Num 11 | XteSC | STEP | Bisi embarami taruda, Israel nesala ikin kupra, kange mun kange doupidi, Allah damai mali-mali peramipa, aperami ngeda, Allah er si Yahweh gekepudi, yu kupupa, uku bu sun kan-kan dokotepupa, sun opkal bol di keana dodin tenda ati dominge sirikai talipu jepudi, akati dana-dana sirik tarada, akwapu keca puda jepropu.

Numbers 11

Allah er si Yahwehdi Israel nesala wenemna tep uku dokotepu upu

1 Bisi embarami taruda, Israel nesala ikin kupra, kange mun kange doupidi, Allah damai mali-mali peramipa, aperami ngeda, Allah er si Yahweh gekepudi, yu kupupa, uku bu sun kan-kan dokotepupa, sun opkal bol di keana dodin tenda ati dominge sirikai talipu jepudi, akati dana-dana sirik tarada, akwapu keca puda jepropu. 2 Auku jeu taruda, Israel nesaladi kware kupupa, mali pepra Musa damaipu beidi moropipa, Musadi Allah er si Yahweh tep moropu. Amoropunge gekepudi, auku bu tapropu.

3 Uku jepka tep nengeda, sundi amutu si tep, ‘Tabera’ pepra si pepi. Ada, sun upu deiki di, Tabera pepya deiyoda, ‘Uku jenmare’ tenen, penunge. Amutu si karepi ngeda, Allah Yahwehdi sun kan-kan uku bu dokotepupa jepka tep, amutu si ‘Tabera,’ pepra si karepi.

Allahdi Israel nesala tep, “Sun jen tep, tu keca karepkamsene,” pepra, yal ma utopu ma karepu upu

4 Israel nengda, Mesir mutu tapra katuai mutu neitamai embarami taruda, sun kan-kan dinin, yuk yala neng, nimi bo neng cap kikiman embarami. Anengda, mali kange doupra, mali-mali kurami neng kurami. Anengda, ‘Tu kecapu jeptepe. Angepu putaserure,’ mali pepra ngolongami. Sun anesala uperami pangeda, sun yuk Israel nesala peda, ‘Uo tu keca jeptepe teptoda, telep kuptepe. Atep, ware ngebodi tu keca karepsetu do?’ pepra, mali peramidi engerami.

5 Tonda uperami, “Uo, Mesir mutu kuramupu taruda, mokon pumbon kurur keca, mekina weik tomopra jeramepu. Ajeramepu ngeda, kunumna gum, talipu tomopra jeramepu. Tonda sumnye cap, tapu du utopu keca semangka cap, tonda bawang merah cap, bawang putih cap, akeca-keca weik jeramepu. Angeda pio telep tep, ange tepapu pio tupa tenenupe. 6 Dinino, ataruda nun akeca-keca peda, ton pio gum cadi, Allah kareserur keca, er si mana kwaneng, angepu kipra jenupa tep, nun matang peserure. Atep, nun dabal weik kuserepapu, akeca manapu jenup ngeda, nun songe,” perami.

7 Mana er nongeda, yambul du-du keca, tonda er kamoda, co pe yambul utopu kupu dinin, er tau peramngada mong mokon utopu kuramu. 8 Akecada, lukunda mul duduya mo semamre utopu kupra sangamu. Ukupmanpa, Israel nesala ipna sisa di, bena doupra yan dingeda, gat keca deiki di ataingna keca di taingmanpane, sikke utopu kupne pangeda, mau gamami. Ukupmanpane, konum popne pangeda, dopramnedi roti kwaneng kuna bum telepra jerami. Mana er taueda, yambulanun zaitun du taikmengedi, aminyak goreng utopunge cap gapra, jeramengtopu kupupa jerami. 9 Israel nesala nimi gum mutu neitamai kurami taru yumada, lukunda kwirye dei saknedi, pen paleramu taruda, Allahdi kareramu jen keca, er si mana cap im deiki di sangamu.

10 Ataruda, Israel nesala yuma, sun dodin ati yuk-yuk buplan dam teknedi, mali pepra engeramipa, Musa gekeramu. Sundi mali peraminge tep, Allah er si Yahwehdi gekeramudi, yu weik kupupa, mali kange doupra teneramnga tep, Musadi, ‘Uo sun anesalada, Allah tep mali weik penungada, war keca tep do? Ukunmangada, ware keca deiyo tep do,’ teneramudi mambul kange douramu.

11 Musa utenepudi, Allah Yahweh tep asipetepu. Neda kan amutarapu kunedi, kan pelpu donuna cadi, warya tep kandi kange mun keca karepnerem do? Tonda, nedi ware keca mali kupsipa, kandi yu tenepmanerem do? Kange men deipneremdi, yu kupkera deiki di, Israel nesala yuma, sun kange mun keca, warya tep ne deiki deipmanerem do? Allah kandi ware deiyo keca tep, ‘Israel nesala dubankamre’ tenen, wepra deiamnemum do? Ware keca mali kupsipa, kange mun keca ne deiki deipmanerem do?

12 Nedi sun Israel nesala yuma deipsipa, ne nyapu kunung do? Nerapudi sun deiamenge nyapu iripra embarameng utopu, ware keca deiyo tep kandi peipnemumpa, anesala doupra, banun do? Kandi sun co puna neng tep, ‘Atelep mutu karepkamsene,’ peiamum mutu bana tep, bisi bange taru yuma, ware keca deiyo tep, nedi anesala doupra banun do? Sun tep ne ikin weik kunerure.

13 Sundi tu keca morongedi, mali penenunga cadi, nedi waretoai di bena doupra yatenedi, sun Israel nesala yuma tep, tu keca yan kareptene do? Ada sun gungda, denge pio weik men nukmanto kungedi, sundi ne damai engeryakangedi, ‘Uo, tu keca karepkamserume,’ pepra, mali penenunga tep pepkene. 14 Neda tenpu ngebo cadi, Israel nesala yuma, sun putapre keca tep, ne dipapu men makupra kareptene. Angeda, ne ikine weik kunerure. Neda apel men dopmanto kupnera tep, ne mambul kange doupne.

15 Ange tep ngeda naio, ikin kecapu karepkunemem dingeda, tek sisi ngeda ne adipapu pona telepe. Ange yuma tep tenepnedi, ne ikin kange doupra tenimtona kunerura cadi, angeda men kupmanto kupne. Dinin, kandi ne tep, ‘Telep ngebo’ tenepnememnyopda, makupnetumpa, ne ikine weik men kunerepa, ne men depkamne. Musadi Allah tep pepu.

16 Musadi upepupa, Allah er si Yahwehdi tamupra Musa tep pepu. “Israel deiyo neng, konum kael keamum nengda, wisi-wisi neng cap, gonga kemna neng cap, upu bongdina deiyo neng cap, denge yoneitam bari neng (70) bupra deipkurume. Ukupmem dingeda, aneng doupra, ne si eremna tep, opkal bol ati, ne Allah cap, nimi cap, antamdina tep, opkal bol di domi ati damai duyamempa, kan cap ne damai yan tekurume,” Allahdi pepu.

17 Upepudi aupu ton pepu. “Ne si eremna ati dam yan tekrum pangeda, aca dipapu yanedi upu pepkamakene. Ne Sambala cap, ne puto cap konum karepkesi ngeda, bokrapnedi adeiyo neng pe ton, sun deiki ton deipkamane. Ukupnepa, kan pe yuk, ne nyapu Israel nesala kan-kan pel domempa kange mun kukerya tep, sun awisi neng cap, kikiman sun Israel nesala tep pel donkamrume. Ada kan ikin kukere ngeda, sun adeiyo nengdi, kwa dakrap melipkamkenge. Ukupmenga deiki di, yambul kanam cap kupkamkere. Amenda taruda, kan pedipapu Israel nesala men dubenkamrume.” Allahdi Musa tep pepu.

18 Upepudi, aupu ton dukdongopra pepu.

Ukupkamna tep nengeda, kandi Israel neng tep pepkurume. Ambutumi mambul pel donkamepa tep, sun mali keca tapra keteneipmamumnya di, dumsisipu kumumnyopda, ‘Allah er amutarapu kunkamepe,’ tenenkamrume. Ambutumida, tu keca jepkamaruma tepa. Ada, sundi, ‘Uo, Mesir mutu neitamai kuramepu taruda, telep kuramupu dinin, ukutaruda tu keca men jenupe. Tu keca putapsera tep, tu keca jeptepetoda, telep kuptepe,’ pepra engeramrume. Mali pepra engeramrum ngeda, neda sun nai Allahdi konum gekepmasene. Gekepsisa tep, neda Allah, ne si Yahwehdi, tu keca karesenepa, weika di jenkamarume.

19 Angeda ambutumipu jepkamaruma guma. Tonda tumi butene deikipu gum. Ue taru pamu bari deiki 5 tumi ton gume. Ue taru morokyo deiki di dutara 10 tumi neitamai di, ataru neitamaipu men jenkamrume. Tonda denge weik 20 tumi deiki di, ‘Tu keca jenkamepe,’ tenena gume. Amenda taru akeca weika di yamupra karenkamsen taruda, meteka di gume, weika di pio jenkamrume. Ada, oryankamre taru neitamai, weika di jenkamrume.

20 Ada war tenpu neitamai yumada, tu keca jenkamrume. Ukupra ajeramumya deiki, sun mumun pu jepserepa dukamrume. Tu keca jena tep dabal weik kupkamsere. Ange kupkamsera deiyoda, ake. Ada sundi, ‘Allah ton nun kan-kan akurure,’ men teneprumdi, ne tep tapnerume. Tonda, ‘Mesir mutu tapra yamepuada, warya tep do? Mesir mutu tupa kuramtepetoda telep kutepe,’ pepra, mali perumdi engerumya deiki, ne Allahdi wenepkamsene. Tonda, ‘Mali peramepudi engeramepka deiki di, ikin kupmasere’ tenen, kael kepkamrume. “Kan Musadi Israel nesala perberume,” pepra, Allahdi Musa tep pepu.

21 Allahdi upepu dingeda, Musadi Allah tep tamupra pepu. “Israel neng sun dengeda, enam ratus ribu (600.000) nimi banunge. Aneng, sun nerapu cap, nyapu cap men nukmanto. Anesala yuma men nukmanto dinin, naio kandi, ‘Anesala yuma tep tenpu war neitamai yuma, tu keca karepkamne,’ pepmarem ngeda, warya tep do? Ware kuprap, sun anesala yuma tu keca weika di kareptumpa jeptenge do?

22 Tonda, sun tu keca jena tep, domba bisam cap, sapi bisam capda, dan mutu di pio weika di kuramtupa doupra yatengedi, popra sun anesala yuma jena kareptengepa jeptenge do? Pio weika di poptengeya peda, men suktaleptu do? Ange utopu, laut mokon amu kuramre mekina yuma popra buluiptengedi, kareptepeya peda, anesala yuma jeptenge do? Ne kangeda, ayuma akaptua peda, tu keca suktalepsetue. Ada sun anesala gungda, denge pio weik cadi, jena men karepmanto,” pepra, Musadi Allah tep mali penmau.

23 Upenmau pangeda, Allah er si Yahwehdi Musa tep pepu. “Ne buruda bum kunerepa, apel men doptenya tep aupu pepnerem do? Ne puto metek kunerura tep aupu pepnerem do? Ne putoda men sukmanto ngebo kununa cadi, apeipmaken ngeda, utopu kuprepa epkamareme. Atep, kanda, ‘Tek do, gum do?’ tenen, tenimtona gume. Tek sisi pepmakena tep, adipapu epra kael kepkamareme,” Allahdi Musa tep pepu.

Musadi nimi deiyo neng denge yoneitam bari (70) neng wepra deipupa, Allahdi er puto karepu upu

24 Musa cap, Allah cap upu taleproprei dingeda, adipapu Musadi amutu tapra, Israel nesala damai tamupra yau. Ataruda, Allah er si Yahwehdi pepmau upu, Israel nesala tep yan pepu. Ukupu taruda, Israel neng sun upu talena deiyo neng cap, upu bongdina deiyo neng cap, denge yoneitam bari 70 neng, Musa weprapudi bulupra deipu. Sun aweipu nengda, Allah er si eremna tep, opkal bol di keana dodin tenda ati damai bena teki.

25 Ukupi taruda, Allah er si Yahwehdi, ila dua neitamai di kwerepra yaupa, Musa cap upu taleprei. Upu konum sisikreiyopda, Allah er puto, Musa deiki deiamunge utopu, ton doprapudi Israel nesala, sun deiyo neng denge yoneitam bari 70 neng tep ton karepu. Karepu pangeda, ataruda sun adeiyo neng yumadi, Allahdi sun tep peipu upu gekepidi, ataru dipu er upu jenek pena neng, nabi neng perameng utopu kupra pepi. Dinino, yuk taru ton, ange kange di ton cap aupu utopu men perami. Atumi dipu aupu pepi.

26 Denge yoneitam bari 70 neng, Allah er si eremna ati dam, tekra bulupi dinin, nimi butene neng, sun sida Eldad cap, Medad capda, Musa konum wepra deipudi, sun si sekeipu dinin, sunda Allah er si eremna ati dam men bulupra yarei. Sunda, Israel nesala sun opkal bol di keana dodin tenda ati dam tupa kunmarei. Yukai tupa kunmarei dinin, Allahdi er puto cap, Sambala cap, sun yuk deiyo neng tep karepupa, abutene neng peda, sun ton karepupa, Allah er Sambala sun dipru ton wekrou. Allah er Sambala, sun aneng karepupa, Allah er upu jenek perami neng, nabi utopu kupra, Israel nesala sun dodin ati dampu gekenmaiyai penmarei. Ada, sun butene neng pedi, Allah er upu jenek pepmarei. Sun peda ataru dipu pepmarei dinin, yuk taru ton ange utopu men peramrei.

27 Sun butene di, Allah upu jenek perameng neng peramitopu penmareipa, ataru dipu kaber ngebo tenpu gekeprapudi, sepdaro beudi, Musa tep bena lap pepu. “Eldad cap, Medad cap, Allah pepre upu jenek penmarenge. Allah er upu lap pena deiyo neng, nabi nengdi perameng utopu kupra jenek penmarenge,” pepra lap pepu. 28 Lap pepupa, gekepidi, nimi si Nun, erdi deiamunge mi, er sida Yosuadi Musa damai bena upepu. “Naio, sun abutene neng penmarengada, kandi, ‘Upena gume, yapreso,’ pepmempa dimpepkurenge,” bena lap pepu. Uda, Yosuada, er yambul ngebo kuramu taru di gonga kepra, ataru neitamai yuma, Musa er melimna ngebo kuramnga tep, aupu menmena di Musa tep lape perbeu.

29 Yosuadi, pepu upu tep nengeda, Musadi Yosua tep tamupra pepu. “Ware keca deiyo tep kandi aneng tep, yu kupkerpa dipru wilipmum do? ‘Sun butene di, mambul upu peprengepa, Musa er kange mali kuprur’ tenena tep pepmanerem do? Gume, ne kangeda, ware nesala do, Allah Yahwehdi er puto cap, er Sambala cap, sun deiki deiptu pangeda, sun Israel nesala tep, er pere upu lap peptenge pangeda, telepe pua. Ada abutene neng peda, yuk neng peda, Allah Yahweh, er upu jenek peptengopda, ne kangeda ada telepe pua,” Musadi pepu.

30 Upepu dingeda, Musa cap, Israel nesala sun deiyo neng yoneitam bari (70) weipu neng cap, sun ayuma Allah er si eremna ati damai di tapra, Israel nesala sun opkal bol dodin ati damaipu tamupra bei.

Allahdi, ‘Tu keca karepkamne,’ peiamutopu, yal ma utopu ma dopra karepu upu

31 Allahdi ila kum karepupa, dato-dato di ila laut mokon deiamu tara di, pung pepra yaudi puyu ma, er kamoda yal ma utopu ma, er kamoda pokpok ma utopu ma doupra yaudi, Israel nesala, sun dodin ati dam yan tapu. Tapupa, pio gung weik lakra orbena yana kemaidi, tuai sisi embanmai cadi, amutu yumada, ama dipapu diniptapupa, bisi peda epra men benmanto kupi. Amada ton tu deiki apu embanmaidi, sun pe nong deikipu bungdanmaipa, er lyomda 1 meter tinggi kupu. [1 meter tinggi dari atas tanah] Ada mening damaipu gum dinin, tenpu tumi deiki di yuk karen mutu bisi betuma peda, ange utopu amutu neitamai yumada, ama nongeda, pio dipapu diniptapupa pio weike kupu.

32 Ama pio weik kunmaipa, Israel nesala yuma epidi, atumi cap, alukunda cap, mapmaiya bereku tumi cap, ortumi neitamai yuma cap, Israel nesaladi, ama tomopra kinmai. Ada nimi peda nerapu pepeda, tomonmai ngeda, pio weik cadi, sun tenpu-tenpu neng tep, ila alen douramep utopu denge weik 60 alen ton doupidi, er alen ikipi. Konum tomopi taruda popra, sun pe ati dam yuk-yuk kel-kel pena tep, dan-dana yuma tu deiki deipi. 33 Ukupi dinin, ange yuma gawal dangna tep, men jepmanto kupupa tupa apu deipmai taruda, Allah er si Yahwehdi, sun anesala yuma tep pio yu kupupa, kange mun keca, sun nong deiki karepupa, pu jepudi nimi weika di depi.

34 Ukupi atep nengeda, amutu er sida Kibrot-Tawa pepi. Upepra amutu si pepi ada, sun upu deiki di pepi. Deiyoda, ‘Ila putana deiki di nimi depipa, peipiyai’ tenen, amutu si pepi. Tonda, ‘Ma tu tep pio apu jeptepe,’ tenerami atep, Allah yu kupupa, pu keca karepka deiki di, nimi weik depi. Atep, adepi neng yumada, amutupu peipiya tep, amutu sida, Kibrot-Tawa pepra si deipi. 35 Ataruda, Israel neng yumada, Kibrot-Tawa mutu di tapra, yuk mutu si, Hazerot mutu beidi, sun opkal bol keana dodin ati bena dopidi, acapu kunmai.