Mic 4 | XteSC | STEP | Amenda doryankamre taru kupkamre ngeda ake. Allah Yahweh er si eremna ati domi mutu tep, nesala ban-ban yumadi, ‘Uo, yuk mutuda yambul mambul dinino, amutupuda ila mambul weik mutu kurure,’ tenenkamenge. Allah er si eremna ati domi mutu erepra deiprepa, yuk mutu yumada, amutu amutara utopu kunkamre. Ukuprepa, mutu ban-ban yuma dakunge nesaladi, amutupu yakankamenge. Amutu yangopda, Allah er sipu eremkamenge.

Micah 4

“Allah Yahwehdi, nesala ban-ban yuma antapra telep kupra deipredi, talenkamre,” pepu upu

1 Amenda doryankamre taru kupkamre ngeda ake. Allah Yahweh er si eremna ati domi mutu tep, nesala ban-ban yumadi, ‘Uo, yuk mutuda yambul mambul dinino, amutupuda ila mambul weik mutu kurure,’ tenenkamenge. Allah er si eremna ati domi mutu erepra deiprepa, yuk mutu yumada, amutu amutara utopu kunkamre. Ukuprepa, mutu ban-ban yuma dakunge nesaladi, amutupu yakankamenge. Amutu yangopda, Allah er sipu eremkamenge.

2 Amutu yakankameng nesala, sundi penkameng ngeda, “Yakaso, nun yuma Sion mutu deiki welepmepedi, Israel nesala sun nai bo Allah Yahweh, er si eremna ati damai benkupe. Ukupmepepa, erdi nun kunkamepnge yuma tep, bisi peteremkamsere. Ukupra peterepserepa, nun yumadi abisipu dombankamepe. Ange pepmasena deiyoda, Allah Yahweh er upuda, Yerusalem mutu neitamaipu kurura tep, amutupu bena kunkamepe. Tonda, Allah Yahwehda, Sion mutu deikipu kuredi, er nyapu sisa tep, upu moupra peteremrure. Atep Yerusalem mutupu bena kunkamepe,” pepra penkamenge.

3 Mutu ban-ban yuma dakunung nesala, sun kunung keca tep, Allah dipapu upu bokeipkamre. Ada, ila pala mutu tep negara penungai kunungdi, ila puto weik kunge nesala cap, karen mutu yuk-yuk dakunung nesala yuma cap, damai mutu kunge nesala yuma cap tep, upu bokeipkamre. Tonda ataruda, mar podanung nesala yumadi, sun mar podana tep dounung keca yala-yala yuma, dopra deipmengedi, tali dimpeprappu kunkamenge. Sun mar podana tep, taleami jen cap, parang cap, besi takke keca cap yuma dopropmengedi, uku dongopmengepa, uku bupu di boun kupyopda, wa pena keca cap, co du dangna keca cap, ketenepra derinkamenge.

Deiyoda, ataruda nesala ban-ban yumadi, ‘Mar podana tep, ila kael kemna deiyo kecada, nun songe. Ange ton cap men kael kemkamepe’ tenen, kunkamenge. Atep, sun podana tep ketenemdinge keca yumada, gum kupra deipkamenge.

4 Ton tara nesaladi yuk tara nesala tep, men podankamenge. Dinino, sun yuma yuk-yuk gam kunkameng taruda, tonpa dukdongopra tenpu kange doupra teleppu kunkamenge. Akunkameng taruda, anggur tapu du wa cap, ara co du wa cap, sun pedi sun pe wa peamenge mutu neitamaipu bukmengedi, tali kange deipra kunkamenge.

Ataru kunkameng nesala yumada, kwar-kwara di men kunkamenge. Yuk mutu nesaladi, yuk mutu nesala tep, kwar men dangkamenge. Alap pepmasen keca yumada, ne Allah Yahwehdi, im deiki jen talepra kunge malaikat yuma, sun ila deiyo ngebo kunedi, pedina upu pepmasena tep, ange yuma tek sisi nong kupkamre. Neda ila puto ngebodi akeca yuma, telep kupra derinkamna tep pepsene.

5 Yuk mutu-mutu yuma dakunung nesala yumadi, ‘Akecada nun nai yape’ tenen, isok er sipu yuk-yuk si pepra eremnunge. Dinino, nun Israel nesalapuda dumsisipu telep kupra kupedi, nun nai bo Allah Yahweh er sipu eremepedi, er amutarapu pio akunkamepe. Nun nai bo Allah tep, pio men tamkamepe.

Israel nesala yuk karen mutu dabena kuramengepane, “Amenda taruda Allahdi anesala dopra, tamupra duyankamre,” pepu upu

6 Allah Yahwehdi pepu.

Ne tenepsi taru konum kupre pangeda, sun wenemna tep tamsipa, yuk mutu nengdi doupra dubenamipa, kange mun kange doupra kuramyane, tupa dakunge nesala yumada, nedi dopra duyanedi, bupra deipkamne. Sun men benmanto nesala cap, yo kwaneamu nesala cap, sun nong deiki ikin keca deipsipa, kange mun kange doupra kurami nesala cap, telep kupra deipnedi, sun pe mutu tamupra duyankamne.

7 Ne nyapu sisada, yuk mutu nesaladi popra dopropseidi, sun pe mutu dubeipa, karen mutu neitamai bena dakuramyane, tupa dakungedi, ukutaruda puto pio bounpu kunung dinino, dakuramrum nesala yumada, yambul metekanun tupa dakunung dinin, nedi ka tamupra weik kupra deipsenepa, sundi deipmumpa, dadeipdanen bankameng nesala yumada, pio weik kupbankamenge. Ukupsene taruda, puto weik nesala kunkamrume. Ukupkamsen taruda, ne sun nai bo Allahda, Sion mutu deiki kunedi, sun talenkamsene. Nedi sun tep, “Ukupra kunkamrume,” pesenepa, pio tep akunkamrume. Kange di ton cap, pio men tamkamsene.

8 Yerusalem kanda, ne Allahdi ka di ton cap, telep kupra deipkamne. Ne Allahda, ne nyapu sisa, sun Israel nesalada, Yerusalem neitamai kunkamenge. Menop taruda, Yerusalem mutu dakurami nesaladi, yuk mutu, dana-dana tara mutu yuma talepra, ila puto weik kuramitopu, amenda taru peda, nedi sun tep telep kupra deipsenepa, kange di ton cap, sun puto weik nesala kunkamrume. Sun Yerusalem mutu kunkamrum nesala tep nengeda, ‘Uo, sunda ne ner mi utopu kununge’ tenen, ila di bicau tenesenuna cadi, telep kupra deipsenyopda, yuk mutu kunkameng nesala yumada, sun amutarapu kunkamenge.

9 Dinino ukutaruda, sun ware keca deiyo tep, ila di engepra mali perum do? Tonda ware keca tep, sunda mumun douamre ner mi deipkurya tep, pu weik jerepa mali peramretopu, kurumudi mali pepra engerum do? Tonda, sun ila nimi deiyo ngebo, Raja erdi sun ati arum dopra, kuruma neitamai tupa men kurur do? Sun makuna tep, ila kael nengdi, ‘Telep kunada ake, mali kunada ake,’ pepra pesengedi, upu bungdina neng cap yumada, konum depropseipa, sun mali pepra engerum do?

10 Uo, sun Yerusalem mutu kurum nesalao, mali-mali weik kuramrumnya deiki di, mundu douamenge nerapudi, ikin kange doupra, ngolokra kurameng utopu konum kurume. Tali tep engepra men ngolongrume. Uktaruda, sun kumum mutu di tapra, katuai mutu bena, ke taru neitamai kunkamrume. Ukunmamumpane, Babel mutu nesaladi sun tep, bisbisa kapsengedi, sun yuma ateng koupra, adipapu Babel mutu dubenkamsenge.

Dubena dadeipsengepa, dakuramrumpane, amenda taruda, ne sun nai bo Allah Yahwehdi, akaren mutu dabena kuramrumpane, akan-kan nedi lyepra doropkamsene. Ada, sun podan nesala neitamai di lopra tapsenedi, lyepropkamsena tep pepsene.

11 Tek sisi ukutaruda, yuk karen mutu ban-ban yuma, dakunge nesaladi bulupra Yerusalem mutu yangedi, ‘Anesala yuma popkamepe,’ tenen, yana warengmasenge. Sunda amali kunge nesaladi, ‘Uo, Sion mutuda, ila mambul mutu penung dinin, nundi amutu yuma cap, amutu neitamai kure keca yuma capda, mali kupra deipkamepe. Israel nesaladi, ‘Akeca ila mambule,’ tenen, Sion mutu neitamai inipra deiami keca cap, Allah er si eremna ati capda, nun pe asuru di mening damai dinkamepe,’ tenenunge.

12 Dinino, tek sisi pepsene. Sun anengda, ne Allahdi ‘Ukupkamne,’ tenenun ngeda, men tenepra kael kemnunge. Sun anesalada, ‘Allahdi nun bupra tenpuai deipseredi, wenepra popkamsere,’ men tenenunge. Ukupmantoda, gandum sekra bupra tenpai deipmengedi, gege pepmengepa, tenpai sakrepane, malinge cap, telepnge cap weramengtopu, ne Allahdi ukupkamne ngeda, pio moupra men tenenunge. Sun amali kunge nesala peda, wenepra popkamne ja.

13 Ne Allah Yahwehdi, sun Yerusalem mutu neitamai kurum nesala yuma tep pesene. Yerusalem mutu neitamai kurum nesalao, sun adipapu bamumdi, sun podan nesala yuma tep, yanipsingipra benkurume. Ada, ne sun nai bo Allahdi, sun tep puto weika di karepkamsene. Ukupmantoda, sapi bisam giso deiki takke beleramrenge gat kuramretopu, puto weik kweipkamsene. Tonda, sapi bisam er yan gala takke gat weik kuramretopu, sun yan yuma peda, puto weik kweipkamsene.

Ukupmanto ngeda, gat keca er si tembaga cap, tonda gat keca er si besi cap, puto weik kuramretopu, kweipkamsene. Ukupsenepa, karen mutu yuk dakunge nesala yala-yala yuma, sundi anesala tep, bisbisa kapra yanipsingipkamrume. Ukupra kunkamrum taruda, sun podan nengdi upula dalupra dorongedi, talenung bung keca yala-yala yumada, sundi dalupra yamumyopda, ne Allah Yahweh, gispal dona tep karenkamnerume. Sun yuk mutu nesaladi kourameng keca yuma, upula kipra ne kori duyamumdi, ne si eremna tep karenkamnerume. Ne Allah Yahwehda, tuai mutu ban-ban yuma talepra, deiki tara kunedi, Ila Eremna Ngebo, puto weik ngebo kunune.

14 Uo, sun Yerusalem mutu neitamai kurum nesalao, ‘Nun nai bo Allahdi melimkamser’ tenen, Allah tep moupra tenepmumdi, pio pe deipra moromumpa, erdi sun tep melimkamsere. Ukutaruda, nun podan neng yangedi, ‘Israel nesala cap, sun ila nimi deiyo ngebo cap, popkupe’ tenen, wareng yankamsenge. Nun ila nimi deiyo ngeboda, balena dopra, er katum deiki popkamenge. Atep, ‘Nun nai bo Allahdi melipra lyepkamser’ tenen, pio puto di moronkamrume, pepsene.

Nabi Mikadi sun Israel nesala yuma tep pepu.