda taruda, sun kunkamrum mutu neitamaida, nimi yala weik kupra deipsenepa, gung pio weik kupbankamenge. Gung weik kungedi, amutu neitamaipu kange deipra, pingpinga di kunkamenge.

13 Ataruda, ne pedi lyepropsenedi, dubenkamsene. ‘Sun wenemna tep, yuk karen mutu dubenepa kunkamenge,’ tenepra keteneipsipa, yuk mutu nesaladi, sun bisbisa kapya deiki di, sun nong doupra benamseipa, kuramrum mutu di doupra, yuk telep mutu dubenkamsene. Ukupkamsen taruda, yuk mutu nesaladi ateng koupra, sundi dubenamsei mutu neitamai di tapra, akati-akati bisi buplan yuma paksingipra, benkamrume.

Ukupra benkamrum mutuda, sun menop taru di kuramrum mutu neitamai pua. Nedi kareramsipa, sundi dororamrumdi kuramrum mutu, sun mutu sisa tep pepsene. Sun pe mutu tamupra yankamrum taruda, ne Allah Yahweh dipapu, sun ila nimi deiyo ngebo Raja talepra kunkamsene. Atep, sun bemumdi kunkamum mutuda, ne Allah dipapu, ‘Telep bisida aca,’ pepra melimsenepa, embankamrume. Allahdi lap peipupa, nabi Mikadi seku.