Neh 11 | XteSC | STEP | Yerusalem mutu neitamai talepra kungedi, upu penung neng cap amutu neitamai kunge nesala yuma capdi esu pena tep kunumpeten keca er si undi donkamrume. Undi donmamumpane, akeca di konum keteneipre pangeda, tenpu nyapsilip sepuluh utopu apio telep mutu Yerusalem bena wekmengedi kunkamenge. Dinino, akeca undi donmangepane utopu men kupredi, wepra men deipre nesalada, Yerusalem mutu ton men kunkamenge. Yuk-yuk mutupu dakunkamenge.

Nehemiah 11

Yerusalem mutu neitamai kunge nesala tep, si sengna cap, Yehuda yala nesala si sengna cap tep, pepu upu

1 Yerusalem mutu neitamai talepra kungedi, upu penung neng cap amutu neitamai kunge nesala yuma capdi esu pena tep kunumpeten keca er si undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} donkamrume. Undi donmamumpane, akeca di konum keteneipre pangeda, tenpu nyapsilip sepuluh utopu apio telep mutu Yerusalem bena wekmengedi kunkamenge. Dinino, akeca undi donmangepane utopu men kupredi, wepra men deipre nesalada, Yerusalem mutu ton men kunkamenge. Yuk-yuk mutupu dakunkamenge. 2 Akan-kan neitamai di wepra deipmengepa tali lupra Yerusalem mutu neitamai kunkameng nesala yuma tep, yuk nesaladi gispal donkamenge.

3 Tonda Israel yala nesala yuk-yuk mutu dakungedi imam-imam Lewi yala neng Allah er upu ati pumbon neitamai pel don neng cap Salomo cap kuramidi er pel melipra dorami nesala yumada sun mutu sisa konum kepra kununge. 4 Uda Yehuda yala nesala cap Benyamin yala nesala cap Yerusalem mutu neitamai kunge nesala sun sida ake. Ada Yehuda yala nesala sun amutu neng tepa, Uzia er mi Ataya erda Zakariadi deipua neitamai sun apu yapuda ware kuprap do, ada, Amarya cap, Sefaca cap, Mahalalel cap, Peres cap sun ukupra kurami.

5 Yehuda yala nesalada, denge pio weik 486 nesala pio ila balila nesala kurami. Baruk er mida Maseya erdi deipu ngeboda Kolhoze, er nai boda Hazaya er naida Adaya, er nai boda Yoyarib er nai boda Zakaria. Sun aneng yumada Syeladi deipupa deipdanen yakarami neng. 6 Peresdi deipupa deipdanen baramidi Peres yala nesala pio weik Yerusalem mutu kurami. Anesala dengeda ake, 468 nesala puto weik balila nesala kurami.

7 Benyamin yala nesalada ake. Mesulam er mi Salu, Mesulam er nai boda Yoed, Yoed er nai boda Pedaya, Pedaya er nai boda Kolaya, Kolaya er nai boda Maseya, Maseya er nai boda Itel, Itel er nai boda Yesaya. Ukuprap neng kurami. 8 Tonda Gabai cap, Salai cap, sun yumada meneng damai apu dukdongopdana kurami. Anesala sun dengeda, pio weik 928 nesala talepra kurami. 9 Zikri er mi Yoelda amutu nesala talepra kuramu. Ton ngeboda Hasenua, er mi Yehuda cap, sun butene taleamrei.

10 – 11 Aneng ukupra taleramya neitamai di, Allah er ati neitamai pel don neng imamda, Yoyarib er mi Yedaya cap, Yakhin cap, tonda Hilkia er mi Seraya cap, Sadok er mi Mesulam cap, Ahitub er mi Merayot cap, sun yumada, ila neng kuramidi, Allah er upu ati neitamai talepra pel dorami. 12 Uda Allah upu ati pumbon neitamai talepra pel dorami neng imam-imam sun denge pio weik 822 neng kurami. Aneng sundi deipdanen yakarami nengda ake. Yeroam er mi Adaya erdi deipu ngebo Pelaya, Zakaria er mi Amzi cap, Malkia er mi Pasyur cap kurami.

13 Ange utopu, sun cap kikiman dukdongopdana kurami nengda, sun gungda pio weik 242 nesala kurami. Asareel er mi Amasai, tonda dordi deipupa deipdanen yakarami nengda Mesilemot er mi Azai, er nai bo Imer cap kurami. 14 Tonda podana cap, ‘Ange yuma ukupropkupe,’ tenena cap, ila balila di kurami nengda ake, 128 neng kurami. Sun deiyo talepra ‘Ukunkamepe,’ peramu ngebo, er sida Gedolim, er mi Sabdiel kuramu.

15 Allah er upu ati talepra, pel dona deiyo neng Lewi yala nengda ake. Hasub er mi Semaya. Hasub er nai boda Azrikam. Azrikam er nai boda Hasabya. Hasabya er nai boda, Buni kuramu. 16 Tonda, Sabetai cap, Yosabad cap, sun ukupra Lewi yala nesalada, sun ila mambul deiyo neng kepra, Allah er si eremna ati bura tara dinin, akati damai talepra, pel dona deiyo neng kuramrei. 17 Ukupra kuramidi, Mika er mi Matanya, ton Lewi yala ngebo kuramu. Asaf er mi Sabdi cap, sunda Allah tep kange deipra mut pena cap, Allah morona cap, deiyo neng kurami. Sun anengdi, ‘Ukunkamepe,’ pepnetopu kurami, Tonda amenda wepi ngebo, er si Bakbukyada, er kayapu Syamua er mi Abda cap, Yedutundi deiamu ngebo Galal cap, sunpu dukdongopra kikiman kurami.

18 Sun Lewi yala neng pio lengna mutu neitamaipu kurami neng dengeda pio weik 284 nesala kurami. 19 Ange utopu amutu ati bisi buplan dam kalengna neng denge pio weik 172 neng kalengami. Sun kalengami nengda, Akub cap, Talmon cap, sun kayapu neng yuma cap kalengami. 20 Israel nesala gung pio weik kuramitopu imam Lewi yala neng peda pio weika di kurami, cadi Yehuda tara mutu yuma peda, sun pe mutu sisapu kepra kurami.

21 Dinino, sun pel melipra dona tep, Allah upu ati neitamai kurami neng sun kuramyaida, Yerusalem mutu neitamaipu dinino acei tep er sida Ofel mutu peramyaipu, sun deiyo neng Siha cap, Gispa cap, talepra kuramreipa, aceipu wengbarami. 22 Allah upu ati neitamai talepra pel dona tep, Lewi yala neng, sun Yerusalem mutu Allah upu weknedi, geken taruda, mut pena tep bung-bung pena pen keca tep, ‘Ukupra penkamepe,’ pen neng sun sida ake. Bani er mi Uzi, erdi deipu ngeboda Hasabya. Aneitamai kurami neng sun apu yapuda, Mika er mi Matanya ada, Asafdi deiamu ngebo.

23 Sun anengdi talepra dorami pelda, ataru-ataru yuma Allah upu ati weknedi, mut pena tep bung-bung pena pen keca tep, ketenemderina cap, tonda nimi deiyo neng Raja tep, ‘Ukupra kunkameng kecada ace,’ pena cap kurami. 24 Ange utopu, Mesesabeel er mi Petahyada, Serah yala ngebo Yehuda er mi peda, nimi deiyo ngebo Raja, er damai melipra kuramudi, Israel nesala Persia mutu nimi deiyo ngebo bungnai iriamu tara kurami nesala yuma tep, upu peramu.

Yuk-yuk mutu dakurami nesala tep, pepu upu

25 Sun yuk-yuk kunkameng mutu yumada wa pen damaipu kunkamenge. Ware kuprap nesala do yuma, Yehuda yala mutu kunkameng nesalada, itara Kiriat Arba mutu cap, Dibon mutu cap, Yekabezel mutu cap, amutu yuma kunkamenge.
26 Ada, Yesua cap, Molada cap, Bet-Pelet cap,
27 Tonda, Hazar-Sual cap, Bersyeba cap, amutu neitamai di kure metek mutu yuma tepa.
28 Ziklag mutu cap, Mekona mutu cap, amutu neitamai kunge nesala yuma tepa.
29 En-Rimon cap, Sora mutu cap, Yarmut cap tepa.
30 Zanoah cap, Adulam cap, Azeka cap, Lakis cap, tonda Bersyeba mutu dinin, Hinom mutu damai daneitamai yuma kununge.

31 Benyamin yala neng kunge mutu neitamai dakunge nesala yumada, ware kuprap neng kunung do? Amutu neitamai kunung nengda ake. Geba cap, Mikmas cap kuramrei. Tonda, Ai mutu neng cap, Betel mutu dana-dana kunung metek ati arum yuma tepa.
32 Tonda, Anatot cap, Nob cap, Ananya cap,
33 Hazor Rama cap, Gitaim cap,
34 Hadid cap, Seboim cap, Nebalat cap,
35 Lod cap, Ono cap, ati don neng kunai capda, akonuma.

36 Lewi yala neng gungda, ware kupra kunung do? “Yehuda tara kapul kunge taru di Benyamin yala nesala kunge tara ton kunkamrume,” pepkamrume. Ada, Benyamin yala neng sun cap kikiman kunkamenga tepa.