Mic 6 | XteSC | STEP | Allah Yahwehdi sun Israel nesala tep, “Sunda mali kurume,” pepra pesenung ngeda, sunda moupra gekepkurume. Sundi, ‘Deiyo men kwapmarepapu, nun nai bo Allahdi nun tep, mali penmaser ngeda, minina upu deiki di penmasere,’ tenenmarume. Uteneprumu dingeda, sundi tekra tenepmarumu ngeda, lap pepkamrume. Aupu sundi pepmumpa, mutu buma cap, ila mutu-mutu yuma, dakunge nesala yumada, sundi lap penkamrum upu gepmengedi kael kepkamenge.

Micah 6

Allah Yahwehdi Israel nesala tep, “Mali kurume,” pepra wenepu upu

1 Allah Yahwehdi sun Israel nesala tep, “Sunda mali kurume,” pepra pesenung ngeda, sunda moupra gekepkurume. Sundi, ‘Deiyo men kwapmarepapu, nun nai bo Allahdi nun tep, mali penmaser ngeda, minina upu deiki di penmasere,’ tenenmarume. Uteneprumu dingeda, sundi tekra tenepmarumu ngeda, lap pepkamrume. Aupu sundi pepmumpa, mutu buma cap, ila mutu-mutu yuma, dakunge nesala yumada, sundi lap penkamrum upu gepmengedi kael kepkamenge.

2 Uo, ange tep nengeda sun deiki tara mutu kurumu nesala yuma peda, amutara mutu kurumu nesala yuma peda, ne Allah Yahwehdi Israel yala nesala tep upu pepra deipkusen upuda sundi moupra gekepkurume. Angeda mesum tep men pepsene. Ne Allah Yahwehdi, ne mawa nesala, Israel yala nesaladi mali kunge keca konum kael kemnuna cadi, Israel nesala yuma tep wenepkamsen upu akapmanerpa pepkusena tep, gekenkamrume.

3 Allah Yahwehdi Israel nesala tep pepu. Sunda, ne nyapu sisa Israel nesalao, nedi sun damai ware mali keca kwamsisi do? Tonda nedi ware ikin keca sun damai di kuramsipa, sundi kange mun kange doupra kuramrum do? Nedi ware kuramsipa sundi ne tep dabal kange doupra kunerum do? Ukuprumu dingeda, atep ngeda sundi aupu ne kori lap pepkunerume.

4 Sun ton tenipetepso. Nedi sun Mesir mutu kuramrumdi pio ikin pel doramruma neitamaida, nedi lyepra doupra yanamsisi. Mesir mutu nesaladi, sun Israel nesala yuma tep, ateng koupra deiamseidi, pio ikin pel dimamseipa, ne Allahdi lyepropsisi. Tonda, ataru neitamai yumada, sun melimna tep, nedi Musa cap, Harun cap, Miryam cap, dopra deiamsisidi, sun deiki ila puto kareramsipa, sundi deiyo neng kepra duyanamsei.

5 Tonda, ne nyapu sisa Israel nesalao, sundi konum luproprum do? Sun kange di ton cap, moupra tenepkurume. Ada Moab mutu nesala yuma taleamu ngebo Balakdi, ‘Israel nesala yuma tep wipnedi popkamsene,’ tenepmaseupane, Beor er mi Bileam ^{▼▼Bileamdi pel doramu ngeda, buku Yosua pasal 3 dan 4 deiki di dinkurume.} tep upupupa, yauopda, ‘Israel nesala wipdongopkurume,’ pepra moropu dinino, Bileamdi er damai ware upu pemu do? Bileamdi, sun Israel nesala tep, telep upu pepseua deiki di teleppu kuipseue.

Tonda, pumun taru Sitim mutu di tapra, bisi baramrumanen, Gilgal mutu neitamai berum taruda, sun melimna cap, kael kemna cap tep, pel weika di doramsisi ngeda, konum luproprum do? Gume, sun Israel nesalada, ‘Uo, nun nai bo Allah Yahwehdi, nun lyemna tep, pio tek sisi mambul weik pel doserure’ tenen, kael kepkamrum tenena tep, nedi ila mambul pel doramsisi ngeda, konum luprorum do? Sundi ange yuma moupra tenepetepmumdi kael kepkurume. Ne Allahdi tek sisi lyepramsisi.

Allah Yahwehdi, ‘Ne tep karenkamneng kecada, angepu karepnetenge,’ tenerura tep, lap pepu upu

6 Allah Yahwehdi Israel nesala sun wenemna tep asimpetena utopu pepu upu ake. Atep ngeda nundi ware keca doprapmepedi, Allah Yahweh er gispal dona tep, er damai duyakankamep do? Allahda er im deiki tara kurur ngebo tep, wareto keca dopra er karena tep yatepedi, er damai giso genepdongopra yana karenkamep do? Ada, nun mali kunup keca tep, adipapu poptapsetu dinino, nun yo pununa tep, adipapu sapi bisam gemnge dopra, popmepedi er gispal dona tep, uku dongoryankamep do? Ange kareptepepa kange deipkamser do? Ange utopu sapi bisam ukupunge, keteng tamun tenpupu mapunge dopra, Allah er gispal dona tep yana kareptepepa, kange deipkamser do?

7 Ange dopropsetudi, kange men deipsetupa, nun domba bisam pio men nukmantonge, beribu-ribu doupra betepedi er gispal dona tep kareptepe do? Angepu gum dinin, ange cap, Zaitun co du taikraptepedi, puruptepepa, telel telep me pio weika di deiptupa gwepra karerbetepe pangeda, Allah Yahwehdi kange deipkamser do? Agum dingeda, nun nyapu pio weni nyapu dopra, Allah er gispal dona tep, anyapu popra kareptepepa, nun mali kunup kecada, Allah erdi kaukepkamser do? Ada, nundi mali kunup keca wenemna tep pununada, nundi derinup nyapu dopra popmepedi, Allah tep kareptepepa, kange derinkamser do?

8 Gume, akeca-keca yuma konum kuptepya peda, adeiki di pio men lyepkamsere. Dinino, nun nai Allah Yahwehdi nun tuai mutu kunup nesala yuma tep teneseryada, ‘Ne kange derina tep nengeda, ukunkamenge,’ teneserure. Uteneserya tep, er menop taru konum lap peamseu. Ada ake. Ware nesala do yuma, pio dumsisi telep kupra kungedi, yuk nesala yuma tep bicau tenedangedi dipru amutara bouna di kange deipra teleppu kunkamenge. Ukungedi, Allah er amutarapu kungedi, kange dipru eremna gum dipapu, Allah cap dipru dukdongopra kikiman kunge pangeda, Allahdi anesala tep kange derinkamre. Angeda, ‘Ukunkamenge,’ teneserure.

Mok upu pena cap, nimi pona cap, mawa di pena cap kunge nesalada, Allahdi wenepkamre, pepu upu

9 Sun dakurumu nesala yumada, Allah Yahwehdi pesere upu moupra gekenkamrume. Sun ila kael nesalada, ‘Nun mali kunup keca tep, Allahdi wenepserur’ tenen, Allah Yahweh tep pio kwar kuserepa pio moupra men kununge. Ada mesum tep men pepsene. Sun ati arum dopra amutu kunup neng yuma tep peserure. Ada, “Pio moupra tenenkamrume,” pepra peserure. Allah Yahwehdi, yu jen talen neng gung pio weika di konum doproipmarpa, nun wenemna tep poryankusenge. Atep nengeda, nun amutu neitamai kunup nesala yuma, erdi pesere upuda moupra gekepkupe.

10 Allahdi upeserure. Sun mali keca weik kurum nesala yumada, sun kurumu ati pum neitamaida, mok upu peruma deiki di upula dororum bung kecapu meneng yakarume. Ukupmantoda sun jen keca er sida gandum cap, jagung cap kipra yuk nesala kunumna tep, mok upu deiki di, “E, angeda ukupra karepkuserume,” pepra mok upu peptapra, co bo weika di dororum keca yumada, ne men disenun do? Mok upu peruma deiki di bung keca weika di mawa derirum ngeda, ‘Lupronkamre,’ tenenerum do? Gume, nedi anesala kunung keca yuma tep, yu tenenune. Atep sun anengda, nedi wenepra popkamsene.

11 Ange utopu, sun bung keca cap, jen keca cap kunumna tep, ‘Ikinda, ware kuprap kupre do?’ tenen, kunupeten keca deiki derirum dinin, tek sisinge deiki men derirume. ‘Ikin weik kupre,’ pepra mok upu deiki di pepmepyopda, ‘Nun kunumna keca weika di doronkamepe,’ tenerumudi, sun kayapu neng tep mok upupu perume. Ukumumdi pio mali weik kurum ngeda, nedi kaukemkamsen do? Gume, angeda ne pio men kaukemkamsene. Atep akecada ne songe. Sun mok upu deiki tali pertamnung neng tep nengeda, nedi sun aneng tep, adipapu wenepra popkamsene.

12 Ne kaele. Sun kan-kan neitamai kungedi, ila isomka kunge nesalada, pio mali kunga deiki di, bung keca weik upula doronunge. Anengdi sun amutu tara kunung kankan kunge nesala tep, mok upu deiki pepmengedi, upula doronunge. Tonda, sun amutara kunge nesala popmengedi, sun keca upula dalupra doronunge. Ukununga cadi, mok upu pena cap, nimi pona cap deiki di ila isomka nesala kununge. Anengda sun tupa-tupa mok upupu penunga cadi, ukutaruda, tek sisi sun upu men pepmanto kungedi, isomka nengda, mok upu pena nengpu kununge.

13 Pio mali weik kuruma tep nengeda, ukutaruda ne Allahdi sun mali kurumunge tep wenepra popsenedi pio gum kupra deipkamsene. Sun pio mali weik kuruma tep nengeda, nedi sun tep pio mali kweipkamsene.

14 Atep nengeda, sun jen keca weika di jenkamrum dinin, pio men bounkamsere. Pio tupa putanapu kunkamsere. Tonda, sun bung kecada pio weika di dopra talepbankamrum dinino, ‘Abung keca pio tupa men kunkamsere. Sunda abung keca weika di mawa deipmepyopda, amenda taru teleppu kunkamepe’ tenen, abung keca derinkamrum dinin, akeca deiki di telep kupra men kunkamrume. Ange yumada gum nedi gum kupra deipsenepa, dimpepkamsere. Tonda, abung keca dubena telep kupra derinkamrumnya peda, nedi go karepnepa, sun podan neng yangedi, mar ponkamseng taru di, upula dalupra doronkamsenge. Nedi abung keca yuma yawarapra tapnedi, gum kupra deipkamsene.

15 Tonda, sundi gandum du cap, yuk yal keca yuma cap dopra bolokamrum dinin, du telepnge ton mouprepa pio men dangkamrume. Sun kounkamrum keca yala yumada, telep kupra nong kuprepa, men kinkamrume. Mesumpu kunkamrume. Tonda, sun Zaitun co du dakra, sun nong puruna tep me purupmumdi, minyak me dopra, mawa derinkamrum dinin, sundi aminyak me dopra, sun pe nong deiki men lingdinkamrume.

Yuk nengdi aminyak meda dalupra dopropkamsenge. Ange utopu, anggur tapu du dakrapmumdi, adu yanipra taikmumdi, anggur me gwepra dingdongonkamrum dinin, anggur me ketenepra deipkamrum ngeda, sun ton dopra men jenkamrume. Yuk nengdi, sun anggur me peda, dalupra dopromengedi, jenkamenge.

16 Ange yumada, nong men kupkamsera deiyoda, sundi Raja Omri cap, er mi Ahab cap, sun mali kuramrei kecapu talepra, sun peda melipra dombamumdi, malipu kuruma tep kupkamsene. ^{▼▼Raja Omri, Ahab cap, pio mali weik kuramrei. Aupuda Raja-Raja 16:25-30 dinkurume.} Abutene Raja nengdi pio mali weik kuramreitopu, sun ukutaru kurumu nesala peda, mali weik kuruma cadi, nedi sun tep wenepkamsene. Ukupsenedi sun yala nesala yumada, pio mali kweipkamsene. Ukupsene pangeda, mutu ban-ban yuma dakunge nesala epsengedi, sun tep mali pepra nalemkamsenge. Allah Yahwehdi Israel nesala tep pepu.