Nehemiah 8

Allahdi, ‘Ukunkamrume, angeda ton men kunkamrume,’ peramu upu, Esradi doupra, sun Israel neng yuma tep nuku

1Yerusalem mutu neitamaida, me gwerbarami buplan damai dinin, ila go kuamudi, ati pirmanaipu, Israel nesala yuma bulupi. Buluprapidi, sundi Esra tep upepi. “Naio, Allah er si Yahwehdi, nun Israel nesala tep, ‘Angeda kunkamrume, angeda ton men kunkamrume,’ pepra deiamseu upu, gekenkamepa tep, Allahdi peiamupa Musadi sekeipseu buku, Mem Upu buku doupra duyamemdi, nukamserume,” pepi. Esrada, Allah peramu upu lap pena cap, peteremna cap deiyo ngebo kuramu.

2Upepya tep nengeda, yoneitam war dinin, menmena tumi konum kepu pangeda, Allah er si eremna ati pel doramu ngebo Esrada, Allah er si Yahwehdi peramu upu doupra duyau. Ada, Allahdi Israel nesala tep, ‘Ukunkamrume, angeda ton men kunkamrume,’ pepra deiamu upu, Mem Upu buku duyau. Israel nesalada dimpepra kunmaiyaipu, Esradi abuku duyau. Ataru kupne pangeda, aupu gekepmanto nesala yuma, Israel neng cap, nerapu cap, me gwepra yakan bisi buplan damai yan tekmaipane, Esradi abuku nuku. Ada Allahdi peipupa, Musadi sekeipu buku, Mem Upu buku nuku.

3Awar menmena tumi kepne pangeda, Allah er si eremna ati pel dona ngebo Esradi, me gwerbarami bisi buplan dam tekudi, Mem Upu buku nuku. Esradi nungmau taruda, Israel neng cap, nerapu cap, tonda aupu gekepmanto neng yuma cap, abuplan damaipu bulupra wekmaidi, pio moupra gekenmai. Esradi penmau taruda, ipna taru di nungmaupane, keteng dukduk konum kupu pangeda, konuma gawal dakudi tapu. Abuku Mem Upu buku nukra penmau taruda, sun nimi cap, nerapu cap yuma, dimpeprap bukmaidi, moupra gekenmai. ‘Aupuda mambule’ tenen, pio moupra gekenmai.

4‘Esrada Allahdi peramu Mem Upu, buku penkamar’ tenen, lyom co doupra deipmaiyai bena welepra tekudi aupu nuku. Er bena teku taruda, er dumsisi tamnada, nimi ton teki. Sun sida, Matica, Sema, Anaya, Uria, Hilkia, tonda Maseya tonpa tekmai. Ange utopu, er tebalal tara tonpa yan tekmai neng sun sida, Pedaya, Misael, Malkia, Hasum, Hasbadana, Zakaria, tonda Mesulam tekmai.

5Ukupi taruda, Esradi, arup ketenepra deipmai lyom co deiki welepra tekmaua tep, sun Israel nesala yuma, bulupra wekmai neng yumadi, tuai bukra Esra tep dinmai. Esradi, ‘Abuku nukun’ tenen, tepra deipmau taruda, abulupmai neng yumadi, ‘Gispal dopkup’ tenen, tekrapidi dinmai. 6Ukupipa, Esradi, “Nun nai bo Allah, er si Yahwehda, pio telep, ila puto ngebo kurure,” pepra gispal donmau taruda, sun abulupmai nesala yumadi, sun buru ereprapidi upenmai. “Pio tek sisi, tek sisi peprema tep, Amin, Amin pepmepe,” penmai. Upenmai dingeda, Allah er gispal dona tep, ataru dipu sun yuma nong genepdongoprapidi, tuai dinmaidi, Allah er si Yahweh tepapu, er si erepra gudinmai.

7Tonda, atarupu, Allahdi, ‘Ukunkamrume, angeda ton men kunkamrume,’ pepra menop taru peramu upuda, sun Lewi yala neng, Mem Upu peteremna deiyo neng kunmaiya cadi, anengdi, “Allah peramu upu deiyoda, ace, ace,” peprapidi, Israel nesala tep lap pepra peteremai. Sun Lewi yala neng, peteremai neng, sun sida ake. Yesua, Bani, Serebya, Yamin, Akub, Sabetai, Hodia, Maseya, Kelita, Asarya, Yosabad, Hanan, tonda Pelaya. Anengdi peteremaipane, sun atekmai neng moupra gekenmai.

8Mem Upu buku neitamai sekamu ngeda, Allahdi Israel nesala tep, ‘Ukunkamrum, angeda ton men kunkamrume,’ pepra deiamu upu douprapidi, deiyonge tep, lap pepra peterenmai. Ada, ‘Israel nesala yumadi, aupu deiyonge betapra kael kepkameng’ tenen, sekra deiaminge pasal, ayat penmai taruda, aupu deiyonge ton lap penmai. Sun Lewi yala nengdi, “Sun nai bo Allah, Yahwehdi pepra deiamseu upu ace, ace. Tonda aupu deiyoda, ukupra pepseu. Upepseua tep ukunkamepe,” pepra, lap pepra peteremaipane, abulupmai neng yumadi moupra gekenmai.

9Lewi yala nengdi, Allah peramu Mem Upu penmai taruda, Israel nesala gekenmaidi, ‘Uo, aupuda mambul weike’ tenen, engenmai. Engenmai pangeda, amutu nimi deiyo taleamu ngebo Gubenur Nehemia cap, tonda Allah er si eremna ati pumbon pel doramudi, Allah upu peteremna pel taleamnga deiyo ngebo Esra cap, tonda ataru Allah er upu peteremai neng, Lewi yala neng cap, sun Israel nesala yumadi bulupra gekenmai neng tep upepi. “Nun nai bo Allah, er si Yahwehda, atumida er ila mambul tumi kupre. Atep nengeda, Allah upu ataru pepmapnge tep, gekepra teniprumdi engena gume,” pepi.

10Upepi pangeda, Nehemiadi sun Israel nesala yuma tep, pepu. “Sunda men engenkamrum dinin, pio telep jen keca cap, tau keca cap, telep me cap, jerbenkurume. Ukupmumdi, ton tamnada yuk neng ton, atelep jen keca men keteneipmange neng tep, dopra karepkurume. Atumida, nun nai bo Allah, er si Yahweh, er ila mambul tumi kupmasere. Atep, ukutaruda, engena gume. Nun nai Yahwehdi, er melimserya deiki di, kange pingping kuserure. Atelep kange dipru kareserya deiki di, puto kemdiserure. Atep ngeda atumi engena gume,” pepu.

11Aupu pepmautopu, sun Lewi yala nengdi, sun Israel nesala yuma tep pepi. “Sun yuma dimpepkurume, mambul kange doupra engena gume. Atumida, nun nai bo Allah, er mambul tumi cadi, dipru ikin kange douna gume. Dim pepra kunkurume,” pepi pangeda, anesala yuma engenmai ngeda tapra dimpepi.

12Lewi yala nengdi upepmai pangeda, Israel nesala yuma gekepidi, abulupmaiyai tapra, sun yuk-yuk benmai. Benmaidi, telep jen keca cap, me cap jerbenmai. Tonda, atelep jen keca men keteneipmai neng tep, ton tamna bokra karerbenmai. Ukupmaidi, kange telep doupra, pingpinga di Allah er si eremai. Kange telep doupra kunmaiya deiyoda, sun Lewi yala nengdi Allah peramu upu nukrap, deiyonge jenek kupra lap penmaipa, Israel nesala yumadi, ‘Deiyo ace’ tenen, konum kael kepmaiya tep, pio kange telep doupra kunmai.

13Ukupidi, mapmaiya bereku pangeda, awarpu dinin, tumi butene ngeda, Israel nesala yuma, sun yala yuk-yuk akunmaitopu, ayala-ayala deiyo neng yuma cap, Allah er ati pumbon pel don neng cap, tonda sun melimna neng, Lewi yala neng cap, yuma bupra Esra damai yanmai. Ukupmaiya deiyoda, Allahdi nun tep, ‘Ukunkamrume, angeda ton men kunkamrume,’ pepra menop taru peiamseu upu, ‘Allah upu peteremna deiyo ngebo Esradi, aupu pepkusere’ tenen, er damai yanmaipa, Esradi aupu peterepupa moupra gekenmai.

14Allah er si Yahwehdi, ‘Angeda kunkamrume, angeda ton men kunkamrume,’ pepra, Israel nesala tep peramupa, Musadi sekeiamu bukuda, Esradi penmaupa gekepi. Abuku kwamu upu neitamai di ange ton kael kepi. Ada, abuku neitamai, aupu kwamu. Allahdi pepu. “Yoneitam war konum kepne pangeda, Israel neng yumadi, yambul bura dodin ati dopnedi, yoneitam war neitamai yumada, abura dodin ati pumbonpu kunkamenge. Ada kailya kalemkamrum taru neitamai di akati kunkamrume,” pepu. Aupuda, abuku neitamai sekeipu ngeda, Esradi epra nukupa, gekepra kael kepi.

15Tonda, aupu ton kwamupa gekepidi kael kepi. Ada, Allahdi pepu, “Yerusalem mutu neitamai cap, sun kunkamrumai yuma capda, aupu doupra lap perbenkamrume. Ada, bura tara embemumdi, co palpal neitamai di, co teru sekra duyankamrume. Aco teru yalada, nimidi kouami zaitun co teru cap, tali bura tara paramre zaitun co teru cap, cemara co teru cap, palma co teru cap, tonda co bo weik kuramre co teru cap, co bata cap gakrapmumdi, doupra yankarume. Yamum dingeda, tali bura ati utopu ati, yambul pio atep dodin ati dopkamrume. Dopmumnyopda, yoneitam war neitamai yumada, akatipu ke kunkamrume. Akunkamrumada, Allah peramupa, Musa sekeiamseu upu neitamai apeipseutopu kunkamrume,” Esradi nukra pepu. Aupu kwamunge ton gekepra kael kepi.

16Esradi aupu nukupa, gekepi dingeda, ataru dipapu, sun Israel neng yumadi, Allah upu peramutopu, bura benmaidi, co bo weik kwamu co gakrapidi, ka di tamupra, Yerusalem mutu neitamai dekanmai. Duyai dingeda, sun yumadi yuk-yuk yambul bura ati utopunge, dodin ati yana dorami. Ada, sun men di pala gel dopra, ban kupra domi ati deiki tara, yambul dodin ati dopi. Ton nengda, sun ati dam dopi. Ton nengda, Allah er si eremna ati mening damai dopi. Ton nengda, me gwerban bisi buplan damai dopi. Ton nengda, tenpu pala go kupkai neitamai dopi. Tonda Efraim yala nesaladi barami bisi buplan damai ton dopi. Ada, yuk-yukai yambul dodin ati weik dorami.

17Pumun taru, sun Persia mutu nengdi, Israel nesala tep popidi, nimi weik doupra dubeipa, dakuramyane, ka di tamupra Yerusalem mutu ukupu tamupra yai nesala yumadi, ayambul dodin ati domi. Konum dopidi, ataruda, abura ati pumbonpu ke taru tep kunmai. Ange kunmai ngeda, nimi si Nun, er mi Yesua kuramu taru di dipra, daneitam taru yumada, ange ton men kurami. Aketeng tamun, aketeng tamun denge weik neitamai yumada, Allah er gispal dona tep, yambul dodin ati dopra men kurami dinin, ataruda ka di ton cap kupi. Ukupi atep nengeda, sun yuma kange telep doupra pingpinga dipu kunmai.

18Akunmai taru neitamai, ue yoneitam tumi deikida, Esrada, Allahdi peramu upu, Mem Upu neitamai di nukra peteremau. Ada, Allahdi, Israel neng tep, ‘Ukunkamrume, angeda ton men kunkamrume,’ pepra deiamu upu, Mem Upu buku tepra nukamu. Ataru neitamai yuma, akailya kalemamidi pingpinga di kunmai. Menmena tumi di dipdongopra, yoneitam tumi kupu pangeda, sirya tumi kupka tep, gawal darbarami. Ban bari tumi konum kupu pangeda, Allah upu deiki peramutopu, sun yuma tenpuaipu buluprapidi, upu talenmai.