Num 15 | XteSC | STEP | Allah Yahwehdi, Musa tep pepu.

Numbers 15

Allah Yahweh er si eremna tep, “Yana karepmenge keca, ukupra-ukupra kunkamrume,” pepu upu ton

1 Allah Yahwehdi, Musa tep pepu.

2 Sun nai Allah Yahwehdi, “Angeda, ukupra-ukupra kunkamrume,” pepra peipmaser upuda ake,” pepra, kandi, sun Israel nesala gekenai tep, bena lap pepkurume. Aupuda ake. ‘Nedi sun Israel nesala karepkamsene,’ pepra pedina upu deiki di peiamsisi mutu wengbenkameng taruda, angepu talepra bena kunkamnunge. 3 Amutu neitamai wengbena kunkameng taruda, sun Israel nesaladi, ‘Nun nai bo Allah Yahweh tep, nun peinup domba bisam do, sapi bisam do, ma yala keca do, dopropmepedi, Allah tep karepmepepa, imam nengdi uku dongonkamenge,’ tenepmengedi, yana karepkameng nge do, agum dingeda, ‘Allah si eremna tep, apel ton donkamne,’ pepra pedina upu deiki peramenge nge do, Allahdi, ‘Ne karena tep nengeda, ‘Ukupra-ukupra karenkamnerume,’ pepra deipseunge utopunge tep do, sun kange dipapu ‘Allah si eremna tep talipu karepkupe,’ tenepmenge nge do, ataru-ataru yuma er gispal dona tep, ‘Akeca ton popra karepmepepa, imam nengdi uku dongopmengopda, nintong telepnge weleprepa, Allah gekepredi, kange derinkamsere’ tenen, karenkamnenge do, er pedina upu deiki di peiamre ngebodi, doupra kareryakankamrenge yumada, Allah tepapu kareryakankamnunge.

4 Akeca-keca yuma karenkamneng taru yumada, ware ngebo di do, Allah karena tep, gam keca popra Allah kareryankure taruda, roti kwaneng dana deiyo keca ton tapakra karenkamnerure. Ada, roti kwaneng dana deiyo keca, er si gandum do, yakung do, keledai do, ange utopu keca ton taikmengepa, tepung telepnge keteneipmenge nge er ikinda, 2,2 liter ketenepkamenge. Tonda, minyak saitun me ton wilipra, er nungna mokonda, 1 liter ton gwepmengedi, ange cap, tepung cap tapakmengedi doupra, ne Allah tep kareryakankamnunge. 5 Tonda, yapi keca ton popra, uku dongopkunga tep, domba bisam do, sapi bisam do doupra, ne Allah tep yana karepkunenge nge peda, ataru yumada, anggur me 1 liter cap doupra, tapakmengedi kareryakankamenge. Ada, domba bisam mi karepkamnenge taru yumada, apeipmantopu, anggur me 1 liter cap tapakra karenkamnenunge.

6 Dinino, jem domba bisam, keteng tamun weik konum nepunge doupra karerbenkunge taruda, roti kwaneng dana deiyo keca er si tepung, pio telepnge keteneipmenge nge, er ikinda, 4,4 kilo cap, tonda minyak saitun me mokon 1 liter capdi, tapakra karena tep, doupra kareryakankamnunge. 7 Tonda, ne Allah karena tep, karenkamnenung kecada, anggur me 1,3 liter ton tapakra kareryakankamnenunge. Ukupmenge pangeda, akeca uku dongopmengepa jepre pangeda, nintong telep ngeda, weleprepa ne Allah gekepnedi, kange pio derinkamne. 8 Ukupmantoda, sapi bisam dopra popmengepa, imam nengdi uku dongonkameng taruda, roti kwaneng dana deiyo keca tepung ton tapakra karenkamnunge. Ada ware deiyo keca tep do yuma, sun mali kupmenge keca daemna tep do, ne Allahdi, ‘Ne gispal dona tep karepkamnerume,’ peipsisinge tep do, ne Allah cap, sun nimi cap antapra teleppu kuna tep, kareryakan keca do, ange-ange kareryakankamnerum taru yumada, ukunkamrume.

9 Ada, asapi bisam doupra kareryakange taru dipapu, tepung pio telepnge ton tapakra er ikinda, 3,3 kilogram cap, tonda, minyak saitun me mokon, 2 liter cap, tapakra karenkamnenunge. Abutene keca ton, telep kupra tapakmengedi, duyakankamnunge. 10 Tonda, anggur me 2 liter ton cap tapakra duyakankamnunge. Adoupra kareyankameng keca yumada, karepmengepa, imam nengdi uku dongopmengopda, uku jeprepa, nintong telep keca weleprepa, ne Allah gekepnedi, kange telep kunkamnere.

11 Ange ukunkamrumnge yumada, jem sapi bisam tenpu do, jem domba bisam weiknge tenpu do, tonda ange gum dingeda, jem kambing bisam do, domba bisam mi do, kambing bisam mi do, akeca yuma karenkamnerum taruda, anggur me 2 liter ton tapakra, adipapu doupra, ne Allah tep kareryakankamnerume. 12 Tonda, adoupra karerbana tep, yapi kecada, ‘Ukupra nuknedi, karepkune,’ tenepmengedi, agam keca nukmengetopu, anggur jen me 2 liter tapakra kareryakankamenge. Tenpunge peda, men tamkamenge. Gam keca tenpu-tenpu kareramengtopu, anggur me 2 liter ton tapakra karenkamenge. 13 Apeipne ngeda, sun Israel nesala sisa yumadi, doupra kareryakankamenge. Ada, “Ukupkamrume, ange karepkamrume,” pepra deipsisitopu, sundi ne si eremna tep, gam keca do, tepung do, ware keca do, ange-ange yuma dopra duyangedi, ‘Imam nengdi akeca doupra uku dongonkameng’ tenen, kareryakankamneng taru yumada, apeipmasentopu kupkamenge. Uku dongopmengepa, nintong telepnge welepre pangeda, adeiki di, ne Allah Yahweh, ne kange deipkamne.

14 Ange utopu, ware mutu nesala do yuma, sun tengyakan nimi bo neng cap, sun Israel nesala cap, kikiman keana kunkameng neng peda, sun Israel nesala sisa di, ne Allah tep karenkamnengtopu, sun nimi bo neng peda utopu karenkamnenge. Ne Allah kareryakana tep, uku dongopmengepa, nintong telepnge welepre pangeda, adeiki di, ne Allah Yahweh, ne kange deipkamne. Atep, apeipsen ngeda, pio angepu talepra kunkamrume.

15 – 16 Ne Allahdi, “Ange kunkamrume, angeda, pio men kunkamrume,” pepra, deipsen upu yumada, sun Israel nesala sisa pe, yuk mutu di yana, sun cap tonpa kurumu tengyakan nimi bo neng peda, sun yuma apeipsen upupu talepra kunkamrume. ‘Nun yuk, sun nimi bo neng yuk kununge,’ tenena gume. Ada, ne Allahdi, sun yuma tep nengeda, ‘Ne nyapu kununge,’ tenesenune. Atep, ne gispal dona tep karenkamnerum ngeda, sun yumada, nedi peipsisi upu utopu, angepu talepra pio tep, kunkamrume.

17 Allah Yahwehdi, Musa tep pepu.

18 Kandi Israel nesala sun damai bememdi, Allahdi sun tep peipmaserada, upeipmasere pepkurume. Ada, “Sun Israel nesala tep, karepkamsene,” pepra, pedina upu deiki di peiamsisi mutu benge dingeda, nedi sun tep, “Ange yumada, ukupra-ukupra kungedi, talepra kunkamnunge,” pepra, ‘Deiamsingepu talepra, bena kunkamnunge,’ peipmasere,” pepra, sun damai bena pepkurume. 19 Tenpu ngeda, ake. Sun amutu bena kungedi, wa pepra kounkameng keca yuma kipmengedi, gandum du dopra keteneipmengedi, roti kwaneng jen keca dapra jenkunge taruda, menmenada, ne Allah Yahweh tep, ton ngeda bokmengedi, sun adipapu ange dopra ne gispal dona cap, ‘Telepe’ pena cap tep, kareryakankamnenunge.

20 Ukupmantoda, sun gandum wa pepra, kouamumnge menmena weninge yupra, sekra kipmamum ngeda, taikrapmumdi roti kwaneng cap kepra, tapakra dapmumdi, sundi ne Allah karena tep, tenpu roti kwaneng nong ketenepra derinkamnerume. Angeda utopu, gandum du menmena weni kipmum ngeda, bam keca gum kupra derina tep, taikmumdi, telep kupra keteneipmumyai di, ne Allah ‘Telepe,’ pena tep, ketenepra kareramrumtopu, roti kwaneng weninge dapkamrum taru peda, tenpunge dopra ne Allah tep karenkamnerume. 21 Angeda pio tep, sundi deiprumupa, dadeipdanen bankameng nesala peda, roti kwaneng menmenange dapkamrumnge dopra, ne Allah tep karenkamnerumtopu, sun anesala yuma peda, aweni ngepu bokra karenkamnenge. Ada, ataru-ataru yuma, sun gandum wa pepra kouamumnya, menmena weni yupra kipmumdi, roti kwaneng dapkamrum ngeda, ne Allah karena tep, yana karenkamnerume. Ada, ne Allah ‘Telepe,’ pena tep, karena ngeda, menmena weninge ketenepra derinkamnerume.

22 Dinino, ukupmantoda, ware nengdi do yuma, sun Israel nesala kan-kan neitamai di, nedi sun tep, “Angeda, kunkamrume, angeda pio men kunkamrume,” pepra, Musa deiki peipsipa, sun damai yana lap peipseu upuda, sun mankau di lupronmamumdi, men kupmamumnyopda, ukupkamrum keca lap pepkusene. 23 Ada, ne Allah Yahwehdi Musa tep gonga kepsidi, “Angeda, kunkamrume, angeda pio men kunkamrume,” pepra, Musa deiki peipsi taru di dipra, daneitamai taru yumada, akunmarum nesala neitamai dinin, dipdongopra dortaru kupbankameng nesala yuma antapmamumdi, ton nengdi lupronmamumdi, nedi peipsisitopu men karepmamumnyopda, amali kupkamrumnge kange di tamupra telep kudina tep nengeda, akupkamrum keca tep, lap pepkusene.

24 Ada, tenpu ngebo di do, mankau di ne karena gum deiki di, mali kupmau dinin, sun yuk Israel nesala yumadi, ange men kael kepmengedi, men tenepmengopda, angebo er mali kupunge, yo pununa tep nengeda, ukupkurume. Sun Israel nesala yuma dukdongopra kikiman di, jem sapi bisam ukupu nenmarenge dopra, imam neng karepmengepa, sun imam nengdi asapi bisam dopra uku dongopkamre. Ukuprepa, uku di jepropre pangeda, nintong telepnge weleprepa, Allah gekepredi, er kange telep deipkamre. Tonda, roti kwaneng dana deiyo keca, er si gandum utopu ngeda, ange ton tapakra karenkamnenunge. Tonda, ange cap, tapakra anggur jen me ton keteneipmengedi, 2 liter ton tapakra deipmengedi, ange doupra kareryakankamenge. Tonda, ‘Allahdi nun mali kupmepu keca daepkamser’ tenen, jem kambing tenpunge ton dopra kareryankankamnenunge. Ange-ange yumada, ne Allahdi sun tep, “Ukunkamrume,” pepra deipsisitopu kupra, duyakankamrume. Ange doupra yamumpa, uku dongopmengepa, nintong telepnge weleprepa, ne Allah gekepnedi, kange telep kunkamnere.

25 Ukupmum pangeda, imam ngebo adipapu, ‘Allahdi nun mangkau di mali kupmap keca kaukepredi, gum kupra deipkamser’ tenen, gam keca popredi, ne Allah karena tep, uku dongopredi, apel yuma konum doprepa, Israel nesala sun mali kumum ngeda, ne Allahdi daepropsenedi, telep kupra derinkamsene. Ada, sun mali kun keca akupmange nge tep, gam keca popra duyangepa, imam nengdi uku dongopkamenga tep, amalinge daepra, telep kupra derinkamsene. 26 Sun Israel yala nesala yuma cap, tonda yuk mutu di yana, nimi bo tengyakan neng dinin, sun Israel neng kan-kan kunung nesala yuma capda, apeipsentopu kupra kepmum pangeda, sun mali kunkamrum keca yumada, daepropsenedi telep kundinkamsene. Deiyoda, sun men karepnemum ngeda, mangkau di mali kupmamumnge tep, apel dopmum pangeda, telep kupra derinkamsene, pepsene.

27 Tonda ukupmanto, nimi tenpu ngebo ton, er mangkau di mali kupyopda, angeboda adipapu kambing bisam nernge tenpu, keteng tamun tenpungepu, doupra kareryakankamnerure. Ange karepnerya deiki di, angebo er mangkau di mali kwamre ngeda, daepropnedi, telep kudinkamne. 28 Akambing doupra yare pangeda, Allah cap nimi cap antamna tep, dodina ati pel dona ngebo, imam ngebodi, agam keca dopra, ne Allah damai duberedi, uku dongopre pangeda, ange kupkamra deiki di, angebo er mangkau di mali kupkamre kecada, daepnedi, telep keipkamne. Ada, er mali kuamunge tep, adipapu poptaptene dinin, imam ngebodi agam keca karepkamnera deiki di, amali kuamu ngebo tep, er yo punupkamre. 29 Ne Allahdi, “Ange kunkamrume, angeda pio men kunkamrume,” pepra, deipsen upu yumada, sun Israel nesala sisa pe, yuk mutu di yana, sun cap tonpa kurumu tengyakan nimi bo neng peda, sun yuma apeipsen upupu moupra talepmumdi kunkamrume. ‘Nun mali kun keca daemna tep, nun yuk, sun nimi bo neng yuk pel donkamenge,’ tenena gume. Atep, sun mali kun keca daemna tep karenkamnerum ngeda, sun yumada, nedi peipsisi upu utopu, angepu talepra pio tep, apelpu dopkamrume.

30 Dinino, Israel nesala tenpu ngebo do, yuk mutu di yana nimi bo tengyakan neng do yumada, mangkau di gum dinin, balila kupmengedi, dina di, ne tep karen keca men karepnengedi, pio mali kupmangopda, ne Allah Yahweh tep, ‘Nun songe,’ tenepra mali, kupnunga cadi, autopu ngeboda, sun Israel nesala kunkamrumai di, bura tara enepropmumpa, er yuk tali dabena kunkamre dinin, nedi angebo wenepra poptapnepa depkamrure. 31 Angeda, tali tep men pepne. Deiyoda, er angebodi ne Allah Yahwehdi pepnedi, upepra deipsi upu tep, yanipra tapredi, bisbisa kapmarya deiki di, balila deipra, ne Allah Yahwehdi, “Akeca kuna gume,” peipsisi keca kupmarya tepa. Angeboda, er pe amali kupmarya kunumna tep, wenepra poptapnepa, denkamrure. Er mali kupmare kecada, men kaukepkamne. Ikin kecada, er nong deikipu kunkamrure.

“Sabat tumi neitamaida, ange-ange yuma men kunkamrume,” peipunge men kupmenge neng tep, pepu upu

32 Uda, Israel nesaladi Mesir mutu konum tapra, bisi neitamai daembaramyanen, katuai mutu bena kunmai taruda, Sabat tumi ^{▼▼Sabat tumi – Sabat tumida, Allahdi sun Israel nesala tep, upepra deiamu. “Tumi-tumi yuma tali pel dopra kuramumyanen, Sabat tumi konum kupyopda, tali pel yuma taprumudi, beipye peingnapu kunkamrume. Ange kunkamrumada, ne si eremna cap, ne gispal dona cap tep, ukunkamrume.” Upepra deipka cadi, tali pel yala-yala yumada, Sabat tumi deiki di, pel men dorami.} deiki di nimi tenpu ngebo ton ati co dopra derinmaupa, epi. 33 Epi dingeda, angebo apel donmaupanen, asuru di epi nengdi, adipapu angebo doupra, Musa cap, Harun cap, Israel nesala yuma cap, sun damaipu, doupra yai.

34 Doupra yai pangeda, sun yumadi, ‘Uo, Allahdi Sabat tumi deiki di tali pel yala-yala yuma pio men donkamrume, peipseua cadi, angebo er Sabat tumi deiki di tali pel donmaua deiki di, mali kupmau dinin, er wenemna tep nengeda, ware kupkamep do? Nun walwale,’ tenepidi, keana tep wenemna ati pumbonpu, acapu bena deipmaipa, kunmau. 35 Ukupmaipanen, Allah Yahwehdi Musa tep yana upepu, “Angeboda, mangkau di gume, erda balila kepudi, ne peipsisi upu yaniptapudi, mali kupka cadi, adipapu wenepra poptapmumpa depkurure,” pepu. Ada er angeboda, sun Israel nesala kunmarumai di doupra bura tara dubemumdi, ne nyapu Israel nesala yumadi, gel dopra poptapmumpa depkurure,” pepra deipu. 36 Upepupa, Israel nesala yumadi angebo sun kuramyai di doupra, bura tara dubei di, gel doprapidi er nong deiki dopra, bena poptapipa depu. Ada, Allah Yahwehdi, “Ukupkurume,” peiputopu kupra popi.

“Israel nesala sun opkal sirikaida, benang tapu di urasin telep kudina tep, angeda ukupra-ukupra winkamrume,” pepra deipu upu

37 Allah Yahwehdi Musa tep pepu.

38 Kandi sun Israel nesala tep, bememdi upepkurume. Sundi kemkamrum opkal wipkungopda, aopkal sirik-sirikaida, benang tapu di urasin telep-telep kupra wipra lelipkununge. Ukupmengedi, aopkal sirik-sirikda, im kalum dinin, mirin tapu di wipra koupdongopkununge. Angeda sundi gonga keprap ukupmumpa, sundi deipmumpa, dadeipdanen bankameng nesala yumada, angepu kupbankamnunge. 39 Benang tapu di urasin telep kupra wipra deipkamrum ngeda, ‘Nun nai bo Allahdi ukuamseu’ tenen, sun kael kemna tep peten keipkamrume. Ukupmumnya deiki di, nedi sun tep, “Angeda kunkamrume, angeda pio men kunkamrume,” pepra deipsi upuda, sundi tupa-tupa tenenkamruma tep, peten kemdinkamrume. Adeiki di sunda ne peipsisi upu lupromum dingeda, benang tapu wipkamrumnge epmumdi, tamupra tenenkamneruma tep, peten keipkurume. Sun pe kange tenena deiki di mali kecapu kuprum tenena tep, nedi “Ukunkamrume, angeda pio men kunkamrume,” pepsisinge men kupbamumdi, luproneruma tep pepsene.

40 Abenang tapu di urasin telep kupra petupra deipkamrum ngeda, nedi, “Angeda kunkamrume, angeda pio men kunkamrume,” pepra, deipsisinge luprorum taruda, apeten kepra deiamum ngepu epmumdi, ‘E, Allahdi pepra deipseu ngeda ace’ tenen, kael kepmumdi, bouna di ne amutarapu tamupra kuna tep, peten kepra deipkamrume. Adeiki di sunda mali kunange yuma taprumudi, telepngepu talepra kunkamrume. Adeiki di, ne mawa nesala, telep lengna nengpu kumumdi, tek sisi ne nyapu sisapu kunkamrume. Neda, sun nai bo Allah kunkamsene. 41 Neda sun nai bo Allah Yahweh kunune. Sunda Mesir mutu neitamai kuramrumpane, nedi lyepsisidi, Mesir mutu neitamai di doupra yanamsisi. Deiyoda, ‘Neda sun nai bo Allah kunepa, sunda ne nyapu kunkameng’ tenen, duyanamsisi. Atep ne sun nai Allah Yahwehda, nepu kunune. Nedi peipsene.