Num 10 | XteSC | STEP | Allah er si Yahwehdi Musa tep pepu.

Numbers 10

“Lyom bung-bung pena keca er si terompet pena gekeprumnya deiki di, keteneiprumdi, yuk mutu benkamrume,” peipu upu

1 Allah er si Yahwehdi Musa tep pepu. 2 Bung-bung pena butene gat keca, er si perak deiki betaipkurume. Ukupmemdi, akeca deiki di, Israel nesala upupmempa, gekepra kan dam bulupra yakankamenge. Ton ngeda, sun opkal bol di keana dodin tenda ati urupra benkunge taru upupmempa, gekepra kan dam yangepa, ‘Amutu tapra bendopso,’ pepra lap penkamrume. Atep nengeda, bung-bung pena butene, er si terompet butene betaipkurume pepkene. 3 Abetapmem keca butene deiki, ila upu di, upupmem taruda, sun Israel neng yuma gekepmengedi, ‘E, ada bulupra Allah cap, nimi cap, antamna tep, opkal bol di tenda ati domrumnge, Allah er si eremna ati, opkal bol di keana dodin tenda ati buplan dam yakana tep upupmasernge’ tenen, adipapu sun Israel nesala yuma yakankamenge.

4 Dinino, bung-bung pena keca, tenpungepu upupmem pangeda, Israel nesala, sun yala yuk-yuk akuretopu gekepmengedi, ‘E, nun deiyo-deiyo neng bulupra, Musa damai yakana tep upupmasere’ tenen, kael kepmengedi, adipapu sun Israel nesala yala-yala deiyo neng yuma, kan damai bulupra yakankamenge. 5 Bung-bung pena tenpunge deiki di, upuna ila di pepmemnyopda, Israel nesala keteng yakan tara opkal bol ati dopra kunung neng, sun bana tep upupkamrume. Upupmempa, gekepmengopda, sun opkal bol ati urupra amutu tapra yukai benkamenge.

6 Utopu ton, atarupu dinin, ue butenenge upupmem pangeda, itara opkal bol ati dopra kunung neng, sun bana tep pepkamreme. Angeda, bung-bung pena ila di pung pepmem pangeda, itara Israel neng gekepmengedi, ‘E ada amutu tapra, yuk mutu bisi bana tep, upupmasere’ tenen, kael kepmengedi, bankamenge. 7 Dinino, lyom bung-bung pena di doupra, pung pepkamrum dinin, lelim yambul yuktoto pepmemnyopda, ada Israel nesala yuma gekepmengedi, bulupra yakana tep, pung pepkamrume. Ange upupmem dingeda, ada sun Israel nesala yuma bulupkamenge.

8 Bung-bung pena er si terompet, yuma taru yuma penkameng nengda, tali nengdi men puptenge dinin, Harun er nyapu dipu pung pepkamenge. Ada anengda, Allah ati pumbon pel dona deiyo neng kununga cadi, sun dipapu penkamenge. Ange pepmasenada, ataru di dipdongopra doryankamre taru neitamai yuma, sun cap, sundi deipmumpa dadeipdanen bankameng nesala peda, utopu kunkamenge. Pio men tapkamenge.

9 Ukupmanto, sun pe mutu neitamai dinin, yuk mutu nengdi sun Israel nesala tep, ‘Aneng popbisipmepedi, ikin keca sun nong deiki derinkamepe,’ tenepsengepa, aneng porbenkurum taruda, lyom bung-bung pena, er si terompet deiki di ila di pepmum pangeda, neda sun nai bo Allah Yahwehdi gekepsenedi, sun podan neng damai di melipra lyemkamsene.

10 Utopu, sun kange derin taru yuma peda, terompet deiki pung penkamrume. Ada ukupu bungre war cap, tonda nedi, ‘Ne si eremna tep, sun ila kailya tumi ake,’ peiamsitopu, aila tumi konum kepyopda, ne Allah gudina cap, gispal dona cap tep, sundi lyom bung-bung pena, er si terompet pung pepkamrume. Upepmumpa, neda sun nai bo Allah, Yahwehdi gekenkamsene.

Tonda, sun mali kuramrum keca tep, wenepra poptapsetene dinin, sun yo pununa tep, gam keca popra ne tep karepmumdi, uku dongorbenkumum taruda, lyom bung-bung pena, er si terompet deiki di pung penkamrume. Ange utopu, ne cap sun cap kikiman telep kuna tep nengeda, gam keca popra karenkomum taru peda, lyom bung-bung pena, terompet deiki di pung penkamrume. Neda, sun nai bo Allah, Yahwehdi pepsene.

Israel nesaladi, Sinai mutu dam gopra yuk mutu bei upu

11 Israel nesalada, Mesir mutu kuramya tapra, Sinai mutu dam yai taru di nukra keteng tamun butenenge konum mapyopda, tonda war butenenge Februarito konum kepudi, tumida tanggal 20 deiki di, atarupu Allah er si eremna ati, lyom okpal bol ati deiki tara, ila dua bum tekamu ngeda, welepudi gopra beu. Ukupka tep, sun Israel nesala peda, gonga kepra gopra bei.

12 Ada, Allahdi kareramu ila dua gopra embaramutopu, ange diramidi, adua embaramutopu, sun Israel nesala peda melipra barami. Ukupra kuramya cadi, adua embaramutopu, sun men di kurami mutu, Sinai mutu damai di gopra, mo gum tep nimi men kurami mutu, bura tara katuai mutu neitamai talipu embaramyane, amenda taru katuai mutu, mo gum tep nimi men kurami mutu, amutu si Paran mutu, adua bena teku. Adua bena teku pangeda, Israel nesala peda Paran mutupu bena, sun opkal bol di keana dodin tenda ati deipidi amutupu kurami.

13 Amutu benkoi taruda, menmena gonga kepra embarami taru cadi, Allah er si Yahwehdi Musa tep, ‘Ukutaru Sinai mutu tapra yukai benkurume,’ peipu pangeda, Musadi Israel nesala tep lap pepupa, gekepidi, gopra bei. 14 Ataruda menmena mepra bei nengda, sun Yehuda yala neng mepra bei. Yehuda yala neng, sun bisi bana tep deiyo kepu ngeboda, er si Nasondi kepu. Nason er nai bo sida, Aminadab kuramu. Ukupupa agung-agung tep, nimi yuk-yuk deiyo kepra, bendera deiki sun yala si sekra talepidi, akeca talepra sun adipapu menmena mepra bei.

15 Ange ukuramitopu, Israel nesala sun yala-yala yuk-yuk akuramitopu, deiyo neng wepra deipipa, bendera talepra barami. Nataniel er mi Zuardi, Isakar yala neng tep, sun deiyo ngebo kepudi mepra beupa, Isakar yala neng cap melipra bei.

16 Ange utopu, Helon er mi Eliabdi, Zebulon yala neng tep, sun deiyo ngebo kepudi mepra beupa, Zebulon yala neng cap melipra bei. 17 Ayala nesala butene konum mepra banmai pangeda, ataruda Allah er si eremna ati doupra bankamenga tep, akatida opkal bol di keana dodin tenda atida uruprapidi, Gerson yala neng cap, Merari yala neng capdi, akeca yuma doupra bei.

18 Ukupi dingeda, Elizur er mi Syedurdi, Urben yala neng tep, sun deiyo ngebo kepudi mepra beupa, Urben yala neng, sun yala si bendera deiki sekra talepidi, melipra bei. 19 Ange utopu, Zurisadai er mi Zelumieldi, Simeon yala neng tep, sun deiyo ngebo kepudi mepra beupa, Simeon yala neng cap melipra bei. 20 Ange utopu, Dehuel er mi Eliyasapdi, Gad yala neng tep, sun deiyo ngebo kepudi mepra beupa, Gad yala neng cap melipra bei.

21 Gad yala neng konum gonga kepra bei pangeda, Kehat yala nengdi, Allah er si eremna ati pumbon moupra deiami keca, Allah gispal dona tep pel doraminge, ila mambul telep kecada, Kehat yala nengdi akeca dopra banmai. Sun Gerson yala neng cap, Merar yala neng capdi, Allah er si eremna tep, opkal bol ati uruptapinge, doupra konum mepra banmaiya cadi, utenepi. ‘Akati uruptapi keca yuk mutu bena, menmena akeca konum ketenepra deipmenge pangeda, Kehat yala nengdi, akati pumbon moupra deiamepu mambul keca dopra, amenda taru yangedi, akeca akati pumbon ka di ton cap dongopkamenge,’ tenepidi yuk-yuk bei.

22 Ukupi dingeda, Amihud er mi Elisamadi, Efraim yala neng tep, sun deiyo ngebo kepudi mepra beupa, Efraim yala neng, sun yala si bendera deiki sekra talepidi, melipra bei. 23 Ange utopu, Pedazur er mi Gamalieldi, Manase yala neng tep, sun deiyo ngebo kepudi mepra beupa, Manase yala neng cap melipra bei. 24 Ange utopu, Gideoni er mi Abidandi, Benyamin yala neng tep, sun deiyo ngebo kepudi mepra beupa, Benyamin yala neng cap melipra bei.

25 Ukupbaramya amendada, sun tenerami utopu, Dan yala neng tep nengeda, Amisyadai er mi Ahieserdi, sun deiyo ngebo kepupa, sun yala si bendera deiki sekra talepidi, Dan yala neng melipra bei. 26 Okran er mi Pagieldi Asyer yala neng tep, sun deiyo ngebo kepupa, Asyer yala neng cap bei. 27 Enan er mi Ehiradi Naftali yala neng tep, deiyo ngebo kepupa, Naftali yala neng cap bei. 28 Angeda sun Israel neng embarami taru yuma, benkun taru kurami ngeda konum lap pepmap adano.

29 Musadi er yamal bo Rehuel, er mi Hobab Midian mutu ngebo tep upepu. “Nunda Allah er si Yahwehdi, ‘Atelep mutu karepkamsene,’ pepra pedina upu deiki peamseua tep benkamepe cadi, kanda nun cap kikiman benkamepe. Kan cap kikiman kupmepyopda, nundi kan tep, telep kupra melimkamsepe. Angeda mesum tep men pepne.

Deiyoda, nun nai bo Allahdi, ‘Sun Israel nesala tep nengeda, pio telep keca karepsenedi, teleppu kupra deipkamsene,’ pepra pedina upu peamseu. Atep, kan cap nun cap kikiman bepyopda, nundi kan tep, melimkepepa, telep kupra kikiman kunkamepa tep pepkene,” Musadi Hobab tep pepu. 30 Upepu dinino, Hobabdi Musa tep tamupra pepu. “Gume naio, nedi men melipkukene. Tamupra ne kayapu neng cap, ne yala neng cap sun koripu, ada ne mutu sisa tamupra benkune,” pepu.

31 Upepu pangeda, Musadi tamupra pepu, “Uo ne kabo, kandi nun tapra bana gume. Kanda ila kael ngebo kuruma cadi, me gumai tep nimi men kunge mutu neitamai embenkamep taru neitamaida, kandi, ‘Bisi bana telepaida, aca,’ pepra dubankamsereme. Ukupsemem dingeda, sun opkal bol ati derinai tep nengeda, kandi, ‘Aca telepe,’ pepsetumpa, amutupu nun ati deipkamepe. 32 Ukupsemem pangeda, Allah er si Yahwehdi nun tep, telep kun keca karepkamser ngeda, kanye ton bokra karepkamkepe,” Musadi Hobab tep pepu.

Israel nesaladi, ‘Kanaan mutu benkamep’ tenen, Sinai mutu tapra bei upu

33 Allah er si Yahweh, er ke taru kuramngai Sinai mutu, Israel nesala konum tapra beidi, bisi barami taruda, ue weneri mapbarami. Ada Allahdi, “Ukunkamrume, angeda men kunkamrume. Ukupmumnyopda, nedi melimkamsene,” pepra, pediramu upu kipdongopra dekdongomi co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 39:35 dinkurume.} doupra barami. Ada, ton nengdi abekine doupra mepra ban pangeda, yuk Israel nesala yumada, amenda tara melipra barami. Bisi mapbaramyane, ‘Dan mutu bena bepe peikamep do?’ tenen, mapbarami taruda, Allah upu kipdongomi bekine doupra mepra baramipa, ila dua bena tekne pangeda, amutupu bena di, opkal bol di keana dodin tenda ati dopra deipnedi, amutupu marami.

34 Israel neng sun opkal bol dodin ati uruptaprapnedi, komuni bisi ban taruda, Allah er si Yahwehdi ila dua karepnepa, sun barami bisi deiki tara kikiman baramudi, sun damai pio melimamu. 35 Allahdi peiamu upu kiami co lase, er si Peti Perjanjian, amambul bekine doupra embana tep benkoi taru yumada, Musadi uperamu.

“Nun nai Allah Yahweh, kan puto di tekra mepmempa, ‘Kan tep yu tenenge neng cap, nunda kan mawa nesala cap tep, yu tenesenung nengda, kandi melipsemem pangeda, nun podan neng, nun damai di kwar kuprepa, tapra bendopkameng’ tenen, moropkepe,” Musadi pepu. Aupu pepnepa, Israel nesala bisi barami.

36 Tonda, Allahdi peiamu upu kipdongopra deiami co bekinda, doupra benkoi taru yumada, Musadi uperamu.

“Nun nai Allah, Israel nesalada, pio weik men nukmanto kunupe. ‘Yahweh kanpu tamupra nun damai yamemdi, kalekra makunkamsereme’ tenen, moropkepe,” pepra Musadi mororamu. Upepra moropnepa, amutupu ke taru tep bena marami.