Num 17 | XteSC | STEP | Allah er si Yahwehdi, Musa tep pepu.

Numbers 17

Harun er maca gapu youpudi, kait popunge tep, pepu upu

1 Allah er si Yahwehdi, Musa tep pepu.

2 Kandi Israel neng tep pepmempa, sundi maca dua belas yuma karepkukenunge. Amacada, Israel nesala kan-kan dinin, sun yala yuk-yuk akungetopu, tonda sun co puna neng yuk-yuk dakungetopu kupra, nukmemdi, 12 maca dopropkurume. Sun yala yuk-yuk tep, deiyo kepra talenge nengdi amaca karepkukenunge. Amaca karepkengepa, kandi amaca bol deiki, sun sida sekra deipkurume. Israel yala yuk-yuk deiyo kepra talepi neng, sun sipu sekamrume. 3 Tonda, Lewi yala neng tep nengeda, sun maca deiki ton Harun er sipu sekamrume. Ange utopu, Israel nesala yala-yala yuk-yuk akungedi deiyo kepra talepi neng akungetopu, adipapu sun maca ketenepra karepkengopda, amaca deiki yuk-yuk sun si sekra deipmemdi, keteneipkurume. 4 Konum keteneipmemnyopda, ne cap, nimi cap antamdana tep, opkal bol di keana dodin tenda ati dopra keteneiprumai, aneitamaipu duyankurume. Tonda, nedi, “Angeda ukunkamrume, angeda pio men kunkamrume,” pepra, deipkesi upu, pala gel deiki sekra karepkesipa, kandi kipra deiprum co bekin pumbon, abekin damaipu, amaca 12 doupra deriryankurume. Ange co bekin damaida ataru-ataru yuma, kan cap, ne cap kikiman antapra upu sisingnumai tep pepkene. 5 Amaca yuma yana deipmumpanen, nedi, ‘Israel nesala tep, gonga kepra deiyo kepredi nedi peipnepa, upu perbenkamre’ tenen, nedi wepra deipkamne ngebo, er macapuda, gapu pakamre. Amaca gapu pakamara deiki di, sun yuma kael kepkamrume. Ada, ‘E, angeboda nun Israel nesala deiyo tep, Allahdi konum wepra deipmasere’ tenen, kael kepkamarume. Tonda, sun Israel nesala kan-kan di, mali kuna nengdi, sun tenenge kecapu kange tenengedi, tupa-tupa kan damai mali upu peryakakenge nge yumada, upu sekdongopkamne. Allahdi Musa tep pepu.

6 Upepu pangeda, aupu yuma Musadi, Israel nesala geken damai bena lap pepu. Upeipka tep, Israel nesala dinin, yala-yala yuk-yuk tep, deiyo talepra kurami nengdi, sun maca yuk-yuk doupra, Musa damai duyana karepi. Amacada amul dam di utara, dua belas (12) di yana karepi. Tonda, Lewi yala neng tep, maca tenpunge ton deipi dinin, angeda, Harun er maca kupka cadi, 12 maca adeipmaiya kankan neitamaipu Harun ernge yana tapakra deipi. 7 Ukupi pangeda, Musadi, amaca amul damai dutara (12) yuma doprapudi, Allah Yahweh cap, nimi cap antamdana tep, dopra deiamidi, Allahdi, “Angeda ukunkamrume, angeda pio men kunkamrume,” pepra, deiamudi kareamunge, Musadi agel pala deiki sekeiamu upu doupra, co bekin pumbon kipra deiamunge, abekin damaipu yana deipu.

8 Ange yuma konum kupidi, mapmaiya bereku pangeda, ataruda, Musa adipapu Allah Yahweh cap, nimi cap antamna tep ketenepra deiamidi, domi ati neitamai weku. Musa akati wekudi dipetepupa, Lewi yala neng sun maca dinin, amaca nong deiki Harun si sekmaidi dopra deipmai macada, konum gapu youpmaupa epu. Amacada konum gapu youpmaudi, buku kepra kait popu dingeda, co du er si badam moupu. Ada ketapang co du mouamya wisiramrenge utopu kupu. 9 Ukupmau pangeda, Musadi amaca yuma doprapudi, Israel nesala dinmayaipu yana peterepu. Ukupra benbenepra peterepupa, akupmaunge yuma sun asuru di epidi, kael kepi. Ukupi dingeda, Israel nesala yala-yala yuk-yuk deiyo keami nengdi, sun maca yuk-yuk akupmaunge yuma epidi, ‘Uo, ware kupmaser do?’ tenepra, sun yuk-yuk deiyo talepra kuramitopu, amaca tamupra dopropi.

10 Musadi, ange yuma yana peterepupa epyopda, Allah Yahwehdi, Musa tep pepu. “Harun er maca gapu youpmar ngeda, kange di tamupra douprapmemdi, ne Allahdi peiamsi upu kipra, deipmum co bekin pumbon damaipu bena, derirbenkurume. Abena deipkamrem macada, Israel nesaladi, moupra kael kepmengedi, ‘E, angeda Israel nesala kan-kan dinin, Korah cap, er tara neng capdi, Musa pemu upu men gekeramya deiki di, Allah er upu yaniptapya tep, Allahdi aneng yuma tep wenepra poptapu ngeda epmupu. Ukuamseu,’ tenepmengedi, Israel yala nesaladi kael kemkamenge. Tonda, men di Israel yala nesala mali kupmange dinin, nun ataru kunmap nesalada, kange di mali men kupkamape,’ tenepra, kange moupra kunkamenge,” pepu. 11 Allah Yahwehdi Musa tep, “Angeda ukupkurume,” peiputopu, Musadi ange yuma konum utopu kupu.

12 Ange yuma Musadi konum kupu pangeda, sun Israel nesalada, kware pio weik kupupa, sundi tamupra Musa tep pepi. “Uo, Allahdi aupu peipmasera tep nengeda, nunda tek sisi ikin keca dopropmepedi, denapu kunkamepe. Allahdi nun yuma wenepra popkamser do?” pepi. 13 Tonda, sundi, “Ukupmantoda, ukutaruda nundi, Allah cap, nimi cap antamdana tep, er si eremna ati damai bepyopda, adipapu depkamepe. Ange tep nengeda, nun amenda taru kunkamepa tep nengeda, ‘Gampu tupa kunkamepe,’ men tenenkamepe. Nun kware kunmasere,” pepi.