Neh 9 | XteSC | STEP | Ware yoneitam bari deiki, ue dua puluh empat hari konum kupu pangeda, Israel nesala yumadi, mambul kange doupidi, jen jena gum di, si tepra kunmai. Ukunmaidi, mali opkal di nonge kepdongopra, kalkal peramu tu buta dopra, sun giso deiki deipra kunmai. Ukuraminge deiyoda, sun mali kuraminge tep, ‘Uo mali kuramepu,’ tenena tep, ukurami.

Nehemiah 9

Israel nesaladi, “Nun mali kuramepu keca ace, ace,” pepra, jenek kupra lap pepidi, amalinge tapra, Allah tep mororami upu

1 Ware yoneitam bari deiki, ue dua puluh empat hari konum kupu pangeda, Israel nesala yumadi, mambul kange doupidi, jen jena gum di, si tepra kunmai. Ukunmaidi, mali opkal di nonge kepdongopra, kalkal peramu tu buta dopra, sun giso deiki deipra kunmai. Ukuraminge deiyoda, sun mali kuraminge tep, ‘Uo mali kuramepu,’ tenena tep, ukurami. 2 Ataruda, Israel yala nesaladi, ‘Nun mali kuramepu keca jenek kupra penkamepe’ tenen, yuk mutu yala neng cap wisipra men kunmai. Yuk mutu neng tep bokra wilipropi. Ataruda, Israel nesala yuma tekidi, sun mali kurami keca tep, katuai lap penmai. Tonda, sun apu yapu mali kurami keca cap tep, jenek kupra lap penmai.

3 Sun atekmai taru neitamai dipapu, Allahdi Musa tep peramupa, sekeiamu Mem Upu neitamai dopra nungmai. Sun nungmai bukuda, ada Allah er si Yahwehdi, “Angeda ukunkamrume, angeda men kunkamrume,” pepra deiamupa, sekeiamu upu nungmai. Keteng weneri deiki di ukupra konum nuki dingeda, sun mali kuraminge tep, keteng weneri deiki di, katuai lap penmai. Konum lap pepi dingeda, sun nai bo Allah, er si Yahweh tep, er si ereprapidi gispal dopi.

4 Lewi yala neng tengna tep, co moropra lakra deiamyaida, Yesua, Kadmiel, Bani, Sebanya, Buni, Serebya, Bani, Kenani cap, tekmai. Sun aneng bena tekidi, ila upu deiki di sun nai Allah, er si Yahweh tep, moronmai. 5 Ataruda, Lewi yala nengdi gonga kepra, Allah tep moronmai. Moronmai neng sun sida ake. Yesua, Kadmiel, Bani, Hasabneya, Sherebiah, Hodia, Shebaniah, tonda Pethahiah cap moronmai. Upenmai, “Sun yuma tekroso. Sun nai bo Allah, er si Yahweh tep, si eremkurume. Yahwehda, pumun di akuramngane, ukutaru pe, doryankamre taru peda, apio kunkamre ngebo, Allah er si eremkamrume,” penmai. Sundi penmai upuda ake.

“Nun nai Allah, kan si ila mambule. Kan cap, kan si cap tep, ‘Pio telepe, nimi ban-ban yuma kan si kael keptenge’ tenen, pepkepe. Yuk-yuk keca, kandi kareserum keca yuma tep, ‘Angeda yambul mambule’ tenen, ‘Telepe,’ peptepe dinin, kan tenpu tep nengeda, pio ila di kan si eremnupe. Yuk telep keca yumada, kan amutara kurepa, kanda ila si eremna ngebo deiki tara kuruma cadi, ‘Kanda ila mambule,’ pepkepe. Yuk keca yumada yambul mambul pua. Atep nengeda, kan tep pio si eremkamkepe,” pepra si eremai. 6 Tonda, sun Israel nesaladi, upepi.

Yahweh kan puda, tek sisi Allah kurume. Yuk ton men kurure. Kan dipapu im deiki ketekepra deipmume. Kan dipu im neitamai kure keca kuru cap, war cap, keteng cap akeca-keca yuma ketekepra deipmume. Tonda, laut mokon cap, laut mokon neitamai kure keca cap, tuai mutu cap, tuai mutu neitamai kure keca cap, ayumada kan dipu ketekepra deipmume. Ukupmumdi, akeca-keca yuma gam kuna tep, isin karepmumdi, melimempa, tupa gam kununge. Ange tep nengeda, im deiki jen talepra kunge malaikat yumadi, kan gispal dona tep, giso genepdongopra si eremkenunge.

7 Nun nai bo Allah, kan Yahweh dipapu nun apu bo Ur-Kasdim mutu nimi kan-kan kuramupane, ‘Angebo telepe’ tenen, Abram wepra deiamume. Ukupmumdi, Abram doupra yanamume. Ukupmum dingeda, er si ukupu si Abraham pepra, karepmume. 8 Abraham wepra deipmuma deiyoda, kan tep teka teneramkeudi, pio men tamamkeupa diramuma tep, wepra deipmume. Ukupmumdi, Abraham tep, “Kandi deipmempa, dadeipdanen bankamenge nesala tep, telep mutu karepkamsene,” pepra deiamumdi pedina upu karepmume.

Abraham tep, ‘Amutu-mutu yuma karepkamsene,’ pepra deipmum mutu, amutu kunge neng sun yala sida, Kanaan mutu neng cap, Het mutu neng cap, Amori mutu neng cap, Feris mutu neng cap, Yebus mutu neng cap, Girgasi mutu neng cap, kurami. Kandi Abraham tep, “Ayala neng yuma, sun talepra kunge mutu-mutu yuma dopra, kan nyapu tep karepkamne. Ada, kandi deipmempa dadeipdanen dorbankamenge nyapu tep, karepkamne,” pepra deipmume. Allah kanda, pio dumsisi kurum ngebo cadi, kandi peamsemumtopu konum kupmasereme. Sun Lewi yala nengdi pepi.

9 Upepidi, aupu ton dukdongopra pepi. Allah kandi nun apu yapu Mesir mutu neitamai pel doramidi, ikin kange doupra kurami taruda, kan diramumdi kael keamume. Tonda, nun apu yapu laut mokon Teberau damai engepra mali penmaipa, gekeramume. 10 Gekepmumdi, Allah kan dipapu Firaun cap, er amutara deiyo neng cap, er mutu neng tali neng yuma cap, diramipa, kandi nimi men kupmanto keca, kunupsek pen pel weik doramume. Ukuramumada, ‘Amutu nengdi akeca epmengedi, ‘Uo, tek sisi Allah dipapu apel donmasere, tenepkameng’ tenen, kuramume.

Ukuramuma deiyoda, sun Mesir mutu nengdi, balila weik kuramidi, kan nyapu neng tep, ikin keca sun nong deiki derirami pangeda, kandi ila mambul pel weik doramume. Kunupsek pen pel doramuma deiki di, kan si weike keipdamumpa, ataru kurami nesala yuma kael keami. Ukupmuma tep, ukutaru peda, nimi ban-ban yumadi, kan si gekepmengedi, ‘Angeda ila mambule,’ tupa tenenunge. Ton nengda, kan si tep ila di eremnunge.

11 Pumun taru, nun apu yapu Israel neng, sun dinmaiyaidi ila laut mokon cepra deipmumpa, tu kal kupka deiki di, goupra bei. Dinino, ‘Israel nesala popkup’ tenen, domyakanmai neng Mesir nesalada, kan puto deiki di, me getepdongopra popmume. Nimidi gel dopra ila me mokon neitamai dokotepmengepa, me pumbonpu sakrepa, me jeramretopu, Mesir nesala laut mokon neitamai keteneipmum bisi wengyai taruda, kandi mambul pel dopmuma deiki di, aneng sun nong deiki me getepdongopmumpa, jepropu. Aneng yuma popra gawal dakmume.

12 Tonda, nun apu yapudi, ‘Dan bisi benkup do?’ tenen, ‘Sun kange wang-wang peprur’ tenen, sun makuna tep, kandi keteng komuni taruda, ila dua dopra deiamumpa, ayumnya co utopu tekamudi, mepra baramupa, sun amenda tara barami. Lukunda taruda, ila uku bu kareramumpa, tekamupa ne, dirin weik kuamu bisipu nun apu yapu epra barami. 13 Tonda, kan im deiki di kwerepra, Sinai mutu deiki tengyamumdi, Israel nesala gekenai tep peiamume. Ataruda, kandi, “Angeda ukunkamrume, angeda men kunkamrume,” pepra, im deiki di dumsisi upupu pepra deiamsemume. Apeiamsemum upu yumada, tek sisi telep upupu kurure.

14 Tonda, kandi, “Yoneitam tumida, ne Sabat tumi, ila tumi tep, atumi neitamaida, pel yuma dona gum di, teleppu kunkamrume. Lengnapu kunkamrume.” Tonda, “Angeda kunkamrume, angeda men kunkamrume,” pepra, kan pel dona ngebo Musa deiki peiamumpa, Musadi sekeiamseudi lape peamseu.

15 Ukuramumdi, nun apu yapu, sun jen putaramu taruda, im deiki di mana kwaneng weik dokoteramumpa, bupra jerami. Tonda, me putaramu taruda, gat gel neitamai di, me karepmumpa, pakra yaupa jepi. Tonda, pumun taruda, kan buru erepmumdi, kandi nun apu yapu tep, “Ne si deiki di, telep mutu karepkamsene,” pepra, pedina upu deiamsemume. Amenda taruda, kandi sun tep, “Ukutaru amutu konum karepsena tep, adipapu amutu wengbemumdi talepra kunkamrume,” pepra deipsemume.

16 Kandi akeca-keca yuma weik kuramsemum dinino, nun apu yapu, balila kupidi, kandi, ‘Angeda kunkamrume, angeda men kunkamrume,’ pepra peamsemum upu men gekepmanto kuramidi, ‘Ange yumada nun songe,’ teneramidi, kan upu gekepra men dombarami. 17 Kandi sun tep bicau tenepra, telep kuna tep kuramum kecada, luproami. Tonda, sun damai kunupsek pen pel doramumnge yumada, tupa men teneramidi, luproi. Kan peramum upu yanipidi, balila weik kupra gemeramidi, ‘Mesir mutu ka tamupra dubeserepa, sun amutara tali pel don neng kunkamep’ tenen, sun pedi nimi deiyo ngebo wepra deipi.

Mali weik kurami dinino, Allah kanda nimi yuma mali kunge keca kaukemna deiyo ngebo kurume. Menmena men derepsememdi, kan kange dipapu ila bicau tenesememdi, weika di melimserume. Bicau tenesemem ngeda, ila weika di bicau teneserume. Ukuruma tep nengeda, nun apu yapu men tamamume.

18 Ukuramumpapu, sundi tamupra sapi bisam mi urasin utopu ketekepra deipidi, “Nun Mesir mutu di doupra yanamseu Allahda, adano,” pepra er sipu erepidi, Allah kan si yanipkei. Tonda, kandi, ‘Angeda ne pio songe,’ tenemem kecada sundi akecapu kurami. Tonda, sundi kan nong deiki mali upu pediramkeinge peda, kaukepmumdi, men tamamume.

19 Nun nai Allah, kandi ila bicau teneramsemumdi, kupsemuma tep, nun apu yapu, me gumai katuai mutu neitamai yakarami taruda, men tamamume. Sun tep bicau tenepra tupa meliamume. Ukuramumada, keteng komuni barami taruda, ila dua ayumnya co utopu kupra, tekra mepra baramupa amenda dombarami. Ange utopu, lukunda taruda, ila uku bu dirin kwamudi, ayumnya co utopu tekamupa, adirin deiki di sun barami bisi epra barami. Mali kuramya peda, adua cap, auku bu cap, kange di tamupra men dopramume.

20 Tonda, kandi sun kael kemna tep, kan sambala sun damai dokotepmume. Tonda sun jena tep, im deiki di, mana kwaneng dokoteramumpa bupra jerami. Sun me putaramu taruda, sun me jena tep kareramume. 21 Nun apu yapuda, me gum katuai mutu bisi barami taruda, keteng tamun empat puluh deiki di, ‘Aneng depnung’ tenen, kandi sun tep pio kalekra meliamume. Akatuai mutu embarami taru yumada, sun putaramu keca yuma melipra karepbaramume. Kandi sun tep, ton men tamamume. Tupa meliamumpa, sun opkal ton men gweliamu. Sun yan ton nepra pu men jeramu. Teleppu kurami.

22 Angepu gum dinin, tonda, kandi meliamuma deiki di, sun wengbenkami mutu talepra kurami neng yuma popbisipidi, wengbei. Wengbeidi amutu talepra kurami. Mening damaipu gum dinin, karen mutu peda, kareramumpa, dororami. Hesbon mutu ila nimi deiyo ngebo, Sihon talepra kuramu mutu bena dopropidi, talepra kurami. Tonda, Basan mutu ila nimi deiyo ngebo Og, erdi taleamu mutu bena dopropidi, talepra kurami.

23 Kandi meliamuma deiki di, Israel nesala sun nyapu pio weik kareramumpa, kuru im deiki ingamra utopu, anesaladi nyapu weik deriramipa gung weik kupbarami. Tonda, kandi nun nai yapu tep, “Telep mutu karepkamsene. Amutu wekmumdi talepra kunkamrume,” pepra peamsemum mutu, sun derirami nyapu tep karepmume. Karepmumpa dopropidi, dimpepra teleppu kurami.

24 Sundi derirami nyapu amutu wengbeidi, talepra kurami. Kandi puto kareramumpa, amutu taleami neng, Kanaan yala nengda, Israel nesaladi porbisiramidi, sun mutu talepra kurami. Ada, kandi meliamuma deiki di, sun Kanaan tara ila nimi deiyo talepra kurami neng cap, sun amutara tali kurami neng cap, nun apu yapudi aneng yuma porbisiramidi, sun teneramitopu wenemamidi, portamami.

25 Israel nengdi, amutu ila gel beilya wina tep, gel yakra deipnedi welepra, ongomgenepra wiramidi, ila ati arum dopropi. Tonda, telep wa tu cap, telep tu cap, bena dopropi. Tonda, isomka nengdi talepra kurami ati cap, ati neitamai talepra menengami keca cap, telep-telep keca cap bena dopropi. Tonda, amutu nengdi palirami mokon cap, sun talerami me bungna cap, anggur tapu wa tu cap, zaitun co kouramipa du mouramu mutu cap, yuk yala co du mouramu co cap, bena tali lupra doprami. Dalupra dopramidi, jeramipa, sun nong telep neramidi, sun kange telep doupra kurami. Kandi nun apu yapu weika di meliamumpa telep pingping kange doupra kurami.

26 Ange-ange yuma teleppu kuramu dinino, nun apu yapudi, kan peramum upu yumada, bisbisa kapra yaniptapidi, ‘Allah peserur upuda nun songe, ange men kunkamepe,’ teneramidi, mali kecapu kurami. Kandi, ‘Ukunkamrume,’ pepra, Mem Upu peramuma utopu, pio ton men dukdongopra kurami. Ukuramya tep nengeda, kan upu lap pena nengdi, “Nun mali kuramep ngeda, tapmepedi nun nai bo Allah, er upupu gekepra kunkamepe. Er damai ka tamupra bepedi, er cap dipru dukdongopra kunkamepe,” perami neng yuma popra tamami. Tonda kan cap, kan si cap tep, pio mali upu pepra, ila mali kemdongoramkeidi, kandi, ‘Akecada ne song cadi, pio men kunkamrume,’ peamsemum ngeda ange ton kurami.

27 Ukuramya tep nengeda, kandi sun podana neng tep, puto sun deiki deipnepa, anengdi nun apu yapu yana porami. Popbisiramidi, Israel neng sun nong deiki ikin pel deriramipa, Israel nesala, sun kange mun kuramu pangeda, “Uo, nun nai Allah, kandi makupseo,” pepra mororami. Moropne pangeda, kan im deiki di gekepra men kaukemamume. Sun tep pio bicau teneramuma tep, Israel neng melimna tep, yuk neng damai puto deipnepa, Israel sun podan neng bena porbisirami. Popbisipya deiki di, Israel nesala lyemdoramume. Ada tenpu taru dipu gume. Ataru-ataru yuma angetopu lyem doramsemume.

28 Sun tep tupa melipra lyem doramumpapu, nun apu yapu, sun ikin kwamunge gum kupu pangeda, kange deipra kurami taruda, adipapu ka tamupra, sundi mali keca ton tupa kurami. Ada, kandi, ‘Angeda mali kun keca cadi, ne songe,’ peamsemum ngeda, ka di tamupra kurami. Ukupya tep nengeda, kandi Israel nesala tapmumdi, yuk mutu neng damai puto karepnepa, sun podan nengdi porbisiryakaramidi, Israel neng ka di ton cap taleramidi, ikin keca sun nong deiki deriramipa, mambul kange doupra engerami.

Sun kange mun kange doupra engeramidi, “Uo, nun nai Allah, kandi makupseo,” pepra mororami. Moropne pangeda, kan im deiki di gekepra kaukemamumdi, sun tep pio bicau teneramuma deiki di, Israel neng melimna tep, sun kan-kan dinin, yuk neng damai puto deipnepa, sun podan neng bena porbisirami. Popbisipna deiki di, Israel nesala lyem doramsemume. Ada tenpu taru dipu gume. Ataru-ataru yuma angetopu lyem doramsemume.

29 Israel nesala mali weik kurami taruda, sun tep kandi kurpetenange karepmumdi, “Nedi, ‘Angeda kunkamrume, angeda men kunkamrume,’ pepra peipsi Mem Upupu ka di ton cap gekepra dombankamrume. Ukupmumdi telep kunkamrum dinin, gum dingeda, wenemkamsene,” pepra deiamume. Wenemamum dinin, balila kupra gemeramidi, kan peramum upu yaniptapidi, sundi tenepi ngepu kurami. Kandi peramum upu tali yaniptapra bisinapu kurami.

Dinino, ware ngebo do yuma, kandi, ‘Angeda kunkamrume, angeda men kunkamrume,’ peamsemum upu moupra gekepredi, dombaryopda, angebo tek sisi gam kunkamre. Dinino, ataruda Israel nengdi, balila weik kuramidi, ‘Allah er upuda pio men gekepra kunkamepe,’ pertamamidi, kan tep amnyo karekrapidi, yuk tara keproi. Kan upu men moupra taleamya deiki di, ila malipu kurami.

30 Ukupra ukuramipane, kandi keteng tamun, keteng tamun denge weik neitamaida, sun mali kurami keca tep epra kael keamum dinin, menmena yu men kupkeupa, sun tep men wenepra portamamume. Ukuramumdi, ‘Sun mali kunge kecada, sun pedi kael keptenge’ tenen, kan sambala dopra nabi neng karepnepa, kan upu lap perami deiyo neng, sun dipru neitamai pel doramu pangeda, anabi neng deiki di kandi pediramumpa, anengdi Israel nesala tep, ‘Ukuna meme,’ pepra wenemami. Kan upu lap pepra peteremna nengdi peteremamidi, wenemami dinin, sun Israel neng, nun apu yapudi tupa men gekerami. Men gekeramya tep, kandi tamupra yuk mutu neng puto karepmumpa, Israel neng poryakarami. Ada, sun Israel neng kurami mutu damai nengdi, sun tep yana porbisirami.

31 Sun yuk mutu nengdi, Israel neng tep poryakarami dinin, kandi sun tep pio bicau teneramumdi, men tamamume. Kandi, ‘Anengda, pio mali neng cadi, adipapu poptapkune,’ teneramtum dinino, sun tep pio men tapmumpa, yuk mutu nengdi popbisipidi, gawal men dakami. Nun nai Allaho, kanda tek sisi nimi tep pio bicau tenesememdi, tupa ukutaru peda melimserume. Nun mali kurameptopu, men wenepra potamserume. Yambula dipu wenemserume.

32 Ange tep nengeda, ukutaruda nun Israel nengdi mali kuramepupane, kandi pel weik doramsemumdi, lyem doramsemum ngeda, ‘Angeda mambul gume. Anengda dakwapye, dapoptenge’ tenen, men tamkamserume. Mali kuramepupane, kandi ikin keca deriramsemum ngeda, tupa tenenkamserume. Ada, nun ataru kunup neng ikin kuserenge cap, nun ila nimi deiyo talepra kurami Raja neng tep, ikin kuramunge cap, nun upu bongdina deiyo neng tep, ikin kuraminge cap, kan si eremna ati pumbon pel dona deiyo neng tep, ikin kuraminge cap, kan upu lap pena deiyo neng tep, ikin kuramunge cap, nun apu yapu tep ikin kuramunge cap, tupa tenenkamserume.

Uda kan nyapu yuma tep, ikin kuramunge yuma tep nengeda, ‘Ange yumada mambule gume,’ men tenenkamserume. Sun Asyur mutu nimi deiyo nengdi, nun tep talepra, ikin keca nun nong deiki deriramseidi, adinen dipdongopra, ukutaru peda ikin kuserurnge tep, ‘Angeda ikine gume, men tenepkamserum’ tenen, morokenupe.

Nun nai Allah, kanda ila puto ngebo kurume. Tonda, kanda akeca-keca deiki tara kure ngebo kurume. Tonda, yuk mambul keca akwapmarepapu, kanda ila mambul ngebo tenpu kurume. Yuk keca yumada, yambul mambul pua. Kandi bicau teneramsemuma deiki di, “Bicau tenesenuna cadi, ukupra kunkamsene,” pepra, deiamsemumnge yumada, tek sisi kurume. Tenpunge peda men tamserume. Kandi pio tupa melimserume. Atep nun ikin kuserur ngeda, tenepsememdi makunkamserume nai.

33 Naio, nun tenenup ngeda, pepkupe. Nunda mali-mali weik kuramepupane, kandi nun wenemna tep, ikin keca kareramsemum ngeda, dumsisipu kuramume. Kanda mali keca tenpunge peda men kuramume. Kandi, ‘Ukunkamsene,’ pepra pediramsemum upu yumada, tek sisi tupa kuserume. Tenpunge peda men tamrume. Nun puda, mali weik kuramepu.

34 Nun kaele, nun deiyo talepsei Raja neng cap, sun amutara dinin nun yala deiyo neng cap, kan si eremna ati pumbon pel dona deiyo neng cap, nun apu yapu cap yumadi, kandi peamsemum upu moupra men gekeramidi, mali weik kurami.

Mali kuramipa, kandi, ‘Ukuna meme. Angeda tupa kupmumnyopda, wenepkamsene,’ peamsemumpane, sundi ange yumada men gekerami. Tonda, kandi, ‘Angeda kunkamrume, angeda men kunkamrume,’ pepra deiamsemum upuda, nun deiyo-deiyo neng yuma gekena gum di, men dombarami.

35 Nun nimi deiyo neng akeca talepra telep kurami taru neitamai peda, kandi kareramsemum keca, pio telep keca dopra kuramidi, pingpinga dipu kurami. Telep kurami dinino, ataru peda, Allah kan tep, moupra men tenerami. Pio telep mutu, pala weik mutu kareramsemum ngeda, tu telep kwamu mutu cadi, akeca-keca yuma telep kupra paramu. Teleppu kupra kurami dinin, ataru neitamai peda, kan amutara kupramidi, kan pel tenpu peda men doramkei. Tonda, sun mali-mali kurami ngeda, men tamami.

36 Nun nai Allah, diseo. Nun apu yapudi, pio mali weik kurami dinino, nai nun ukutaru kunup nengda, kan kaele. Nunda yuk mutu deiyo nengdi talesengedi, ‘Nun pel tali pel dopseo,’ pepra, ikin pel dimsenunge. Amutu neitamaida, ikin dipu kunup dinin, kandi nun apu yapu tep, amutu tek sisi karepmume. Ada, ‘Ne nyapu, Israel nengda, amutu paramre keca yuma kipra pingpinga di jenkamenge. Tonda, amutu co du yuma dakrapmengedi, telep kange deipra kunkamenge,’ tenen, nun apu yapu tep, telep mutu kareramume. Dinino, ukutaru apel donupnge yumada, yuk mutu deiyo neng tepapu donupe. Atep kandi diserume.

37 Uda nun kaele. Nun pio mali weik kuramepua deiki di, wenemserume. Atu deiki wa penupnge yumada, weik bongopredi, weika di nong kurepa kinup dinin, nun talesenunga deiyo neng, yuk mutu deiyo neng dipu dalupra doronunge. Nun wenemna tep, kandi adeiyo neng doupra, nun deiki tara deiamsemume. Anengdi, sun tenemengetopu, nun cap, nun peinup keca cap tep, puto di talesengedi, ikin keca nun nong deiki derisenunge. Atep nun nai Allah, ange-ange yuma tep nengeda, nun pio kange mun kuserure. Sun Lewi yala deiyo nengdi aupu yuma pepidi, Allah tep moropi.

38 Aneng upepi dingeda, aupu ton dukdongopra pepi. “Ange yuma tep nengeda, nun nai Allah, nun Israel nesala yumadi, pedina upu pepkukepe. Ada, nun Lewi yala deiyo neng cap, Israel nesala upu bongdina deiyo neng cap, ila nimi deiyo talenge neng cap, Allah kan si eremna ati pumbon pel dona deiyo neng cap yumadi, aupu pepmepedi, surat neitamai sekeipkupe. Sekeipmepe dingeda, adeiyo neng yumadi sun peten kemdina keca ton, asurat deiki deipkamenge. Deiyoda, ‘Aupu yuma nun teka tenenupa cadi, angepu kunkamepe,’ tenena tep, sun si asurat deiki sekamenge.

Aupuda, ataru dipu pepmepe. Nun yumadi, kan peamsemum upu, Mem Upu moupra gekepmepedi, aupu talepra dombankamepe. Upepra deipmepe.” Sun Lewi yala deiyo neng cap, sun Israel yala neng cap yuma, kikiman pepidi, aupu sekra deipi.