Neh 3 | XteSC | STEP | Uda angeda, Yerusalem mutu wiami gel beilya mali kupka tep, ‘Ware kuprap, ka di tamupra wirami do?’ tenena tep, lap pepsene. Allah er si eremna ati pumbon pel dona ila deiyo ngebo, Imam Elyasib cap, er kayapu yuk imam neng yuma capdi, agel beilya tamupra wirami taruda, domba bisam doupra wengbarami bisi buplanda ka di punupra dopdongopi. Ada, ‘Allah er gispal dona tepapu dopkupe,’ tenepra dopi. Tonda alyom gel beilya kange di punupra wiami gel beilya deiki di, lyom ati ton domidi, akati pumbon kalengna neng tengamidi, kalekra dirami. Alyom ati er si tep, “Seratus Lyom Ati,” pepra si perami. Seratus Lyom Ati damai di dipdongopra ortara domi ati er sida Menara Hananeel Ati damaida, abeilya neitamai yumada Allah tep ketenepra karepi.

Nehemiah 3

Yerusalem mutu wiami gel beilya, mali kupupa, kange di punupra wipinge tep, pepu upu

1 Uda angeda, Yerusalem mutu wiami gel beilya mali kupka tep, ‘Ware kuprap, ka di tamupra wirami do?’ tenena tep, lap pepsene. Allah er si eremna ati pumbon pel dona ila deiyo ngebo, Imam Elyasib cap, er kayapu yuk imam neng yuma capdi, agel beilya tamupra wirami taruda, domba bisam doupra wengbarami bisi buplanda ka di punupra dopdongopi. Ada, ‘Allah er gispal dona tepapu dopkupe,’ tenepra dopi. Tonda alyom gel beilya kange di punupra wiami gel beilya deiki di, lyom ati ton domidi, ^{▼▼lyom ati – Akatida Indonesia upu deiki di menara penunge.} akati pumbon kalengna neng tengamidi, kalekra dirami. Alyom ati er si tep, “Seratus Lyom Ati,” pepra si perami. Seratus Lyom Ati damai di dipdongopra ortara domi ati er sida Menara Hananeel Ati damaida, abeilya neitamai yumada Allah tep ketenepra karepi.

2 Yuk neng, Yeriko mutu nengdi, Hananeel Ati damai di dipdongopra ortara beilya wirami. Yeriko mutu neng sun damaida, nimi si Imri er mi Zakur cap, er kayapu neng capdi, ortara gel beilya dukdongopra wipbenami. 3 Ikan dopra dekarami bisi buplan perami ngeda, Hasena ^{▼▼Hasena – Ayala nesala sun si ton Sena sengnunge.} yala nengdi domidi abuplan potokra deiami. Tonda abuplan dana-dana tara derirameng co cap, deiki tara derirameng co cap, ensel cap, bon potokra dengdongon keca cap dopidi dekdongopi. Tonda, abuplan deikida gat keca besi beton dopra denepra deipi.

4 Hasena yala nengdi domi buplan damai di dukdongopra dopka deiyo ngeboda, Hakos er mi Uriadi deipu mi er si Meremot cap er kayapu neng capdi, tapakra dukdongopra dopbei. Ace di dukdongopra dopbeua deiyo ngeboda, Mesesabeel er mi Berekyadi deipu mi er sida Mesulam cap, er kayapu neng capdi agel beilya punupra dukdongopra wipbei. Utopu, ace di dukdongopra dopbeua deiyo ngeboda, Bahana er mi Sadok cap, er kayapu neng capdi, agel beilya punupra dukdongopra wipbei.

5 Ace di dukdongopra dopbarami nengda, Tekoa mutu nengdi dopbarami. Dinino, Tekoa mutu ila nimi deiyo nengdi, ‘Nunda amutu pel ton men donkamepe. Agel beilya punupra winkameng pelda, nun songe. Apel dona deiyo ngebodi, ‘Apel dopso,’ pepsetua peda, men gekenkamepe,’ pepi. 6 Gel beilya potokra deipi buplan, er sida Gerbang Yesyana perami ngeda, nimi si Paseadi deiamu mi Yoyada cap, er kayapu neng capdi dopbarami. Tonda, Besoja er mi Mesulam cap, aneng cap kikiman dopbarami. Sun yumadi, buplan si Gerbang Yesana perami ngeda, potokra deiami. Tonda abuplan dana-dana tara derirameng co cap, deiki tara derirameng co cap, ensel cap, bon potokra dengdongon keca cap dopidi dekdongopi. Tonda, abuplan deikida gat keca besi beton dopra denepra deipi.

7 Ace di dukdongopra dopbarami nengda, Gibeon mutu ngebo er sida Melaca cap, tonda Meronot mutu ngebo er sida Yadon cap, sun kikiman dopbaramrei. Tonda, Gibeon mutu neng cap, Mispa mutu neng capdi melipra dopbarami. Abutene mutu yumada, Efrat me goupra ortara keteng dangban tara talepra kuramu ila nimi deiyo ngebo, Gubenurdi taleamu.

8 Ace di dukdongopra dopbeua deiyo ngeboda, Harhaya er mi Uziel cap, er kayapu neng capdi agel beilya punupra dukdongopra wipbei. Uzielda, kunumna weik keca er sida emas dopra ketekemdina deiyo ngebo kuramu. Utopu, ace di dukdongopra dopbeua deiyo ngeboda, Hananya cap, er kayapu neng capdi, agel beilya punupra dukdongopra wipbei. Hananyada, nintong telep minyak ketekemdina deiyo ngebo kuramu. Anengdi, aca di dukdongopra ortara wipbarami lyom gel beilya er sida Tembok Lebar punupra wipbarami.

9 Ace di dukdongopra dopbeua deiyo ngeboda, Hur er mi Refaya cap, er kayapu neng capdi agel beilya punupra dukdongopra wipbei. Anengdi, aca di dukdongopra ortara lyom gel beilya wipbarami. Refayada meneng damai akuramudi Yerusalem mutu dana tara ton bokra deiyo ngebo kepra taleamu. 10 Ace di dukdongopra dopbeua deiyo ngeboda, Harumaf er mi Yedaya er ati meneng damai agel beilya punupra dukdongopra wipbei. Tonda sun cap meneng damaida Hasabneya er mi Hatus cap, er kayapu neng capdi agel beilya punupra dukdongopra wipbei.

11 Ace di dukdongopra dopbeua deiyo ngeboda, Harim er mi Malkia agel beilya punupra dukdongopra wipbei. Tonda sun cap meneng damaida, Pahat-Moab er mi Hasub cap, er kayapu neng capdi agel beilya punupra dukdongopra wipbei. Tonda jen keca roti dana tep ila lyom ati tenpu punupra dopi.

12 Ace di dukdongopra dopbeua deiyo ngeboda, Halohes er mi Salum cap, er kayapu neng capdi agel beilya punupra dukdongopra wipbei. Anengdi, aca di dukdongopra ortara lyom gel beilya wipbarami. Salumda meneng damai akuramudi, Yerusalem mutu dana tara ton bokra deiyo ngebo kepra taleamu. Erdi melipupa er cap er ner nyapu capdi sun pe meneng damai adipdana kuramitopu, alyom gel beilya ukupunge punupra wipdongopi.

13 Utopu ban mutu bana tep, bisi buplan potokra deiami. Ada Hanun cap, tonda Zanoah mutu kurami nesala cap, sun yuma melipdaidi abisi buplan ukupunge dopi. Tonda abuplan dana-dana tara derirameng co cap, deiki tara derirameng co cap, ensel cap, bon potokra dengdongon keca cap dopidi dekdongopi. Tonda, abuplan deikida gat keca besi beton dopra denepra deipi. Ange ukupu tapakra wiami lyom gel beilya er lyomda denge weik empat ratus empat puluh meter (440) kupu. Aceida, domba bisam dei dopra dokoterban buplan akwamu.

14 Mali keca cap, domba bisam dei cap dopra dokoterban buplan perami ngeda, Rekhab er mi Malkiadi buplan ukupunge punupra dopu. Malkiada, Bet-Kerem mutu talena tep deiyo kepra taleamu. Tonda abuplan dana-dana tara derirameng co cap, deiki tara derirameng co cap, ensel cap, bon potokra dengdongon keca cap dopidi dekdongopi. Tonda, abuplan deikida gat keca besi beton dopra denepra deipi.

15 Tonda me bungna kwamngai me gwerbana tep bisi buplan potokeiamipa kwamu ngeda Kolhoze, er mi Salumdi, ukupunge punupra dopu. Salum, ada Mispa mutu taleamu ngebo kuramu. Utopu abuplan domya deiki tarada, ati aruma dopdongomi. Tonda abuplan dana-dana tara derirameng co cap, deiki tara derirameng co cap, ensel cap, bon potokra dengdongon keca cap dopidi dekdongopi. Tonda, abuplan deikida gat keca besi beton dopra denepra deipi. Tonda, Siloam mokon deiamngai pirimanda, agel beilya punupra wipdongopi.

Amokon damaipu amutu ila nimi deiyo ngebo Raja, er wada nimidi peiamipa akwamu. Acei di gonga kepidi, gel beilya wipbaramyane, menop taru Raja Daud kuramu ati dam ^{▼▼Daud ati – Raja Daud menop taru kuramngaida mutu buma deiki nimidi ati domipa kuramu. Atep, er ati damai di kwerepra Siloam mokon damai bana tep moropra deiami.} bana tep moropra deiami co moromna damai bena deipi.

16 Salumdi agel beilya wipbaramnganen deiamngaida, acapu Azbuk er mi Nehemia, Bet-Zur mutu bokra taleamu ngebodi, alyom gel beilya dukdongopra wipbaramnganen, Daud cap er nyapu cap depnepa peiramyai bena wipdongopu. Ukupu dingeda, er dipapu dukdongopra wipbaramnganen, nimidi paliamipa deiamu mokon damai ton wipdongopu. Tonda, nimi deiyo ngebo Daud Raja kuramu taru di, sun jen talen neng, ila balila neng tep, sun gispal dona tep, ati domya damaida, gel beilya wipbaramyanen aceipu bena deipi.

Sun Lewi yala nengdi angepu dukdongopra, gel beilya ukupungepu wirami upu

17 Uda ange utopu sun Lewi yala nengdi agel beilya pu dukdongopra wirami taruda, Bani er mi Rehumdi gonga keamupa pel dorami. Tonda sun meneng damai dipdongopdana gel beilya wina deiyo ngebo Hasabya cap, er taleamu mutu neng cap, sundi alyom gel beilya ukupunge ton dukdongopra wipbarami. Hasabyada Kehila mutu dana tara ton bokra taleamu. 18 Utopu, sun damaida, Henadad er mi Binuida, Kehila mutu dana tara bokra taleamu deiyo ngebo, er cap er kayapu yuk neng cap, sun yumadi aila lyom gel beilya ukupunge punupra wipbaramyane, acei bena deipi.

19 Utopu, sun damaida, Yesua er mi Ezer, Mispa mutu taleamu deiyo ngebo cap, er kayapu neng capdi, alyom gel beilya ukupunge punupra dukdonopra wipbaramyane, ku kepra deipidi, wipbaramyane, jen talen nengdi nimi porbana tep, talerami keca yala-yala yuma derirami ati damai bana tep welerban bisi damai bena deipi.

20 Ange utopu Zabai er mi Baruk cap er kayapu neng capdi, aca di dipdongopra agel beilya wipbaramyane, Allah er si eremna ati pumbon pel dona ila deiyo ngebo Imam Elyasib er ati buplan damai bena deipi. Baruk er gungda, pio pe deipra wipbarami. 21 Hakosdi deipu ngebo, Uria er mi Meremot cap, er kayapu neng capdi alyom gel beilya ukupunge wipbaramyane, Imam Elyasib er ati wengban bisi buplan damai bena deipi.

Sun imam-imam neng, yuk mutu neitamai kurami neng yumadi, abeilyapu dukdongopra wirami upu

22 Sun Imam-imam neng dipapu meneng damai akuramnetopu, aneng dipu dukdongopra wipbarami. Ada Yerusalem mutu damai cap, Yordan mekin cap kurami nengdi agel beilya pu dukdongopra wipbarami. 23 Aceida Benyamin cap, Hasub capdi sun pe meneng ati damai adukdongopdana kuramreitopu wipra dukdongoprei. Ange utopu, Ananya er mi Maseya cap, er mi Asarya cap sun peda meneng ati damai adipdana kuramitopu agel beilya wipra dukdongopi. 24 Henadad er mi Binuidi atapyai di dukdongopra wipbaramnganen, Asarya er ati dam kumunai bena deipu.

25 Tonda, Uzai er mi Palaldi agel beilya kumunai di dukdongopra wipbaramnganen, itara nimi deiyo neng Raja kurami ati damai cap, bisi kalengna neng bupra wengamyai cap damai bena deipu. Nimi si Palaldi wipbaramnganen bena deipkai di, Paros er mi Pedayadi acei dipu dukdongopra wipbeu. 26 Aceida pio karen gum dinin meneng damai apu mutu si Ofel mutu perami mutuda, Allah Yahweh ^{▼▼Yahweh – Allah er si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamrure. Allahdi Musa tep, er si katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra, ne tep gispal donkamnerume,” pepu. Ibrani nesaladi huruf YHWH sengnung dinin, nundi, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda, lap pena upu nomor 49 dirume.} er ati pumbon pel don neng, sun pel melimna neng Ofel mutu deiki kurami. Atep, Allah Yahweh er ati pel melimna nengdi, keteng yakan tara di me gwerbana tep barami bisi buplan kwamngai di dukdongopra agel beilya wipbaramyane, bena deipi. Ada, me gwerbana tep ban bisi buplan potokamya damai ila lyom ati er si menara pepra domi ati damai bena deipi.

27 Uda ange yuma ukupra wipbaramyanen tupa atapyaida yuk nengdi dukdongopra wipbarami. Aceida Tekoa mutu nengdi alyom gel beilya punupra wipbarami. Ada agel beilya deiki tara ila lyom ati er si menara pepra domi ati damai di dukdongopra wipbaramyane, Ofel mutu damai ongopgenepra wiami beilya damai bena deipi.

Yuk pel don neng yuma tep, pepu upu

28 Tonda sun imam-imam sun ati dam yuk-yuk meneng akuramitopu agel beilya lepsisikra wipbarami. Ada, kuda bisam wengbana tep potokeami buplan damai di dipdongopra, beilya ukupunge punupra wipra welerbarami. 29 Aceida, nimi si Imer er mi Sadokdi alyom gel beilya er pe ati damai di dukdongopra wiamu. Abena wipra deipkaida, yuk ngebo ton er si Sekanya er mi Semayadi dukdongopra wipbaramu. Semayada, keteng yakan tara potokeiami buplan damai kalengna deiyo ngebo kuramu.

30 Abena deipu pangeda, Salemya er mi Hananya cap, yuk ngebo ton Zalaf er mi Hanun cap, sundi ange yuma punupra wipbaramrei. Zalaf er nyapu yumada, ngantan bari deiamu dinin, Hanunda, ngantan bari ngebo kuramu. Hanun cap, Hananya cap gel beilya wiramreiyai di dipdongopra pel dopu ngeboda, Berekya er mi Mesulam er ati dam di dukdongopra, gel beilya ukupunge punupra wipbaramu.

31 Aceida, nimi er si Malkiadi abeilya ukupunge punupra wipbaramu. Malkiada kunumna weik keca, pio telep gat keca er sida emas di dopra yuk keca ketkemna deiyo ngebo kuramu. Angebodi alyom gel beilya dukdongopra wipbaramnganen, Allah si eremna ati pumbon pel dona tep melimna neng, sun kurami ati cap, tonda bung keca talepra kunumna nesala cap, sun kurami ati cap, akati damai gel beilya wipbaramu. Wipbaramnganen deiamu bisi buplanda, ‘Malinge duyanmang do, telepnge duyanmang do?’ tenen, wepra dirterena buplan ^{▼▼dirterena buplan – Ada, Allah er si eremna tep dekarami domba bisam cap, kambing cap, ‘Bol mali do, telep do?’ tenen, wepra dipterepnedi, ‘Telepe,’ pepnopda, abuplan bisi di dopra wengbarami.} pepra potokeiami buplan damai bena deipu. Abuplan sida Gerbang Mifkad perami. Abuplan damaida, Malkiadi gel beilya wipbaramnganen, bena deipu. Abeilya kumunai deiki tarada, ati ton domi.

32 Ukupra domi ati di dipdongopra ortara gel beilya wipbarami. Ada, urasin pio telep gat keca er sida emas di dopra ketkemna neng cap, bung keca talepra kunumna deiyo neng cap, sun yumadi agel beilya sirikai dukdongopra wipbaramyane, domba bisam dopra wengbarami bisi buplan damai bena deipi.