Nehemiah 2

Persia tara Raja Aratasastadi, Nehemia weipudi, ‘Yerusalem mutu benkamre’ tenen, dokotepu upu

1Ne Nehemiada, Persia mutu ila nimi deiyo ngebo Artasasta, er anggur me jen taru, me mau moupra duyakaramsi ngebo kuramsa tep, aRaja ngebodi, Persia tara talepra kuramu taru, keteng tamun dua puluh tahun neitamaida, er damai perbesi. Ada, er melimna nengdi, ‘Anggur me jepkor’ tenen, er anggur jen me duyai pangeda, ame mau dopropsidi, Raja ngebo damai bena karepsi. Yuk taru, er damai baramsi taru yumada, pingping kuramsi dinin, atumida, dabal kange doupra pingping men kupmaneupapu, er damai besipa epneu. Epneudi, asipetepneu.

2Dabal kange doupsipa erdi ne tep pepneu. “Kao, kanda ware keca tep urasin dabal kange doupmarem do? Pu men jenmaker dinin, ware keca deiyo tep, kan urasin yuk kupmaker do? Ne kangeda, kan dipru neitamaida ikin kupkere,” pepneu. Upepneua tep, ne kwar kupneu.

3Kware kupneu dinin, nedi tamupra Raja tep pepsi. “Naio, ne putapner ngeda, kanda pio tep gam kunkamreme. Ne ikin kupnere ngeda, ne nai yapu deramipa, tu palipra peirami mutu cap, akati arum dominge cap, yu nengdi dakra uruptamitopu, tupa mali kurure. Tonda, akati bura tara sun bisi wengbarami beilya buplanda, dakra uku dongopipa uku jepropu. Ange yuma mali kupmara tep, ne mambul kange doupne,” pepsi. 4Upepsipa, Raja ngebodi, ne tep tamupra pepneu. “Kanda ware kupkamne tenepmaremdi do?” pepra asipetepneu. Ila nimi deiyo ngebodi asipneu pangeda, ne dipru neitamai di, Allah ban-ban yuma talepra im deiki tara kurur ngebo tep moropsi.

5Moropsidi, Raja ngebo tep upepsi. “Naio, kandi ne tep bicau tenepnememdi, ‘Angebo telep ngebo,’ tenepnetum dingeda, kandi pepnemempa, ne Yudea tara neitamai benedi, ne co puna neng peindam mutu dipeteptenedi, amutu domi ati arum ka di ton cap betapra dopkamne. Atep, ‘Telepe,’ tenepnememdi, ‘Dabeo,’ pepnememnyopda tamupra bendopkamne,” pepsi.

6Upepsipa, nimi deiyo ngebo cap, er ner cap kikiman bukmareiai di, Rajadi tamupra pepneu. “Kanda ne damai tupa pel doneruma cadi, bisida ware kuprap marbenkamrem do? Ukuamemyane, wareto taru tamupra yankamrem do?” Upepra sisikdanemu taruda, Raja ngebodi, ‘Telepe dabenkamrume,’ pepneua tep, nedi, “Ne benkunkamne taru ace, ukuprap taru damapmanyanen, ataru tamupra yankamne,” pepsi.

7Upepsi dingeda, ne deiyo ngebo Raja tep aupu ton pepsi. “Naio ‘Telep kupra dabenkure,’ tenepnemem dingeda, kandi surat ton sekra karepnetumpa, ortara mutu talenge nimi deiyo neng, Gubenur neng tep kareptene. Ada, ortara mutu, Efrat me damai dinin, ame goupra ortara talenge neng karepnepa, sundi, ‘Telepe dayarure,’ pepnenge pangeda, sun mutu neitamai kunge nengdi men popetepkamnenge. Telep dipu benedi, Yudea mutu bena kunkamne,” pepsi.

8Upepsidi aupu ton pepsi. “Tonda amutu co palpal talepra kure ngebo, er si Asaf tep surat ton karepnetumtoda, asurat doupra er tep karepnyopda, erdi ila co kwepra karepnetue. Ukupmempa erdi co karepnerepa, doprapnedi Yerusalem neitamai ati lepsisikra dopkamne. Ada, amutu neitamai gel ati domipa nimi podan neng men wekmanto ati, akati bura tara beilya buplan betaipkamne.

Akatida Allah tep karerbarameng ati, er si eremna ati damai kure mambul ati betaipkamne pepne. Tonda ne kun ati betapra dopkamne,” pepra moropsi. Moropsipa, tek sisi Allahdi melipneua deiki di, Raja ngebodi, ne moropsi keca yuma gekepneudi, ange yuma tep, “Telepe,” pepneudi akeca yuma karepneue.

9Asurat karepneupa, nedi asurat sekeipmaunge doupra, Efrat me goupra keteng wengbaramre tara, ortara taleami nimi deiyo neng, Gubenur neng damai duyasi. Sun damai besi taruda, Raja ngebodi peipupa, er jen deiyo neng cap, sun amutara jen neng dinin, kuda bisam bali deiki bukra embarami neng cap, ne cap kikiman bemepu. Deiyoda, sun deiyo ngebo Rajadi, “Er melipkurume,” pepupa melipnei.

10Dinino, Horon mutu ngebo er si Sanbalat cap, tonda Amon mutu jen talena deiyo ngebo, er sida Tobia cap, sun ange gekepreidi kange mun kange doupreidi, ‘Er yanmara deiki di, nun mutu keca yuma yan arapkusenga tep, yanmare. Ware deiyo tep, ‘Sun Israel nesala putaramre keca melipkamep’ tenen, yanmang do? Angeda nun songe,’ teneprei.

Nehemiadi, “Kota Yerusalem ati arum ongomgenepra, lyom gel beilya wina tep, gel yakra deipdanen banai wipkamepe,” pepu upu

11Nehemiadi upepu. Ne adipapu Yerusalem mutu besidi, komuni weneri deiki di tali mapsi. 12Uwe weneri tumi konum kupkopda, atumi lukunda men mapsi. Ne cap, ne nyapu ware kuprap neng do, ton melipneipa, nun tonpa dirbemepu. Nedi yuk neng tep ‘Neda, Yerusalem ati dirbenkune. Dirbenedi epnyopda ka di tamupra abeilya ka di ton cap winkamepe. Akati-akati yuma ton lepsisikra donkamepe,’ men pepsi. Allahdi ne dipru neitam peamneupa, teneamsitopu kupsi. Ukupsi taruda, yuk kuda bisam ton ne damai pio men yanmai. Dinino, ne bukmasipa doupra embanmaneu kuda bisampu nun tonpa embanmanumu.

13Alukundada keteng dangban tara potokami buplan, ada Me Gisoi banai wekra benmasi di, tonda buplan damai me bungna si Naga, atara benmasane, tonda mali keca yuma donongbana tep buplan potokami buplan damai bisi besi. Ada Yerusalem lyom beilya wiamipa daka sakramupa, abeilya buplan dakra uku dongoproaminge yuma tep dirbenmasi. Tonda buplan yuma daktapra uku dongopinge yuma tep bena dipetepsidi kael kepsi. 14Ne adipapu keteng yakan tara me bungna damai ban bisi buplan cap, nimi deiyo neng me gengna tep Kolam Raja ban bisi cap, bena dipetepsi. Acada buplan damai besi dinin, ne welepra benmasi kuda bisam ton, aca men benmantoai cadi, atara men epsi.

15Ukupsi atep, alukundapu me deiki tara weleprapsidi, Yerusalem lyom gel doupra gel yakra deipdi, beilya dopra wiamya kamo tep, bena betapra epsi dingeda, tamuprapsidi ka tamupra keteng dangban tara bena dipetepsidi, daembanmasanen, gonga kepra benmasaipu, Me Gisoi banai buplanpu tamupra wekra yasi. 16Sun akurami deiyo neng ton, ‘Aca benmare’ tenen, men kael kepmanei. Deiyoda, nedi sun Yahudi neng yuma tep ton men lap pepmasi. Sun Allah si eremna ati talepra pel don neng peda, tonda amutu talena deiyo neng peda, tonda abeilya pel donkami neng, yuk neng peda, men lap pepmasa cadi, aneng yumadi men kael kepnei.

17Ukupmasiya, tamupra yasi dingeda, sun yuma tep yan pepsi. “Ne kayapu ikin weik kupsere ngeda, sun yuma konum kael keprume. Yerusalem ati yumada, pumun kuramepu utopu men kunupe. Yerusalem dana-dana wiami beilya cap, abeilya buplan cap, nimi ati yuma capda, daktapidi beilya buplan yuma dakra uku dongopi. Ukupya tep, ukutaruda, akati lyom beilya ka di ton cap lepsisikra dopkamepe. Ukupmepyopda, nun yuma ka di tamupra telep kange doupra kunkamepe. Tonda, yuk nengdi, nyek-nyek tupa men penkamsenge. Ukutaru ali weik kuseretopu tupa ali men kunkamsere,” pepsi. Upepsidi aupu ton lap pepsi.

18Ukutaruda, Allahdi bicau teneramneudi melipneupa, Persia tara ila nimi deiyo ngebo damai pepsipa, ‘Telepe dadopkamreme. Ne weika di melimkamsene,’ pepneu upu ton lape pepsipa, sun Yahudi deiyo nengdi gekepnei. Gekepnei dingeda, sun yumadi adipapu, “Atep nengeda, telepe, nun tonpa abeilya ka di ton cap lepsisikra dopkamepe,” pepi. Upepidi, ataru dipu telep pel gonga kepi.

19Ukupi dinin, ataruda yuk nengdi lap perbei pangeda, Horon mutu ngebo er si Sanbalat cap, Amon mutu ngebo er si Tobia cap, tonda Arab mutu ngebo er si Gesyem cap, sun yumadi aupu gekepidi, nun yuma tep nyek-nyek pepseidi, mali upu peprapidi autunmasei. Upenmasei, “Sunda ware keca di kupkamrum di do? Tonda, sundi wareto keca kuprumdi, ‘Amutu ila nimi deiyo talepu ngebo tep, yanipkamep’ tenerumudi do?” pepra malya pepdongopsei.

20Upepsei pangeda, ne Nehemiadi sun tep pepsi. “Gume, Allah im deiki tara kuredi, akeca-keca yuma cap, talerur ngebodi tenepseutopu kupkamepe. Er melimserya deiki di apel telep kupra donmapyane, gawal dangkamepe. Nunda, Allah er amutara kupedi, nun er nyapuda adipapu akeca-keca yuma lepsisikra dopmepedi, apel dopra gawal dangkamepe. Dinino, sun apepmaserum nengpuda, Yerusalem mutu neitamai nun tonpa men kunkamrume. Pumun taru peda amutu men talepra kuramruma tep, ‘Amutuda nun ngepu,’ men pepsetume. ‘Sun yuke,’ pepmasi.” Nehemiadi, sun weneri neng, mali upu pepi neng tep weneprapudi pepu.