Mic 3 | XteSC | STEP | Nabi Mikadi pepu. Uo, sun nimi deiyo neng kepra kurumudi, Israel yala nesala talerumu neng yumada, apepkusen upu moupra gekepkurume. Sunda, ila nimi deiyo neng kuruma cadi, tek sisi sunda pio dumsisi kupra kuramtumdi, telep pel doramtum ja. ‘Tek sisi telep kuna ngeda ake, mali kuna ngeda ake’ tenen, sundi konum moupra kael keamtum dinino, sunda tupa pio malipu kurume.

Micah 3

Israel nesala sun deiyo neng cap, Allah upu lap pena deiyo neng capdi, mok upu peteremamipa, Mikadi, “Sunda mok upu peteremna nengpu kurume,” pepu upu

1 Nabi Mikadi pepu. Uo, sun nimi deiyo neng kepra kurumudi, Israel yala nesala talerumu neng yumada, apepkusen upu moupra gekepkurume. Sunda, ila nimi deiyo neng kuruma cadi, tek sisi sunda pio dumsisi kupra kuramtumdi, telep pel doramtum ja. ‘Tek sisi telep kuna ngeda ake, mali kuna ngeda ake’ tenen, sundi konum moupra kael keamtum dinino, sunda tupa pio malipu kurume.

2 Sunda, teleppu dumsisipu kupra kutum dinino, sundi dumsisi kange tenepra, pel donge neng tep nengeda, ‘Nun songe’ tenen, yu kuserure. Utopu, telep kuna peda, ‘Nun songe’ tenen, tamrume. Utenemum dingeda, pio mali pel talepra dorume. Adeiki di ukupmantoda, ne nyapu sisa, Israel yala nesala yuma tep, sundi gam tupa kunmangepapu, sun bol deikinge yuma komorume. Utopu, sun yo deiki kuramre bol yuma, koptapra tu gupra dororume.

3 Tonda, ukupmantoda, sundi ne nyapu sisa, Israel yala nesala tep, sun tu neitamai akapunge dopra jepkumum taruda, sun anesala yumadi, yo copra tapmumdi, sun tu gudorume. Tonda, sun bol yuma sesekra tamrume. Ukupmantoda, bisam galeprapmengedi, mau pumbon dongopramengtopu kurume. Ange utopu bisam galepra meteteka kepra, yangdin keca er sida kuali deiki di, dapra jeramengtopu, sundi ne nyapu sisa tep, ukupra jerume.

4 Ukupra kurum dinino, Allahdi ikin keca karepserepa, sun nong deiki, ikin keca yaryopda, sun mali perumudi, ‘Uo, nun nai bo Allah Yahweh, kandi lyepseo,’ pepra mororume. Mali perumudi, “Uo, nun nai bo kandi melipra lyepropseo,” pepra moronkamrum dinino, Allah Yahwehdi, sun moromumnge tep, gekepra men lyepropkamsere. Sundi Allah tep moropkamrumnge peda, pio men gekenkamsere. Deiyoda, sun mali kun kecapu talepra kuruma deiki di, pio tapkamsere. Ukupkamser taruda, sundi Allah tep, moronkamrum keca yuma peda, pio men gekenkamsere.

5 Mikadi pepu. Allah Yahwehdi, sun mok upu talepra perumu deiyo neng tep, “Ukupra-ukupra,” pepserure. Ne nyapu sisa, Israel nesaladi, sun mok upu perum nabi-nabi neng cap, Allah upu lap pena deiyo neng cap tep, sun lap perumu upu kunumna tep, jen keca weik karepsengopda, sundi, “Yo, telepe. Dortaru neitamaida, tali kange doupra teleppu kunkamrume,” perume.

Dinino, yuk nesala tep nengeda, kunumna telep keca men karesenge nesala tep, sundi uperume. “Gume, dortaru neitamaida, sun podan nengdi yana popkamsenge,” pepra, mali upupu pepra, sun nong deiki ikin keca derirume. Ukuruma deiki di, tali mok upu peprumudi, Israel nesala, sun nong deiki ikin keca kemderirume. Atep, sun ukurum nabi-nabi neng yuma tep, Allahdi aupu peipseu.

6 Uo, sun mali upu perumu nabi-nabi neng yuma, sun mambul upu lap pepra kurumu taruda, konum sirya gawal dakamar taru damai kupre. Atep, ukutaru di dipra amenda taru peda, ne Allahdi sun tep, dortaru kunkamre kecada, men lap penkamsene. Ukupmantoda, keteng dakdongoprepa, kunungamretopu kupkamsera tep pepsene. Ukupkamser taru kupkamrenge yumada, sundi men lap penkamrume. Tonda, ken mana deiki di lap pepnepa, sundi, “Angeda ukupkamra tepa,” pepra lap perumutopu, pio men penkamrume. Ange yumada, nedi men lap penkamsena tep, sun peda, ange men gekenkamrume.

7 Tonda doryankure taru tep, “Ataruda ukupkamre,” pepra lap perumu ngeda, sun alap perumutopu, men kupkamsere. Ne Allahdi akeca-keca yuma tep, tupa men lap penkamsena cadi, tali dimpeprappu kunkamrume. Amenda dortaru kunkamrenge tep, lap pen upu men pepmanto kupseryopda, sun nabi-nabi neng yumada, kware kupserepa, ‘Yuk neng epsenung’ tenen, opkal dopra, sun pe urasin lelimdongorumudi, pio ali dangkamrume.

Ada, “Allah erdi nun penup upu men gekeseredi, tali kaukeproserepa, dortaru kupkamrenge tep, upu peiamepunge yumada, men dukdongopkamsere. Tonda, men di peamepu ngeda, nun pe kange dipu peramepu. Allahdi pediramseupa, sun tep lap peramepu guma,” pepra katuai di penkamrume. Ukuprumnyopda, yuk nesala yumadi, sun tep, “Sunda pio tali nengpu kununge,” pepra tapsengedi, mali upu pepsengepa, sun mok nabi-nabi neng yumadi, kwar kupserepa ali dangkamrume.

8 Sun mok upu peteremum nabi-nabi nengda, ukunkamrum dinino, ne Mikada, Allah Yahwehdi ne tep, bicau teneneredi, er Lek Sambala cap, er puto cap karenerepa, ne dipru neitamai wekneredi diningnerure. Ukunerura deiki, er dipapu ne tep, moupra kael kemna deiyo keca cap, dumsisi kuna deiyo keca cap, tek sisi kupra upu bongdina deiyo keca cap karenerepa, moupra tenepnedi, telep dumsisi kupra kunune.

Ukununa deiki di, Israel nesala yuma tep, “Sun mali kurumudi, Allah er upu yanirum ngeda ake,” pepra, katuai di lap penkamne. Ange utopu, ne balila deiki di, Yakub erdi deiamupa, dadeipdanen yakaramya deipipa, ukutaru amutu neitamai kunung nesala tep, “Sun pio mali weik kurum ngeda, ake,” pepra katuai nedi lap pepra derinkamne. Nabi Mikadi pepu. Upepu dingeda, aupu ton dukdongopra pepu.

9 Sun Israel nesala yuma talepra kumum nimi ila deiyo neng cap, Yakubdi deipupa, dadeipdanen yakaramipa, ukutaru amutu neitamai ila deiyo neng kepra kurum nesala, sun yumada, nedi pepsene upupu moupra gekepso. Ada sundi, telep dumsisi kunange akapmarepapu tamrumudi, lerekra mali kunangepu kuruma tep, lap pepsene.

10 Tonda, Yerusalem mutu neitamaida, telep ati dopra kurum dinino, sun akati-akati yuma telep dumsisi kupra kuna ati, men domrume. Ange gum dinino, Yerusalem mutu neitamai, mali kuna deiyo kecapu talepra kuramruma deiki di, akati yumada domrume. Utopu, Allahdi, ‘Ne mawa mutu’ tenen, Sion mutu neitamai domrum ati yumada, nimi weika di tali lupra portamruma deiki di, doramrume.

11 Tonda, Yerusalem mutu neitamai kunge nesala yuma tep, upu bongdina taruda, dumsisi kupra upu men bondirume. Sun nimi deiyo kepra, amutu talerum deiyo-deiyo neng yumadi, sun mali kupmange nesala tep, wenemamtum dinino, anesaladi, “Nun kupmap ngeda kaukepserume,” penunge. Ada, upu sengdana tep, co bo karepmengepa mok upu deiki dipu perume. Ange utopu, Allah er si eremna ati neitamai talepra, pel donung neng, sun imam-imam nengdi, “Nunda co bo weik karepsengepa dopropmemyopda, amutu neitamai kunung nesala yuma tep peteremkamepe,” perume.

Tonda, Allah er upu pepra deiprepa, sun Allah upu lap pena cap, amenda kupkamre keca tep lap pena cap, kunge neng nabi-nabi peda, “Co bo karepsemumpa, dopropmapya deiki di, Allah Yahweh erdi peipmaser ngeda, lap penkamsepe,” penunge. Ukunge dipapu, sundi tenenungada, ‘Gume, Allah Yahweh nun damai akuserura tep, ikin keca nun damai men yakankamsere. Teleppu kunkamepe,’ tenengedi penunge. Utenenunga deiki, Allahdi kange mun keca dopra, sun nong deiki derinkamre.

12 Ange tep nengeda, ne nabi Mikadi pepsene. Sun ila mali kumumpa, Sion mutuda tu palipra, wa pen damai utopu kupkamre. Ada, Allahdi go kareprepa, Yerusalem mutu neitamai ati dominge yumada, yuk mutu nengdi yana uruptapmengepa, walangyopu kupkamre. Ukupmengedi, Yerusalem mutu neitamai kure ati yumada, uruptapmengepa, sikke bute utopu kupkamre. Amutu neitamai dorami ati arum yumada, gum kupkamre.

Ukupyopda, amenda taru co mutmuta pakredi tekyopda, tali bura mutu utopu kunkamre. Allah Yahweh er si eremna ati, amutu deiki kurur dinino, amenda taru, akati peda uruptapmengepa, gum kupkamre. Amutu deikida, tali co mutmuta paramretopu kupra kunkamre. Ne nabi Mikadi, sun amutu deiyo-deiyo neng tep pepsene.