Neh 12 | XteSC | STEP | Asekeipne ngeda, imam-imam neng cap, sun Lewi yala neng cap yumada, Babel mutu nengdi doupra baramipa dakuramyane, amenda taruda Sealtiel er mi Zerubabel cap, Yesua cap, sun pe kurami mutupu tamupra yai taruda, aneng cap kikiman yai. Sun sida ake. Seraya cap, Yeremia cap, Esra cap, sun yuma Yerusalem mutu tamupra yai.

Nehemiah 12

Imam-imam cap, Lewi yala neng cap, sekra deiaminge tep, pepu upu

1 Asekeipne ngeda, imam-imam neng cap, sun Lewi yala neng cap yumada, Babel mutu nengdi doupra baramipa dakuramyane, amenda taruda Sealtiel er mi Zerubabel cap, Yesua cap, sun pe kurami mutupu tamupra yai taruda, aneng cap kikiman yai. Sun sida ake. Seraya cap, Yeremia cap, Esra cap, sun yuma Yerusalem mutu tamupra yai. 2 – 3 – 4 – 5 – 6 – 7 Ange utopu aneng peda, kikiman tamupra yai. Sun sida, ake.
Ada, Amarya cap, Maluk cap, Hatus cap,
Sekanya cap, Rehum cap, Meremot cap,
Ido cap, Ginetoi cap, Abia cap,
Miyamin cap, Maaja cap, Bilga cap,
Semaya cap, Yoyarib cap, Yedaya cap,
Salu cap, Amok cap, Yedaya cap,
Hilkia cap, Yedaya cap, akonuma.

Sun aneng yumada, imam deiyo neng kurami ngeda, sun ila deiyo ngebo Yesua kuramu taru kurami neng tepa.

8 Allah er si eremna ati pumbon pel dona deiyo neng, sun melimami neng, Lewi yala neng sun Yerusalem mutu tamupra yai neng sida ake. Ada, Yesua cap, Binui cap, Kadmiel cap, Serebya cap, Yehuda cap, Matanya cap, kurami. Matanya cap, er kayapu neng capdi, Israel yala nesala yuk-yuk bupra wekmanaipu mut pepra embana deiyo neng kurami.

9 Mut perami taruda, ke taru tep sundi nimi yuk-yuk bupra wekmanaipu mut pepra melimami nengda sun si ake. Ada, Bakbukya cap, Unia cap, sun kayapu yuk neng yumadi ukupra kurami. 10 Imam-iman neng sun pel melimna tep, deiyo ngebo Yesuada, erdi deipu ngebo er sida Yoyakim kuramu. Yoyakimdi deipu ngeboda er sida, Elyasib kuramu. Elyasibdi deipu ngeboda, er si Yoyada kuramu.

11 Utopu tonda, Yoyadadi deipu ngeboda er sida, Yonatan kuramu. Yonatandi deipu ngeboda er sida, Yadua kuramu. 12 Deiyo ngebo Yoyakim kuramu taruda, Allah er si eremna ati pumbon pel dona deiyo neng, sun ati yuk-yuk kuramya deiyo neng sida ake. Ada, ila deiyo ngebo Yoyakim er pel dona damai talepra pel dorami neng, sun nyapsilip deiyo neng sida ake. Seraya er nyapsilip sun deiyo ngeboda Meraya kuramu.
Ada, Yeremia er nyapsilip sun deiyo ngeboda, Hananya kuramu.
13 Esra er nyapsilip sun deiyo ngeboda, Mesulam kuramu.
Amarya er nyapsilip sun deiyo ngeboda, Yohohan kuramu.
14 Meliku er nyapsilip sun deiyo ngeboda, Yonatan kuramu.
Sebanya er nyapsilip sun deiyo ngeboda, Meraya kuramu.
Seraya er nyapsilip sun deiyo ngeboda, Yusup kuramu.
15 Harim er nyapsilip sun deiyo ngeboda, Adna kuramu.
Merayot er nyapsilip sun deiyo ngeboda, Helkai kuramu.
16 Ido er nyapsilip sun deiyo ngeboda, Zakaria kuramu.
Gineton er nyapsilip sun deiyo ngeboda, Mesulam kuramu.
17 Abia er nyapsilip sun deiyo ngeboda, Zikri kuramu.
Minyamin cap, Moaja cap sun nyapsilip cap, sun deiyo ngeboda, Piltai kuramu.
18 Bilga er nyapsilip sun deiyo ngeboda, Syamua kuramu.
Syamua er nyapsilip sun deiyo ngeboda, Yonatan kuramu.
19 Yoyarib er nyapsilip sun deiyo ngeboda, Matnai kuramu.
Yedaya er nyapsilip sun deiyo ngeboda, Uzi kuramu.
20 Salu er nyapsilip sun deiyo ngeboda, Kalai kuramu.
Amok er nyapsilip sun deiyo ngeboda, Heber kuramu.
21 Hilkia er nyapsilip sun deiyo ngeboda, Hasabya kuramu.
Yedaya er nyapsilip sun deiyo ngeboda, Nataniel kuramu.

Imam pel dorami neng, sun nyapsilip yuma cap, Lewi yala nesala cap, sun si seki upu

22 Lewi yala nesala sun nyapsilip tep, deiyo keami neng cap, imam neng sun nyapsilip tep, deiyo keami neng cap, sun yuma nukra kael kemna tep si seki. Asi sengna gonga keami taruda, imam neng yuma, sun ila deiyo nengda ake. Ada, Elyasib cap, Yodaya cap, Yohanan cap, Yadua cap, sundi imam neng ila deiyo neng kepra talepya kurami taru di, si sengna pel peda gonga kepra si sekyakarami. Ukuramipane, Persia mutu kurami nesala yuma tep, Dariusdi nimi deiyo ngebo Raja kepra talepu. Ataleamu taru di, imam neng cap, Lewi yala nesala cap, si sengami ngeda, ataru di tapi.

23 Dinino, Lewidi deiamupa, dadeipdanen yakarami neng, er yala nesalada, sun nyapsilip yuma tep, gonga kepra talepyakarami neng sun si sekra deipyakarami ngeda, Elyasab er mi Yonatandi deiyo kepu taru di si sekra deipyakarami ngeda konum tapi.

Allah si eremna ati neitamai, pel dona tep, boki upu

24 Allah er si eremna ati, pel talepra donkaminge tep, deiyo kepi neng, sun sida ake. Asabya cap, Serebya cap, Yesua cap, Binuai cap, Kadmiel cap, sundi Lewi yala nesala, sun gung yuk-yuk tep deiyo kepi. Ataruda, sun yumadi, atumi-atumi gung butene-butene kepra deipi. Ada, Allah er si eremna ati neitamai, er upu gekena taru, mut pena tep, tenpu gung ton kepi. Tonda Allah tep, ‘Telepe,’ pepra, gispal dona tep, yuk gung ton kepi. Sun gung yuk-yuk kuramitopu kepra, aupu pepbanmai. Akepi ngeda, men taru Allah er pel doramu ngebo Raja Dauddi, ‘Angeda, ukunkamrume,’ pepra, deiamutopu kupi.

25 Allah er si eremna ati wengban bisi buplan dam kalengnada, sun dipapu Allah er si eremna ati pumbon neitamai wengban bisi buplan damai domi uku bulunga ati, ‘Neitamai deiami keca yuma tep, kalengkameng’ tenen, wepra deipi. Akati kalengna tep, gonga kemna neng sun sida, ake. Ada, Matanya cap, Bakbukya cap, Obaja cap, Mesulam cap, Talmon cap, tonda Akub cap, sun aneng yuma wepra deipi. 26 Sun anengda, Yozadakdi Yosua deipupa, erdi deiamu ngebo Yoyakhim cap, Nehemiadi Gubernur kepra amutu yuma taleamu taru cap, tonda Imam Ezrada, ‘Mali ngeda, ace, telep ngeda, ace’ tenen, lepsisikra upu bongdina deiyo ngebo kuramu taru cap, sundi nimi deiyo kepra taleamidi kurami.

Yerusalem mutu ukupu wipi gel beilya tep, Israel nesala yuma bupra deipudi, “Gispal dopkamepe,” pepu upu

27 Uda, “Yerusalem mutu ka tamupra wiramepu lyom gel beilya tep, kailya kalepra gispal dopkamepe,” pepra, Nehemiadi Lewi yala deiyo neng tep kongpepu. Tonda aupu pepu. “Sun Lewi yala neng yuk-yuk akumumtopu Yerusalem mutu bulupra yamumdi, sundi ‘Ukupkupe,’ pepra kupbamumtopu, sun yuk nesala yuma, angepu melipra kunkamenge. Ada, Allah tep kange deipra telepe pen mut pena tep, pen keca bung-bung pena, er sida gambus cap, kecapi cap doupmepedi, mut pepra gispal dopmepedi, embandankamepe,” pepra deipu.

28 Ange utopu, sun Allah er upu mut pena kael nesala ton kongpepupa, anengdi Yerusalem mutu di dipdongopra meneng damai mutu kurami nesala cap, Netofa mutu kurami nesala yuma cap bulupidi, Yerusalem mutu tamupra mut perami. 29 Tonda, Bet-Gilgal mutu cap, Geba mutu cap, Asmawet mutu cap yumadi, mut pena ila kael nesalada Yerusalem mutupu bulupra yai. Ada, Babel mutu di tamupra yai taruda, amutu-amutu neitamai, sun ati dopra kuramyai tep, amutu di tamupra Yerusalem mutu damai yai.

30 Pumun taruda, Allahdi sun imam neng tep upepu. “Ne si eremna ati pumbon wengbenkumum taruda, sun nong cap, sun talerum keca cap, akati pumbon pel donkamrum keca cap, ange-ange yuma telep kupra deiprumudi lengna nengpu kupmumyopda, ataru dipapu, nati wengna telepe. Ada akeca-keca yuma lek kemdina tep pepsene,” pepra deipu. Upepra deipka tep, sun imam-iman neng cap, Lewi yala nesala capda, ‘Allahdi peipseutopu kupkamep ja’ tenen, ketenepra deipidi, akeca cap, sun pe nong cap tep, telep kupra deipi.

Ange utopu, ‘Nun amutara nesala yuma peda, lengna nengpu kunkameng’ tenen, Allahdi ‘Ukunkamrume,’ peiamutopu telep pel doupra keteneipi. Ukupi dingeda, ila gel beilya wipmainge cap, abeilya buplan potokra deipmainge cap yuma peda, ‘Telep lengnapu kupkamre’ tenen, apelpu doupra keteneipi.

31 Ataruda, ne Nehemiadi ukupsi. Sun Yehuda tara deiyo neng tep ‘Ukupso,’ pepsipa alyom gel beilya deiki welepidi kwiryepu tekra keteneipi. Ukupi dingeda, agel beilya deiki tara amutu yuma ongomgenemaidi, embandanmai. Tonda, ‘Allah er gispal dona tep kange derin mut pepra embandankameng’ tenen, nimi denge weik butene keprap deipsipa, agel beilya deiki embanmai. Denge tenpu ngeda, ila lyom gel beilya deiki tara dumsisi tara di kwiryepu embanmaidi, domba bisam dei cap, sundi talepra peirami yuk yala keca dei cap dokoterban bisi buplan dam bei.

32 Ukupra embanmaya, sun amnyo tarada, yuk neng cap tapakra embanmai. Sun sida ake. Ada, Yudea tara deiyo ngebo er sida, Hosaya banmaupa, Yehuda yala nesala, sun nimi deiyo neng neitamai di bokra, gung ton embanmaidi, mut pepembanmai.

33 – 34 – 35 Ataru sun deiyo neng embanmaipa, amenda dukdongopra embanmai neng sun sida, Asarya cap, Esra cap, Mesulam cap, Yehuda cap, Benyamin cap, Semaya cap, Yeremia cap embanmai. Ange utopu, sun amnyo tara dukdongopra embanmai nengda, imam-iman neng ton, bung-bung pena er sida terompet, upu pepembanmai. Sun cap embanmai neng sida, Yonatan er mi Zakaria cap, Semayadi deipu mi cap, Matanyadi deipu mi cap, Mika deipu mi cap, Zakurdi deipu mi cap, Asafdi deipu mi cap, sun kayapu neng cap, kikiman embanmai.

36 Utopu, sun adi dukdongopra amenda tara tekra embanmai nengda ake. Semaya cap, Asareel cap, Milalai cap, Gilalai cap, Mahai cap, Nataniel cap, Yehuda cap, Hanani cap, embanmai. Sun aneng yumada, mut pen keca yala-yala yuma doupmaidi embanmai. Ada, pumun taru Allah er pel don ngebo Raja Dauddi, ‘Ukunkamrume,’ pepra deiamutopu kupra kunmai. Tonda Allahdi, “Ukunkamrume, angeda men kunkamrume,” pepra deiamu upu talepra sengamu ngebo, er sida Esra, erdi mepra banmaupa, sun anesala yuma er amnyo tara banmai. 37 Sun yuma embandanmaiyane, me bungna damai ban bisi dourbenapidi, Raja Daud er kuramu mutu damai bana tep, moropra deiami bisai dourbena beilya kwanepra wipdongomyai dourbena geneproidi, keteng yakan tara me bungna damai ban bisi buplan deiki tara bei.

38 Sun aneng yumada, apepmantopu embanmaidi, mut penmai dinin, nimi gung weik butene ngeda, tebalal tara embanmai. Ada, ne Nehemia cap, Israel nesala neitamai di bokra, gung weik ton cap, sun mut penmai neng mepra banmaipa, nunda sun amnyo tarapu embanmapu. Ila lyom gel beilya deiki tebalal tara di kepra embanmapkanen, roti dana tep ila lyom ati, er si menara pepra domi ngeda, kirikra ortara bepudi, pala gel beilya peraminge damai bepu.

39 Ukupra pio tep embandanapu kunmapudi, Efraim yala nesala sun bisi buplan banapmupudi, pumun taru domi bisi buplan damai dourbepudi, ikan buplan damai bepu. Adourbepudi, ila lyom keca er si, Menara Hananeel cap, tonda, Menara Seratus pepra domya damai dourbepudi, domba doupra, wengbarami bisi buplan damai bepu. Ukupmupu dingeda, nundi gonga kepra embanmapu deng yumada, Allah er si eremna ati wengban bisi buplan kalengna deiyo neng, sun ati damai apu bena deipmepu.

40 Adenge butene mut pepra embandanmapu nesala yumada, Allah Yahweh er si eremna ati damai abena deipra tekmepu. Ada ne cap yuk Israel yala nimi deiyo neng, neitamai di bokra kikiman embanmapu neng cap, acapu bulupmepu. 41 Aca bena deipmepu pangeda, sun imam-imam nengdi bung-bung pena, er si terompet upu pepra embanmai neng ton, acapu bulupmai. Sun sida ake. Elyakim cap, Maseya cap, Minyamin cap, Mika cap, Elyoenai cap, Zakaria cap, Hananya cap atekmai.

42 Ange utopu, sun amenda tara di dukdongopra embanmai neng peda, akati dam tekmupkaipu yana teki. Sun sida ake. Ada, Maseya cap, Semaya cap, Eleasar cap, Uzi cap, Yohanan cap, Malkia cap, Elam cap, Ezer cap, sun ukuprap nengda, akati dam bulupra tekmai. Sun mut pena kael nengda, mut pepra embanmai. Amut penmai taruda, ‘Ukupkurume,’ pena tep, sun deiyo ngeboda, Yisraya kuramu.

43 Israel nesala, sun deiyo ngebo Gubenur Nehemiadi gonga kepupa, ila kota Yerusalem dan-dana yuma, ila lyom gel beilya wipmainge tep, gel yakra deipdanen baramidi, ongopgenepra wiamyane, apel konum dopra sengpepidi, gawal dakyopda, kange deipra ila di gudinmai. Tonda, sun ila nimi deiyo neng yala-yala yuma cap, Allah er si eremna ati pum pel dona deiyo neng, sun imam neng cap, tonda sun amutara pel melimna neng, Lewi yala neng cap, Allah mut perami neng cap, pio weika di gudinmaidi, mut penmai.

Tonda, ‘Nun nai bo Allah, weika di meliamseua deiki di, kota Yerusalem dan-dana gel beilya wina tep, gel yakra deipdanen deipbaramepudi, ongopgenepra wiamepu lyom beilya konum gawal dakmapa tep, kange deipmepe’ tenen, pingpinga di kunmai.

Atep nengeda, Allah er gispal dona tep, gam keca weika di poprapidi, er tep karepidi, ila di kange deipi. Sun Israel yala nesala yuma, nimi pe, nerapu pe, sun nyapu pe, sun ner nyapu yuma peda, kange deipidi pingpinga di kunmai. Kota Yerusalem neitamai di gudinmaidi, lelim weik penmaipa, sun karen mutu orkunmai nengdi gekenmai.

44 Uda, ataruda sun Israel nesala yumadi, Allah er gispal dona tep kareryakarami kecada, weik kuramnga cadi, akeca derin ati kalengna deiyo neng ton, wepra deipi. Ada, sun Israel nesaladi wa pepra kourami keca, menmena taru bongopra nong kuramunge cap, sun peirami keca weninge menmena deriraminge cap, tonda, ‘Nun nai bo Allah tep, telepe pepkup’ tenen, kareryakarami keca cap, Allah er gispal dona tep, akati deriryakaramipa, anengdi dororamidi, akati deipnedi kalengami. Ange ukurami ngeda, ake. Sun kurami mutu dana-dana yuma, wa pepra kourami keca konum du mouramupa, weni keca kirami ngeda, Allah er gispal dona tep kareryakarami.

Ukurami ngeda, ada Allahdi er mem upu peiamnga neitamai di, ‘Ne si eremna ati pum pel dona deiyo neng cap, sun amutara pel melimna neng, Lewi yala neng cap, sun putan keca melimna tep, akeca-keca yuma akan-kan neitamai di bokra, duyamumdi karenkamrume,’ pepra deipu.

Atep, Allahdi peiamutopu kareryakarami. Sun Yehuda tara kurami neng yumadi, Allah er si eremna ati pum pel dona deiyo neng, sun imam neng cap, tonda sun pel melimna neng, Lewi yala neng cap tep, kange deipidi, bicau teneramya tep, Allahdi peiamutopu, sun keca yala-yala yuma dangolbari di dipra utara keteneipnopda, neitamai di bokra tenpunge doupra, Allah tep kareryakarami. Ada seper sepuluh peramengenge, bokra kareryakarami.

45 Allah er si eremna ati pum pel dona deiyo neng, sun imam neng cap, sun amutara pel melimna neng, Lewi yala neng capdi, Allah er si eremna ati pel telep kupra dorami. Tonda, ‘Israel nesaladi Allah er damai yatenge’ tenen, sun mali kurami keca daemna tep, Allahdi, ‘Ukunkamrume,’ peiputopu, apel ton doramya deiki di, Israel nesala tep kange di ton cap telep kudirami. Ange utopu, sun Allah mut perami neng cap, kota Yerusalem dan-dana wiami beilya buplan potokeiamyai kalengna deiyo neng cap, sun pel peda telep kupra dorami. Aneng-aneng pel dorami ngeda, ada pumun taru Allahdi peiamupa, Raja Daud cap, er mi Salomo capdi, “Ukupra kunkamrume,” peamreitopu apel dorami.

46 Pumun taruda, Israel nesala taleamu nimi deiyo ngebo, Raja Daud cap, tonda yuk ngebo Asaf cap kuramrei taru neitamaida, Allah mut pena tep, gonga kemna deiyo neng ton wepra derirami. Adeiyo nengdi, sun Allah mut perami neng tep, ‘Allah mut pena tep, ukupra-ukupra penkamrume,’ pepra deriramipa, Allah mut perami. Ada Allah tep, ‘Uo kanda pio mambul ngebo kuruma cadi, kan tep telepe pepkepe,’ pena tep, Allah mut perami. Pumun taru, ‘Ukupra kunkamrume,’ pepra, deiami upu tupa kuapka cadi, ataru peda aupu peramitopu tupa kurami.

47 Tupa kuramya tep, Gubenur Nehemia cap, tonda Zerubabel cap, kuramrei taru peda, sun Israel nesala yumadi, tumi-tumi yuma, sun taleami keca neitamai di bokra, sun Allah mut pena neng cap, Yerusalem mutu dan-dana wiami beilya buplan domipa, abuplan kalengna neng cap tep, akeca-keca yuma duyana karerami.

Ange utopu, sun Lewi yala neng putan keca makuna tep, sun Israel nesaladi, sun taleami keca neitamai di bokra kareryakarami. Konum karepne pangeda, sun Lewi yala deiyo nengdi, akeca bokrapidi, Harundi deiamupa, dadeipdanen yakarami neng tep karerami. Ada, Allah er si eremna ati pum pel dona deiyo neng, sun makuna tep karerami.

Apel-apel yumada, Allahdi, “Angeda kunkamrume, angeda men kunkamrume,” peiamutopu kurami.