Neh 1 | XteSC | STEP | Hakailya er mi Nehemiada, men di Israel nesala kuramyai kuramu dinin, sun Persia tara nesaladi, Israel nesala popbisipidi, ateng koupra sun pe mutu Persia tara dubenamipane, Israel nesala keteng tamun denge weik dakuramyane, amenda taru Persia tapra, ka tamupra Yehuda tara neitamai yan kurami. Nehemiadi pepu upu ake. Neda Persia mutu taleamu ngebo Raja Artasastadi, Persia tara taleamupane, keteng tamun denge dua puluh tahun neitamai dinin, war sida Kislew deiki di, sun podan neng men wekmanto gel ati, amutu sida Susa mutu kuramsi. Amutu kuramsi taruda, ne weit bo tenpu, er sida Hananidi ne damai yana pepneu.

Nehemiah 1

Nehemiadi Israel nesala tep, Allah moropu upu

1 Hakailya er mi Nehemiada, men di Israel nesala kuramyai kuramu dinin, sun Persia tara nesaladi, Israel nesala popbisipidi, ateng koupra sun pe mutu Persia tara dubenamipane, Israel nesala keteng tamun denge weik dakuramyane, amenda taru Persia tapra, ka tamupra Yehuda tara neitamai yan kurami. Nehemiadi pepu upu ake.

Neda Persia mutu taleamu ngebo Raja Artasastadi, Persia tara taleamupane, keteng tamun denge dua puluh tahun neitamai dinin, war sida Kislew deiki di, sun podan neng men wekmanto gel ati, amutu sida Susa mutu kuramsi. Amutu kuramsi taruda, ne weit bo tenpu, er sida Hananidi ne damai yana pepneu.

2 Ne tamna ngebo Hanani cap, er kayapu neng yuk neng cap, Yudea tara di ne damai yai. Yaipa sun tep asipetepsi. “Pumun taru sun Persia mutu nengdi, Israel nesala dinin, Yudea tara neitamai kurami neng yuma popbisipidi, Persia mutu dubeipane, keteng tamun weik dakuramipane, ton neng derami dinin, ton nengda, ka di tamupra Yerusalem mutu bei nengda, wareto kunung do? Telep kunung do? Tonda, nun mambul ati arum domupkai, kota Yerusalemda telep kurur do, mali do?” pepra asipetepsi.

3 Asipsipa, sun anengdi tamupra, “Persia mutu nengdi popbisipseidi, sun mutu dubenamsei nengda, ton nengda derami dinin, ton neng dengeda yambulpu tupa gam kungedi, tamupra Yerusalem bei. Sunda, Yudea tara Yerusalem mutu damai tamupra bei dinin, ikine weik kununge. Ukungepa, yuk mutu nengdi, aneng tep nyek-nyek pengepa, ali weik kurure. Tonda Yerusalem mutu ila gel beilya wiami ngeda, dakra uruptapitopu tupa kurure. Abeilya buplanda uku dongopipa jepropu,” pepnei. 4 Ne kayapu nengdi aupu pepneipa, gekepsi dingeda, ange tepapu tenepsidi, tuai bukra engepsi. Mali kange doupra engepsada, ue tenpu taru di gume. Ada, ue ware kuprap tumi yuma jen jena gum di, ikin kange doupra engenmasidi, im deiki kuredi akeca-keca yuma talerur Allah tep, puto di moropsidi pepsi.

5 Uo, ne nai Allah, im deiki kurum ngeboda, kanda ketekemdina ila puto ngebo kurume. Kan tep nengeda, nimi tuai neng yumadi, ‘Uo, erda, ila mambule,’ tenekenunge. Kandi, “Angeda kunkamrume, angeda men kunkamrume,” peiamsemum upu gekepra aupu utopu kunge nengda, kan deikipu sun kange dipru konum deiamkei. Atep, kandi sun tep bicau tenepra weika di melimserume. Aneng tep nengeda, kandi, “Ne pene upu moupra gekepmumpa, nedi ukupra melipkamsene,” pepra pediramsemum upu tek sisi kuserume. Tenpunge peda men tamserume.

6 Atep ngeda keteng komuni pe, lukunda peda, nedi kan tep tupa morokenune. Neda kan amutara kunedi, kan pelpu donune. Ada kan amutara kunge nesala, Israel yala neng yuma tep morokenune. Naio, ‘Kanda adipapu gekena cap, dina cap kumemdi yuma kael kepkurum’ tenen, morokenune. Nun Israel neng yumadi, kan tep mali kunupe. Ada, ne cap, ne nai yapu cap, ne yala neng yuma capdi, kan damai nun mali kunupnge tepapu, katuai pepne. 7 Tek sisi kan damai nun pio mali kunupe. Kandi, “Angeda kunkamrume, angeda ton men kunkamrume,” pepra, Musa damai peramumtopu men kunupe. Aupu yuma yaniptapmepudi, malipu kunupe.

8 Ne nai Allah, kandi kan pel don ngebo Musa tep peramum ngepu, kange di ton cap tenepkurume. Kandi upepmume. “Sundi ne pepmasen upu utopu men kupmum pangeda, sun wenepnedi, yuk mutu neng kan-kan di wilipra yuk-yuk mutu weike deipbankamsene.

9 Dinino, ukupkamsena peda, sundi tamupra ne damai yamumdi, nedi, ‘Angeda kunkamrume, angeda men kunkamrume,’ peipsitopu gekepra kupmumnyopda, yuk mutu nengdi popbisipsetengedi, pio karenai dubenkamtenga peda, sun kayapu mutu sirik, im sirik, dakunkamtenge neng peda, nedi bulupra tenpuai deipkamsene. Ada, ‘Akunkamrume,’ tenen, wepra keteneramsesaipu, kumumdi, ne si eremkamnerume. Ada, ‘Ne si aca kunkamrai,’ tenen, ‘Keteneipsi mutu tep pepsene,’ pepra peipsemum upu tep pepkene nai.” Nehemiadi pepu.

10 Upepudi aupu ton pepu. “Ne nai Allah, Israel nesalada, kan nyapu kunupe. Israel nengda, kan amutara kupedi, kan pel melimna neng utopu kunupe. Tonda, kan pe buru deiki cap, kan ila puto deiki di lyepramsemum neng kunupe. 11 Ange tep ngeda nai, neda kan amutara pel donun ngebodi kan tep moropken upuda, gekepneo. Tonda kan nyapudi kan si tep, pio kange deipra kungedi, ‘Erda pio mambule,’ pepra, kan si eremenge nesaladi, sundi ton morokenunge. Sun moronunga peda, gekepseo nai.

Naio, ange yuma tep nengeda, ne moropken upu gekepmemdi, ‘Atumida bicau tenepra melipnetume’ tenen, moropkene nai. Ada, melipsememya deiki di, ila nimi deiyo ngebo Raja, er damai bena upu pepnyopda, ‘Erdi kange deipnetudi, gekepnetuopda, telepe pepnetue’ tenen, moropkene nai,” Nehemiadi Allah tep upepra moropu.

“Ange yuma moropsi taruda, nedi ila deiyo ngebo Raja Aratasasta er me mau dekana deiyo ngebo kuramsi.” Nehemiadi pepu.