Nehemiah 13

Israel nesala yuma tamupra, Yerusalem mutu yakarami taruda, sun deiyo ngebo Gubenur Nehemiadi kuramu keca tep, pepu upu

1Allah er gispal dona tep, Israel nesala denge weik bulupra Yerusalem mutu yai tumida, sun deiyo ngebo Nehemiadi, “Ukupkurume,” peipupa, Allahdi peiamu upu nungmaipa, anesala yuma gekenmai. Ada, Allahdi, “Ange ukunkamrume, angeda pio men kunkamrume,” pepra lap peipupa, Musadi sekeiamu upu, nungmaipa awekmai nesala yuma wekra gekenmai. Allah upu gekenmai taruda, Allah upu neitamai sekeiamunge ton gekepra kael kepi. Ada, Allahdi upeiamu.

“Moab yala nesala cap, Amon yala nesala cap, sun abutene yala nesala yumada, tumi-tumi yuma sun Israel yala nesala cap, kikiman dukdongopra pio men kunkamrume. Sun Israel yala nesala kunkamrum mutu yumada, abutene yala nesala ton, sun damai yana wengna pio meme,” Allahdi peiamseu, pepra, angeda Allah upu buku neitamai di nukipa, gekepra kael kepi.

2“Abutene yala nesala cap, kikiman pio men kunkamenge,” pepka deiyoda, Israel nesala Mesir mutu di sakotepra, bisi yakarami taruda, jen keca cap, me cap, putaramunge ton, sun abutene kurami yala nesaladi jen keca cap, me cap, Israel nesala tep ton pio men karerami. Men kareramitopu amutu taleamu ngebo Balakdi, ‘Israel nesala mali kweipkamne’ tenen, tenpu ngebo er sida Bileam kongpepupa, yau. Yaupa, amutu deiyo ngebodi upepu. “Kandi Israel yala nesala mali kudina tep, sun deiki mali upu peipmempa, Allahdi anesala wipdongopkamre,” pepra moropu.

Utenepra moropu dinino, nun nai bo Allahdi Bileam tep, telep upupu karepupa, Bileamdi telep upupu Israel nesala deiki pepra deipu. Ukupka deiki di, amutu taleamu ngebo Balakdi, ‘Israel nesala wipdongoptene,’ teneamu ngeda, gum kupra deipudi, Israel nesala tep telep keca weik kareramu.

3Ange tep nengeda, Allah upu buku nungmai taruda, sun Israel nesala yumadi aupu gekepidi, adipapu Allahdi, “Ayala butene yala nesala cap kikiman pio men kunkamrume,” pepra deiamutopu, “Ataru peda angepu kupkupe,” pepra deipi. Atep, atumi dipapu, sun yuk mutu yala nesala yala-yala yuma cap, yuk yala nesaladi deiami nyapu yuma capda, dopra sun Israel yala nesala kan-kan neitamai di dopra, yukai dokotepi. Ukupidi, sun cap, yuk yala nesala cap kikiman pio men kurami.

Imam Elyasibdi, mali keca kuramunge tep, Gubernur Nehemiadi Elyasib mali kupunge tep, pepu upu

4Menmena taru di imam Elyasibda, Allah er si eremna ati pumbon wilipra domi ati, bunga keca derirami ati tep, Israel nesaladi, “Akati kalengna deiyo ngebo kunkamserume,” pepra wepra deipi. Ukupi dinino, imam Elyasibdi nimi ton er si Tobia, sun yala tenpu cadi, Elyasibdi Tobia tep, ‘Ne kabo,’ teneamnga cadi, sun butene kikiman dukdongopra upu peramrei. 5Tobia cap dukdongopra kuramreiya cadi, Elyasibdi ila kamar ati ton Tobia tep karepu. Ada menop taru di, ‘Akatida Allah tep karenkameng keca bulupra derinkameng’ tenen, ketenepra deiami. Atep, Allah er ati pumbon neitamai pel don keca cap, Allah tep karerami gandum cap, nintong telep keca er sida kemenyan cap derina tep, akati ketenepra deiami.

Tonda, ‘Lewi yala neng tep karenkamep’ tenen, persepuluhan keca gandum cap, anggur tapu du mokon cap, zaitun co du mokon cap, bulupra akati deriami. Tonda, akeca neitamai di bokra, sun bung-bung pena pen keca talepra mut pena deiyo neng cap, Allah er ati pumbon ban bisi buplan damai kalengna deiyo neng cap, sun yuk imam-imam neng cap tep, akeca bokra karerami. Ukuramya tep, akeca-keca yuma dopra derinai tep akati ketenepra derirami. Dinino, Elyasibdi er kabo Tobia tep, akati karepu.

6Ange ukupu pangeda, ataru ne Nehemiada Yerusalem mutu ton pio men kuramsi. Neda Babel mutu neitamai ila nimi deiyo ngebo Artasasta talepra kuramu taru, keteng tamun denge pio weik 32 konum kupupa, neda Babel mutu tamupra benmasi. Babel mutu deiyo ngebo Artasasta er damai lap perbenamsi taru, Elyasibdi mali kupu ngeda, ne ton men gekepsa cadi, men kael keamsi. Nedi Artasasta tep, “Naio, ukuda ne pe mutu ka tamupra betene do?” pepra moropsidi, dakuramsanen, ila deiyo ngebo Artasasta erdi “Telepe kan pe mutu tamupra benkurume,” pepneuopda, Babel mutu tapra, Yerusalem mutu tamupra yasi.

7“Yerusalem mutu tamupra benkamne,” pepra moropsipa, erdi, “Telepe,” pepneuopda, yakaramsanen, Yerusalem mutu yasi. Yasidi yana dinmasipa, imam Elyasibdi er kabo Tobia tep, tenpu atida Allah er si eremna ati pumbon wilipra domi ati ton kareamupa, ange kael kepsidi ne lukdasi.

8Nedi Elyasib cap, Tobia cap tep yu weik kupneupa ila di derepsidi, Tobia tep, “Kan keca yuma doupra bendopo,” peprapsidi, er keca yuma dopra bura dokotepsi. 9Ukupsi dingeda, nedi, “Akati ka tamupra telep kudina tep, ukupkupe,” pepsipa, akati pumbon yuma me kuprapmepudi, kange di ton cap telep kupra deipmepu. Ukupmepu dingeda, Allah er ati bo neitamai pel don keca nedi duyanmasinge yumada, angepu kange di ton cap dopra, akati neitamai deipmepu. Tonda, nintong telep keca er si kemenyan cap, Allah karena tep gandum cap, derinai tep akati kange di ton cap telep kupra keteneipmepu.

10Tonda sun amutu kurami nesaladi Allah er si eremna ati pumbon melipra pel don neng, sun Lewi yala nesala karena tep, deriryakan keca weika di men deriryakaramipa, aneng yuma Yerusalem mutu taprapidi, sun wa pena tep sun pe mutu tamupra yuk-yuk dabenami. Ange utopu, Allah er upu mut pena kael neng tep, Israel nesaladi sun tep makupra men kareramipa, aneng peda Yerusalem mutu taprapidi, sun wa pena tep, sun pe mutu yuk-yuk tamupra dabenami.

11Ange yuma gekepra kael kepsidi, ne mali kange doupsidi amutu neitamai talepra ‘Ukupkupe,’ pena deiyo neng tep derepsidi upepsi. “Sunda ware keca deiyo tep Allah Yahweh er si eremna ati pel melimna neng tep karenup keca, ware keca deiyo tep taprum do?” pepra derepsi. Upepra derepsidi, Lewi yala neng cap, mut pena deiyo nesala cap tep, “Tamupra yakaso,” pepsipa, tamupra yaiopda bulupra deipsidi, “Sun men di yuk-yuk talepra pel doramrumtopu, apel talepra donkamrume,” pepra karepsi.

12Apel konum karepsi pangeda, Yehuda tara kurami nesala yumadi, Allah er karena tep persepuluhan keca kange di ton cap dukdongopra kareryakarami. Ada gandum cap, anggur tapu du mokon cap, zaitun co du mokon cap, doupra yanpa, akeca dopra derin ati talena deiyo ngebo damai deriryakaramipa, erdi akeca dopra adeirin ati pumbon dongoramu.

13Akeca derin ati pumbon neitamai kungedi, ‘Akeca yuma moupra kalengkameng’ tenen, nedi nimi yuk neng ton apel dona tep wepra deipsi. Nedi awepra deipsi nengda, imam Selemya cap, Allahdi peiamu upu sengna ila kael ngebo er si Sadok cap, tonda Lewi yala ngebo tenpu er si Pedaya cap, wepra deipsi. Aneng sun amutara pel dona tep, Matanyadi deipu ngebo Zakur er mi Hanan wepra deipsi. ‘Sun aneng melipra pel donkameng’ tenen, wepra deipsa deiyoda ake.

Ada, aneng-aneng yumada, pio dumsisi kun kecapu talepra teleppu kuramipa, amutu nesala yumadi, sun aneng tep, “Sunda telep nengpu kununge,” pepra gispal dorami. Atep nengeda, aneng wepra deipsi. Aneng wepra deipsidi upepsi. “Sunda Israel nesala yumadi, Allah er karena tep, akeca-keca yuma duyakaramengepa, sundi akeca dopra Allah tep karenkamrume. Tonda, Allah er si eremna ati pumbon pel melimna neng, sun Lewi yala neng tep, yambulanun ton bokra aneng tep karenkamrume,” pepra deipsipa, apel talepra dorami.

14Apel-apel yuma doramsinge yuma tep nengeda, ne nai Allah tep upepsi. “Teka ne nai Allah, kandi teneramnemumtopu, tenpunge peda men tapsidi, ‘Kan ati neitamai pel donkameng’ tenen, wepra deipman neng cap, sundi talepra donkameng pel yuma cap, kan ati lepsisikra doramsi pel cap tep, Israel nesaladi kan si eremna tep, ‘Ukunkamrume, ukunkamrume,’ pepra lap peramsinge cap, ange yuma tep, ‘Kandi ne tep bicau tenepra melimkamnerum’ tenen, moropkene,” pepsi.

15Ataru neitamaida nedi dinmasipa, Sabat tumi deiki di ware kuprap neng do, Yehuda yala nesala weika di, anggur tapu du me puruprapidi pel donmaipa epsi. Allahdi, “Sabat tumi deikida, pel tenpunge peda ton pio men donkamrume,” pepra deiamseu dinin, anesaladi aupu yanitamnapu kurami. Ton yuk nesalada, gandum cap, anggur tapu du cap, ara co du cap, yuk yala keca yuma cap dopra, keledai bisam bali deiki kipra deipnedi, Sabat tumi deiki di Yerusalem mutu duyakanmai. Ukunmaipa nedi dinmasidi, “Sabat tumi deikida, warya tep akecada kunumyakanmarum do?” pepra wenemamsi.

16Ange utopu, Tirus mutu neng ton sun meneng Yerusalem mutu neitamai akurami nengdi, mekina cap, tonda yuk-yuk yala keca cap, sun talepra kurami keca yumada, Sabat tumi deiki di doupra yakanmai. Ada, ‘Yudea tara kunge nesala sundi kunumkamseng’ tenen, duyakarami. 17Ukunmaiya tep, nedi, ‘Ware keca deiyo tep Sabat tumi deiki di pel dopra kunmang do?’ tenen, Yudea tara talepra kurami ila nimi deiyo neng tep yu kupneupa, “Ware keca deiyo tep mali kunmarum do?” penmasi. “Sun anesala ukunmaruma deiki di pio mali-mali weik kunmarumdi, Sabat tumi yanipra mali kweipmarume,” penmasi.

18“Ware keca deiyo tep mali kunmarum do? Sundi amali kunmarumtopu, pumun taru nun apu yapudi mali kuramipa, ‘Allahdi nun apu yapu yuma popra gawal dangamutopu, nun peda utopu wenepsetudi ikin deipsetu’ tenen, kunmarum do? ‘Allahdi nun ton cap tapakra popsetu,’ tenepra, sun Israel nesaladi, Sabat tumi deiki mali kupra derinmarum do?” pepra deremamsi.

19Ange tep nengeda, Sabat tumi dortara kupbankaminge yuma tep, atumi di gonga kepra penmasi. “Yerusalem mutu neitamai ongopgenepra wiamepudi potokeipmepu bisi buplanda, ton pio men pangtamkamrume. Ada pamu tumi ipkamarya tep, kapul ipbanmare taruda, adipapu buplan dekra sengpenkamrume. Ukupra dekdongopmamumtopu kupmarepane, ngantan tumi kembankamre. Ngantan tumi ipkamarya tep, kapul ipbanmare taru di, abuplan yumada, adipapu dengpenkamrume,” pepsi.

Upepsi dingeda, ne nyapu ton dopra, ‘Abisi buplan damai yuma talepra kalengkameng’ tenen, wepra deipsipa, kalengmai. Ada, ‘Yuk mutu neng ton sun bung keca talepra kunumyakaramenge nengdi, pamu tumi idona taru di dipra, Sabat tumi neitamai yuma, abisi buplan wekra amutu bunga keca kunumyakanung’ tenen, kupsi.

20“Ukunkamepe,” pepra deipsi upuda, sun yuk mutu di kunumyakarami nengda men gekepmaiya cadi, Sabat tumi deiki di Yerusalem mutu wengban bisi buplan damai yaidi, ‘Wekup’ tenen, piripetepmaidi, buplan dekmupka tep, men wekmanto kupmaiya cadi, agel beilya wiamupka bura tara mapra kunmai. Ange utopu ware kuprap tumi do, yana piripetepidi, men kupmanto kupupa, bura tarapu yana kurami.

21Ukurami pangeda, nedi aneng tep aupu ton pepra wenepsi. “Sunda tali kange doupra kunmarum do? Ware deiyo keca tep, nun lyom gel beilya pirmanai marum do? Sabat tumi deiki di amutu neitamai kunum yakana tep, abisi buplan wekra men yatume. Ayana kalengmarumtopu kange di ton cap ange utopu kupmum pangeda, ne puto di wenepkamsene. Ukupsenedi, ateng koupra wenemna ati pumbon dongopkamsene,” pepsi. Upepsipa, aupu gekepi tumi di, dipdongopra dor Sabat tumi deiki yumada, kange di nun mutu neitamai tamupra men kunumyakarami.

22Tonda nedi sun Lewi yala neng tep upepsi. “Sunda abuplan damai kalengkamrum taruda, sun nong cap, sun opkal cap yuma, me kunkamrume. Tonda, Allahdi, ‘Sun nong telep kudina tep, apel donkamrume,’ pepra deiamseutopu, apelpu talepra donkamrume. Ukupmumnyopda, ka tamupra yamumdi, abuplan damai yuma kalengmamumpane, Sabat tumi damai kupyopda, pio teleppu kunkamsere. Atep atumi deikida, ketenepra deipmamumnyadi, Allah er sipu eremkamepe. Yuk pel ton pio men donkamepe,” pepsi.

Upepsinge tep, nedi Allah tep moropsi. “Uo, ne nai Allah, nedi, ‘Sabat tumi tupa-tupa teleppu kunkamser’ tenen, anesaladi mali kuraminge yuma tep, gum kupra deipsi ngeda, men lumdongonkamrume. Akupsi ngeda, kan tenepnememdi ne tep, ila di bicau tenepra melimkamnerume,” pepra moropsi.

23Atarupu nedi dinmasipa, Yahudi yala neng weika di yuk mutu si, Asdod mutu nerapu cap, Amon mutu nerapu cap, Moab mutu nerapu cap, dodaranmaipa epsi. Allahdi, “Yuk mutu nerapu cap men dodankamrume. Israel yala nerapupu dodankamrume,” peiamseu dinin, aupu yaniptapidi, yuk mutu nerapu doraminge cap, tupa donmainge cap, dinmasi. 24Yahudi yala nengdi, yuk mutu nerapu dodaramya deiki di, anerapu yumada, sun pe upupu peteremamipa, sun derirami nyapu yuma aupupu kael kemami. Atep nengeda, Yahudi yala nyapu kurami dinin, neitamai di bokra ton tara nyapuda, yuk mutu upupu kael kemami. Ada Asdod mutu upu cap, tonda yuk-yuk mutu upu yuma cap kael kemami. Israel nesala perami upu ton kael kepra men perami. Yudea tara neitamai peramepu upuda, telep kupra men perami.

25Ukuramipa, nedi sun anesala yuma tep wenepra wipdongopsi. Ukupsidi ton tara nengda balena di popsi. Ton tara nengda sun giso potong lyekra tapsi. Ukupsopda, nedi tamupra pepsi, “Sunda tek sisi Allah er si deiki di pedina upu pepkurume. ‘Nun ner nyapu doupra, sun yuk mutu neng tep ton men karenkamepe. Utopu, nun nyapu sun ner dona tep, yuk mutu nerapu ton doupra men kareryakankamepe. Nun peda, yuk mutu nerapu ton, pio men dorbankamepe,’ pepra pedina upu deiki di pepkurume,” pepsi.

26Nedi aupu ton cap dukdongopra pepsi. “Amali kunmarum kecada, pumun taru nun Israel nesala, nun ila nimi deiyo ngebo Raja Salomodi mali weik kuramnga tep, Allahdi er tep wenepu. Salomodi kuramutopu, sun peda yuk mutu nerapu dopdarumudi, tali lupra kunkamrum do? Salomoda pio ila kael kemna cap, ila isomka kemna cap ngebo kuramupa, Allahdi bicau tenepra kange deriramudi, nimi deiyo ngebo erepra deiamupa, Israel yala nesala yuma taleramu.

Yuk mutu ila nimi deiyo nengda, Salomo er telep kuramutopu, yuk mutu nimi deiyo neng yumada utopu ton pio men kurami. Dinino, Raja Salomodi, yuk mutu nerapu weika di doramnga deiki di, pio mali weik kuramu. Ada Raja Salomo kuramu taruda, yuk mutu nerapu pio weika di namdoramnga deiki di, sun anerapu talerami kecapu er peda taleramudi mali kuramu.

27Ange yumada, sun konum lupronmarum do? Tek sisi sun balila deipra mali kunmaruma deiki di, Allah tep bisirterenmarumdi mali pio weik kurume. Ada sundi yuk bura tara nerapu cap dodamumnya deiki di mali kunmarum ngeda, nun gekena dabale! Allahdi ‘Ukuna meme,’ peiamseu upu yaniptaprumdi pio mali kunmarume,” pepra, aneng tep wenepsi. 28Tonda, imam ila deiyo ngebo Elyasib er mi Yoyadadi, Horon mutu ngebo er si Sanbalatdi deipu ner mi dopka cadi, nedi Yoyada tep upepsi. “Kanda, Yerusalem mutu neitamaida pio men kunkamrume,” pepra wenepsidi, Yoyada dopra, Yerusalem mutu neitamai di bura tara dokotepsi.

29Atep nengeda, nedi Allah tep upepra moropsi. “Uo, ne nai Allah kandi, ‘Anengda imam kunkameng’ tenen, wepra deiamumpane, sun anengdi kan si cap, kan si eremna ati pumbon mambul pel cap tep, yanipra mali kudinunge. Tonda, kandi, sun imam-imam neng cap, Lewi yala neng cap tep, ‘Angeda kunkamrume, angeda men kunkamrume,’ pepra deiamsemum upuda, sundi tupa yaninunge. Atep, sundi mali kunge ngeda, kandi tupa tenememdi, aneng tep wenemkamrume,” pepra moropsi.

30Ukupra Israel nesala cap, bura tara nesala cap, sundi tenpu wisipra kuramidi, mali-mali weik kudidaraminge yuma wepra dopropsi. Tonda, sun imam neng cap, Lewi yala neng capdi, yuk mutu keca dopra taleraminge yumada, dopropsidi, gum kupra deipsi. Ukupsi dingeda, Allahdi, ‘Aneng telep kudina tep, apel donkamrume,’ pepra deiamseutopu, apel dopsipa sun yuma kange di ton telep kupra deipsi. Apel yuma dopra sengpepsi dingeda, sun imam neng cap, sun Lewi yala neng cap tep, Allahdi ‘Ukunkamrume,’ pepra deiamutopu, ‘Sun yuk-yuk talepra pel donkameng’ tenen, pel dona deiyo keca yuk-yuk bokra karepsi.

31Nedi, “Ukupra kunkamrume,” pepra deiamsinge yuma konum keteneipsi dingeda, ‘Sundi apel donkamep, tenepmenge tarupu donkameng’ tenen, keteneipsi. Ada, ‘Amutu kunkameng nesaladi, Allah er karena tep, sun talepra kunge gam kun keca yuma deriyakangepa, uku dongonkameng’ tenen, nedi uku dongon co yuma konum ketenepra deipsi.

Tonda, ‘Amutu nesaladi sun keca weninge yuma doupra duyangedi, sun imam neng tep karepmengepa, Allah er gispal dona tep uku dongonkameng’ tenen, nedi ‘Ukunkamrume,’ pen upu yuma pepra deriramsi. Ada sun pel donkaminge ketenemna tep ukuramsi.

Ukupra pel doramsinge yuma tep Allah moropsidi, “Ne nai Allah ne kupmasinge tep kandi men lupronkamnerume. Pio tenenkamnerume. Ukupra tupa tenenememdi, ne tepapu bicau tenepra ne damai akumemdi, telep kupra melimkamnerume,” pepra moropsi.

Ne Gubernur Nehemiadi pepne. Akonuma.