Num 16 | XteSC | STEP | Uda, Lewi yala ngebodi, Kehatdi deiamupa, erdi, deipu ngebo er si Yizardi deipu ngebo Korahdi, Musa tep, bisbisa kapudi mali upu pepu. Amali upu pen mau taruda, Ruben yala ngebodi deipupa, deiami neng weneri di ton cap, upu tapakra mali upu pepi. Sun aweneri neng sida ake. Datan cap, Abiram sunda, Eliab er nyapu kuramrei. Tonda Pelet er mi On kuramu.

Numbers 16

Nimi weneri sun si, Korah cap, Datan cap, Abiram cap, sundi Musa er upu ton men gekepkamep’ tenen, bisipidi mali kupi nge tep, pepu upu

1 Uda, Lewi yala ngebodi, Kehatdi deiamupa, erdi, deipu ngebo er si Yizardi deipu ngebo Korahdi, Musa tep, bisbisa kapudi mali upu pepu. Amali upu pen mau taruda, Ruben yala ngebodi deipupa, deiami neng weneri di ton cap, upu tapakra mali upu pepi. Sun aweneri neng sida ake. Datan cap, Abiram sunda, Eliab er nyapu kuramrei. Tonda Pelet er mi On kuramu. 2 Tonda, Korahdi Datan cap, Abiram cap, On cap, uda amutu kurami Israel nesaladi, sun deiyo kepra kuna tep, wepra deiami deiyo nengda, 220 neng ton erepra deiamipa, Korahdi akurami neng doprapudi, sun yumadi tapakrapidi, Musa damai bena mali upu pepi. 3 Sun aneng yuma tapakra adipapu, Musa cap, Harun cap, sun damai bei. Beidi, upepi, “Musao, kandi ton cap men kupkurume. Akonum kupreme. Ware keca deiyo tep, Israel nesala yuma tep, ‘Mali keca yuma taprumudi, pio Lengna nengpu kunkamrume,’ pepra tupa-tupa peserum do? Nun yumada, Allah erngepu, er mawa nesala konum kunupe. Tonda, nun nai bo Allah Yahweh, nun kan-kan akurure. Er si eremna atida, nun kunupai neitamai kurure. Ange tep nengeda, kanda ware deiyo keca tep, kan pepu ereipdarem do? Kan dingeda, ‘Israel nesala yuma, sun deiki tarapu kunune. Sunda yambul mambul dinin, neda ila mambul ngebo kunune’ tenen, ereipdaremdi, sal nong-nong kamarem do? Yuk nengda kan utopu men kununga tep do?” pepra bena wenepi.

4 Aupu pepipa, Musa gekepu dingeda, ‘Uo,’ tenen, Musa genepdongopra tu deiki bukudi, er urasinaida, tu damaipu deipudi, Allah Yahweh tep moropu. 5 Musadi Allah tep Konum moropu dingeda, Musadi Korah cap, er tep melipra yanmai neng yuma cap tep pepu. “Mapmapya berekre pangeda, ipna taru dipapu, Allah erdi tek sisi, “Ne adano, ne kune kecada ake. Tonda, ne pel dona deiyo ngeboda adano,” pena cap, “Ne damai yanmanto nengda, ake. Sunda, ne nyapu sisada ace,” pepra, lap pena ngeda, “Pepserepa, gekepkamape,” pepu. Upepra weipserya deiki dipapu, ‘Allah er pel dopnedi, er damai benmanto ngeboda, ake’ tenen, “Kael kepra kunkamepe,” Musadi pepu.

6 “Atep nengeda, ukupkamarume. Mapmapya berekrepa, ipna taruda, Korah kan cap, kan melipmakeng neng cap, sun yumada adipapu, siltong telep pena tep keca, kipra deipmumdi doupra, uku dongon keca ton duyankamarume. 7 Ukupra akeca duyamumdi, Allah Yahweh er damaida, siltong telep pen keca doupra auku dongon keca deiki tara deiprumdi, uku sekeipkurume. Ukupmum pangeda, nun tonpa wekmepedi, apel doprumupa Allahdi kupkamar keca deiki di, ware ngebo Allah er pel dona deiyo ngebo wepra deipkamre do?’ tenen, kael kepkamape. Ambutumi ange epmepya deiki dipapu kael kepkamape. Dinino, ne kangeda, sundi aupu pepmaneruma deiki di, sunda konum mali kupmarume.” Musadi pepu.

8 Upepu dingeda, Musadi aupu ton dukdongopra Korah tep, pepu. “Lewi yala nengo, sunda ne upupu moupra gekeneso. 9 Sun Lewi yala nengo, tenipetepso. Israel nesala si eremnung Allahda, erdi, sun Lewi yala neng tep konum wepra deipseu. Ada, ‘Sun Lewi yala nengda, Israel nesala yuma kan-kan di wepnepa, ne si eremna ati, ne cap nimi cap antamdana tep kure ati pumbon wekmengedi, sun Israel nesala yuma tep melipkamenge. Akati mambul pel donange tep, sun dipapu donkamnunge’ tenen, wepra deiamseuada, ‘Angeda mambule,’ men tenepmarumdi, amali upu pepmarum do? Sundi tenepmarumada, ‘Apelda yambulngepu kurure,’ tenepmarumdi, malipu penmarum do? 10 Kan Korah cap, kan melipmakeng neng, sun Lewi yala neng yuma cap tep, Allahdi, ‘Ne pel donkamnenge’ tenen, konum erepra deiamseue. Allah er si eremna ati pumbon wengkamrumada, pio telep pel men tenepmarumdi mali penmarum do? Dinino, sun balila di, ‘Gume, ne Lewi yala nengda, imam neng utopu ton kupra deipsetue,’ tenenmarumdi malye penmarum do? 11 Ange tep nengeda, akeca putarepa, ne tep mali upu penmaneruma deiki di, kan cap, kan melipkamkeng neng cap, sun yumadi, Allah tepapu mali upu bena penmarume. Er pe tep yanina utopu kupmarume. Tonda, Harunda, wareto ngebo kunmarpa, er tep mali upu ton pepra, er nong deiki derinmarum do? Sundi, er tep bena men pepmarum dinin, tek sisi Allah Yahweh er tep, mali pepmarume,” Musadi Korah cap, er melimna neng cap tep pepu.

12 Musadi, “Eliab er nyapu butene, Datan cap, Abiram cap tep, bena pepmumpa, yankurununge,” pepra deipu dinin, sun aneng butenedi, “Gume, nun men yankuneme,” peprei. 13 Nun Mesir mutu kuramepu taruda, pio telep keca, akeca-keca yuma, koupnepa pio telep kupra bongopmanto mutu kuramepu dinin, kandi, nun yuma doprapsemumdi, atelep mutu tapra, doupra duyanamsemumpa, nun yuma akeca-keca gum kure mutu, pio mutu katawai aduyasemumpa, acapu depkamep do? Ange kupsemum ngeda, pio ikin keca nun nong deiki di konum deipsemum dinin, ware deiyo keca tep, ton cap tapakra ila ikin keca ton karepkuserem do? Ada, kandi nun deiki tara keipdamemdi, nun tep, ‘Ukupkurume, ukupkurume,’ pepra, mali kweipkamserem do? Ukupsemum dipapu ton cap tamupra nun dipkuserema tep, pepmepe.

14 Kandi nun doupra amutu neitamai duyakaramsemum ngeda, tek sisi konum kael kepmepe. Amutuda, pio tu telep mutu gume. Amutuda, akeca-keca weikanun men kurure. Ange-ange yumada, amutu neitamai men kurure. Tonda, wa pena telep tuai cap, anggur wa pepra kouamenge wa tu telepai cap doupra beserepa, talepra kunkamepa tep, amutu neitamai duyasemum do? Nun kangeda, ange pio gum. Nun kangeda, kandi mok upu pepsememdi, nun Korah yala neng cap, nun tep melimkamseng neng cap tep, nun wenemna tep nun asuru lukra popkamserem do? Ange tep nengeda, nun men yankukepe,” pepra Datan cap, Abiram capdi upeprei.

15 Upepreia tep, Musa pio yu kupupa, Allah Yahweh tep pepu. “Sun anengdi Allah kan gispal dona tep, yana karepkenge ngeda, dorona gume. Ange utopu, nedi sun aneng peinung gam keca, sun keledai bisam tenpu peda, men dopropsi. Tonda, sun aneng nong deiki ikin keca tenpunge peda, men deipsi. Sun tep mali men kweipsi. Musadi, Allah tep pepu.

16 Allah tep upepra lap pepu dingeda, Musadi tamupra Korah tep pepu, “Atep, mapmapya berekrepa, ipna taruda, kan cap, kan melipkamkeng neng, 250 neng capda, Allah er si eremna ati damai yankamarume. Ada Allah cap, nimi cap antamna tep, dodina ati damaipu, sun kikiman yamumpa antapkamape peipu. Tonda, aceida Harun peda, apu kunkamara cadi, sun peda sun uku dongonai, ada uku sekra siltong telep pen keca dongopkamrum keca tep, yuk-yuk ketenepra duyankamarume. 17 Tonda, sun Korah yala neng cap, sun melipkamkeng neng cap yumada, siltong telep keca dongopmumdi, uku sekra derina keca doupra duyankamarume. Ange utopu, Harun peda, ernge ton duyankamare. Akeca yumada, denge weik 250 kupra duyanmamumnyadi, Allah er damai erepra deipkamarume.

18 Upeipmaua tep, anengda uku dongonai peda, sun yuk-yuk doupra yai. Adoupra yainge neitamaida, siltong telep pena tep keca ton uku sekmangai deiki tara deipmai. Ukupmai pangeda, Musa cap, Harun cap, sun aneng yuma cap, sun tonpa Allah Yahweh cap, nimi cap antamna tep, lyom opkal bol di domi tenda ati wengbana tep, buplan damai yana teki. 19 Ukupi taruda, Korahdi, sun Israel nesala yuma tep, “Bupra yankurume,” pepupa, sun yuma bupra yai. Sun yuma yan dingeda, Musa cap, Harun cap, tonda Korah cap, sun wekmana urasin damai tarada, Allah cap, nimi cap antamna tep dodina tenda ati, buplan damai tara yana weki. Yana wekipanen, dato-dato di, pio leng-leng peramretopu dirinda, Allah Yahweh er dirine sun damai yana kupupa, sun awekmai nesala yumadi epi. 20 Ukupkopda, Allahdi Musa cap, Harun cap tep pepu. 21 “Sun anesala yumada, Korah cap melipmangpa, sun damai tengyanmang nesala yumada, adipapu sun aneng damai di tapra, yukai bendopkurume. Deiyoda, ne yu kupmanerpa, nedi ataru dipapu, Korah cap, er melimna neng cap, atekmang Israel nesala yuma cap, popnedi gum kupra deipkune,” pepu.

22 Upepupa, gekepi dingeda, sun atekmai nesala yuma cap, Harun cap, Korah cap yumada, sun adipapu tu deiki genepgopra bukidi, Allah tep morona deiki di upepra moropi. “Uo, nun nai bo Allah, nun tuai nesala cap, tali dakure gam kun keca yala-yala yuma cap tep, gam kuna deiyo keca, nun sambalada, kan dipapu kareserume. Nimi tenpu ngebodi, ton, mali kupmaunge tep, Allah kandi kan nyapu nun Israel yala nesala yuma tep, yu tenepmemdi, adipapu poptapkuserem do? ‘Naio, atep nunda men popkuserum’ tenen, morokepe,” pepra moropi. 23 Moropipa, Allah Yahwehdi Musa tep pepu. “Kandi sun anesala yuma tep, upepkurume peipu. 24 “Sundi upepra moropmanenga tep, kandi sun ayana wekmang nesala yuma tep, ‘Sunda, Korah cap, Datan cap, Abiram cap, sun dodina ati dopra kunmangai di gopra, yukai benkurume,’ pepmempa, adipapu benkununge,” pepra deipu.

25 Upepra deipu pangeda, Musadi gonga kepupa, Israel nesala dawekmai neng yuma cap melipipa, sun yuma adipapu Datan cap, Abiram cap, kuramreiyai bei. 26 Bei dingeda, sun Israel nesala yuma tep, Musadi pepu, “Mali kupmang neng, Korah cap, Datan cap, Abiram cap, sun dodina ati dopra deipidi kunmanga damaida, bena men kunkurume. Tonda men dinkurume. Adipapu amnyo karikra, gopra yukai bendopkurume. Sun Israel nesalada, sun aneng cap tapakra men kunkurume. Tonda, sun Israel nesaladi amali kupmang neng, sun taleami keca peda, bol bena gume. Aneng sun nong cap, sun talenge keca cap, bol bepmumnyopda, ‘Allahdi sun aneng popra gum kweipkamartopu, sun peda yuma popra, gum kupra deipserur’ tenen, pepsene. 27 Upepupa, Korah cap, Datan cap, tonda Abiram cap, sun dodina ati dopra kunmaiyai di, sun Israel nesala yumada, amnyo karekrapidi, gopra yukai bendopi. Ukupi taruda, Datan cap, Abiram cap, Korah capda, sun dodina ati dopra kunmaiyai di, sun cap, sun nyapu yuma cap, nerapu cap, sundi ukupu deipi nyapu cap, sun yuk-yuk akuramitopu, sun keana dodin ati pumbon di gupra, akati buplan damaipu yana weki.

28 Ukupi pangeda, Musadi, pepu. “Sundi ne tep, ‘Erda Allah Yahwehdi wepra deipudi, deiyo karepupa, apel-apel talepra dorure. Er kange dipapu apel talepra men dorure. Allahdi ne tep, ‘Ukunkamrume,’ peipneupa, apel donune. Ange tenenkamneruma tep, Allahdi ange kupkura deiki di, epmumdi kael kepkurume. Neda, ne pe kange dipapu tenepra men pel donune,” pepu. 29 Ne tep, ‘E, Musada, tek sisi Allahdi wepra deipseue,’ tenenkamnerum’ tenen, petenkemna keca ton epkurume. Ada, Allahdi sun amali kupmang neng tep, men wenepra poptapredi, men depmengopda, kael kepkamarume. Ada, Allahdi aneng tep taprepa, sun anengda, nimi dena sisa deramengtopu kupra depmengopda, kael kepkamrume. Ada, ‘Gume, Musada, Allah erdi men peipupapu, apelda talepra men dorure,’ tenenkamanerume.

30 Dinino, Allah erdi wepra deipneupa, apel doramnyopda, sun anengdi ne damai mali upu pepmangu ngeda, ne tepa guma dinin, Allah tep, mali upu pepmangua tep, sun aneng wenepra popkamare. Akupkamar ngeda, pumun di ton kurepa, pio men dinupnge kupkamare. Ada, nimi men kupmantonge kupredi, poprepa epkupe. Ada, sun tekmang tu neitamaipu dikroprepa, sun cap, sun peinung gam keca cap, sun talenung keca yala-yala yuma capda, gam kepmanpu, atu pumbon wekrongedi, atu pumbonpu dakuramenganen, depkamenge. Ukuprepa, sun yuma eprumudi, kael kepkamarume. Ange epmumnyopda, ‘Anesalada, Allah Yahweh er upu bisipmangpa, kupmara’ tenen, kael kepkamarume.” Musadi pepu.

31 Musadi aupu yuma pepra seng pedongou taru dipapu, sun tekmai tuda, dato-dato di dikda pepropu. 32 Tu dikda pepropupa, sun aneng cap, sun nyapu yuma cap, atekmaitopu adipapu, tu pumbon wekda pepipa, atu di tamupra kepdongopu. Ada Korah er tara kepmai nesala yuma cap, er nyapu yuma cap, er ati kikiman kurami nesala yuma cap, tonda sun talerami keca yuma capda, tu pumbonpu neitamaipu wekroipa, gum kupu. 33 Sun anesalada, tu dikropupa, gam kepmanpu apumbon kwerepidi, derami neng kunungai, amutu si Sheol bei. Tonda, sun talepra kurami keca yuma peda, adipapu tu pumbon wekropupa, gum kupu. Sun anesala tekmai tu dikda pepupa, sun anesala tu pumbon wekroi pangeda, atupu tamupra yana antipdongopudi, jepra gum kupu. Ataru dipapu, Israel nesala dakurami mutu neitamai di gum kupipa, kange di ton cap, aneng ton pio men epi. 34 Akupu ngeda, sun Israel nesala yuk dakurami neng, meneng damai ateka dinmaiya cadi, epidi kwar weik kupupa, Israel nesala yuma aca di tapra bura saka banmaidi, upenmai. “Uo, nun yuma peda, akupretopu tu dikroprepa, tu pumbonpu wekropepa, tu di kepdongopkusere,” pepra ngolokra mali pepbanmai. 35 Tonda atarupu, Allah Yahwehdi, uku bu dokotepupa, Korah tara neng, nimi dengeda, dua ratus lima puluh (250) neng peda, uku di jepra gawal daku. Ada, sun anengda siltong telep pena tep keca, ‘Dupa uku dongopkamap’ tenen, keteneipmai neng yuma peda, sun nong yuma ukudi jepropu.

Uku jepkai tep, pepu upu

36 Allah Yahwehdi Musa tep pepu.

37 “Kandi imam Harun er mi Eliasar tep pepkurume. Pepmempa, erdi uku jepmardi, sesek tapmarnge bupropkurure. Ada emas di petupra keteneipi keca, apiring deiki uku sekra, siltong telep pena tep keca, uku dongopkamep’ tenen, doupmai kecada, tupa akapmar ngeda, bupropkurure. Tonda uku jepra sikke buktapmarenge cap, kalum capda dopra, yukai tambenkurure. 38 Auku jepmarpa, sesek tapmar emas keca wepropkurume. Ada, uku cap, siltong telep pena tep keca deipmai ngeda, ukutaruda akeca pio lengnapu kurura cadi, akeca wepropkurume. Korah tara neng, sun 250 nengdi, akeca doupra yanmangudi, uku dongonmangu siltong telep keca yumada, mali kupmangu nengdi kunmangu keca cadi, Allah er uku di, sun mali neng yuma konum jepropupa depmai dinin, angeda tapmangu cadi, ukutaru akecada, lengna keca konum kupmare. Atep nengeda, akeca bena doprapmemdi, betamna keca palu di taikmempa, pala yambulanun kupre pangeda, gam keca popmengedi, uku dongona tep betapra deipi keca er si mesba, akeca bol deiki, ange emas palepra deipkurume. Ada, sun Israel nesaladi ange epmengedi, atumi Allahdi amali neng wenepmaunge, kange di tamupra tenepmengedi, kael kepkamnunga tep, peten kemnange betapra deipkurume.” Allahdi Musa tep pepu.

39 Upepupa, Musadi aupu bena imam Eliasar tep lap pepu pangeda, imam Eliasardi uku jepmaudi sirik tapmaunge, emas keca yumada bupra deipudi, er nyapu tep pepupa, sundi akeca deipra taiknepa, telep kun keca deiki deipra, taik-taik pepipa, yambula di pala kepu pangeda, ange dopra, gam keca popnedi uku dongomnai tep, mesba keteneipya deiki palepra deipi. Ada, Allahdi, “Ukupkamrume,” pepra deiputopu kupi.

40 Abetapra deipi ngeda, Israel nesala epmengedi, atumi Allahdi Korah yala neng tep wenepudi, tu dikropupa, tu pumbon kwerepidi, derami neng kunungai beinge cap, Allahdi uku dokotepupa, Korah tara neng yuma jepropunge cap, kange di tamupra tenepidi, kael kepi. Ada, emas taikra, yambul pala kepupa, amesba deiki deipinge epidi, kael kemkameng’ tenen, petenkemna tep, akeca ketenepra deipi. Tonda, Harun tara nengpu Allah damai yangedi, siltong telep pena tep keca kareptenge dinin, Harun yala gum nengdi, yuk nesala yala-yala yumada, apel pio men doptenge. ‘Ange peda kael kepkameng’ tenen, akeca ketenepra deipi. Uda, yuk yala nesala yumada, ‘Allah er si eremna tep, uku cap, siltong telep pen keca cap, er damai yana kareptepe’ tenepmenge nengda, atumi kupunge kange di tamupra tenepmengopda, kwar weik kupkamre’ tenen, petenkepi. Yuk yala nesaladi balila di karepterepmengopda, Korah cap, er melimna neng cap popra, gum kupra deiputopu kunkamenge.

Aupu yumada, Allah Yahwehdi Musa er gekenai pepra deipupa, erdi Elieser tep, bena aupu pepupa, gekepudi apeiputopu kupra pel dopu.

Harundi Israel nesala tep, lyepropu upu

41 Dakunmaiyanen, mapmaiya bereku pangeda, atumida, sun tali dakunmai Israel yala nesala yumadi, Musa cap, Harun cap tep, deremaidi penmai upuda ake. “Kandi Allah Yahweh, er nyapu sisa neitamai di, nimi weik ton, sundi konum popmarurume,” penmai. 42 Ukupra aupu penmaipa, Israel nesala weika di, gekepi dingeda, nesala yuma bulupra wekmaidi, ‘Musa cap, Harun cap, sun upu ton men gekenkamepe, sun tep yu weik kupmasere,’ tenepidi bulupra wekidi, Musa cap, Harun cap tep, bisbisa kamai. Ukupidi, amali upu pepra upenmai taruda, Musa cap, Harun capdi, Allah cap, nimi cap, antamna tep, opkal bol di dodina tenda ati, Allah er si eremna ati tep deipinge damai, atarapu tamupra dinmareipa, akati deiki cap, dana-dana tara yuma cap, ila dua bum ton kwerepudi, yana singipdongopu. Ukupudi, adua deiki di Allah Yahweh er dirine katuai kupupa, sun anesala yumadi epi. 43 Ukupu pangeda, Musa cap, Harun cap, sun adipapu, adodin ati damaipu dinin, akati wengban bisi buplan damai bena tekrei. 44 Orbena tekrei pangeda, Allah Yahwehdi Musa tep pepu.

45 “Sun butene tep deremaseng nesalada, sun Israel yala nesala damai di, kan cap, Harun cap, menmena gopra yukai bena kunkururume. Sun anesala yumada, ayana bulupra wekmangai dipapu poptapkune. Ue tenpu deiki dipapu, amali nesala yuma poptapnepa, gum kupkamange,” pepu. Upepupa, Musa cap, Harun cap aupu gekepreidi, tu deiki saka mapreidi, giso dutara genepdongoprei dingeda, Allah tep moroprei. 46 Ukupre dingeda, Musadi Harun tep pepu. “Kan uku sekra siltong telep pen keca dongorum emas piring dopra, Allah karena tep, gam keca popra uku dongonai, er si mesba damai di, uku sekmanguai di, uku dopropkurume. Uku dopropmemdi, emas piring deiki deipmempa, uku jere pangeda, siltong telep pen keca, el sida dupa uku dongopkurume. Ukupmemdi, akeca uku jere pangeda, auku jerengepu, menmena doupra, sun Israel nesala kunmangai damai dubememdi, ‘Allahdi sun mali kupmangu keca kaukepredi, gum kupra deipkamre’ tenena tep, bena uku sekmemdi, sun yo pununa tep pel dopkurume. Angeda, menmena kupkurume. Ada tali tep men pepkene. Deiyoda, Allah Yahweh er yuda, pio weik kuprepa, konum gonga keprepa, ila mambul pu deiyonge ton karepmaserpa, konum gonga kepredi, ila mambul pu deiyonge ton karepmaserpa, jenkamsere,” pepra, Musadi Harun tep peipu.

47 Uda, Musadi aupu upepra deipupa, Harun gekepudi adipapu, apeiputopu kupra, Harundi emas piring cap, uku cap, siltong telep keca cap dopra, sepdara Israel nesala bupra wekmaia damai beu. Ataruda, Allah er ila yuda konum gonga kepudi, sun anesala damaida, ila mambul pu deiyonge konum karepmaua cadi, ikin keca weik yakau taru dipapu beu. Harundi emas piring doupra, sun anesala kan-kan neitamai beudi, siltong telep pena tep keca dupa doupra, sun anesala mali kupmainge daemna cap, sun yo pununa cap tep, uku dongona pel dopu. 48 Harundi, Israel nesala sun yo pununa pel konum dopu pangeda, ikin pu deiyonge di nimi dena pu jena gonga kepunge di, nimi weik ataru dipapu depi ngeda, dinin, ortarada, sun gam tupa kunmai nesala tekmai. Ortekamaiyai dinino, erda neitamai bisipu teku. Acei tekra kunmaua deiki di, ila pu deiyonge karepmaua gum kupu. Ada Harunda, sun gam tupa kunmai nesala cap, ataru dipapu denmai nesala cap, sun kan-kan neitamai bena tekupa, nimi dena tep deiyo pu karepmau ngeda, gum kupu.

49 Ataru dipapu gonga kepra depi nesala dengeda, pio weik, empat belas ribu, tujuh ratus (14.700) neng depi. Ila mambul pu jepupa depi neng nuki ngeda, wilipra nuki. Aneitamaida, Korah cap, er melimna neng cap depmai nengda, aneng cap tapakra men nuki dinin, aca kunmaidi pu deiki depi neng tep nuki. 50 Adepyakanmainge konum gum kupu pangeda, Harun adipapu tamupra, Musa kunmauaipu beu. Ada, Allah cap, nimi cap, antamdana tep dodina tenda ati buplan damaipu, Musa tekmauaipu tamupra beu.