Neh 10 | XteSC | STEP | Hakailya er mi Gubernur Nehemia, erdi menmena peten kemderina tep, er si asengna keca deiki seku. Ada, meterai derirameng keca deiki, nimi sekra, tanda tanggan kemna tep, sekra peten kemdiramengtopu konum kupra deipu. Ukupupa, amenda taru, er damai bupra yaidi, dukdongopra seki neng sun sida ake.

Nehemiah 10

Israel nesala yumadi, “Allah peiamseu Mem Upu moupra gekepmepedi, aupu talepra dombankamepa tep, nun si asengna keca deiki sekra deipkupe,” pepi upu

1 Hakailya er mi Gubernur Nehemia, erdi menmena peten kemderina tep, er si asengna keca deiki seku. Ada, meterai derirameng keca deiki, nimi sekra, tanda tanggan kemna tep, sekra peten kemdiramengtopu konum kupra deipu. Ukupupa, amenda taru, er damai bupra yaidi, dukdongopra seki neng sun sida ake.

2 – 3 – 4 – 5 – 6 – 7 – 8 Sedekia cap, Seraya cap, Asarya cap, Yeremia cap,
Pasyuri cap, Amarya cap, Malkia cap,
Hatus cap, Sebanya cap, Maluk cap,
Harim cap, Meremot cap, Obaya cap,
Daniel cap, Gineton cap, Baruk cap,
Mesulam cap, Abia cap, Miyamin cap,
Maasya cap, Bilgai cap, Semaya cap, akonuma.

Sun nimi si sengna tep, tanda tanggan kemna tep sekra, peten kemdiramengtopu konum kupra deipi. Aneng yumada, Allah er si eremna ati pumbon pel talepra pel dona deiyo neng imam kurami.

9 Ange utopu Allah er ati pumbon pel deiyo neng, sun melimna nengda, Lewi neng kurami. Sun asengna keca deiki sun si sekra deipi Lewi yala neng sun sida ake. Ada Asanya er mi Yesua cap, Henadad di deipupa, deipdanen yakarami nengdi, yan deipi ngebo Binui cap, Kadmiel cap, sun si sekra deipi. 10 Tonda anesala sun kayapu neng sisa utopu neng, sun si seki. Ada, Sebanya cap,
Hodia cap, Kelita cap, Pelaya cap, Hanan cap,
11 Mika cap, Rehob cap, Hasabya cap,
12 Zakur cap, Serebya cap, Sebanya cap,
13 Hodia cap, Bani cap, tonda Beninu cap, akonuma.

Sun aLewi yala nesala yumadi, tanda tanggan kemna tep, sekra peten kemdiramengtopu, asurat deiki di konum kupra deipi.

14 Amutu neitamai talepra kuramidi ‘Upu penkameng’ tenen, wepra deiami neng sun sida ake.
Ada Peros cap, Pahat-Moab cap, Elam cap, Zatu cap, Bani cap,
15 Buni cap, Azgad cap, Bebai cap,
16 Adonia cap, Bigwai cap, Adin cap,
17 Ater cap, Hiskia cap, Asur cap,
18 Hodia cap, Hasum cap, Besai cap,
19 Harif cap, Anatot cap, Nebai cap,
20 Magpias cap, Mesulam cap, Hezir cap,
21 Mesesabeel cap, Sadok cap, Yadua cap,
22 Pelaka cap, Hanan cap, Anaya cap,
23 Hosea cap, Hananya cap, Husub cap,
24 Halohes cap, Pilha cap, Sobek cap,
25 Rahum cap, Hasabna cap, Maseya cap,
26 Ahia cap, Hanan cap, Anan cap, 27 Maluk cap, Harim cap, tonda Bahana cap, akonma.

Sundi amutu neitamai talepra kurami. Aneng yumadi, nimi si sengna tep, tanda tanggan kemna tep sekra peten kemdiramengtopu asurat deiki di, sun si sekra konum ukupra deipi.

28 Uda, adeiyo neng yumadi, asurat sengna keca deiki sun si konum seki pangeda, Nehemiadi upepu.

Sun Israel nesala yumadi, ‘Allah er upupu moupra gekepmepedi, angepu talepra dumsisi kunkamep’ tenen, peten kemna tep, sun si yuma men sekung dinin, sun gonga kemna tep, ila nimi deiyo ngebo ne Gubenur Nehemiadi, ‘Apedina upu tek sisi kunkamepe’ tenen, ne si konum sekmane.

Ange utopu, Allah cap, nimi cap, antamdina deiyo neng, ada Allah er si eremna ati pumbon pel dona deiyo neng, sun imam neng yuma, sun si ton sekmange. Tonda, Allah er si eremna ati pum pel dona deiyo neng, sun amutara pel dopra melimna neng, ada sun Lewi yala neng ton, sun si sekmange. Tonda, Israel nesala, sun deiyo neng denge weik, empat puluh empat (44) neng, sun si sekmange.

Aneng-aneng yumadi, ‘Nun tek sisi apedina upu kupkamnupe’ tenen, peten kemna tep sun si sekmange. Tonda, sun Israel nesala weika di, Nun nai Allahdi, ‘Angeda kunkamrume, angeda ton men kunkamrume,’ pepra kareramseu mem upu, ‘Angepu talepra kunkamep’ tenen, ukupmange. Sun dan-dana tara kuramidi, Allah tep teka men tenerami nesala kuramyai tapra, yuk kepropi. Ada, ‘Yuk mutu nengdi sun mali kunge keca, nun ton epmepedi, amali kun keca nun ton kupnup’ tenen, yukai beipra bei. Yuk mutu nesala cap wisipra men kurami.

Ukupra kurami nengda, Allah er si eremna ati pumbon pel doramya deiyo neng cap, sun amutara pel melimna neng, Lewi yala neng cap, aneng sun amutara dinin, akati tali pel melimna neng cap, Allah mut perami neng cap, Allah er si eremna ati buplan dam kalengna deiyo neng cap, aneng-aneng yuma, sun nerapu cap, sun ner nyapu cap, sun sal nyapu cap, kange konum douami nyapu yumada, sun pedi, ‘Apedina upuda nun pedi angepu talepra kunkamep’ tenen, pedina upu deiki di konum pepmange.

29 Anesala yumadi sun si seki nesala cap, pedina upu deiki di pepmai nesala cap, akupmainge deiyoda ake. Ada, Nun nai bo Allahdi, ‘Angeda kunkamrume, angeda men kunkamrume,’ pepra, er amutara pel doramu ngebo, ada, ‘Nun apu bo Musa tep karepseu mem upu yumada, moupra talepmepedi, angepu gekepra kunkamep’ tenen, sun si sekmange. Tonda pedina upu deiki di, “Ukunkamepe,” pepmange. Tonda, sun anesala yumadi, upepmange. “Allah er si deiki di pepmepe. Allahdi peiamseu upu gekepra, ange tek sisi men kupmepyopda, nun wenemna tep, ‘Allahdi, ila kange mun keca nun nong deiki deipsetue,’ pepra deipmange.

Tonda, nun yala Israel nimi deiyo neng yala-yala yumadi, nun nai bo Allah, er si Yahweh, nun ila deiyo ngebo kuserura tep, Allahdi, ‘Angeda kunkamrume, angeda men kunkamrume,’ peiamseu upu, ‘Er upupu moupra gekepmepedi, angepu kunkamepe,’ pepra, peten kemna tep sun si sekitopu, ‘Nun peda utopu kunkamepe’ tenen, sun yumadi, ‘Ukupra kunkamepe,’ pepra, pedina upu deiki di peipmange.” Nehemiadi pepu.

30 Ataruda, aupu konum pepu dingeda, abulupra weki nesala yumadi, aupu ton pepi.

Nun Israel nesala yumadi, nun nai bo Allah tep, ‘Ukunkamepe,’ pepra, pedina upu ton dukdongopra pepkukepe. Apedina upuda ake. Ada sun yuk-yuk yala nesala nun dan-dana tara kunge nesaladi derinkameng ner nyapuda, nundi nun nyapu ner dodana tep, men dopropkamepe. Tonda, nun nyapu sun nerapu tep men dopropkamepe. Tonda, nun ner nyapuda, sun yuk-yuk yala nesala, sun nyapu ner dodana tep nengeda, pio men karenkamepe.

31 Tonda, nun dan-dana tara kunge nesala, yuk-yuk yala nesaladi, nun pel men donup tumi, Sabat tumi deikida, kunumna keca, tali bunga do, jen keca do yuma, ‘Akeca-keca kunupkunge’ tenen, nun damai duyasengopda, nundi men kunupkamepe. Ada, nun nai bo Allah er gispal dona cap, er si eremna cap tep, mambul tumi, Sabat tumi deiki di pel men donupa tep, kunumna keca duyasenga peda, nun men kunupkamepe. Ange utopu, kan Allahdi, ‘Atumida ne mambul tumi cadi, atumi deiki di ne gispal donkamnerume,’ pepra deipsemum tumi yumada utopu kunkamepe. Pel dona cap, kunumna cap men kupkamepe.

Tonda, keteng tamun nukmepepa, ngantan bari keteng tamun deiki di, tali lupra wa pepra, kinkamepe. Dinino, keteng tamun nukra yoneitam baringe konum kupyopda, tahun ketujuh yuma ngeda, nun ukupu wa men pepkamepe. Tonda, nun wa tu neitamaida, yal keca men kounkamepe. Tali akwamrengepu, tali paramre keca kipra jenkamepe.

Ada, men di peipsemumtopu, keteng tamun yoneitam baringe deiki di, nun tu cap, wa cap yumada, beipye peingna utopu kepkamra tepa. Tonda, yuk nengdi nun co bo do, ware keca do, keana tep dopropsei neng tep nengeda, yoneitam bari keteng tamun deiki di, “Ange dakwapye. Nun keca, keana tep dopropsemum keca yumada, ka tamupra karena gume,” pepkamepe.

32 Tonda, kan Allahdi peamsemumtopu, gekepra kunkamepe. Ada keteng tamun, keteng tamun yumada, nun kunumna deiyo keca, er sida perak, tenpunge bokra seper tiga bokra karenkamepe. Ada ukupmanto 4 gram keteneipmepedi, Allah er si eremna ati lepsisikra dona tep, Yerusalem dokotepkamepe.

33 Aco bo bulupmengedi, adeiki di kunkamenge yuk ngeda ake. Ada, arupnge utopu, kandi, ‘Ukunkamrume,’ peamsemumtopu, pel dona gum di, nun Sabat tumi deiki yumada roti jen keca 12 kepra dapra, kan mambul si eremna ati pumbon dinin, co lase meja deiki deirbankamepe. Ange utopu, kandi, ‘Ataruda, akeca karenkamnerume,’ peamsemumtopu, roti deiyo keca, er si gandum do, yuk yalange do, karenkamkepe. Tonda, nun mali kuna tep, tali lupra poptapsetum dinin, nun yo pununa tep, ‘Gam keca popra uku dongorberumudi karenkamnerume,’ peamsemumtopu tupa kunkamepe.

Tonda, Sabat tumi deiki karekenup keca cap, tonda war tengdongon taru, ila kailya kalepra kan tep karekenup keca cap, tonda kandi, ‘Ataru-ataru yuma ila kailya kalepkamrume,’ peamsemumnge cap, tonda pio lek keca, kan tep telepnge karekenup keca cap, tonda nun mali kun keca daemna tep karekenup keca cap, pio men tapkamepe. Kandi, ‘Ange-ange yuma ukupra karenkamnerume,’ peamsemumtopu karenkamkepe. Ange yumada, kandi nun tep, ‘Sun anesalada wenepra men popkamne,’ tenesemuma tep, nun yo pununa tep, akarekenup keca kange deipra dororume. Atep nengeda, nai kan si eremna ati pel yala-yala yuma doramenge ngeda, men tapkamepe. Tupa pel dopnapu kunkamepe.

34 Tonda nun nai bo Allah, kan si eremna ati pumbon pel dona deiyo neng cap, nun pel melimne neng, sun Lewi yala neng cap, uda nun Israel nesala yuma capda, nun yumadi peten kemna keca konum wepmape. Ada, ‘Ware yala nengdi, Allah er ati damai uku sengkamengai derina tep, co kwepra dekankameng do? Tonda dan taru di, yuk yala nengdi dekankameng do?’ tenen, peten kemna keca konum wepra deipmepu.

Konum kupmupka cadi, ukutaru nun kaele. ‘Ayala nengda, aketeng tamun neitamai, ton tumi awarda, atumi deiki di, Allah er ati dam uku sengkamengai tep, co toupra dekankamenge. Tonda yuk taruda, yuk yala neng dipu co toupra dekankamenge,’ utenena tep konum kael kepmepu. Ukupra dengopda, Allahdi peramupa, Musadi mem upu buku neitamai sekeipseutopu, Allah Yahweh, er si eremna ati dam dinin, gam keca popmengedi, gel yakra deriramengai, akeca deiki uku sengkamengaida, ayala-ayala neng yuk-yuk di co duyankamenge.

35 Tonda keteng tamun, keteng tamun yumada, nun wa kouramep keca cap, nun keca du mouramre li taruda, weninge capda, kiprapmepedi, kan tep kareryankamkepe. Ada nun nai Allah kan si Yahweh, kan si eremna ati damai nun weni keca yumada kipra duyankamepe. Apel peda men tapkamepe. Dopnapu kunkamepe.

36 Tonda, Allah kandi peramumpa, Musadi sekeiamseutopu, nun weni keca yala-yala yuma kan si eremna ati damai dekankamepe. Ada nun wein nyapu cap, nun sapi bisam weni derinkamengenge cap, nun domba do, kambing do, weni nyapu deriramenge ngeda, kan ati damai duyankamepe. Ada, kan si eremna ati pumbon pel dona deiyo neng, sun damai du yapedi, aneng pel doramenge taru, sun damai deipkamkepe.

37 Angepu gum dinin, kan ati pumbon pel dona deiyo neng, sun damai du yapedi aneng tep karenkamep keca karepmepepa, dopropmengedi, kan ati pumbon mambul keca mawa deriramengai ton derinkamenge.

Akecada, ake. Ada, nun roti dana deiyo keca gandum do, yuk yalange do, taikmepepa sikke utopu kuprenge cap, tonda taingna gumnge cap, co du mouramre du yala-yala yuma cap, anggur du purupmepepa ukupu me mokon nge cap, tonda, zaitun co du taikmepepa, minyak zaitun embaramrenge capda, gwepra duyankamepe.

Angepu gum dinin, kan ati pel dona melimna deiyo neng, sun Lewi yala neng karena tep, nun wa pepra kouramep keca yala-yala yuma dekankamepe. Tonda, wai damai di kipmepedi, ange yuma, neitamai di bokra yuk-yuk sepuluh deipmepedi, tenpunge, seper sepuluh peramenge dopropmepyopda, sun Lewi yala neng, sun makuna tep karenkamepe. Ada mesum gume, deiyoda sun Lewi yala nengdi, nun bena pel donup mutu yuma neitamaida, nun bokra karenup keca, seper sepuluhnge bulupra deriramenga tep, aneng damai akeca karenkamepe.

38 Nun kaele, nun apu bo Harundi deipupa dadeipdanen baramyane, deipi yala neng yuma, gerekdarami nengdi, sun Lewi yala neng cap arup penmap pel donkameng taruda, aneng melipra donkamenge. Ada, sun Lewi nengdi nun karenkamep keca, kareryakankamep taru yumada, Harun er yala nengdi derirami neng, Lewi yala neng cap melipra apel donkamenge.

Nun karenkamep keca, sun Lewi yala nengdi dopropmengopda, ange yuma bulupra deipmengedi, neitamai bokra, sepuluh ton deipmengopda, tenpunge dopra Allah kan si eremna ati duyakankamenge. Ada, kan si eremna ati pumbon, mambul keca mawa derin ati dongopra deipkamenga tepa.

39 Ange tep nengeda, nun Israel nesala yuma cap, tonda sun Lewi yala neng peda, nun nai bo Allah karena tep, akeca yala-yala yuma dekankamepe. Ada nun roti dana deiyo keca gandum cap, anggur me ukupunge cap, minyak zaitun ukupunge cap, kipmepedi, Allah kan si eremna ati damai deipmepe pangeda, akati pumbon mambul keca tep, mawa derin ati dongopkamenge.

Mambul keca derirameng ati pumbonda, Allah er si eremna ati pumbon pel dona tep, ila mambul keca ton, imam neng talenge keca mawa deriramenge. Tonda akati damaida, sun buplan damai kalengna neng cap, sun mut penge neng cap, kan ati pumbon pel dona deiyo neng, sun imam-iman neng cap, akati pumbon ton kununge.

Atep nengeda, nun nai Allah, kan si eremna atida, men tapkamepe. Kandi, ‘Ukunkamrume,’ peamsemumtopu, akeca-keca yuma akati damai dekanapu kunkamepe. Atep, aupu yumada pedina upu deiki di pepra deipmepe. Ada kan cap, nun cap kikiman telep kuna tep pedina upu aca deipmepe. Sun Israel neng cap, sun deiyo-deiyo neng cap yumadi, Allah tep aupu pepra deipi.