Nah 2 | XteSC | STEP | Allahdi peipupa, nabi Nahumdi sun Niniwe mutu nesala tep, lap pepu. Uo sun Niniwe mutu neitamai kumum nesala yumao! Sunda moupra gekepso! Sun tep, popra gum kupra deipkamser ngeboda, konum sun damai yankamre! Atep, sun mutu neitamai, ila ati arum ongopdongopra deiprum gel beilya, er si tembok, adopruma deiki tara welepmumdi, sun mutu kalengna tep neng ton, wepra deipmumpa, akeca deiki kalengkamnunge! Ukupmengedi, ‘Nun podan nengdi, dan bisi di yakankameng do?’ tenen, sun mutu yakan bisi yuma moupra dinkamnunge! Ukupmenge dingeda, sun amutu kurum nesala yumada, adipapu ketenepra kalengdankamrume. Sun pe puto weika di, kweipdankamrume!

Nahum 2

Israel nesaladi yana, Niniwe mutu nesala yumada, popra gawal dakamenga tep, pepu upu

1 Allahdi peipupa, nabi Nahumdi sun Niniwe mutu nesala tep, lap pepu.

Uo sun Niniwe mutu neitamai kumum nesala yumao! Sunda moupra gekepso! Sun tep, popra gum kupra deipkamser ngeboda, konum sun damai yankamre! Atep, sun mutu neitamai, ila ati arum ongopdongopra deiprum gel beilya, er si tembok, adopruma deiki tara welepmumdi, sun mutu kalengna tep neng ton, wepra deipmumpa, akeca deiki kalengkamnunge! Ukupmengedi, ‘Nun podan nengdi, dan bisi di yakankameng do?’ tenen, sun mutu yakan bisi yuma moupra dinkamnunge! Ukupmenge dingeda, sun amutu kurum nesala yumada, adipapu ketenepra kalengdankamrume. Sun pe puto weika di, kweipdankamrume!

2 Uda, angeda tali tep men pepsene. Deiyoda, ake. Allah Yahwehdi sun Israel tara ^{▼▼Israel tara – Menop taru di, sun Israel yala nesala tenpu yalapu kurami dinin, ‘Nun songe’ tenepdaramidi, bokra yuk-yukai bena kikiman men kurami. Ton tara nengda, dapu tara (arah utara) bena kurami. Sunda, Israel tara nesala perami. Ton tara nengda bokra, yukai iknapi tara (arah selatan) bena yuk kurami. Sunda Yehuda tara nesala perami. Sun yumada Allah er mawa nesala, Yahudi nesala kurami dinin, ataruda, bokra yuk-yuk kurami.} kunge nesala yuma cap, Yehuda tara kunge nesala yuma cap tep, telep kupra deipredi, kange di ton cap mengne kweipkamre. Ukupyopda, yuk nesala yumadi, sun tep, ‘Uo, men di sunda pio telep kuramitopu, ukutaru peda telep kununge,’ tenepra penkamnunge.

Tek sisi, men taruda, sun podan yu nengdi, popra pio mali weik kupra derirami dinino, ukutaruda, Allahdi sun men di tamupra telep kuramitopu, telep kweiprepa, teleppu kunkamenge. Ada, sun pon nengdi kapul men dubenami taru, urasin telep cap, puto weik cap kuramitopu, kange di ton cap telep kunkamenge.

3 Ukutaruda, sun Niniwe mutu neitamai kumum nesala, sun nimi poryakankamseng nengda, nimi porban taru kenekra bana tep, tonda, ‘Mar popsenung’ tenen, nong lelimna tep talenung keca, er sida perisai, binge akupmare. Tonda sun ajen talena neng opkalda bingepu kurure. Tonda, sun mar podana tep neng bukra embana tep keca, er si kereta-kereta perangda, embanmangpa uku bu jeramretopu kunmare. Ange utopu, sun kuda bisam yan yuma peda, mar porbenkameng taru tep, ketenemangdi, ‘Adipapu sepdaro betepye’ tenen, sun yan bepekra kemengedi, moropsemnunge.

4 Sun Niniwe mutu mar porbana tep kereta-kereta perang yumada, pio tamna gum di tupa sepdaro bangedi, dipnapu kunkamenge. Mar podana tep ketenepra deiamyaida, sun aneng yumadi, sun bisi neitamaida orbenapna, ayanapna kemengedi, domdanapu kunkamenge. Ukunkameng ngeda, uku upmangepa, uku bu jeramretopu, kunmangdi puto di embandankamengaida, epna lang peramretopu kunkamenge.

5 Sun ajen talena deiyo ngebodi, er amutara jen talena neng tep, ‘Amutu, porbenkurume,” upeprepa, ‘Sepdaro porbenkup’ tenen, sun ajen talena neng, sun yan di yuk neng yan popra deipdanen bankamenge. Ajen talena neng yumadi, Niniwe mutu dana-dana tara ongopdongopra deiami gat gel beilya neitamai di potokami buplan, ‘Uruptapra akati arum wekupe’ tenen, gel tembok dominge damai sepra bei. Bei dingeda, atembok buplan olokra dokotena tep keca, akeca deiki tara deipkameng ati arum utopu dinin, gat galuna utopu keca ton menmena ketenepra dopkamenge.

6 Sun mar podan neng yumadi, ukupra bena dopi dingeda, Niniwe mutu neitamai kwamu embaramre me bisi yuma neitamaida, buplan dominge pakra deipkamenge. Ukupmengepa, Niniwe mutu neitamaida, ame ila di opra embaramredi, nimi deiyo ngebo kuramre ati dam, er si istana damai bena poprepa, teno pakra embankamre. Ukupyopda, aila istana atida, moropsepra, loka dourberedi sakmanto kupkamre. 7 Ukupmengopda, Niniwe mutu neitamai talepra kuramu nimi deiyo ner, sun mar pona jen nengdi talepmengdi, er kenengamu opkal yuma kwiripra deipmengepa, adeiyo ner, er pel melimna nerapu yuma epmengedi, bicau kuprepa, yal ma engeramretopu, engepmengedi, sun taram deikipu bongopra podanapu kungedi, embankamenge.

8 Uo, sun amutu nesala ukudankameng taruda, ukupmantoda, me mokon deiamyai di diniksakredi, puto dipapu tali mutu yuma embaramretopu, sun Niniwe mutu neitamai kurami nesala yumada, amutu neitamai yuma yamurtambenkamenge. Ataruda, ton neng dingeda, “Gume, sunda tamupra benkurume, tamupra benkurume,” pepra upu ila di ngolokra penkameng dinino, sun yumada, tamupra bana gum di, Niniwe mutu tapra sepdaro bura bendopkamenge. Tenpu ngebo peda, tamupra men benmanto kupkamenge.

9 Sun amutu neng konum sepdaro bendopmengopda, sun podan nengdi, upenkamenge. “Uda, amutu nesaladi, mawa derirami kunumna weik keca perak cap, emas capda, yana dalupra dopropso! Ataruda, sun mar podan nengdi, “Gume, amutu neitamai talepra kurami bung keca yala-yala yumada, men nukmanto kurure. Tek sisi akunumna weik keca, mawa deriraminge yumada, men gum kupkamre! Akeca yala-yala yumada, men nukmanto tupa akapmara dano!” penkamenge.

10 Niniwe mutu neitamai yumada, sikke bukra tapkamenge. Ukupmengedi, amutu neitamai kwamu keca yumada, pio gum kupra deipmengepa, walang yopu kupkamre ja! Amutu nesala taleramidi, dorami keca yuma peda, pio sikke buktapmengedi, amutu neitamai yumada, malipu kupra deipkamenge. Ukupkameng taruda, sun amutu kunge neng yuma, sun dipru neitamai di asimdana cap, tenimtona cap, dipru pu jepredi, dipru bulungsangnapu kunkamre.

Ukupkamenge deiyoda, sun ila kwar kupya tepa. Tonda, sun gutam yuma puto boun kupredi, yo berber pepkamre. Sun amutu nesala yuma, sun urasinda, ila pu jeramre nesala, sun urasin kurupredi, pupeng doramretopu kuprepa, mali kange doupra kunkamenge.

11 Ataruda, yuk-yuk mutu kunge nesala yumadi penkamenge. “Uo, menop taruda, Niniwe mutu neitamai kurami nesalada, balila weik kurami. Sunda, bura tara tali gam kuramre keca, ila yu pus er si Singa pus, gel imir pumbon kuramrai utopu, sun amutu neitamai kurami nesala peda utopu kurami. Dinino, ataruda kware weik kununga cadi, menop taru balila weik kurami ngeda, dan do?

Tonda, ukupmantoda, ila yu singa pus, er nyapu tep jen karepmengedi, sun kunungai, gel imir pumbon bena, tali dim pepra kungopda, yuk gam kecada, aca kunga damaida, pio men yakanunge. Kware tep, nimi peda, agel imir damai men yakanunge. Ange utopu, menop taruda, nimi mutu ban-ban yumadi, Niniwe mutu nesala tep, kware weik kuramupa, amutu damai men yakarami dinino, ukutaruda, Niniwe mutu neng pio amu kepra kunmangada dan do?

12 Dinino ukutaruda, Allahdi utenerure. ‘Gume, ukupmantoda, pumun taruda amutu neitamai kuramu yu singa pus, jemngedi, er jen tep, yuk gam kuramu keca popra jeramudi, er nyapu tep, weika di ton kareramu. Tonda ajem singa pusdi, er ner Singa pus tep, sun jena tep, gam keca ton popra kareramu. Er ukupne dingeda, er maramu ati pumbon, agam keca yuma tep, pio weika di popra doupnedi, duyanopda, seknedi galepra deriramupa, kange deipra kikiman jerami. Ange utopu, sun Niniwe mutu kurum nesala peda, yuk mutu nesala weika di poramrume.

13 Ange yuma tep nengeda, sun moupra gekepneso! Atep, neda sun mar pona ngebo utopu kunune. Neda, Allah Yahweh, akeca-keca yuma deiki tara talepra, ila puto ngebo kunune. Im deiki jen talena malaikat yumada, sun ila deiyo ngebo kunune. Ne dipapu, sun Niniwe mutu nesala tep pepsene. Sun nimi porbana tep, tu deiki sepdaro embana keca, er si kereta-kereta perang yumada, uku dongoprapnedi gum kupra deipkamne.

Ukupkamnetopu, sun jen talena neng tep nengeda, mar podanai di, yu parang ya di popra gawal dakamsene. Sun yumada, nedi gum kupra deipkamne. Ukupne dingeda, sundi menop taru yuk mutu neng keca, yala-yala yuma dopromumnge yumada, nedi kange di tamupra dalupra dopropkamne. Tonda, sun Asyur mutu nengdi wepra deipmum neng tep, “Ortara mutu kunge nesala tep, ‘Nundi poryankamsepe,’ pepra, deipmumpa, nimi upu perbana neng yumada, pio gum kupra deipne pangeda, sun upu ton nesala yumadi, ton cap pio men gekenkamenge.”

Allahdi sun Niniwe mutu nesala tep peipupa, nabi Nahum di lap perbeu.