Nehemiah 4

“Yuk nengdi, ‘Ukuna gume,’ pepkamsenga tep, moupra tenepmumdi, gel beilya winkamrume,” pepra, Nehemiadi pepu upu

1Yuk nengdi, “Israel nengda, Yerusalem ati gel yakra deipidi, beilya tamupra wipmange,” pepipa, Sanbalat gekepudi, dipru neitamaida, ila tulum kupupa, mali kange doupu. Ukupupa, “Israel neng sunda apel men kuptume, sunda tali neng pua,” pepra, nyek-nyek peprapudi autupseu.

2Tonda er yala neng cap, Samaria mutu jen deiyo neng cap yuma tep, bena upu doupra beudi, er nyapu gekenmaiyai di pepu. “Sun Yahudi neng puto gum neng cadi, ware tenepra apel donmang do? Sunda walwal neng cadi, Yerusalem ati bura tara gel beilyada, ka tamupra telep kupra gel yakra deipra, welepra wiptenge do? Tonda awipmengedi gam keca popra, Allah er gispal dona tep, karenkameng do? Apele yumada pio weike tep, ue tenpu tumi deiki di, konum gawal dakra wiptenge do? Yerusalem ati cap, gel beilya cap, yu nengdi uruptapidi, uku dongopropi ngeda, ka di tamupra telep kupra wiptenge do? Gume, men kuptenge,” pepra, nyek-nyek pepra asipetepu.

3Upepu tarupu Amon mutu ngebo, er si Tobia damai bukmaua di, “Sun wareto keca pel donmang do? Gel yakra deipra, welepbangedi agel beilya winmangada, bura dumre kam meteknge ton yaredi, abeilya yan kaplepre pangeda, dakra sakropkamre,” upepra nyek-nyek pepu. 4Upepreiya tep, Nehemiadi, Allah tep moropudi pepu. “Nun nai bo Allah, nun moropmep kecada gekepseo. Nun tep mali pepsengedi, mali kemsenge ngeda, kandi sun deikipu deipkamrume. Ton mutu nengdi, yuk mutu neng tep popbisipmengedi, sun talemenge keca yuma dalupropmengedi, abunga dopra sun pe mutu tamupra baramengtopu, kandi amali upu pesenge neng tep wenepra bisbisa kapkamrume.

5Atep nengeda, kandi sun mali kunge ngeda, lupropmemdi tamna gume. Tupa tenepra wenemkamrume. Tonda sun mali kunge kecada, lyemna gume. Sun mali kunge kecada tupa epra tenenkamrume. Deiyoda, kan ati dam beilya winge neng tep, malya pemdongosenga tep pepne. Atep kandi aneng sun mali kunge keca tep, men kaukepkamrume, naio,” Nehemiadi Allah tep upepra moropu. 6Ange konum moropu pangeda, Nehemia cap, sun Israel neng capdi, pio pe deipra pel doramya tep, sun gel beilyada, kange di punupra, gel yakra deipra, weleprapidi, lyoma di wipbaramipa, neitamai kupu. Ton cap dukdongopra gel tuai deipra, welepipa neitamai kupu. Angeda sun nimi yuma bupra puto di deipra welepya tep kupu.

7Ukupupa Sanbalat cap, Tobia cap, sun Arab neng cap, Amon mutu neng cap, Asdod mutu neng yuma capdi gekenmaipa, yuk nengdi, “Yerusalem ati gel beilyada telep kupra winmange, tonda gel beilya bon kwamunge yumada, lepsisikra kemdongomange,” pepipa, aneng gekepidi pio ila tulum kange doupi. 8Ange gekepidi, sun aneng yuma bupra wekidi, “Yerusalem bena warekmepedi, apel donge nesala yuma tep, ikin keca sun nong deiki deipmepedi, sun tep popbisipmepedi dopronkamepe. Ukupmepyopda, sundi apel tapra bendopkamenge,” pepra upu talepi.

9Upepra upu talepi dinin, ‘Nun nai bo Allahdi melimkamser’ tenen, Allah tep moropmepu. Tonda, ‘Sun aneng poryankamseng’ tenen, keteng komuni pe, lukunda taru peda kalengna neng ton wepra deipmepu. 10Ataru neitamaida, Yehuda tara nengdi pepi. “Nun pel don nengda, pel weik dopmupka cadi, nun puto boun kupbanmasere. Tonda, nun pel donaida, men di uruptapi gel telepropange pio weik kupka tep, nundi abeilyada, men pel dopra gawal daktepe,” pepi.

11Tonda, nun podan neng dingeda, upepsei. “Sun Yahudi nengda walwal neng cadi, kael kepra men epsenge taru dipu, nundi sun kan-kan akungepa inipra wekmepyopda, sun yuma popra gawal dakropmepepa, apel donge nge yuma tapkamenge,” pepsei. 12Yehuda neng dinin, aupu pepsei neng, damai kurami nengdi, ue sepuluh tumi deiki di nun damai peryakaramsei. “Sun popkamseng nengda, amutu neitamai yuma kununga tep, dan cei betumpa, men popsetenge do, gume. Sun benkamrumai yuma, yangedi popropkamsenge,” perami.

13Ange tep nengeda, ‘Ukupsenung’ tenen, nedi Yahudi yala neng yuma, sun deipgerekdani neng kuramitopu, gel beilya amutara dinin, daktapipa bum kupkai yuma ketenepra deipsidi, ‘Amali neng aca di wekra popsenung cadi, pio moupra kalengkamrume,’ pepra deipsi. Adeipsi neng yuma keteneipi ngeda, sun jen cap, mar cap, parang ya cap, co takke cap dopra keteneipidi kalengami. Tonda, kelapye wirikra deiamidi, kalengami.

14Ange yuma moupra dipetepra kael kepsidi, tekrapsidi sun Yahudi nimi deiyo taleami neng cap, sun ila-ila neng cap, sun tali neng yuma cap tep upepsi. “Sunda sun yuk neng tep, kwar kuna gume. Allah tepapu tenenkamrume. Allahda, akeca-keca yuma taleredi, er pio ila puto weik kuryadi, kunupsek pen pel dona ngebo kurur dinin, er tepapu tenepmumdi, kware men kunkamsere. Tonda, ‘Er dipu melimkamser’ tenen, tenepmepedi, sun yala neng cap, sun kayapu neng cap, sun nyapu cap, sun ner nyapu cap, sun nerapu cap, sun ati cap tep, ange-ange yuma tep nengeda, pio pe deipra kunkamrume. Sun mali neng podana tep ketenepkamrume,” pepsi.

15Nun yuma keteneipmepupa, yuk nengdi, “Gume, Yahudi yala nengdi konum kael kepmasenge. ‘Sun popkamepe’ tenepmepu ngeda, konum gekepidi, konum keteneipmange. Tonda, Allahdi nun tenepmepu ngeda, konum bisi sekseue,” upepra lap perbeipa, nun podan neng gekepi. Konum gekepipa, nun Yahudi yala neng yumadi, agel beilya lepsisikra wina tep, gel yakra deipra, welepra wipbaramepu. Nun pel yuk-yuk akwamutopu gel yakra deipra, wipra welepbaramepu.

16Atumi dipapu gonga kepmepudi, dortumi yumada, ne nyapu yuma bokeipsipa, ton tamna neng ton pel donmai. Adipapu ton tamna nengda bokra jen cap, mar cap, co takke cap, teng cap, kelapye cap douprapidi nun podan neng damai tep kalengmai. Jen talena deiyo nengdi, Yahudi yala nesala gel beilya wirami neng pel donmaiyai amenda tara yan teki. 17Ila gel beilya wina tep, gel yakra deipra, welepra wina tep nengeda, gel cap, yuk don keca cap doupra dekarami nengda, jen ton tara buru doupman dipapu, ton tara buru di gel doupra duyakaramidi wipbarami.

18Ange utopu, gel beilya pel winmai neng yumadi, sun parang ya deiyoteng kan-kan dengamidi pel dorami. Dinino, ‘Porbenkup, tenenkameng’ tenen, bung-bung pena keca talepra pung penkamu ngeboda, ne damaipu kunmau. 19Nedi sun amutu taleami deiyo neng cap, yuk ila-ila neng cap, tonda tali dakurami neng tep, upepsi. “Adonkamep pelda pio weike. Tonda, aca di gel beilya wina tep, gel yakra deipra, welepbandi, pel wipbaramepyane, ortara bena winkamep taruda, daneitamaida karen weike tep, mening damai pel men donkamepa cadi, go tapmapyai neitamai di, wekra popsenung cadi, kange moupkamrume.

20Bung-bung pena keca, er si terompet pung pepmengepa, sundi lelim gekeprumnyopda, ‘Nun podan neng konum yakanmange’ tenen, sun yuma menmena buluprumdi, nun damai yankamrume. Nun nai bo Allahdi, nun tep melipserepa, nun podan neng tep popbisipkamepe,” pepsi.

21Ange tep nengeda, nun apel donup nengda, tenpu ngebo peda men tapmepu dinin, nimi gung neitamai bokrapmepudi, ton tamna nengdi jen cap, co takke cappu doupra kalengami. Ton tamna nengda, gel beilya pelpu wiramepu. Ada keteng tengyakan taru di dipra, keteng dangban taru pe, adine kuru ingamu taru peda, aneitamai yuma pel donapu kuramepu. 22Ataru peda nedi akurami neng yuma tep upepsi. “Sun pel talepra dorum neng cap, sun melimna neng cap, yuk mutu men marbankamrume. Yerusalem mutupu marbankamrume. Ukupmumpa, lukunda taruda, sundi nun tep kalengkamserume. Ukupmamumnya berekre pangeda, keteng komuni neitamai yuma tamupra gel beilya wina pel doryakankamrume,” pepra deipsi.

23Uda apel doramepu taru yumada, ne pe cap, ne yala neng cap, ne amutara pel dorami neng cap, tonda ne cap kuramupudi, ne amutara kalengna neng cap, nun yuma kemamepu opkalda men kwiripra tamamepu. Aopkal kepne dipapu tupa pel dopbaramepu. Tonda, nun yumadi jen doupra baramepu. Tenpu taru peda men tamamepu. Me gwerbenkun taru peda, nun jen doupnapu kwamepu.

Uda Yerusalem mutu dinin, ila lyom gel beilya ongopgenepra wiramepu ngeda, ue lima puluh dua (52) tumi deiki di gel yakra deipra, welepdoramepudi, agel beilya win pelda gawal dakmepu. Ataruda, war si peramepu ngeda Elul dinin, tanggal 25 deiki di gawal dakmepu (ada Oktober 25).

Ukupmepupa, nun dan-dana tara yuma kurami podan neng, yala-yala yuk neng yumada, ange gekepi pangeda, kware weik kupu. Tonda, sun balila di, ‘Nun pedipapu Israel nesala bisbisa kaptepe,’ tenerami ngeda yaproi. Ange deiyoda, sun ayuk mutu neng yumadi, ‘Uo tek sisi sun Israel nesala ila mambul pel donmaiyane, gawal dakmangada, sun nai bo Allah meliamnga deiki di apel dopi. Sun pedipapu gume,’ tenen, kael kepya tep, kware weik kupu.