Mic 7 | XteSC | STEP | Nabi Mikadi Israel nesala yuma tep pepu. Neda kange mun kange dounune. Ukupmantoda co du mouramre li taru kuprepa, aco du mouamrepa dakra jepropmenge taruda, amenda jen putaprepa, ‘Acoda du ton mouptupa dakra jeptene,’ tenenung dinin, co du yuma konum gum kuprepa, men dakra jerameng utopu ngebo kunune. Tonda anggur tapu cap, kwarang co cap, menmena telep du mouamrenge yumada, dakra jepmengedi mali ngeda tamameng utopu ngebo kunune.

Micah 7

‘Israel nesala kan-kanda, telep kun neng ton men kununge,’ pepu upu

1 Nabi Mikadi Israel nesala yuma tep pepu. Neda kange mun kange dounune. Ukupmantoda co du mouramre li taru kuprepa, aco du mouamrepa dakra jepropmenge taruda, amenda jen putaprepa, ‘Acoda du ton mouptupa dakra jeptene,’ tenenung dinin, co du yuma konum gum kuprepa, men dakra jerameng utopu ngebo kunune. Tonda anggur tapu cap, kwarang co cap, menmena telep du mouamrenge yumada, dakra jepmengedi mali ngeda tamameng utopu ngebo kunune.

2 Angeda tali men pepne. Aupu nongda ake. Pumun taru kurami nesala yumada, Allahdi peiamungepu teka teneramidi, talepra bouna di dumsisipu kurami dinino, ukutaruda, anesala utopu tenpu ngebo peda men kurure. Dumsisi kunge nesalada, konum gum kupye. Atep ukutaruda dumsisi kuna nesala yumada, pio gum cadi, er kabodi er kabo tep, ‘Ware kuptenya deiki di poptene do?’ tenen, pena pepra kalengdirameng utopu kudidanunge. Adeiki di amutu neitamaida, mali kun keca konum belepre.

3 Ange ukununga deiki di mali kun kecapu kael kepmengedi talenunge. Ada nimi deiyo neng kepmengedi, talepra kunung nesala cap, mali kupmangepa upu bongdina deiyo neng cap, sun yumadi “Nun nyapu sun mali kupmarum nengda, nun damai, ‘Nimi poipserume,’ pepra karen co bo karepserume,” pengepa, Israel nesaladi karemengepa adeiyo nengdi doronunge. Tonda nimi deiyo talepra kunge nengdi, ‘Nun tenepmap ngeda adipapu doproptepe’ tenen, puto di pengepa sun tenepmangetopu dalupra doronunge. Ukupmenga deiki di, pio tupa-tupa mali upu pedanunge. Dumsisi kupra nimi upu men bongdinunge.

4 Atep nengeda, sun amali weik kununga deiyo nengdi, yuk neng yuma tep, mali kudinunge. Ukupmantoda, takke keca popserepa dabal kuramsertopu, mali kudisenunge. Tonda, takke keca, weika di papredi, lyom weik konum kuprepa, dekpepyopda, nimidi abisi men benmanto kurameptopu, sundi telep ban bisi sengdongosenunge. Yambul telep kupra kunung deiyo neng peda, pio gwalin bisi banunga cadi, sun yumada, tek sisi malipu kununge.

Ukurumya tep nengeda, Allahdi sun tep ila di wenepkusere. Sun malipu kuruma kunumna tep, Allahdi upu bokeipseredi, wenepra poptapkamsere. Ataru konum damai kupre pepsene. Ada Allahdi, “Sun amali kunge nesala tep, yawarapra deipkamne,” peiamu taru konum damai kupre.

5 Atep nengeda, ne Mikadi sun tep pepsene. Sun pe tara nengdi penkameng upuda, ‘E, tek pepmasenge’ tenen, teka tenepra men gekenkamrume. Tonda, ‘Ne kabo kunerura tep, er deikipu kunkamne,’ pio men tenenkamrume. Ange utopu, sun pe nerapudi mali kudisenunga tep, sun cap, sun nerapu cap kikiman kurum taruda, sundi, ‘Ukunkamne, ukunkamne, tenepne ngeda ake,’ pepra men lap penkamrume. Ada, aupu gekepmengedi, yu neng tep lap pepmengepa, gekepsengedi, ‘Sun anengdi popsenung’ tenen, pepsene. ‘Ne tenepman ngeda pepkun do?’ tenen, pio moupra tenepmumdi kalengdankamrume.

6 Apepmasen upuda tali tep men pepsene. Deiyoda, sun pe nyapsilip dipapu, mar pepdankamenge. Ukupmantoda, sal nyapudi sun nai yapudi pepmenge upu pio moupra men gekenkamenge. ‘Anengda tali nengpu kununga cadi, sunda dakwapye’ tenen, kaukemkamenge. Tonda, ner nyapudi, sun nin yapu pepmenge upu pio moupra men gekepmengedi, ‘Anerapuda nun song’ tenen, ‘Sun upu yaninkamepe’ tenen, sun ner nyapudi, sun nin yapu tep kaukemkamenge. Ange utopu, sun yamal nerapudi, sun yamal yapu tep, ‘Nun song’ tenen, yu kuprepa podankamenge.

7 Sun mali-mali kunge nesala yumada, ukunkameng dinino, ne nabi Mika puda ange men kunkamne. Nun nai bo Allah Yahweh er tepapu teka tenenuna cadi, ‘Er dipapu melipra lyepropkamnere’ tenen, er tepapu teka tenepra ketenepra deiya dinkamne. Ukupnedi, Allah teppu pio moronkamne. Moropnyopda, gekepredi lyemdonkamnere.

‘Allah Yahwehda, nun Nimi Lyemna Deiyo Ngebo Kurure,’ tenenkamrume, pepu upu

8 Nabi Mikadi, Israel nesala tep tenepudi pepu upu ake. ^{▼▼Nabi Mikadi apu neitamaida, “Ne” pepu dinin, tek sisi Israel nesala kupkamunge tep lap pediramu.} Ne podan nengdi mali men penkamnerume. Tonda, ne podan neng, sundi, ‘Walito popra gum kupra deipkenge’ tenen, ila kange deipra nyek-nyek men penkamnerume. Deiyoda ake. Tek sisi ne saktenya peda, amenda taru kange di tamupra ereipnerepa teknedi telep kunkamne. Tonda, ukutaruda ne kunungnai utopu kunun dinin, amenda taruda ne nai bo Allah Yahweh erdi dopra ila dirinai deipkamnere.

9 Ada nun Israel nesala yumadi Allah Yahweh er damai mali kuramepupa, er yuda nun damai deipserepa, kange mun kange doupra kunkamepe. Atep nengeda, nun yumadi, Allah tep, mali kuramepupa, akeca kunumna tep wenepkamsere. Dinino, wenepserepa, ikin kange doupra kuramepepane, amenda taruda, Allahdi nun tep bicau tenepseredi dopra, dumsisi telep dirinai deipkamser taru, tek sisi kupkamre. Nun tep mali kudinkamseng nesalada, Allah er pedipapu anesala tep upu bokeipkamre ja. ‘Ne mawa nesala’ tenen, nun Israel yala nesala yuma douprapseredi, pio telepai dubeserepa, er dirine dinkamepe. Amenda taruda, Allahdi nun mali kudiramsei nesala tep, wenepkamre ngeda, epmepedi kael kepkamepe.

10 Menop taruda, nun podan neng sun taleamseidi, uperamsei. “Sun nai Allahda, dan cei kurur do? Allahdi melipra men lyepropkamser do?” pepra asimamseidi, nyek-nyek peramsei. Dinino amenda taru, Allah Yahwehdi nun tep lyepseredi, nun damai telep kupkamre ngeda, sun epmengedi ali dakamenge. Tonda amenda taru, Allahdi nun podan neng tep yanipredi, anesala popra gum kupra deipkamre. Ukupyopda ukupmantoda, nesala bisi embaramengai bental yanipra baramengtopu, Allahdi nun podan nesala yuma tep, yanipredi popbisipkamre ja. Nun yuma ange epmepedi, kael kepkamepe. Nabi Mikadi Israel nesala yuma tep, sun kupkamunge tenepudi pepu.

‘Allah Yahwehdi, Israel nesala tep kange di tamupra telep kudinkamrenge,’ tenepudi pepu upu

11 Nabi Mikadi Israel nesala yuma tep kupkamunge tenepudi pepu. Uo, sun Yerusalem mutu neitamai kurum nesalao. Allahdi tenemu taru konum damai kupre pangeda, sun kumum mutuda ila lyom gel beilya tamupra wipkamrume. Yu nengdi agel beilya urupra daktapi dinin, amenda taruda, agel beilya kange di lepsisikra winkamrume. Ataruda, Allahdi sun talenkamrum tu weik ton cap tapakra karepseryopda, sun gel beilya go weikanun ton cap sundi tapakra gisikmumdi, weik kepra winkamrume.

12 Allahdi telep kupra deipkamser taruda, konum damai kupre pangeda, sun dana-dana tara nesala, yuk-yuk karen mutu dakunung nesala yuma tamupra yana bulupkamenge. Sun anesala kunungaida, iknapi tara Asyur mutu ton kunung dinin, sun gispal dona tep diryakankamsenge. Tonda, sun dapu mutu tara kunge nesala yuma peda, Mesir mutu neitamai kunge nesaladi, sun gispal dona tep diryakankamenge.

Atep, dapu tara kunge nesala cap, adinen iknapi tara Efrat me damai kunge nesala cap, sun gispal dona tep diryakankamenge. Tonda keteng tengyakare tara, ila laut mokon ortara di dipra, ortara keteng dangbare tara, ortara ila laut mokon deipu tara kunung nesala peda, sun yuma yakankamenge. Tonda karen mutu dabena kunung nesala, ila mutu neitamai kunge nesala peda, anesala yuma bupra sun damaipu diryakankamsenge.

13 Dinino, ayakankameng nesala yumadi, sun pe mutu neitamai di mali kun kecapu kununga kunumna tep nengeda, Allahdi amutu tu yuma mali kupra deipkamre. Ada, sun anesala mali kunkamenga deiki di amutu-amutu yumada mali kupra deipkamenge. Mikadi pedina upu deiki di pepu.

Nabi Mikadi, “Israel nesala tep, Allah Yahweh kandi bicau tenepsememdi melimkamserume,” pepra moropu upu

14 Nabi Mikadi Allah tep moropu. Uo, ne nai Allah Yahweh, kandi kan nyapu sisa Israel nesala yuma tep wepra deiamumdi, kan nyapu utopu kuramepu. Atep nengeda, kandi sun tep bicau tenepra, pio moupra kalengkamrume. Ukupmantoda, domba bisam peina deiyo nengdi, sun domba bisam pio telep kupra kalengamengtopu, kandi nun tep kalekra melimkamserume. Ada ‘Nun Israel nesalada pio bura mutu neitamai utopu kunup dinin, kandi lyepropsememdi, pio telepai deipkamserum’ tenen, moropkene. ‘Lyepropsememdi, nun kunkamnupaida pio sukun tu kupu mutu bena talepra kutepe’ tenen, moropkene.

Tonda pumun taru, Allah kandi pio telep mutu, Gilead mutu cap, Basan mutu cap, nun Israel nesala nun apu yapu tep kareramumpa kurami mutu utopu, ‘Pio telepai karepsemempa, pio telep mutu neitamai kunkamep’ tenen, moropkene. ‘Pio telep mutu karepsemempa, nun jen kecada weika di dopra jenkamep’ tenen, moropkene.

15 Nun nai Allah Yahweh kandi, nimi men kupmanto keca ton kupkamserume. Ada menop taru, Mesir mutu neitamai ikin kange doupra kuramepupane, kandi doupra bisi duyakaramsumum taru, ‘Nimi men kupmanto keca weike, dordi ila mambul pel weik doramsemumtopu, kange di ton cap kunkamserum’ tenen, moropkene. ‘Ukupsemempa amenda taru peda telep kutepe’ tenen, moropkene.

16 Ukupsemem pangeda, nesala ban-ban yuma yuk dakunge nesaladi ange epmengedi, ali dakmengedi kwar kunkamre. Ada sundi ukupra tenenkamenge. ‘Uo, menmena taru, nunda ila puto nesala kunupe,’ teneramepu dinin, tek sisa, nun putoda metekapu kuserure. ‘Allah er puda, ila puto weik ngebo kurure’ tenen, kael kepkamenge. Ange kael kepmenga deiki di sun anesala yumadi Allah tep, ‘Uo, er puda ila mambul ngebo kurure,’ tenepmengedi, sun kange deipmengedi lolopkamenge. Ukupkamre taruda, ‘Nun ila puto neng kunupa,’ tenerami nengda, sun dipru neitamai kunung dongona cap, amul kinidongona cap, tonda sipyal buplan dengdongona cap kunkamenge.

17 Sun anesala yumada, Allahdi donkamre pel epmengedi, ‘Uo, erda ila mambul ngebo kurur dinino, nun yumada, pio mali nesalapu kunupe. Nunda mambul pio gume,’ tenepmengedi, kware weik kuprepa ali dangkamenge. Ukupmantoda, buru gum bal tali tu deiki embaredi mundu tu baramre keca pio amutara kuramre utopu kupra, mambul kange doupra kunkamenge. Utopu kunmangedi embanmangepa, Allah Yahweh erdi mambul weik pel dore keca epmengedi lukdana kwar weik kunkamre. Ukupmengedi, ‘Allahdi ware kupkamser do?’ tenen, er damai gekeryakankamenge. Allah tep kwar weik kunkamenge. Nabi Mikadi pepu.

‘Allahdi er mawa nesala tep, ila di bicau tenepredi, er nyapu sisa tep, pio melimrure,’ pepu upu

18 Nabi Mikadi Allah tep pepu. Uo, ne nai Allah. Kan utopu Allah ton pio men kurure. Kan tenpu kurume. Atep nengeda, Allah Yahweh kandi wepra deiamum nesala yambul gawal tupa akunmap nesalada, nun mali kunup keca yuma kaukepsememdi, lyepropserume. Kanda nimi tuai nesala tep, pio ton men deremserume. Nun mali kunup keca kunumna tep, adipapu wenepra poptapsetum dinino, ange men kumemdi, nun tep tamupra bicau tenesememdi, melipra lyemserume. Kandi nimi tep ila di bicau teneserume. Kandi nun tuai nesala tep, kange derikerure. Ukupra kurum ngebo tep moropkene.

19 Kanda ila di nun tep tupa-tupa bicau teneserum ngebo kuruma tep, kandi nun Israel nesala yuma tep bicau tenesememdi, nun mali kunup keca yuma lyepropsememdi, kaukemkamserume. Ukupmemdi nun mali kunup keca yumada doprapmemdi, ila laut mokon deipka numnuma neitamai donokamrume.

20 Allah kan nyapu sisada, Abrahamdi deiamupa, dadeipdanen barami neng, nun Israel nesala tep tenepsememdi, bicau kupkerepa tenepra lyemdonkamserume. Tonda, nun apu bo Yakubdi deiamupa, dadeipdanen baramyanen deiamsei Israel nesala tep, tenipsememdi bicau kupkerepa tenepra lyepropkamserume.

Ada, pumun taru kan dipapu nun co puna neng tep, pedina upu deiki di, “Ukunkamsene,” pepra deipyakaramsemuma utopu, kunkamserume. Pio men tapkamserume. Kandi nun co puna neng tep, “Ukunkamsene,” pepra pediramsemum keca yumada, men tapkamrume. Ange yumada, tek sisi pel donkamserume. Amenda taru peda nun damai telep kudinamserume. Nabi Mikadi Allah tep upepra moropu.