Nah 1 | XteSC | STEP | Allahdi sun Asyur mutu neitamai dinin, Niniwe mutu nesala yuma tep, yu kupupa, upu pepra deipu ngeda ake. Aupu pepra deipu ngeda, ken mana utopu deiki di, nimi si nabi Nahum, er anabi ngebo damai yana katuai kepra pepupa, Nahum gekepu. Nabi Nahumda, Elkos mutu neitamai di deiami ngebo kuramu. Ada, nabi Nahum tepa.

Nahum 1

Allahdi, Asyur mutu neitamai dinin, sun Niniwe mutu nesala tep, yu kupka tep, pepu upu

1 Allahdi sun Asyur mutu neitamai dinin, Niniwe mutu ^{▼▼Niniwe mutu – Menop taruda, nabi Yunusdi, Asyru mutu neitamai, ila ati arum doamidi, sun mutu deiyoi kota, er si Niniwe mutu, amutu kurami nesala tep, bena peteremamudi, Allahdi sun mali kunange tep, amenda taru wenepkamunge tep lap pepupa, sun Niniwe mutu nesaladi, ‘Uo, tek sisi nun mali kuramupka cadi, nun mali kunange yuma tapra, teleppu kunkamepe,’ teneramdi, Allah tep teka tenepipa, Allahdi anesala men popra gawal daku. Dinino, keteng tamun denge pio weik, 100 tahun ton konum kupupa, kange di ton cap, anesaladi mali-mali weik kuramidi, ‘Ange yuma men tapkupe,’ perami balila weik kurami. Sun Niniwe mutu nesaladi, Israel nesala dinin, dapu tara, (arah utara) kurami nesala damai bena, keteng tamun 722 deiki di, popidi sikke buktapi. Ukuramipa, nabi Nahumdi, amutu bena, Allahdi sun wenepkamunge tep, lap peramudi, wenemamu. Konum kupupa, amenda taru, Allahdi peiamutopu, keteng tamun 612 deiki di (Yesus kapul men yau taru), Allahdi go karepupa, sun Babel tara nesaladi, Asyur tara nesala cap, Niniwe mutu nesala cap tep, sun damai yana, popra gawal daki.} nesala yuma tep, yu kupupa, upu pepra deipu ngeda ake. Aupu pepra deipu ngeda, ken mana utopu deiki di, nimi si nabi Nahum, er anabi ngebo damai yana katuai kepra pepupa, Nahum gekepu. Nabi Nahumda, Elkos mutu neitamai di deiami ngebo kuramu. Ada, nabi Nahum tepa.

Allah Yahweh, er kure keca tep, pepu upu

2 Allah Yahwehdi teneramu ngeda ake. Ada, ‘Tuai mutu kunge nesalada, yuk tali keca do, isok si do yumada, sundi atali keca pio si men eremkamenge,’ tenerure. Ange tep nengeda, ware neng do yuma, er tep, ‘Nun songe’ tenen, tali keca si eremnung nesala tep, wenemrure. Tonda, upu deiki bisina nesala tep nengeda, wenepra ikin keca deipkamre. Ada, er tep mali kange doupra kuramenge nesala yumada, ila yu di, pio ila di wenepkamre. Sun mali kunge keca tep, ‘Dakwapye’ tenen, men kau kepkamre dinin, er tep yaninung nesalada, kange mun keca karepredi, ila yu di wenepkamre ja! 3 Tek sisi Allah Yahwehda, menmena di yu kuprepa, adipapu men wenemserure. Bicau tenepseredi, bouna dipu melimserure. Dinino, er peda ila puto ngebo kurure. Ange tep nengda, ware nesala do yuma, er tep, ‘Nun songe,’ tenepmengedi, pio mali kupmenge pangeda, sun wenemna damai di taprepa, tali men kunkamenge. Allahdi sun mali kunange tep, ‘Dakwapye’ tenen, tali men kaukemrure. Ange gum dinin, ila yu kuprepa, puto di aneng tep, wenepkamre ja. Dan mutu do yuma, Allah Yahweh embankamre mutu neitamai er pel dopre pangeda, amutu neitamaida, ila puto kumanya pung perure. Tonda ila mo cap, kum cap, perenglang penange cap kurure. Ukupmantoda, Allah Yahweh er yan yanipra embankamra amngai di, sikke buteda dua bum utopu kunkamre.

4 Allahda, ila puto weik kurura cadi, er tenepre taruda, Allah Yahwehdi ila laut mokon balana poprepa cepredi, kalapropkamre. Utopu, ila di embaramre me yala yuma peda, gum kupra derirure. Tonda Karmel mutu buma cap, Basan mutu neitamai telep parur beteida, gum kupra deiprepa, kolupra derirure. Ange utopu, ‘Ukupkamne,’ tenepre taruda, Libanon mutu neitamai parur telep bunga kait yala-yala yumada, nunupropkamre. 5 Allah Yahweh mutu buma deiki yaryopda, mutu buma yuma moropsemkamre. Tonda, er damai yaryopda, mutu gon yumada, me utopu kuprepa, teno pakra embenkamre. Allah Yahweh yakare pangeda, mutu yuma lokredi, moropsepkamre. Ukupkamre taruda, mutu ban-ban yuma cap, amutu ban-ban yuma neitamai kunung nesala yuma capda, kware kuprepa, yo moropsemkamenge.

6 Allah Yahweh er yu tenepkamre taruda, ware nesala do yuma, kware gum di, er damai yana tektenge do? Gume, er yu kuprepa, ila kange mun wenemna keca, uku ila di jenmarepa, gel lyeipredi butungamretopu kupra, sikke buktapkamre. Ukupkamre taruda, ware nesala ton er yu kupkamre taru, er damai yana tektenge do? Gume, ada men kupmanto. Er yu weik kupyopda, ila gat gel peda, er damai di sikke but utopu kupra deipkamre.

7 Dinino, Allah Yahweh, erda pio telepe kurure. Ukuredi, erda er tep teka tenenung nesala yuma tep, kange mun kure taruda, erdi pio melimserure. Nimidi, ‘Nun podan neng yana popsenung’ tenen, gat gel di dopra, lyom gel ati cap, beilya cap dopmengedi, agel ati pumbon inipra baramengtopu, Allah Yahwehda, ‘Er damai tep, yana melipra lyepropsetue’ tenen, er damai yakankameng neng, sun tep kalekra melimkamre. Kange mun keca, sun damai men yakankamre. Ila mo cepredi, ila me deiptudi, opra teno pakra, nimi ati damai yatua peda, Allahdi er tep teka tenenung nesala tep, kalekra melimrepa, teleppu kunkamenge.

8 Dinino, Allah tep, dabal kuprepa, ‘Nun songe’ tenen, tamameng nesala tep nengeda, Allah Yahwehdi, anesala domembenkamre. Siryada, anesala popra, sikke bungtapkamre. Allah tep, yu tenengedi, yanitamameng nesala yumada, poprepa, sun yumada depmengopda, kunungnaipu wekamenge. Ukupmengepa, adipapu gum kupkamenge.

Allahdi sun Niniwe nesala tep, yu kupupa wenepkamrenge tep, pepu upu

9 Ange tep nengeda, ware deiyo keca tep, sun Niniwe mutu nesala tenepmumdi, Allah Yahweh tep, ‘Er tapra, er deiki bisipkamtepe’ tenen, upu sisingrum do? Sundi, ‘Ukupkamepe,’ tenepmumnge yumada, tek sisi pio men kuptume. Sundi Allah tep, ‘Nun songe’ tenen, tamamrum nesala tep nengeda, Allah Yahwehdi, dombenkamsere. Siryada, sun yuma popra sikke bungtapkamsere. Ware nesala do yuma, erdi konum wenepra poptapseryopda, adinin sun pepu butene taru ton, kange di ton cap tekra, er tep mali men kupkamrume. Siryada, sun yuma popra sikke bungtapkamsera tepa.

10 Allah tep, dabal kuprepa, ‘Nun song’ tenen, yanitamnung nesalada, sun adipapu uku bu jenkamra neitamaipu, dongopkamsere. Ada, nimidi konum kouluamre manmaning dopra, uku donokmengepa, uku di jeroretopu, Allahdi sun tep, gum kupra deipkamsere. Sun kange erepra, balila kuprepa, er tep yaninung nesala yumada, sunda takke keca beleramrenge koupdaramretopu, tonda, kange yawaramre me jepmengepa, sun kange yawaramrepa, men kupmanto kunge nesala utopu kupra, Allahdi sun tep wenepra, gum kupra deipkamsere.

Allah Yahwehdi, Asyur tara nesala yuma, wenepra gum kupra deipkamra tep, pepu upu

11 Uo, sun Niniwe mutu neitamai kurum nesalao, sunda bicaue. Sun kan-kan neitamai di, tenpu ngebo ton, konum belepudi, ‘Allah Yahweh tep, yaniptapmepedi, mali-mali kun keca, er deikipu deipkamepe,’ perure. Tonda, sun yuma tep, erdi, ‘Gume, nun yumadi, mali-mali kun kecapu, talepra kunkampe. Ada, er angebodi, ‘Allah Yahweh er upu tep nengeda, yanipkamne’ tenen, konum yana tengrure.

12 Atep nengeda, sun Yehuda tara kurum nesala, sun yuma tep nengeda, Allah Yahwehdi, “Gume, sun Asyur nesalapu dinin, sunda ila puto neng kungedi, tonda sunda denge pio weika di bulupra kununge. Ukupra, puto weik neng, denge pio weika di kunung dinino, sun adipapu gum kupra deipnedi, sikke bukra tapkamne. Atep nengeda, uo sun Yehuda tara kurum nesalao, ne mawa nesala kuruma cadi, men di sun mali kurum keca tep, nedi ila kange mun keca dopra kareamsisipa, kange mun kange doupra kuramrum dinino, ataru di dipra dorkunkamre taruda, nedi sun damai, kange mun keca ton cap pio men derinkamsene.

13 Atep nengeda, ukutaruda ne Allahda, sun Asyur mutu nesaladi, ila puto deiki sun Yehuda tara nesala deiki, ikin keca sun nong deiki derisenung ngeda, nedi akeca gum kupra deipkamne. Tonda, ukupmantoda sun damai ila gat tapu, er sida rantai di, sun koupdongopsei ngeda, nedi bulukra tapnedi, sun tep loptapra lyepropkamsene. 14 Angeda, tek sisi Allah Yahwehdi, ‘Ukupkamne,’ pepudi, kanda Asyur mutu ila deiyo ngebo tep, konum pepra deipu. “Kan cap, kandi talerem nesala cap yuma tep nengeda, sundi sun mutu neitamai kunkameng nengdi deipmengepa, dadeipdanen yakankameng ngeda, pio gum kupra deipkamne. Sun nyapu ton men deiprumupa, sun tara neitamaida, sun si peda gum kupkamre.

Tonda, sun mutu nesaladi, ‘Nun nai,’ pepra, tali keca tep si eremnung isok-isok cap, aisok si eremna tep patung-patung petupra derinung keca yuma capda, nedi popra sikke buktapkamne. Ukupnedi, sun isok si eremna ati pumbon yumada, akeca yuma gum kupra deipkamne. Tonda, Asyur mutu neitamaida, nesala depmengepa, peinkamengai tep nengeda, ne Allah dipapu, sun popnedi, sun nong peinkamengaida, ketenepra deipkamsene. Ukupkamna deiyoda, sun Asyur mutu nesala tep nengeda, pio mali-malipu kurume. Nedi, sun tep, ‘Dakwapye, sunda ne songe,’ tenesenunga cadi, sun yuma men gam kunkamruma tepa!” Allah Yahwehi pepu.

Allahdi, sun Yehuda tara kurami nesala tep, pepu upu

15 Uda, sun Yehuda tara kurum nesala yumada, moupra dinkurume. Ada, nimi tenpu ngebo ton wepra deipnepa, mutu dupai yuma deiki tara di yankamre. Ayankamre ngeboda, kai pio telep upu doupra peryankamre. Angebodi doupra peryankamre kai telep upuda, podana gum dipapu, pio kange telep kupra, dipru dungdongona tep upu duyankamre. Atep nengeda, uo, sun Yehuda nesalao, ukutaru sun Allah si eremna tep, ila tumida moupra tenepmumdi, atumida ila kailya kalepra, Allah tep gispal dodinkamrume.

Tonda, menop taru ikin weik kuramrum taru neitamai di, sunda, ‘Allahdi lyepropsetuopda, nundi Allah tep ukupkamepe, ukupkamepe. Er gispal dona tep, akeca-keca ton, akeca ton karenkamepe,’ pepra, pedina upu deiki peiamrum keca yumada, tek sisi angepu kupkamrume. Kware gum di, tali lupra ukupkamruma deiyoda, ake.

Ataru di dipra, dorkunkamre taru yumada, sun mutu neitamai yumada, yu neng ton yangedi, pio men poryakankamsenge. Ada, Allahdi sun podan neng tep, konum popra sikke buktapkamredi, anesala yuma gum kupra deipkamra cadi, tenpu ngebo peda ton pio men kunkamenge. Sun er mawa nesalada, kange deipra teleppu kunkamrume.

Allahdi pepu.