Num 12 | XteSC | STEP | Musa doupu nerda, Israel yala ner gum dinin, yuk mutu ner, amutu si Kus mutu ner dopra douamu. Ukuamnga cadi, er nerda Kus mutu ner kuramua tep, Miryam cap Harun capdi, aner tep mali kange doupreidi, ‘Er mali kupra deipkunem’ tenen, Musa tep ngeda mali pepbaramrei.

Numbers 12

Miryam cap, Harun capdi, Musa tep mali upu pepreipa wenepu upu

1 Musa doupu nerda, Israel yala ner gum dinin, yuk mutu ner, amutu si Kus mutu ner dopra douamu. Ukuamnga cadi, er nerda Kus mutu ner kuramua tep, Miryam cap Harun capdi, aner tep mali kange doupreidi, ‘Er mali kupra deipkunem’ tenen, Musa tep ngeda mali pepbaramrei. 2 Ada, yuk neng gekenai tep, sundi uperamrei. “Allah er si Yahwehdi tek sisi Musa koripu er upu pepra karerur do? Gume, sun ton tenipetepso. Nun deiki peda ton, Allahdi er upu peserepa, nun ton men penum do, gum do?” pepra peramrei. Aupu mali peramreinge tep, Allah er si Yahweh gekepudi, yu kupu.

3 Sun abutene nengda, dipru eremna cap, balila kuna cap, kupupa, adeiki di uperamrei dinin, Musada dipru bouna di tenepra, amuramu ngebo kuramu. Ukuramnga cadi, erda nimi ban-ban yuma kuramyada, er utopu ngebo ton men kuramu. Tonda, Musa dipru bouna di kuramu utopu neng ton, tuai ban-ban yuma neitamai men kununge. Erda dipru eremna ngebo pio gum tepa.

4 Sun Miryam cap, Harun capdi, mali upu Musa tep upepreiya tep, ataru dipu, Allah er si Yahwehdi sun aweneri neng tep upepu. “Harun cap, Miryam cap, Musa cap, sun weneri nengda, adipapu Israel nesala sun wengna opkal bol di keana dodin ati ^{▼▼dodin ati – Akeca gambar dina tep, Keluaran 27:9 dinkurume.} dam di tapra, ne Allah cap, nimi cap, antamna tep, opkal bol di dodina domi tenda ati, ne si eremna tep ati damai, bura tara yankurume. Ada, nimi cap, ne Allah cap, antamna ati dam, bura tara yankurume,” pepu. Upepupa, sun yuma akati dam bei. 5 Upepupa bei taruda, Allah er si Yahweh adipapu dua kan-kan di kwerepra, er cap antamne ati buplan damai yan tekudi, Miryam cap, Harun cap tep, ‘Aca yarerume,’ pepupa, sun butene er damai berei.

6 Berei taruda, Allah er si Yahweh, adipapu sun butene tep upepu. “Gekenereso! Sun kan-kan neda Yahweh, ne upu jenek perur ngebo, nabi ngebo ton akuryopda, er kael kemna tep, men mapmare taruda, er kange dipru neitamai lap penepa gekerure. Tonda kene mapra deiki di, ne kune keca lap penepa, epra kael kemrure. Tonda, men mamre taru dinin, mambul upu pepne pangeda, gekenerure. Tonda, yuk tali neng yumada, ange yuma men epra kael keptenge dinin, nedi karepnepa, ne pel don ngebodi mambul keca diryaredi, nedi er tep ne upu jenek pedinune.

7 Dinino, ne amutara pel don ngebo Musa kurur utopu, yuk neng ton men kununge. Ada, ne amutara kupra, ne pel donere ngebo Musada, ne pene upu yuma telep-telep kupra pel donerure. ‘Ukupkurum’ pene keca yuma, tenpu peda ton men tamrure. Ne nyapu Israel nesala, sun kungeya neitamaida, ‘Musa er tenpu di ne nyapu yuma, sun kalengna deiyo ngebo kunkamre’ tenen, konum wepra deipsi. Ne mawa nesala pio moupra talerur deiyo ngebo kurure.

8 Ukurura tep nengeda, Musa cap, ne cap, nun tonpa antapnemedi, upu sisingnume. Er tep nengeda, nedi upu jenek pedinune. Musa tep, domona upu pepunge ton men pedinune. Tonda, yuk neng yuma gum dinin, ne upu sisingmane taruda, Musa er puda ne nong kamo men dinerur dinin, kuku yangeda dinerure. Ange yuma tep nengeda, sundi Musa er tep mali pepmarerum ngeda, warya tep kwar men kupmaser do? Ware keca deiyo tep, er deiki mali upu pererumya di yanirerum do? Musada, ne pel dorur ngebo kurura tepa,” pepra, Allah er si Yahwehdi, Harun cap, Miryam cap tep wenepu.

9 Aupu pepra, Allah er si Yahwehdi, sun abutene neng damai tep, weika di derepudi sun aneng tapra beu. 10 Allah er si eremna tep, opkal bol di keana dodin tenda atidam, ila dua utopu kupra yanmauanen, konum upu pepu dingeda, tamupra welepu. Welepra beu taruda, Miryam er nong deiki yumada, bol kona susu utopunge talepudi, er nong bol deiki yuma kurupu. Kurupupa, er kabo Harun epudi, ‘Uo’ tenen, mali pepu.

11 Ukupupa, Harundi Musa tep pepu. “Uo, naio, nunda kange douna gum neng kuramengtopu, nun walwal di pepmanemua cadi, nun butene nengdi kan deiki mali kupra deipkenemunge tep, yu men tenepkuserume. Nun mali kupnemu keca tupa men tenenkamrume. Tonda, nun wenemna gume. Amali keca nun nong deiki karepserem ngeda, ka di tamupra doproprume,” pepra moropu.

12 Moropudi aupu ton pepu. “Naio, ne ka ner Miryam tep, nerapudi lyun mi deiptapmengepa, er nong bol ton tamna lyuramre utopu kupre ngeda, gum kupra deiptumdi ne ner kweteptume,” pepra moropu. 13 Upepupa, Musadi Allah er si Yahweh tep moropu. “Naio, Miryam er bol deiki bol kuna susu deiyo keca deiamrem ngeda, gum kupra deipmemeo. Aner kwetepo naio,” pepra moropu.

14 Ataruda, Allah er si Yahwehdi Musa tep pepu. “Ukupmanto ngeda, er nai bodi, er ner mi aso deiki ul tulupra deiptu pangeda, komuni yoneitam bari ali men keptu do? Ange tep nengeda, Israel nesala sun keana tep dodin ati dam di tapra, er pe yuk bura beredi kunmarepane, ue yoneitam bari tumi konum kupkopda, ka tamupra sun ati dampu tamupra yatue. Ada er wenemna tep ukunkamre, pepne,” Allahdi pepu.

15 Upepka tep nengeda, Miryamda sun Israel nesala dopra wengami ati dam di gopra, er yuk bura tara beudi, bena kunmaupane, Allahdi pepmautopu, ue yoneitam bari tumi konum mapu dingeda, tamupra yaue. Miriyamda, bura tara bena er yuk kuramu taru yumada, sun yuk Israel nesala aca di gopra, yuk mutu men benami. Tupa acapu kunmai. 16 Yoneitam bari tumi konum kupupa, Miryam tamupra yau taruda, Israel nesalada, Hazerot mutu di tapra, Paran mutu bei. Ada, Paran mutuda me gumai cadi, nimi ton men kurami. Amutu neitamai beidi, sun opkal bol keana dodin ati bena dopi.