Mic 5 | XteSC | STEP | Allah Yahwehdi pepu. Betlehem Efratao, kanda Yehuda mutu neitamai yambul ati arum domkeipa, yambul mutupu kurume. Dinino, Betlehem mutu neitamai di, ila nimi deiyo ngebo tenpu wepra deipnepa tekamre. Tekredi, Israel nesala yuma talenkamre. Angeboda, pumun taru akeca-keca yuma kapul men kwamu taruda, er konum kuramu. Atekamre nimi deiyo ngebo erda, pio pumun taru neitamai di dipdongopra, pio akuramu.

Micah 5

Allahdi pedina upu deiki di, “Betlehem mutu neitamai tekamre ngeboda, nimi lyemna deiyo ngebo kunkamre,” pepra deiamu upu

1 Allah Yahwehdi pepu. Betlehem Efratao, kanda Yehuda mutu neitamai yambul ati arum domkeipa, yambul mutupu kurume. Dinino, Betlehem mutu neitamai di, ila nimi deiyo ngebo tenpu wepra deipnepa tekamre. Tekredi, Israel nesala yuma talenkamre. Angeboda, pumun taru akeca-keca yuma kapul men kwamu taruda, er konum kuramu. Atekamre nimi deiyo ngebo erda, pio pumun taru neitamai di dipdongopra, pio akuramu.

2 Allahdi aupu ton pepu. Atep nengeda, sun Israel nesalada, Allah er si Yahwehdi kaukemserepa, sun podan nengdi, ateng koupra dubesengopda, ikin pel dimkamseng dinino, sun nai bo Allah tenepu taru konum damai kupyopda, lyepkamsere. Ada Israel nesala kan-kan Allah er pedipapu kaber ner tenpu wepra deiprepa, mundu doamyane, amenda taru er mi deipkamre.

Tonda akaber nerdi er mi konum deipyopda, er kayapu Israel yala nesala, sun wenemna tep, yuk karen mutu nesaladi ateng koupra dubenami mutu neitamai kunge nesala, nimi gung weiknge yumada, Allahdi lyepra dopropredi ka tamupra sun men di kurami mutupu yan deiprepa, tenpu kange doupra telep kupra kunkamenge.

3 Animi lyemna deiyo ngebo konum yan belepra tekre pangeda, Allah Yahweh er ila puto angebo er nong deiki deiprepa, er nyapu yuma tep taleredi, kalekra melimrepa, telep kuprappu kunkamenge. Allah Yahweh er sida ila mambul si kurure. Atep, ataruda aila nimi lyemna deiyo ngebodi, Allah er si puto deiki di, Israel yala nesala yuma melimkamre. Ukupmantoda, domba bisam peina deiyo nengdi, sun domba bisam tep, telep jen keca karepmengedi, telep kupra peiramengtopu, angebodi Israel nesala yuma tep, pio telep kupra puto di kalekra melimkamre.

Ukupyopda, sun yuma bouna di dimpepra kungedi telep kange doupra kunkamenge. Ada mesum tep gume. Deiyoda, aila nimi deiyo ngeboda ila puto weik kunkamra cadi, im sirik, mutu sirik cap, tuai mutu ban-ban yuma kunge nesala, angebo epmengedi kael kepmengopda, er angebo tep, ‘Uo, erda tek sisi ila mambul weik ngebo kurure,’ tenen, er tep gispal donkamenge. Atep nengeda, erdi talenkamre Israel nesala yumada, telep kange doupra, pio dimpeprappu kunkamenge. Deiyoda, erdi talenkamsera tepa.

4 Tonda, Asyur mutu nesaladi, ‘Israel nesala bisbisa kapmepedi, popkamepe’ tenen, nun mutu neitamai yana weksetengedi, nun mutu tu yana yanipetepsetengopda, Israel nesala yuma puto kepmengedi, sun yoneitam bari kalengna deiyo neng ton wepra tekeipkamenge. Sunda gembala utopu neng kupra, Israel yala nesala melimkamenge. Ange utopu, sun tep ‘Telep bisida ake, telep kun keca kunkamrum ngeda ake,’ pepra peteremkamsenga tep, ila deiyo neng ban bari di ton wepra deipkamenge. Ukupmengopoda, aban bari deiyo nengdi Israel nesala talepmengdi, kalengkamenge.

5 Ataruda, Asyur mutu nesala pe, Nimrod mutu nesala yuma peda, ‘Israel nesala popbisipkamep’ tenen, sun Israel yala nesala kunkameng mutu yana wekamenge. Dinino, ukupra wekmengopda, Israel nesaladi sun Asyur mutu nesala cap, Nimrod mutu nesala cap tep popmengedi bisipkamenge. Ada, Asyur mutu neng porbisina tep, Allahdi wepra deipkamre ila puto ngebodi gonga kepredi, Israel nesaladi Asyur mutu neng yumada bisbisa kapmengedi, parang ya dopra sun Asyur mutu nesala dopra amutara derinkamenge.

Tonda, Nimrod mutu peda ajen talen nengdi, parang ya di popbisipmengepa, anesala sun amutara deipmengedi, sun mutu talenkamenge. Ukupmengopda, sun Israel nesala yuma teleppu kungedi dimpeprap kunkamenge.

“Amenda taru, Israel nesala yambulanunpu kunkameng dinin, puto weik kunkamenge,” pepu upu

6 Amenda taruda, Israel yala nesala metekanun gawal tupa kunmange nesalada, yuk mutu nesala kan-kan kunkamenge. Ukupmantoda, mo cepredi nimi kouamenge keca damai sakrepa, telep kupra bongoramretopu kunkamenge. Tonda, kwirye dei sangredi, paramre keca yala-yala yuma deiki sangredi, bul kuprepa, telep kupra bongoramretopu kunkamenge. Mo cap, kwirye dei cap tep, nimidi ‘Akecada men sangkamre,’ peptenga peda, tupa sangamretopu, Israel nesala tek sisi teleppu kunkamenge. Sun yuma Allah er damaipu kange deipra kunkamenge.

7 Tonda amenda taru, Israel yala nesala metekanun gawal tupa kunmange nesalada, yuk mutu nesala kan-kan dabena kunkameng dinino, ila puto weik nesala kunkamenge. Ukupmantoda, ila yu pus er si singa pusda puto pio weik kurure. Bura tara neitamaida, yuk gam keca ton, yala weik akurur dinin, sun putoda yambul pua. Singa pusda er puto ila weike. Singa pus ila yunge di domba bisam wengamenga kan-kan bena wekredi, tali lupra domba bisam popra jeredi, er si di bululukra tamamretopu, sun Israel nesaladi yuk mutu nesala kan-kan bengedi ponkamenge.

Nimidi ila yu singa pus tep, upu men sektengetopu, yuk mutu nesaladi Israel nesala tep, upu men sekmanto kunkamenge. Singa pusdi domba bisam poramre taru, domba bisamdi men lyepdanmanto kuramengtopu, ataruda Israel nesaladi porbenkameng nesala, sun pe tep men lyepdankamtenge.

8 Ataruda Allah pio weika di er puto dopra Israel nesala deiki deipyopda, Israel nesaladi sun podan neng yuma popra gawal dakamenge. Ukupmengedi, sun podan nesala yuma tep bisbisa kapmengedi, pio gum kupra deipbankamenge.

Amenda taruda Israel nesala kan-kan mali kun keca kupkamrenge yumada, Allahdi gum kupra derinkamre pepu upu

9 Allah Yahwehdi Israel nesala tep pepu. Amenda taruda, ila nimi deiyo ngebo ton erepra deipsenepa, sun podan neng yuma popbisipredi, gum kupra deipkamre dinino, ataru neitamai peda, sun Israel nesala mali-mali keca tupa akapkamser keca peda, nedi gum kupra deipkamsene, pepu. Ada, nimi porbana tep sun kuda bisam bali deiki bukra embaramrumu kuda bisamda gum kupra deipkamne. Tonda, sun podan neng porbana tep, tu deiki embaramrum keca, tapu gerekra sun kuda bisamdi tu deiki gipra embaramrum keca, er sida kereta kuda yuma peda gum kupra deipkamne.

10 Tonda, sun mali kun keca wenemna tep, sun dorumu ati arum ila lyom gel beilya wipra ongopdongomi ngeda, dakra tapkamne. Tonda, ‘Yuk mutu nengdi nun poryasunung’ tenen, kalengna tep ketenepra deiamidi dorami gel ati yumada, nedi dakra tapkamne. Ukupnepa ange yuma gum kupredi, talipu kupkamre. 11 Tonda, asuru kwa nengdi deramenge nesala sun sambala dirameng keca yumada nedi gum kupra deipkamne. Asuru kwa neng yuma poptapkamne. Ange utopu ken mapmangedi epmange keca tep pepmengepa, “Dortaruda ukupkamkere,” pepra tali lap penung neng yuma peda, pio poptapnedi gum kupra deipkamne.

12 Ukupne taruda, tali keca dinin, sundi, “Nun nai yapu,” pepra sun pe buru di ketenepra deiprumudi, isok si eremrumu keca yumada, gum kupra deipkamne. Tonda, mutu tep “Acada memai,” pepra keteneipmengedi isok si eremrumai cap yumada, gum kupra deipkamne. Tonda, sundi isok si eremna tep, lyom co ikra derirumai yumada urupra daktapnedi, gum kupra derinkamsene. Ukupnyopda, amenda dorkunkamre taru neitamaida, kange di ton cap tali keca tep, “Nun nai isok er sipu eremkamepe,” pio men penkamrume. Sun pe buru di ketenepra derirumu keca tep, si men eremkamrume. Akeca yala-yala yuma gum kupra deipkamna tep pepsene.

13 Ange utopu, sundi isok er si Dewi ^{▼▼Dewi – Aupu deiyoda, ake. Dewi peramengada, isok ner, er si eremna keca tep penunge. Amutu nesala si eremami isok nerda, er si Dewi Asyera tepa.} Asyera, isok ner si eremna tep sun kurum mutu neitamai di lyom ayumnya co utopu co ikraprumdi, isok si Asyera tep si eremrumai yumada, dakra tapnedi gum kupra deipkamne. Tonda, isok si eremna tep, isok er ati dopra deiprumai cap, aisok si eremna tep ila ati arum domrumai yuma capda dakra uruptapkamne. Ukupnepa akeca yumada, pio gum kupra deipnepa, sundi akeca gispal dona cap, si eremna cap tep, gutam tu dipdongopra tupa-tupa men kunkamre.

14 Tonda, ne Allahdi, sundi isok si Asyerah si eremna tep ingrum lyom co yumada, urupra tapnedi, gum kupra deipkamne. Tonda, sun mali kurumu keca wenemna tep, sundi konum domrum ila ati-ati arumda, uruprapnedi, sikke buktapkamne ja! 15 Ataruda, ware mutu nesala do yuma, sundi ukupra mali kungedi, ne upu tep, ‘Nun song’ tenen, yanirtamamnenge nesala mutu ban-ban yumada, ne tep tulum tenenenge nesala yumada, popnedi gum kupra deipkamna deiki di, ne tulum kunere ngeda adipapu angapronkamne.

Ada, tuai mutu neitamai kunge nesala yuma, sun pedi mali kununga deiki di wenepra poptapkamne. Allahdi Israel nesala tep peipupa, nabi Mikadi gekepudi sekeiamu.