Neh 5 | XteSC | STEP | Uda ue ware kupra taru konum maramidi Yahudi yala nesala kange mun pio weik kuramu. Ada nimi cap, nerapu cap, konum gonga kepidi ‘Uo,’ tenepra, sun pe meneng damai kikiman kurami nesala tep deremdarami.

Nehemiah 5

Nehemiadi Yehuda yala kankan kurami nesala, sun putaramu keca tep meliamu upu

1 Uda ue ware kupra taru konum maramidi Yahudi yala nesala kange mun pio weik kuramu. Ada nimi cap, nerapu cap, konum gonga kepidi ‘Uo,’ tenepra, sun pe meneng damai kikiman kurami nesala tep deremdarami. 2 Utenepra deremdaramya deiki di uperami. “Uo, nun nyapu cap, ner nyapu cap, pio weik kusununga cadi, jen keca gandum karepsetengepa jeptepya deiki di gam kunkamepe. Gum dingeda, gume,” perami.

3 Ange utopu ton nengdi uperami. “Gume jen putan taru kunmasera tep, neda ne wa pepra kouramsi wa tu yala-yala yuma cap, ne pe ati cappu pe deipra kunupnedi ange deiki di gandum kunupkamne. Ukupnepa nun yuma jenkamepe. Ukupmepyopda, jen putana deiki di men denkamepe,” perami. 4 Ton yuk neng dingeda uperami. “Nunda yuk neng co bo ton keana tep dopramepyane, kange di amenda punupkamepe. Aco boda nun nai bo Raja karepmepepa erdi wa penai tu cap, anggur tapu du wa pen tu cap tep, “Pajak co boda, ukuprap karenkamnerume,” pesere ngeda, nundi kareptepe,” perami.

5 “Ange tep nengeda, nunda Yahudi yala neng guma tep do? Utopu, nun nyapu cap, yuk Yahudi yala neng sun nyapu capda, utopu men kununga tep do? Nun kangeda, nun nyapu yumada, utotopu kunung dinin, nun nyapuda, yuk neng tep kunupropmupupa, anengdi nun nyapu nong deiki ikin keca weik deringedi, sun nong deiki ikin pel dimnunge. Co bo karena gum dipapu, tali pelpu dimtamnunge.

Tonda nun ner nyapu, kaber telep kupra nenge ner nyapu weike, nundi kunupramupka deiki di yuk neng tep, pel melimne nerapu kepra kununge. Dinino, nunda nimi bo neng utopu keipseiya deiki di nun puto pio gum tep, ware kuptepe do? Nun wa pen tu yumada, yuk neng sun co bo deiki di konum kunupra dopropidi talenunga cadi, ware keca deiki di kunuptepedi, nun ner nyapu ka di tamupra doproptepe do?” pepra weika di engerami.

6 Sun anesaladi putaramunge tep mali kange doupra perami ngeda, ne konum gekepsidi, yu kupneupa ila di derepsi. 7 Ukupra derepsi dingeda, upepsi. “Uo, sun deiyo talepra, ‘Ukupkupe,’ pena neng cap, amutu taleruma deiyo neng cap tep, weika di derepsene. Sunda sun kayapu nesala sisa tep nun songe tenepra yu dororamrumdi, amutu nesaladi, co bo morosenge taruda, sun deiyo nengdi, uperume. ‘Akarepkusep ngeda, tamupra karepkamserum dinin, yuknge ton cap weika di tapakra karenkamserume,’ perume. Uperuma deiki di pio mali kurume. Atep nengeda, sun yuma buluprumupa upu talepra lepsisingkamepe,” pepsi.

8 Nedi aupu ton cap dukdongopra puto di pepsi. “Pumun taruda, yuk karen mutu nesala, Yahudi yala gum nesaladi, nun nyapu weik kunupra dubenamsei dinin, ukutaruda, nundi nun damai akapseretopu, nun nyapu ka di tamupra kunupra duyakaramepu. Dinino, sunda Yahudi yala nesala kurum dinino, sun pe nengdi sun pe nyapu tep, kunumdodarume. Ukurumada, ware keca deiyo tep do? Ware kupra taru deiki di, ka tamupra nun pe nyapu kunumdonkamep do?” pepra wenepsi. Upepra wenepsipa sun amutu neitamai talena deiyo neng cap, ‘Ukupkupe,’ pena deiyo neng capdi, tamupra pepmanto upu ton men kupudi, sun ali kupka tep, dimpepnapu kupi.

9 Nedi aupu ton dukdongopra pepsi. “Sun amutu kumumdi pel domumnge yumada pio tek sisinge ton men kurume. Malipu kurume! Atep sun gam kunkamrum taru yumada, adipapu Allah tep kware tenepra kunkamrume. Ange men kupmumnyopda, nun mar podan nengdi tenenkamsengada, ‘Allahda men kurure,’ tenengedi, ‘Sun Yahudi yala nesalada, talipu kununge’ tenen, nyek-nyek penkamsenge.

10 Tonda, ne Nehemia cap, ne kayapu neng cap, ne nyapu cap nun yumadi, sun yuk Yahudi yala nesala sun makuna tep, co bo cap, gandum cap, keana tep karenupe. Dinino, nundi aco bo doronge nesala tep, ‘Weika di tapakra karenkamserume,’ men penupe. Atep nengeda, sun amutu deiyo talepra kurum nengdi, sun yuk Yahudi yala nesala sun amutara kunge nesala tep, ‘Keana tep doproprum co bo tamupra karenkamserum taruda, weika di ton cap tapakra karenkamserume,’ peprum ngeda, adipapu tapkurume.

11 Ange utopu, sun anesala yuma peda pumun taru di sun kayapu neng keca dopramrumdi, ‘Ka di tamupra punupkamsep ja,’ pertamamrumnge yuma peda, adipapu punupmumdi kilitamkamrume. Ada co bo do, gandum do, anggur tapu du do, zaitun co du mokon do, ange yumada ka di tamupra karenkurume. Tonda sun wa pen tu cap, anggur tapu wa penai cap, zaitun co du mokon wa penai cap, sun ati yuma capda, adipapu tamupra karenkamrume,” pepsi.

12 Upepsinge tep, sun amutu neitamai talepra kuramya deiyo nengdi, “Jo telepe. Apepmaserem ngeda, ukunkamepe. Tonda nundi dukdongopra penkamepe. Ukupmepedi sun taleami keca yumada, kange di tamupra karenkamepe. Ukupmepyopda, nundi sun yuk Yehudi yala nesala tep, ‘Ton cap tapakra karenkamserume,’ pepra men moronkamepe,” pepi. Upepi pangeda, nedi sun imam neng cap, amutu talepra kuramya deiyo neng cap, ‘Ukupkupe,’ pena deiyo neng cap tep, “Yarume,” pepsidi sun amutu neitamai ila nimi deiyo nengda, arup taru di ‘Ukupkamepe,’ pepmangu ngeda, ‘Tek sisi kunkameng’ tenen, “Pedina upu deiki di katuai lap pepra deipneso,” pepsi.

13 Atumi dipapu ne kenengamsi opkal deiki talepra gege pepsipa, ne opkal deiki kwamneu buta sakropu. Ukupsidi aupu ton pepsi. “Ware nesala do yuma, Allahdi, ‘Anesalada ne mawa nesala kunkameng’ tenen, wepra deiamseu nesala neitamaida, sun atumi pedinmanerum upu, men gekepra dororur ngeboda, abuta sakmautopu, Allahdi aneng yuma tapkamre. ‘Angeda, ukupra kunkamepe,’ penmanerum upu men gekenung nesalada, sun ati cap sundi talenung keca cap yumada, Allahdi gum kupra deipkamre,” pepsi.

Upepsipa, awekmai nesala yuma gekepidi, ‘E, tek sisi upu penmaserema tep, apenmaseremtopu kunkamepe’ tenen, “Amin,” pepi. Amin pepmaidi, Allah Yahweh er sipu erepi. Amutu neitamai kuramidi “Ukunkamepe,” penmaitopu, tek sisi gekepidi, atumi di dipra dortaru yuma ukurami.

Nehemia er dipru boun kupu upu

14 Neda ‘Yehuda yala nesala sun deiyo ngebo Gubernur kunkamre’ tenen, wepra deiamnei taruda, Persia mutu ila nimi deiyo ngebo Raja Artasasta er kuramnga neitamaipu keteng tamunda dua puluh (20) di dipdongopra, tiga puluh dua (32) tahun mapsi. Tonda aketeng tamun dua belas tahun neitamai yumada, ne cap ne kayapu yuk neng capdi, amutu taleamu nimi deiyo ngebodi, “Jen keca bokra karenkamnerume,” pepra deiamu ngeda, amutu kurami nesaladi karerami dinin, nundi ajen keca yala-yala yumada, tenpunge peda men dopra jeramepu.

15 Ne ila ngebo Gubernur kapul men wepra deipnei taruda, yuk ila nimi deiyo neng amutu taleami. Animi deiyo nengdi, amutu kurami nesala yuma tep, sun nong deiki ikin keca deriramidi, “Sun uang perak empat puluh (40) karenkamserume,” pepra upula dororami. Tonda, “Jen keca yala-yala yuma cap, anggur me cap tapakra karenkamserume,” pepra upula dororami. Neda Gubenur kapul men kuramsi taruda, amutu talepra kurami ila nimi deiyo neng cap, sun amutara pel melipra dorami neng, pegawai neng capdi ukurami dinino, neda ange pio men kuramsi. Ange yuma men kuramsada tali tep gume. Telep kupra kuramsa deiyoda, ne nai bo Allah tep pio kware teneramsa cadi, ato mali kun keca pio men kuramsi.

16 Ato mali kun keca pio men kuramsi dinin, ‘Neda ila lyom gel beilya wina pelpu doramepedi gawal dangkamepe’ tenen, pio pe deipra pel doramsi. Ataru neitamai yumada, nedi tu yambul peda tenpu ton pio men dororamsi. Ange utopu, ne amutara pel melimna neng peda, tu yambul peda tenpu ton pio men dororami. Ne cap, ne kayapu neng capdi, ‘Nunda amutu kunmapa deiyoda, alyom gel beilya win pel donkamep’ tenen, yanmape. Yuk deiyo tep gume. Atep, ‘Apelpu pio pe deipra donkamepe’ tenen, kuramepu.

17 Ne jen keca ketenepra deiya jen meja deikida, Yahudi yala neng cap, amutu ila nimi deiyo neng cap, denge weik 150 neng wekra kikiman jen jeramepu. Ange utopu, nun dana-dana tara kurami nesala taleami nimi deiyo neng cap, yakaramipa, nun cap kikiman jen jeramepu. Nedi ajen keca yala-yala yuma ketenepra deriramsipa, sun aneng yumadi jen jerami.

18 Atumi-atumi yuma ne amutara pel melimna nengdi, jen keca ketenepra derirami kecada ake. Sapi bisam tenpu cap, domba bisam nong pio telepnge ngantan bari cap, jepmanto ma yala-yala yuma weike cap, ketenepra doupra duyakarami.

Tonda, denge weik sepuluh tumi konum kupne pangeda, anggur me yala-yala yuma weika di, gwepra duyakarami. Ukupra dekarami dinino, nedi Gubenur ngebo moropmanto keca tep, ‘Jen keca yala-yala yuma tapakra duyankamnerume,’ pepra men mororamsi. Sundi tali lupra kareramnei kecapu dopra jeramepu. Yuk keca cap tapakra men mororamsa deiyoda, ake. Sun amutu kurami nesalada, kange mun keca kuramupa, ikin kange doupra kurami ngeda, ne konum kael keamsa tep, yuk yala keca ton pio men mororamsi.

19 Neda ukupra dumsisipu kuramsa tep nengeda, ne nai bo Allah, ‘Kandi ne tep kange deipnetume’ tenen, moropkene. Ada, nedi amutu kurami nesala yuma tep, melipra kuramsi kecada, ne nai Allah kandi tupa tenenkamnerume. Ukuramnememdi, ne tep pio melimkamnerume. Nehemiadi pepu.