Nah 3 | XteSC | STEP | Uo, sun Niniwe mutu neitamai kunung nesala yumadi, tali minina upu pena cap, nimi weika di pona cap, yuk mutu nesala keca upula dalupra dopromumdi, bung keca yala-yala yuma deipra kurumu nesala tep nengeda, ne Allah Yahwehdi popkamsene. Sundi bung keca pio weik dalupra dopromumdi, derirum keca yala yumada, men nukmanto kurure.

Nahum 3

Allahdi sun Niniwe mutu nesala tep, ‘Wenepkamsene,’ pepra deipu upu

1 Uo, sun Niniwe mutu neitamai kunung nesala yumadi, tali minina upu pena cap, nimi weika di pona cap, yuk mutu nesala keca upula dalupra dopromumdi, bung keca yala-yala yuma deipra kurumu nesala tep nengeda, ne Allah Yahwehdi popkamsene. Sundi bung keca pio weik dalupra dopromumdi, derirum keca yala yumada, men nukmanto kurure. 2 Sun mutu neitamaida, sun mar pona nengdi, kuda bisam pona tep kupkameng tapu doupmengedi bangepa, sun kuda bisam yan lelim pepmengepa, sun nimi pona tep, tu deiki embaramre keca, er si kereta perang lelim peda, weika di gekeramrume. Menop taruda, sun mutu neitamaida, alelim weika di gekeramrume.

3 Tonda ange utopu ton, Niniwe mutu jen talena nengdi, kuda bisam deiki bukra porbenami taruda, sun jen talena neng yumada, pio kange deipidi, mar podanai benami. Ukupra benami taruda, sun doupmai yu tema doupi ngeda, dirine pio kuputopu, sundi doupi nimi pona tep, lyom co, er si tombak doupinge peda, epna lang peramre utopu kupu. Sundi yuk mutu nesala tep mar podan taru neitamai di, konum poprum neng yumada, men nukmanto kuramu.

Sundi poprumpa, konum deami neng sun gemna yumada, tu palina gum dipapu, tu deiki pu tamamrum ngeda, men nukmanto kupu. Konum deami neng, sun gemnada pio weik cadi, sun mutu neitamai embarami nengda, konum pomrumpa deami neng, sun gemna men diramya cadi, bisi emban taruda, yan giso duknepa sakami.

Allahdi sun Niniwe mutu nesala tep, ‘Sunda nimidi tali nyangameng nerapu utopu kurume,’ pepu upu

4 Uo, sun Niniwe mutu nesala, sunda nimidi tali nyangameng nerapu utopu kuruma cadi, nedi wenemna keca karepkamsene. Sundi mali-mali kurum ngeda, ake. Ada, tali nyangdana nerapu yumadi, sun pe urasin pio telep kweipdangedi, yuk nimi tep, kange gidon upu pena cap, kungedi kange derina upu peramengtopu, sundi yuk-yuk mutu nesala tep, ‘Nun tara kepropkamrume,’ pepra, kange gidon upu peramrume.

Ton ngeda mutu ban-ban yuma di, nimi pon meri sengna upu peramruma deiki di yuk-yuk mutu neng, sun tara kepra yakaramipa, poramrume. Akange gidon upu cap, nimi pon meri sengna upu cap peramruma deiki di, yuk-yuk mutu nesala weika di, popra bisbisa kamamrumdi, Israel mutu nesala peda doupra, sun pe mutu dubenamrume.

5 Allah Yahweh akeca-keca yuma talepra, deiki tara ila puto kunun ngebodi pepsene. “Uo sun Niniwe mutu nesalao, nedi sun pio mali weik kuramrumnge wenemna tep, ila kange mun keca deipkamsene! Ukupmantoda, nimidi mali kun nerapu, ‘Ali weik dakameng’ tenen, sun mali-mali kunge taruda, tomopmengedi, sun anerapu kenengameng opkal, er si kain sarong, tonda rokda, yuk nesala ban-ban yuma dinai di kwiripra ereipnedi, sun rokda dangapra, anerapu sun giso deiki getepmengepa, yuk nesala yumadi, sun nong banangapu diramengtopu, nedi sun tep, ila ali dangne keca karepkamsene. Sun kange mun keca konum karepnyopda, sun yuk-yuk mutu deiyo neng peda, dingepa, sun ali weik dangkamrume.

6 Ange ukupkamne taruda, mali keca cap, bam-bama donongamengai paleramre keca cap yumada, dopra sun nong deiki dopkamsene. Ukupsenedi, nedi sun tep, ‘Pio dabale,’ tenenkamsene. Tonda, sun tep nengeda, nimidi men kurameng keca utopu kupra deipsenepa, ali weik dangkamrume. Ukupkamsen taruda, yuk-yuk mutu nesaladi epsengopda, autunkamsenge.

7 Pio amutarapu deipsenyopda, sun dinkamseng nengda, sun damai di godonkamsenge. Ukupsengedi penkamenge, “Uo, sun Niniwe mutu nesala konum mali kupmanga tep, ila kange mun keca konum dopropmang adano! Atep, sun damai pio men benkamepe!” penkamenge. Atep, ware nengdi, sun Niniwe mutu nesala tep, “Uo, sunda bicaue,” pepra engenkamseng do? Gume, men kupkamenge. Nimi tenpu ngebo pe ton, bicau men tenenkamsenge. Tonda, nimi yuk nengdi ton, pio telepe tenenange ton, yana men penkamsenge. Kaukemnapu kunkamsenge.

8 Uo, sun Niniwe mutu nesalao, sun tenipetepso! Sunda wareto teneprum do? Sundi, ‘Gume, Mesir mutu neitamai dinin, ila ati arum, er si Tebe mutuda, yambul telep kwamu dinin, nunda pio telep mutu neitamaipu kunupe,’ tenepdarum do? Gume, Tebe mutuda, ila me embaramre me, er sida Nil me damai domipa, dakuramu. Sun anesalada, pio bouna di kuramitopu, sun Niniwe mutu nesalada, utopu kurum do?

Tebe mutuda, Nil me embeua pirman kwamu cadi, ameda ila lyom gel beilya deipra wiamengepa baripredi, puto di tengamretopu kwamu. Sun podan nengda, tali lupra akota damai tali lupra men yanmanto kwamu.

9 Ataruda, sun Sudan mutu jen talena neng cap, Mesir mutu jen talena neng cap, sun yumadi, ‘Tebe mutu podan nengdi, yana popsenung’ tenen, puto weika di melimami. Ange utopu, Libia mutu cap, Put mutu capda, sun kayapu neng Tebe mutu neng cadi, sundi ton Tebe mutu melimami. Ataruda, Tebe mutu melimami mutu nesalada, sun ila putoda, men sukropmanto kurami.

10 Dinino, sun Tebe mutu neitamai kurami nesala yumada, sun podan nengdi popi dingeda, aneng dopra, ateng koupidi, sun pe karen mutu neitamai dubena, wenemna ati deamidi, ikin pel dimami. Dopra debena dopra deiamipa, ikin kange dopra dakuramipa, sun nyapu yuma peda dopra, tu deiki dokotepra popipa, sikke buktapipa deami.

Tonda, sun podan nengdi, ‘Ware ngebo doproptenepa, ne tali pel melimna ngebo kupkamnere do?’ tenen, yambul gel deiki nimi si sekidi, tuai dokotepipa, katuai kupu ngeda, Tebe mutu ila deiyo-deiyo neng yumada, dopropidi gat tapu, er sida rantai di, ateng kourami. Tonda koupne dingeda, yuk neng damai bokra yuk-yuk dokotepnepa, yuk neng sun tali pel melipra dona neng kurami.

11 Uo, sun Niniwe nesalao, Tebe mutu nesala ila ikin keca doproamitopu, sun peda ila kange mun keca dopropropkamrume. Ukupseryopda, sun yumada, sun giso yung bendopkamre. Kange yawaramne me jerameng nesala, sun kange pio yawaramretopu kupkamrume. Atep nengeda, sundi, ‘Uo, adipapu nun popsenung’ tenen, inimbenkamrume. Tonda, sun yumadi, ‘Nun mar podan neng damai di gopda pepra benkamepe’ tenen, piripetepkamrume.

12 Sun Niniwe mutu neitamaida, ila ati arum doramrumdi, ‘Nun podan neng yana popsenung’ tenen, ila lyom gel beilya wipra deiamrume. Ukupra doramrum dinino, sun podan neng yangedi, popkamseng taruda, sun lyom gel beilya uruptapkamenge. Ukupmantoda, arah co du moupra ekredi menmena sakrepa, nimidi, ‘Ange jepkamepe,’ tenena nengdi, arah co long-long pepmengepa, adu menmena sakrepa jeramengtopu, sun podan nengdi yana, sun lyom gel beilya peda, adipapu kanam dipu yana uruptapkamenge.

13 Tonda, sun dipetepkurume. Sun jen talena neng, sun puto yumada, gum kupmara cadi, sunda nerapudi, puto boun kuramengtopu kununge. Tonda, sundi talepmum mutu, ila ati arum dana-dana tara ongopdongopra wiamrum beilya neitamai di potokra deiami buplan yumada, tali paktapkamenge. Atep nengeda, sun yuk mutu podan neng yangedi, adipapu tali lupra sun ati arum neitamai wekra ponkamsenge. Ukupmengopda, sundi, ‘Nun bisi buplan men pakra weksetenge’ tenen, abuplan deiki lyom co deiamrum ngeda, sun podan nengdi, aco yuma dopra, ila uku dongopmengepa, uku bu di jeproprepa, akeca yuma gum kupkamre.

14 Atep nengeda, sun mar podan nengdi menmena yangedi, sun ati arum yuma warekra ongopkamenga cadi, sunda bura men benmanto kupkamrume. Atep, sun Niniwe mutu nengdi, ketenepkamrume. Ada sun me jena tep, me weika di gwepra telepai dikdongopra ketenepkamrume. Tonda, sundi, ‘Nun podan nengdi wekra, men popsetenge’ tenen, sun damai ila puto ati domrumpa, akupu benteng-benteng yumada, puto ton cap tapakra kepropkurume!

Ukupmumdi, sun beilya uruptapkameng ngeda, ka tamupra lepsisikra dopkamruma cadi, me bental neitamai yaniprapmumdi gat gel, er sida batu tehel, weika di ton cap, ketekepra ketenepkamrume. Tonda agel, batu tehel yakra deipkamruma cadi, akeca deiki palepra, puto kemdina tep keca, gat tu er si tanah liat ton ketenepkamrume. Tonda, agel batu tehel ketkemna co peda ketenepmumdi ketekepra derinkamrume!

15 Ware keca do yuma, sundi kunkamrum keca yumada, tali-tali ngepu kunkamrume. Deiyoda, ange yuma kuruma peda, sun podan nengdi yana popkamseng taruda, tek sisi uku di jepra gawal dakamretopu kupkamsenge. Tonda, ange gum dingeda, sun mar podankamrum taru di, sun podan nengdi, sun nimi pona tep yu parang ya di, popsengedi, gawal dangkamsenge. Sun tara nesalada, weika di depkamrume.

Ukupmantoda, podi nimi wa pepra kouamenge keca jeprapmengedi, gawal dangamretopu, sun podan nengdi, sun tara nesala yumada, popra gawal dangkamsenge. Ukutaruda, sun Niniwe mutu nesalada, pio menmena di nepmengedi, weik kupmengepa, nimidi men nukmanto kungetopu kunmarum dinino, amenda taruda, sun podan neng, sundipu weika di popra, gawal dangkamsenge.

16 Tonda, sun kayapu nengdi bung keca deipra kunumna pel talepra kunga deiyo nengda, im deiki ingrur kuruda, weik kurepa, men nukmanto kungetopu, pio weika di sun mutu neitamai bulupra wengmengedi, dakununge. Dinino, amenda taru, sun yuma peda, gum kupkamenge. Ukupmantoda, po er pol weik kupredi, lakra inimbaramretopu, kupkamenge. Ikin keca sun damai yaryopda, sun kunumna deiyo neng yuma bendopmengopda, dim pepkamenge.

17 Sun mutu deiyo-deiyo neng cap, sun mutu mambul keca sengnung neng capda, pio weika di kununge. Ukutaruda, sunda po gung tenpu kepmengedi bul li taru tep, ‘Bupu keptepe’ tenen, gel beilya deiki bulupra bungamengtopu kununge. Ukunung dinino, po kuramretopu, keteng weleryare taruda, bupu konum kepyopda, sun menmena adipapu lakra inimbanunge. Ange utopu, sun mutu deiyo-deiyo neng cap, mambul keca sengna deiyo neng capda, ikin keca sun damai yaryopda, aneng yuma bendopmengedi, dim pepkamenge. Ukupkameng taruda, nimi tenpu ngebo peda, ‘Sunda amutu ton benmange’ tenen, pio men kael kemnunge.

18 Uo kanda, Asyur mutu yuma cap, yuk-yuk mutu cap, talepra ila nimi deiyo ngebo kurum dinino, kanda bicaue! Kan amutara mambul pel talepra kunge deiyo-deiyo neng yumada, konum depkamenge! Amutu neitamai, sun nimi deiyo ngebo Gubernur peda konum depu. Tonda, sun upu bongdina deiyo neng peda, pio-pio tep mapnapu kupkamenge. Sun konum depkamenga tep pepne. Kandi talerum mutu-mutu yuma neitamai kunge deiyo-deiyo neng yumada, sun konum depkamenga cadi, sundi talenung mutu nesala yuma peda, ‘Uo, ware kuptepe do?’ tenen, walwalpu kungedi, tali embanapu kununge.

Ukupmantoda, domba bisam peina deiyo neng yuma popmengedi gawal dakmengopda, sun peirami domba bisamda, kange wang-wang perepa, tali embanapu, kununge. Ange utopu, kandi talerum mutu-mutu neitamai kunge nesala yumada, yuk-yuk mutu iknapi dam tara, mutu gon deiki konum bendopidi, tali embanapu kununga cadi, ware ngebodi ton, anesala ton dopra, sun pe mutu tamupra duyatu do? Gume, ange men kuptue. Anesala tamupra men doupra yatue.

19 Ange yuma tep nengeda, kanda Asyur mutu yuma talepra ila nimi deiyo kepra talerum ngeboda, kan tep popkamkeng ngeda, wareto keca deiki di kwetepra, telep kupra deipkamketeng do? Gume, angeda men kupmanto. Tonda, kan popkerepa, suse dila kunkamkernge peda, pio men kweteipkamketenge. Tek sisi depkamrema tepa. Amenda taru nimidi, ‘Gume, sun Asyur mutu nesalada, sun podan nengdi, konum popra gawal dakmange,’ pepra lap pepmengepa, yuk-yuk mutu nesala yumadi aupu gekepmengopda, adipapu kange deipra, sun buru tang bongopmengedi, pingping kange doupra, pio kange deipkamenge.

Deiyoda, sun yuk-yuk mutu nesala yumada, sun Asyur mutu nengdi, mali kurumada, tamna gum deiki di, sun ila kange mun kange doupra kuramya cadi, sun podan nengdi, sun Asyur mutu nesala yana popsengedi, sikke buktapsengopda, sun yuk-yuk mutu nesala yumadi, ‘E, walito popra gawal dakmang adano’ tenen, kange pio deipmengedi, sun buru tang bongopra kunkamenge.