Num 13 | XteSC | STEP | Allah er si Yahwehdi Musa tep pepu.

Numbers 13

Musadi amol di uneng (12) neng wepra deipupa, sun wengbenkami mutu, Kanaan mutu tep mirbei upu

1 Allah er si Yahwehdi Musa tep pepu. 2 “Pumun taru di dipra dipdongopra ukutaru peda, Israel nesala yala yuk-yuk kununge. Ukungedi, nimi deiyo neng, ayala-yala yuma yuk-yuk talengetopu, aneng kan-kan di, nimi tenpu-tenpu dinin, amol di uneng (12) wepra deipkurume. Aneng doproipmempa, Kanaan mutu dirbenkamenge. Ada, ne Allahdi sun apu yapu tep, ‘Israel nesala ukupu telep mutu, er si Kanaan mutu karepkamsene,’ pepra, pedina upu peramsisi mutu dirbana tep weipkurume. Kanaan mutu mirbenkamenga tep, aneng wepkurume.” Allahdi Musa tep pepu.

3 Allah Yahwehdi upeipua tep, apeiputopu Musadi Israel yala-yala yuma dinin, yuk-yuk neitamai di, nimi amol di uneng (12) wepra deipu. Ukupudi sun tep, “Kanaan mutu dirbeso,” peipupa, Paran mutu me gumai, tonda nimi peda kuna gum mutu dokotepupa, Kanaan mutu neitamai mirbei. 4 Musadi wepra dokotepu neng sida ake.
Ruben yala neng kan-kan di, Zakar er mi Syamua wepra deipu.
5 Simeon yala neng kan-kan di, Hori er mi Safat wepra deipu.
6 Yehuda yala neng kan-kan di, Yepune er mi Kalep wepra deipu.
7 Isakar yala neng kan-kan di, Yusup er mi Yibal wepra deipu.
8 Efraim yala neng kan-kan di, Nun er mi Hosea wepra deipu.
9 Benyamin yala neng kan-kan di, Rafu er mi Palti wepra deipu.
10 Zebulon yala neng kan-kan di, Sodi er mi Gadiel wepra deipu.
11 Manase yala neng kan-kan di, Suhusi ^{▼▼Suhusi – Asida, yuk buku neitamai ‘Susi’ sengnunge.} er mi Gadi wepra deipu. Manase yala nengda, sun apu bo Yusup kuramu.
12 Dan yala neng kan-kan di, Gemali er mi Amiel wepra deipu.
13 Asyer yala neng kan-kan di, Mikael er mi Setur wepra deipu.
14 Naftali yala neng kan-kan di, Wofi er mi Nahebi wepra deipu.
15 Gad yala neng kan-kan di, Maki er mi Guel wepra deipu.

16 Musadi wepra deipupa, sundi Kanaan mutu dirbei nengda adano. Ukupu taruda, Nun er mi Hosea tep, Musadi ukupu si, ‘Yosua,’ pepra, si karepupa, angebo asi dopu.

17 Awepra deipu neng tep, Musadi upepu. “Uda, Negeb mutu neitamai di bemum dingeda, ortara mutu buma welepkurume. 18 Bemumdi, Kanaan mutu kunge nengda, puto kunung do, bounpu kunung do? Tonda, ‘Nimi weik kunung do, yambul do? Tonda sun mutuda, wareto mutu kurur do?’ tenen, moupra dipetepmumdi, betapra kael kepkurume.

19 Ton ngeda, ‘Sun mutuda telep mutu do, mali mutu do,’ ange utopu, ‘Akunge mutu tu telep do, mali do?’ tenen, dipetepmumdi, betapra kael kepkamrume. ‘Sun ati arum domidi kunungaida, dana-dana tara yuma, ila lyom gel beilya wipra ongopdongopi do, gum do?’ tenen, kael kepkurume. ‘Tali lupra, sun ati arumda wektepedi, amutu neng poptepe do, gum do?’ tenen, akeca yuma dipetepmumdi, betapra kael kepkurume.

20 ‘Ton ngeda, akungaida kel-kel tuai do, boun telep tuai do, co palpal tengrur do?’ tenen, betapra diprepkurume. Ton ngeda, sun kouamenge keca tapu du do, co du do, amutu mouramre ngeda, epmumdi ton dakra duyankamrume,” pepra, Musadi peipu. Musadi apepunge deiyoda, anggur du menmena weni tapu du mouramu li taru kupka tep, peipu.

21 Upepra deipupa, sundi amutu neitamaida, ‘Ware kupra kunung mutu do?’ tenen, dirbei. Ada sun utara mutu kunung nengda, katuai mutu er si Zin mutu itara di dipdongopra, Rehob mutu bisi baramya damai, Hamat mutu yuma bena dipro embei. 22 Sun amutu neitamai dirbei nesala yumada, Negeb mutu di dourbenapidi Hebron mutu bei. Ukupra Hebron mutu bena weki. Amutu neitamaida, nimi si Anek, erdi deiamu neng sun sida, Ahiman cap, Sesai cap, Talmai cap, sun yuma dakurami mutu bena weki. Ada, sun ayala nesaladi deipdanen yakarami perami yala nesala kurami. Tonda, Mesir mutu neitamai dinin, Zoan mutu kapul men domi taru di, Hebron mutu ati yumada domipa, keteng tamun yoneitam bari konum kupupa, Mesir mutu neitamai di Zoan mutu domi.

23 Upepka tep, sun amutu dirbei nengdi, dirbenmaiyane, amenda taruda Eskol mutu ban beidi, anggur tapu du pio telepnge bena dakipa, ikin weik kupka tep, butene nengdi co dongopra baya sepdara duberei. Ataruda, co du yuk yala butene ton dakra duyai. Aco du sida, delima cap, ton ngeda er si ara co du cap dakra duyai. 24 Amutu si tep nengeda, si dopidi Eskol mutu ban pepi. Asi pepi ngeda, sun pe upu di, Eskol pepi deiyoda ‘Acada anggur du dakmape,’ tenen, amutu si pepi. Ada sun Israel nengdi, anggur tapu du dakamaiya tep, asi sipepi.

Kanaan mutu dirbanami nengdi yan pepi upu

25 Allahdi peiputopu, Musadi nimi deiyo neng wepra deipupa, sun wengbenkami mutu, Kanaan mutu tep mirbeidi, dirbarami taruda, denge weik, 40 tumi deiki dipembaramidi, ukuramyane tamupra, sun kayapu kuramyaipu yai. 26 Kanaan mutu benamidi diraminge cap, kurami keca yuma cap tep, nimi gum mutu, Paran mutu katuai mutu dinin, Kades mutuda, Musa cap, Harun cap, Israel neng cap kuramyai, menmena tamupra amutupu yaidi, Kanaan mutu dirbenami nengdi, Kanaan mutu mouramu anggur tapu du cap, yuk co du cap dakra duyanami ngeda, Israel nesala kael kemna tep, yan peterepipa, anesala yuma epidi kael kepi.

27 Sundi Musa tep yana upepi. “Kandi, ‘Kanaan mutu dirbenkamrume,’ peipsemumtopu, nundi Kanaan mutu bepudi dipetepmepuada, amutu tuda pio telepai, tonda co du cap, mong me cap, sapi bisam cap, uda akeca-keca yuma cap weik akapu mutu. Cadi, kan kael kemna tep, anggur du dakra duyanmap pangeda adano,” pepra yan peterepi.

28 Aupu pepi dingeda, yuk upu ton pepi. “Amutuda pio telep mutu dinino, amutu kunge nesalada, sipen-sipen nengpu nenunge. Sun nong nena weik cap, ila puto cap neng kununge. Tonda, sun sipen ati dum domidi, gel beilya lyomnge wipra ongopdongopi. Atep, yuk nengdi men welepra wekmanto kupu. Atep, amutu nesala sun puto pio weike. Tonda, pumun taru nepra kuramu lyom ngebo, er si Anekdi deiamupa, dadeipdanen, yakarami neng sun nyapuda, ila lyom nepra, puto neng ton akununge,” pepi.

29 “Tonda Amalek yala nesalada, Negeb tara kununge. Het yala nesala cap, Yebus yala nesala cap, Amori yala nesala cap, mutu gon deiki kununge. Tonda, Kanaan yala nengda, ila laut mokon dam di dipdongopra, ‘Yordan me pikil kununge,’ pepra, yana lap pepsei,” pepi. 30 Sun Kanaan mutu mirbei nengdi, upepi dinin, sun kan-kan dinin, yuk ngebo er sida Kalepdi, yuk Israel nesala yuma tep, ‘Dim pepso,’ pepupa, Musa tep upepu. “Gume, Kanaan tara adipapu wekmepedi, amutu kunge nesala cap poptapmepedi, bisbisa kapra amutu talepra kunkamepe. Angeda tek sisi kuptepe, nunda puto weike tepa,” Kalepdi pepu.

31 Upepu dinin, er cap mirbanmai neng kankan, ton neng yumadi tamupra pepi. “Gume, nunda puto yambulpu dinin, sun ormutu neitamai kunge nengda, ila puto kununga cadi, nundi men popra bisbisa kaptepe,” pepi. 32 Upepya deiki di, Kanaan mutu epi keca tep, mali upu weik perbenmaipane, yuk Israel nesaladi, Kanaan mutu kurami neng tep kware kupu. Sun mok upu deiki di pedanmaidi penmai ngeda ake. “Gume, nun mirbenmapu tarada, kange mun mutu kurure. Yuk nesaladi amutu wekmengopda, popmengepa gawal dakra denunge. Atara neitamai dinmapu nesala yumada, sipen lyom nengpu nenunge.

33 Tonda epmepu ada, nimi sipen-sipen nong galemna neng kununge. Ada Anekdi ^{▼▼Anek neng pepmepu ngeda, sun yuk mutu nesala abuku sengnungada, ‘Enak’ deipgerekdani neng, sengnung dinin, Ketengban nesaladi, ‘Deiyo yuknge do?’ tenepmengedi, ‘Wang-wang peprur’ tenen, nundi amutu nesala si tep, ‘Anek’ neng sekmupke.} deipgerekdani neng, sun yalada Nipilim neng cadi, sundi nun tep dinada, tali po utopu disenunge. Nundi sun tep angetopu tenepmepu. Sundi, nun tep, ‘Nimi nonge meteknge pua,’ tenepsetenge. Atep nundi aneng tep, men popra bisbisa kaptepe,” pepi.