Num 14 | XteSC | STEP | Kanaan mutu mirbenami nengdi, Kanaan mutu tep, ikin upu yan pepipa, sun Israel nesala gekepidi, kwar weik kupka tep, alukunda Israel nesala yuma, ila di engepra mali perami.

Numbers 14

Israel nesaladi, Musa damai mali-mali perami upu

1 Kanaan mutu mirbenami nengdi, Kanaan mutu tep, ikin upu yan pepipa, sun Israel nesala gekepidi, kwar weik kupka tep, alukunda Israel nesala yuma, ila di engepra mali perami. 2 Sun yumadi Musa cap, Harun cap tep, upenmai. “Uo, telep ngeda, nun Mesir mutu neitamai kuramepu taru dipapu konum deamtepe. Agum dingeda, mo gum tep, nimi kuna gum mutu, akatuai mutu neitamai, telep ngeda yan deamtepe. Ange peda telepe,” pepra ongolongmaidi, Musa damai mali upu penmai.

3 Aupu ton pepi. “Warya tep Allah er si Yahwehdi, nun dopropseudi, amutu dubenkamser do? Ukuserepa, yu nengdi ya dopra popsengepa, depkamep do? Tonda ukupsengeya deiki, sundi nun nimi yuma popbisipsengedi, nun nerapu cap, nyapu cap, nun bung keca yuma cap, upula dopropsengedi, gam tupa kunkamenge nesala deiki, ikin keca deipsengepa, sun amutara kupmengedi, tali pelpu donkameng do? Ukupkamsenga tep nengeda, Mesir mutupu tamupra betepe. Angepuda telep pua.” Upepra mali perami. 4 Sun pe Israel nesalapu, upu sisingamidi uperami. “Nun Mesir mutu tamupra dubana tep, tenpu ngebo ton weipmepepa, erdi nun doupra Mesir mutupu tamupra dubenkamsere. Ukupmepyopda, angeda pio telepe,” perami.

5 Uperami pangeda, Musa cap, Harun cap sundi, ‘Uo,’ tenen, mambul kange douramreidi, sun Israel nesala yuma bulupra wekmaiya damai di, tu deiki mapreidi tuaipu dipra kunmarei. 6 Sun Kanaan tara neitamai mirbenami neng, sun yuma akunmai dinin, sun butene nengda, nimi tenpu er si Nun, er mi Yosua cap, ton ngebo er si Yepune, er mi Kalep cap, Israel nesaladi mali peraminge tep, ‘Uo, ware deiyo keca tep mali-mali penung do?’ tenepreidi, ikin kange doupra, sun opkal kemamreinge kwiripra gwleleptaprei.

7 Ukuprei dingeda, Israel nesala bulupmaiya yuma tep upeprei. “Gume, nun mirbenamka yapu mutuda, pio ila telep mutu,” peprei. 8 Upepreidi aupu ton dukdongopra peprei. “Allah er si Yahwehdi nun tep, kange deipsetudi, bicaue teneamseryopda, akeca-keca yuma kapu mutu, pio telepaipu, erdi nun yuma doupra dubeseredi, amutu karepkamsere.

9 Dinino, nun kayapu, nundi Allah Yahweh tep, ‘Nun songe,’ tenen, yaniptapmepedi balila men kunkamepe. Tonda, Kanaan mutu kunge nesala tep, kwar kuna gume. Ada Allah er si Yahwehdi, nun damai kuredi melimsere pangeda, adipapu sun amutu nesala yuma popra gawal daktepe. Ware ngebodi Kanaan tara neng tep, melipkamre do guma. Allahdi sun tep kalekra meliamu dinin, ukutaruda gume. Atep, sun talepra melipmanto ngebo ton, pio men kurure. Dinino, nunda nun nai bo Allah, er si Yahwehdi melipkamsere. Atep, Kanaan tara kunge nesala tep, kwar kuna gume,” peprei.

10 Yosua cap, Kalep cap, sun butene di aupu pepreipa, Israel nesala yuma gekepidi, sun yu kupupa, ‘Gel dopra sun nong deiki dopmepedi, abutene neng poptapkupe’ tenen, upu sisingmai. Sun abutene neng popmanto kupi dinino, dinmaipa, Israel neng cap, Allah cap, antamna tep, opkal bol di tenda ati damaida, Allah er ila dirine yana dokotepmaupa epi. 11 Ataruda, Allah er si Yahwehdi, Musa tep pepu. “Ware kuprap taru yuma sun anesaladi ne tep, ‘Erda tali petamserura,’ pepra, malye penenung do? Tonda, nimi yumadi, ‘E tek sisa Allah er dipapu apel dopmasere’ tenepmengedi kael kepkameng’ tenen, nedi nimi men kupmanto pel weik, sun damai doramsipa, dirami dinin, ware kupra taru ton, ne tep teka men tenenkamneng do?” Allahdi upepra asipu.

12 Upepudi, aupu ton dukdongopra pepu. “Nedi Israel nesala gum kupra derina tep, ila kange mun pu, sun deiki deipnepa, nimi weik depmengepa, gawal dakamenge. Dinino, Musa kan puda, nedi melipra talenkamkene. Adeiki di, kandi deipmempa, dadeipdanen bankamenge nyapu yumada, nesalada denge pio weike kupbankamenge. Tonda, yuk Israel nesalada, puto yambul kunung dinin, nedi melipkene pangeda, kandi deipmempa dadeipbankameng nesalada, pio ila puto di kupbankamenge. Tonda kan gerekdani nesala peda, pio weik kunkamenge ngeda, denge men nukmanto kunkamenge,” Allahdi Musa tep pepu.

13 Upepupa, Musadi tamupra Allah tep pepu. Naio apeprem utopu, sun Israel nesala popmemnyopda, Mesir mutu nesala gekepmengedi autunkamsenge. Naio, kan puto deiki di, Mesir mutu kan-kan di Israel nesala doupra, amutu neitamai yanamsemuma tepa. 14 Nun Israel nesala, Mesir mutu neitamai di doupra yanamsemum dinin, sun popsememnyopda, Mesir mutu neng gekepmengedi, Kanaan tara kunung nesala tep lap penkamenge. Tonda, nimidi peramipa, Kanaan tara kunge nesala konum gekerami ngeda, “Allah er si Yahwehda, Israel nesala damai kuredi pio melimrepa yakanunge.

Tonda, Yahweh er kure kecada, Israel nesala dinunge. Allahdi meliamupa, Mesir mutu di bisi yakarami taruda, Allah dua utopu kupra, sun Israel nesala adua amutara yakanunge. Tonda lukunda taruda, uku bu jeramre utopu kupra melimrepa, adirin deiki yakanunge. Keteng komuni pe, lukunda taru peda, Allahdi mepra barepa, sun epra banunge,” pepra nungmengepa, Kanaan mutu nesala gekenunga tep pepkene.

15 Ange tep nengeda, Allah kandi nun damai kuramsemumnge yumada, Kanaan tara nesala yuma konum gekeramya tep, nun Israel nesala yuma, tenpu taru dipapu popsememnyopda, sun Kanaan tara nengdi, upepkamsenge. 16 Ada, “Allah er si Yahwehdi Israel nesala tep, ‘Tek sisi telep mutu karepkamsene,’ pepra, pedina upu deiki di pediramu dinin, er puto men kupmanto kupupa tep, Israel nesala doupra men duyanmanto kupupa, katuai mutu nimi kuna gumai di, anesala yuma tali poptapue.” Upepsenunga tep, naio, kandi sun Israel nesala pona gume. Musadi Allah tep upepra moropu.

17 Moropudi, ange ton moropu. “Ange tep nengeda, ne nai Allah, kanda akeca-keca yuma talememdi ila puto weik ngebo kuruma cadi, nedi moropkene. Kan pumun taru peiamsemumtopu, nun melimna tep, kan ila puto dopra, nun deiki karepsemempa, ‘Kanaan mutu wengbenkamepe,’ tenen, moropkene,” Musadi pepu.

18 Aupu ton pepu. “Nun nai Allah, kandi peiasemum ngeda ake. ‘Neda sun nai bo Allah Yahweh kunune. Ne adipapu menmena yu men kunerure. Nedi sun tep, weika di bicau tenena cap, melimna cap kusenune. Atep nengeda, mali kunge nesala cap, ne tep yaninenung nesala capda, sun malinge tapmengopda, aneng yumada, kaukemnune. Kau kemkamne dinino, tek sisi balila kupra pio mali kunge nesala tep nengeda, wenemnune.

Tonda, sun nai yapudi, mali weik kupmenge pangeda, sun nyapudi deipmengepa, adine dordeipkameng nyapudi, ton dordeipkameng nyapuda, ada sundi deipdanen, dadeipbenkameng nesala, generasi ketiga cap, generasi keempat cap tep, ikin keca sun nong deiki deipra wenemkamne.’ Ukupra peamsemume,” pepra, Musadi Allah tep moropu.

19 Moropudi aupu ton dukdongopra pepu. “Atep Israel nesala Mesir mutu kuramepupa, lyepra duyanamsemum taru di dipdongopra, neitamai dadinin, ukutaru peda, nun amali kuramepua akupyakanup taru peda, ataru mali kupmepnge peda, yuma tep nengeda, nun nai bo Allah, kandi kaukeamsemumdi, ataru peda tupa kaukemkamserume. Kandi nun Israel nesala tep, ila bicau teneserum ngebo kuramuma tep, moropkene. Bicau teneramsemuma deiki di, ‘Ukutaruda kaukepkamserem’ tenen, moropkene naio,” Musadi Allah tep pepu.

20 Musadi upepra moropupa, Allah er si Yahwehdi tamupra pepu. “Telepe kandi moropmanerem utopu, sun Israel yala nesala, sun kaber neng tep kaukepkune. 21 Ukupkaman dinin, sun kan-kan di, ne ila dirine cap, nedi ila mambul pel doramsinge cap, dirami dinin, ne tep teka men tenenenung nesala yuma tep, wenepkamne. Deiyoda ake. Tek sisi, neda gam kuna deiyo ngebo kunune. Tonda mutu ban-ban neitamai yuma, tek sisi ne ila mambul pel donuna deiki di, ne ila dirine cap, puto cap katuai kurepa, nimidi dinunge. Abutene keca deiki di, tek sisi pepsene. Men di Mesir mutu neitamai cap, mo gum tep nimi gum mutu neitamai Israel nesala embaramyai, nimi men kupmanto pel cap, pio ila mambul pel cap, doramsipane diramnei nesalada, aneng tek sisi wenepra popkamne ja, pepkene.

22 Ada, ‘Allahdi melimyakaserure’ tenepmengedi, kael kepkamenge’ tenen, Mesir mutu neitamai kurami taru cap, me gum tep nimi men kurami mutu neitamai cap, nedi kunupsek pen pel cap, nimi men kupmanto keca pel doramsinge cap, ne dirine kareramsinge cap, sun pe asuru di diramnei neng dinin, teka men tenenge nesala yumada, wenepra popkamne. Ne mambul keca dirami dinin, teka men tenenenunga cadi, aneng tenpunge peda, men tapkamne. Sun yuma wenepra popnepa depkamenge. Deiyoda, sundi ne tep yaniramneidi, ‘Allahda tek sisi puto ngebo kurur do, tek kurur do, gum do?’ tenen, gompeteramneiya tepa. Kange di ton cap, morokyo taru, ue 10 kali deiki di, yaniptapneidi kurpeteramnei atep, pepne.

23 Ange tep nengeda, sun aneng yumada, tenpu ngebo peda ton, Kanaan mutu men epkamenge. Ada, nedi sun apu yapu tep, ‘Kanaan mutu, pio telep mutu karepkamsene,’ pepra, pedina upu peiamsi mutuda, ataru kunge wisi nengdi men bena epkamenge. Atep, ware nesala do yumadi, ne tep, ‘Allah erda, talye’ tenen, ne tep yaniramnei Israel nesala yumada, Kanaan mutu pio men epkamenge. Kanaan mutu men wekamenge. Sun acapu depkamenga tep pepne.

24 Dinino, ne amutara pel dopra melimne ngebo Kalepda, erda sun yuk Israel neng utopu men kurure. Ada, er kange dipru tenena ngeda, teleppu kuredi, ne pene upu gekeneredi, tenimtona gum dipapu, ne pene upu teka tenepra kurura cadi, er mirbeu mutuda, wengbenkamre. Ada, nedi melipnepa, er cap er deipgerekdanen nesala cap, sun deipdanen dadeipbenkameng nesala cap, Kanaan mutu wekmengedi, talepkamenge,” Allahdi pepu.

25 Upepudi, aupu ton dukdongopra pepu. “Uda, sun Amalek yala neng cap, Kanaan yala neng capdi, Kanaan mutu me duman yuma talepra kununge. Ange tep nengeda, ambutumida tamupra, yamum bisipu sun adipapu, Bi Laut Mokon dam bange bisi tamupra bemumdi, me gum tep, nimi gumai, katuai mutu bisi neitamai benkamarume,” Allahdi pepu.

26 Upepudi, aupu ton pepu. Allahdi Musa cap, Harun cap tep pepu. 27 “Sun Israel nesaladi ne tep, ‘Uo, Allahdi ikin keca karenmasere. Angeda nun songe,’ pepra, ne tep mali penge ngeda, konum gekepsi. Ware kuprap taru ton, sun Israel nesala mali kunge nengdi, ne tep mali upu penkamneng do? Sundi mali penenung upuda, konum gekenune.

28 Atep nengeda, Musa kandi sun amali kuna nesala gekenmangai di penkamrume. Allahdi upepsere. Amali penenung nengdi, ne tep, ‘Uo, mali kupkamser do? Ikin weik kunkamep do? Amali mutu neitamai depkamep do?’ pepra, ne tep mali asimtererami ngeda, aperamneinge utopu menenga karepkamsene. Sundi ne tep peramneitopu, ange dopra sun nong deiki deipkamne. Tonda, ‘Ange tek sisi kupkamser do, gum do?’ tenena gume. Tek sisi pepsene. Neda Allah Gam Kuna Deiyo Ngebo kununa tep, aupu tek sisi peipsenetopu, tek sisi kupkamre ja, pepsene.” Allahdi pepu.

29 Upepu dingeda, aupu ton dukdongopra pepu. “Sundi ne damai mali-mali upu penerum nesalada, mo gum tep nimi men kunge mutu neitamaipu bena dadepkamrume. Ukuprumpa, sun nonge amutu katuaipu lyupkamre. Ada sun keteng tamun umur 20 tahun, adinen deiki tara wisi nesala yuma tep pepsene. Ada pumun taru nimi nukamum taruda, umur 20 kurami neng, adinen umur 20 deiki tara nesala yuma peda depkamenge. Keteng tamun umur 20 adinen dutara kaber nesalapuda, gam tupa kunkamenge, pepne.

30 Dinino, nimi si Yepune, er mi Kalep cap, ton ngebo er si Nun, er mi Yosua cap, sunpuda Kanaan mutu berengedi epkamrenge. Ne buru erepsidi, sun apu yapu tep, ‘Telep mutu karepnepa, sun talepra kunkamrume,’ pepra peramsi mutuda, abutene neng, sun nyapsilip cap, bena wekameng dinin, sun yuk Israel nesala yumada, Kanaan mutu men wekamenge. Sun depnapu kunkamenge.

31 Tonda, sundi sun nyapu tep, ‘Uo, yuk nesaladi, nun nyapu dopra dubengedi, ikin pel dinkamenge,’ pepnerum ngeda, men kupkamenge. Nedi melipnepa, pio telep mutu, Kanaan mutu wekmengedi, pingpinga di kunkamenge. Sun wisi nesala pedi amutu tapmarum dinin, sun yambul nyapuda, amutu bena pio talepra kunkamenge. Amutuda, sun mutu sisi keipnepa, talepra kunkamenge.

32 Dinino, sun wisi nesala yumada, akatuai mutu, me gum mutu, nimi men kunungaipu depkamrume. 33 Sun wisi nengdi ne tep, teka men tenepnerumdi, tapneruma tep, keteng tamun denge dumbari, 40 tahun neitamai yumada, katuai mutu me gumai, nimi men kunungai, tali embankamrume. Ada sundi ne upu men gekeramneruma tep, sun nyapuda kange mun deiki, amali mutu neitamaipu kunkamenge. Ukupmengedi, domba bisam peinkamenge. Acapu ukuramengepane, amendada, ne Allah tep, malye peramnei wisi neng yuma, sirya gawal dakra depropmengopda, sun nyapudi Kanaan mutu wekamenge,” Allahdi pepu.

34 Upepudi, aupu ton pepu. “Sundi Kanaan mutu neitamai, ue 40 tumi deiki di embenmarumdi miramrume. Mali kuprumnge tep, ataru 40 tumi deiki di miramrum utopu, keteng tamun denge dumbari, keteng tamun 40 tahun yuma deiki di, menenga karepsenepa, kange mun kange dounkamrume. Tenpu tumi tep nengeda, tenpu keteng tamun utopu kupra deipsenya deiki di, keteng tamunda denge dumbari 40 tahun katuai me gumai mapkamrume. Ataru neitamaida, ‘Allahdi yu tenepmaserpa, ikin keca karenmasere’ tenen, betapra kael kemkamrume.” Allahdi pepu.

35 “Neda sun nai Allah Yahweh kunune cadi, ne konum pepsenetopu, tek sisi kunkamre ja. Sun mali-mali kurum nesala tep, apepmasen keca yumada, tek sisi pepsenetopu kunkamsene. Sun yuma, sun tenena kangeda, utotopu doupra kurumdi, ne si yaninerume. Ange tep, sunda katuai mutu, me gumai, nimi men kunung mutupu, tali dakuramrumyanen, amenda acapu depkamrume. Ne Allahdi pepsene,” pepu.

36 Allahdi upepka tep, Musadi, ‘Kanaan mutu mirbenkamrume,’ pepra weiamupa dirbenami neng yuma depi. Ada, Musadi damai tamupra yaidi, “Amutuda mali mutu,” pepra, mok upu yan lap pepipa, sun Israel nesala yuma aupu gekepidi, mali kange doupra, Musa tep mali upu perami. Deiyoda, adirbei neng cadi, Allahdi aneng tep yu kupupa, wenemna keca karepupa, depi.

37 Angeda, Kanaan mutu tep, mok upu yan peami neng yumada, sun denge yoneitam bari utopu, sun gungda 68 deiyo nengda, Allah yu kupupa, sun aneng tep, dena deiyo keca cap, ila pu cap karepupa, Allah er si Yahweh dinmauai di, sun yuma depra gawal dai. Dinino, sun butene, Kalep cap, Yosua cap gam tupa kunmarei. 38 Atep, Kanaan mutu dirbenami neng yuma depropi dinin, tupa gam kuramrei nengda, Nun er mi Yosua cap, Yepune er mi Kalep cap, gam tupa kuramrei.

39 Allahdi, ‘Sun Israel nesala tep wenepra popnedi, nimi weika di katuai mutu, me gum mutu neitamaipu tapnepa depkamenge,’ peipu. Aupu pepupa, Musa gekepudi, Israel nesala yuma tep lap pepupa, gekepidi pio kange mun kange doupra engepi. 40 Upepmaupa, engenmaipane, mapmaiya bereku pangeda, ipna sisi di, sun adipapu bukra, ‘Ortara mutu dupai welepra benkupe’ tenen, ketenepi taruda, “Uo, nunda tek sisi mali akunmapepapu, Allahdi, ‘Teberau Laut Mokon bisi, katuai mutu neitam bisi benkurume,’ peipmaser dinin, men di peamseu mutu, mutu buma deiki bisi tali lupra welerbenkupe. Allah er si Yahwehdi, ‘Amutu karenkamsene’ pepra, pediramseu mutuda, atara kurura cadi, abisipu benkupe,” pepi.

41 Upepra gonga kepra banmai dinin, Musadi sun anesala yuma tep upepu. “Sun ukutaruda, ware keca deiyo tep, Allahdi peipseunge yanipkurum do? Sundi, ‘Ukupkamepe,’ tenepmarum ngeda, telep men kupkamre. Allahdi peipmasernge yaniptapmumdi, yuk bisi bemumnyopda, sun tenepmarumnge men nong kepkamsere. Malipu kupkamsere,” pepu. 42 “Atep nengeda, sun bana gume. Allahda sun damai men kunmasere. Sun cap kikiman men benkurume. Tek sisi sun pedipapu balila deipra bemumnyopda, sun podan nesaladi popropkamasenge.

43 Angeda, mesum tep men pepsene. Deiyoda ake. Sun Amalek yala neng cap, Kanaan yala neng cap, sun bankamarum tamnapu akunmanga cadi, sun yan popkamsenge. Uda, sundi Allah tep, ‘Dakwapye’ tenen, tali tenepmumdi tapra, sun pe kange dipapu tenepra kuruma tep, sun cap, er cap, kikiman men kunkamrume. Allahdi men melipkamsere. Atep, sun podan nengdi, ya duyangedi, popkamsenge,” Musadi pepu.

44 Musadi upepra wenepu dinin, sun anesaladi men gekepi. Ange tenena gum dipapu, aneng balila deipra, ‘Tali lupra ortara mutu dupai welerbenkupe,’ tenepidi, wengbei. Kanaan mutu ortara bei taruda, Allahdi, ‘Ukunkamrume, angeda men kunkamrume,’ peiamu upu kiami co bekin, er sida Peti Perjanjian, ^{▼▼Peti Perjanjian – Peti Perjanjian kael kemna tep, Keluaran 39:35 dinkurume.} men dupra bei. Tonda Musa capda, sun Israel neng cap, kikiman men beu. Abekin cap, Musa capda, sun opkal bol di keana dodin ati men tapra deipmaiyaipu kunmau. Acapu kunmaupa, sun anengda, sun pe yuk Kanaan mutu benmai.

45 Sun pe yuk benmaiya tep, sun amutu kurami nesala, Amalek yala neng cap, Kanaan yala neng cap yaidi, yan popbisipi dombei. Popbisipmaiya tep, amutu deiki welepmai Israel nesala sepdaro beidi, kwarapra Horma mutu tara bei dinin, sun podan nesaladi tupa popyakaramidi dombei.