Neh 6 | XteSC | STEP | Uda, nimidi, “Yerusalem gel beilya konum wipmange,” pepra lap penmaipa, yuk neng sun si Sanbalat cap, Tobia cap, tonda Arab mutu ngebo er si Gesyem cap, tonda, ‘Israel yala nesala nun song,’ tenepra podarami neng yuk neng cap, sun yumadi gekenmaipa, nun tep, “Yerusalem mutu ila lyom gel beilya konum wipra gawal dakmange,” pepra lap pepipa gekepidi, yu kupu. Ataruda, nundi apala gel beilya yuma wipra gawal dakmapudi bisi buplan bon yuma dopra keteneipra deipmepu dinino, ataruda nundi buplan konum dopmepu dinin, buplan talen keca er sida ensel di kapul men dopmepu.

Nehemiah 6

Sun yuk nengdi Nehemia tep yu kupupa, “Gel beilya wipmarum ngeda, tapso,” pepi upu

1 Uda, nimidi, “Yerusalem gel beilya konum wipmange,” pepra lap penmaipa, yuk neng sun si Sanbalat cap, Tobia cap, tonda Arab mutu ngebo er si Gesyem cap, tonda, ‘Israel yala nesala nun song,’ tenepra podarami neng yuk neng cap, sun yumadi gekenmaipa, nun tep, “Yerusalem mutu ila lyom gel beilya konum wipra gawal dakmange,” pepra lap pepipa gekepidi, yu kupu. Ataruda, nundi apala gel beilya yuma wipra gawal dakmapudi bisi buplan bon yuma dopra keteneipra deipmepu dinino, ataruda nundi buplan konum dopmepu dinin, buplan talen keca er sida ensel di kapul men dopmepu.

2 Atep neda Sanbalat cap, Gesyem cap, sundi nimi ton dopra deipreidi, “Kanda nun damai yamempa, nun cap bulupra upu talepkamepa tep, tenpu metek mutu banai er sida Ono mutu yankamrume,” upepreipa, yuk nengdi yana peipnei. Upepnei dinino, tek sisi ne kael keamsada, sundi ne tep, ‘Angebo popmepepa, er nongda gum kupkamre,’ tenepnei. Angeda, konum kael kepsa tep, men besidi upupu dokotepsi. 3 Nimi dopra deipsidi, upepsi. “Aneng damai bemumdi, aupu pepkurume. ‘Ukutaru neda ila mambul pel donuna cadi, sun upu talenkamrumaida men yankamne. Angeda tali tep men pepne. ‘Apel tapra upu talenai yanyopda, pel dopra men gawal dakmanto kupnun’ tenen, men yankune,’ pepra lap perberume,” pepsi.

4 Ukupra upu pediramneiada, pio weik 4 kali deiki di surat sekra pediramneitopu, nedi tamupra men di pediramsitopu aupupu tamupra pediramsi. 5 Sanbalatdi asurat pamu bari taru sekeipu ngeda, er melimna ngebodi asurat dopra yana karepneu. Sanbalat er melimna ngebodi dopmau suratda men getepdongopu surat doupmaupa epsi. 6 Asengna keca neitamaida, Sanbalatdi sekra kiamu upuda ake. Amutu neitamai kunge nesala yumadi, sun Israel nesala tep pesenge upuda ne konum gekenune. Ne kabo Gesyemdi, ‘Jo, sun anesaladi penge upuda, tek penunge,’ pepneuada, pepkukene.

Ada, kan cap, kan kayapu neng sun Yahudi yala nesala cap, amutu kunge nesala tep yu kangepu tenepra kuruma cadi, amutu talena deiyo neng tep, ‘Popbisipkupe’ tenen, kupetepkamserume. Ange tep ngeda Nehemia cap, er kayapu neng yuma capdi, ‘Nun podan nengdi, ila kota Yerusalem yana weksenung’ tenen, ‘Amutu ongopgenepra lyom gel beilya winmange,’ pekenunge. Angepu gum dinin, aupu ton pekenunge. “Gume, Nehemia erda, ‘Israel yala nesala, sun ila nimi deiyo ngebo kunkamne’ tenen, keteneipmare,” tenepra pekenunge. Tonda aupu pekenunge.

7 “Angeda utenepmara tep, Allah upu lap pena neng nabi-nabi nengdi, ‘Nehemia nun ila nimi deiyo ngebo kunkamsere, pepra, lap perbenkameng’ tenen, nabi-nabi neng wepra deipmare,” pekenunge. Tonda, “Nehemiadi, ‘Yerusalem mutu neitamaida, ila nimi deiyo ngebo Raja konum akurure,’ perepa amutu nesaladi gekenunge,” pekenunge. Ange tep ngeda sun yuma nun damai yamumpa, aupu moupra talenkamepe. Sanbalatdi asurat deiki upepra sekeipneupa nuksi. 8 Upepra sekeipneu dinino, nedi aupu tep ka tamupra upu peipsi. “Gume sun yumadi peserumu upuda, nundi tek sisi men kunupe. Sun yumada, sun pe tenena deiki dipu perume. Sundi perumu upuda, tek sisi men kurure.” Aupu pepsi dingeda, sun damai upu tamupra dokotepsi.

9 Ne Nehemiadi tenepsi ngeda ake. Sanbalat cap, er kayapu neng capdi utenenunge. ‘Sun Israel nesalada, nun upu gekepmengedi, kware weik kuprepa, puto boun kupmengopda, apel donun ngeda tapkameng’ tenen, kupetepsei. Dinino, nedi anesala tep kware men tenepsi. Nun nai Allah tep moropsidi upepsi. “Ne nai Allah kandi ne tep puto karepnemempa, pel telep kupra donkamne,” pepra moropsi.

10 Ataruda, nedi nimi si Metabeldi deipu ngebo er si Delaya er mi Semaya er ati besi. Ukupra besi ngeda, er men embenmanto kuramudi er atipu ai bukamngai besi. Er ati besi pangeda, erdi upepneu. “Yamempa nun butene nun nai bo Allah Yahweh er si eremna ati pumbonpu inimbenkuneme,” pepneu. “Ukupnemedi bisi buplan yuma dekdongopra inimkuneme. Dekdongopnemnyopda, ‘Nehemia popkamape’ tenen, yankameng nengda, lukunda neitamaipu yankamenga cadi, ‘Alukunda neitamaipu yana popkunung’ tenen, pepkene,” pepneu.

11 Upepneu dinino, nedi angebo Semaya tep tamupra upepsi. “Gume neda nimi tep kware kupnerepa, bura saka men benkamne. Neda ange utopu ngebo pio men kunune. Ange tep nengeda, nun nai bo Allah Yahweh er si eremna ati pumbon pio men wekra inipkamne. Ada, ‘Yuk nengdi ne popnenung’ tenen, tek sisi pio men inipkamne,” pepsi.

12 Semayadi pepneu upu gekepsidi, kael kepsi. ‘Gume angebodi pepmaner upuda, er pedipapu tenepra men pepmanere. Tonda Allahdi, angebo tep, “Aupu dopra Nehemia damai lap perberume,” men peipu. Aupu pepneunge yumada, sun yuk neng Sanbalat cap, er kabo Tobia cap, sun kayapu neng capdi, ‘Aupu pepmempa, co bo karepkamkepe,’ pepya deiki di, mok upupu pepmanere. Atep Semayadi ne tep tali minina upu deiki di ne damai yana peipmanere,’ tenepsidi kael kepsi.

13 Sun aneng Sanbalat cap, Tobia capdi tenepmarei ngeda ake. Sundi ne tep ange kupnemepa er kware kuprepa, Allah er si eremna ati inimberyopda, mali kun keca kupkamre. Amali kun keca konum kupyopda, nundi yuk nesala gekenai tep, ‘Nehemiada inimbenmarada, pio mali kupmare,’ pepmepepa, gekepmengedi, teka tenepmengopda, ‘Nehemiada nun songe,’ penkamenge. Sun aneng butene di, ‘Angebo mali kupra deipkamnem’ tenen, penmanerei. Utenepsidi kael kepsi.

14 Ange kael kepsa tep nengeda, nedi ne nai Allah tep moropsidi upepsi. “Ne nai bo Allah, sun aneng Sanbalat cap, Tobia cap, sundi ne tep, ‘Mali kuptue’ tenen, kupnerei ngeda, kan konum kael kepnemume. Atep nengeda, kandi teneamemnyane, sun aneng tep wenepkamrume. Ange utopu, tenpu ner ton er sida, nabi Noaja cap, yuk mali kunge nabi-nabi neng capdi, mali upu penenung ngeda, kandi teneamemnyane, sun aneng tep wenepkamrume. Anesaladi ne tep, ‘Aupu upepmepya deiki di er kware kupkamre,’ tenena upu penenung nesala yumada, kandi wenepkamrume,” pepra Allah tep moropsi.

Ila lyom gel beilya konum wipra gawal dakinge tep, pepu upu

15 Uda lyom gel beilya ongopgenepra wiramepu taruda, denge weik lima puluh dua (52) tumi deiki di, agel beilya uruptaminge kange di tamupra wiramepu. Wiramupkanen, war si Elul peramepu war, tanggal 25 deiki di konum gawal dakmepu. 16 Konum wipra gawal dakmepu pangeda, sun amutu neitamai kuramidi nun tep, ‘Songe,’ tenepra, mar peramsei neng yumada, ange gekepidi kwar kupupa, ‘Nunda sun cap urasin men didankamepe’ tenen, iniproi. Menmena taruda, balila weik kurami dinin, agel beilya wipra gawal dakmepu taruda, kware kupka tep, dimpepra bouna di kurami. Ada amutu nesaladi tenepi ngeda, ‘Uo, aila lyom gel beilya yumada, sun dipapu men gawal daktenge. Allah er puto deiki di melipupa menmena gawal dakmanga’ tenen, sun kwar kupi.

17 Ataru neitamai yumada, sun Yahudi yala nesala talepra “Ukunkamepe,” perami neng yumadi, surat sekra Tobia damai dokoteramidi kurami. Ange utopu, Tobiadi surat sekra sun damai dokoteramudi kuramu. 18 Ataru neitamaida, Yahudi yala nesala weika di Tobia tep, ‘Nun deiyo ngebo utopu kuserure,’ tenerami. Uteneramya deiyoda, sun yala ila ngebo er si Arahdi deipu mi Sekanyadi deipu ner mida, Tobia dopka tep, ‘Erda ila ngebo kurure,’ tenerami. Ange utopu Tobiadi deipu mi Yohanandi dopu nerda, tali ner gume.

Ada ‘Nun yala ngebo Berekyadi deipu ngebo er si Mesulamda, Tobiadi Mesulam er ner mi dopua tep, ila mambul ngebo kurure,’ tenerami. Ange yuma tep nengeda, anesala yumadi Tobia tep, ‘Kandi penkamserem upu yumada, moupra gekenkamepe,’ pepra pedina upu deiki di peiami.

19 Tonda, Tobiadi ne tep tupa surat sekra dokotemamneu ngeda, ‘Er epredi kware dakamre,’ teneamneudi asurat sekra ne damai dokotemamneue. Tonda, sun Yahudi yala nesala yumadi, ‘Tobia tep er si telep kuiptepe’ tenen, tupa-tupa ne damai yakaramidi, erdi telep kuramu keca tep, lap peramnei. Ton yuk ngeda, nedi peiamsinge yuma tep, sundi dopra Tobia damai tamupra lap perbarami.