Num 18 | XteSC | STEP | Allah Yahwehdi Harun tep pepu. Kan nai bo, er nyapsilip yuma cap, kan cap, kan nyapu cap tonda, sun Lewi yala neng yuma capda, ne si eremna tep dodina tenda ati neitamai dinin, pio telepai tep, nimidi mali-mali weik kupmengopda, sun amali kupmengenge tep menengada, sun Lewi yala neng yumadi, ikin keca weik doronkamrume. Dinino, ne si eremna ati pumbon dona pel tep nengeda, yuk nesaladi mali keca kupmengopda, amali kupmenge nge tep menengada, kan cap, kandi deiamum nyapu cap, nedi wenepsenepa, sun tepapu ikin keca doronkamrume.

Numbers 18

Imam neng cap, Lewi yala neng cap, sundi pel donkamenge nge tep, pepu upu

1 Allah Yahwehdi Harun tep pepu.

Kan nai bo, er nyapsilip yuma cap, kan cap, kan nyapu cap tonda, sun Lewi yala neng yuma capda, ne si eremna tep dodina tenda ati neitamai dinin, pio telepai tep, nimidi mali-mali weik kupmengopda, sun amali kupmengenge tep menengada, sun Lewi yala neng yumadi, ikin keca weik doronkamrume. Dinino, ne si eremna ati pumbon dona pel tep nengeda, yuk nesaladi mali keca kupmengopda, amali kupmenge nge tep menengada, kan cap, kandi deiamum nyapu cap, nedi wenepsenepa, sun tepapu ikin keca doronkamrume. 2 Kan cap, kan nyapu capdi, ‘Allah er si eremna tep, opkal bol di dodin tenda ati dominge, urasin tara damai di, imam pel dopkupe,’ tenen, keteneipkamrum taru yumada, sundi, sun yuk Lewi yala neng yuma tep, “Nun pel dopkupa cadi, melipseso,” pepra, napropmumpa, kan apu yapudi deiamipa, dadeipdanen, yakarami neng, sun Lewi tara nengdi, kan cap, kan nyapu cap, sun tep pel karepsesinge tep, talepra donkamrume. Sundi apel dopkumum taruda, sun Lewi yala neng dipu melipra pel donkamnunge.

3 Sun Lewi yala nesaladi, ne si eremna tep, opkal bol di dodina tenda ati neitamai pel donkameng nge yumada, kan Harundi sun tep, “Apelpu dopkurume!” pepra pepmemtopu kupra, pel donkamnunge. Dinin, sun Lewi yala nengda, ne cap, nimi cap, antamdana tep ati, Pio Telep Lengna Ati neitamai konum ketenepra deiprum keca yumada, pio men wengbankamnunge. Tonda, akeca-keca yuma damai men benkamnunge. Angetopu, tonda ne gispal dona tep, gam keca popra ne tep karenai, er si mesba damai cap, akamre keca yala-yala yumada, pio men bol bemkamnunge. Apeipne ngeda, sundi men gekepmengedi, tali lupra kupmengopda, kan cap, apepman keca bepmenge Lewi yala neng cap, nedi sun yuma tep wenepsenepa depkamrume. 4 Dinino, ne cap, nimi cap antamna tep, ne si eremna tep, opkal bol di dodina tenda ati neitamai pel yuk-yuk karepkesingepu, kan cap, kan nyapu cap, sun yuk Lewi yala neng capdi, akati pel donkamrume. Sun yuk Lewi yala nengdi, melipsengepa, sun kikiman pel tonpa donkamrume. Dinino, nedi kan tep, “Sun cap tonpa akati neitamai pel donkamrume,” pepra, men peipsi neng ton, akati neitamai wekra yangedi, pel donada, pio gume. Ada, “Pio meme,” pepra upu konum sekne.

5 Atep nengeda, Harun kan cap, kan nyapu cap, sun dipapu, “Ne si eremna ati, pio neitamainge, lengna telep ati neitamai cap, siltong telep keca uku dongomnai cap, pel dona tep nengeda, sun pe dipapu wekra, pel donkamrume. Ada, ‘Tali nengdi, akati wekra pel dopmengopda, nedi sun Israel nesala tep, yu kupnerepa wenepnun’ tenen,” pepne. 6 Kan tara nesala Lewi yala nengda, yuk Israel nesala kan-kan di kan melipra pel dona tep, nedi tek sisi konum weipsi. Weipsada, kan melipkengepa, sun cap tonpa pel dona tep karepkesi. Tonda, sun ayala nengdi, ne si eremna tep, kumemdi kandi pel donkamremaida, ‘Sundi melipra donkameng’ tenen, konum ketenepra deipsi. Ada, ‘Ne cap, nimi cap antamna tep, dodina tenda ati neitamai pel donkameng’ tenen, karepsinge talepra pel donkamenga tep, ketenepra deipsi.

7 Sun Lewi yala nengdi, ne si eremna ati bura tara pel dona telep dinino, akati neitamai pel dona ngeda, imam pel dona tep karepsi ngeda, ne mawa ati pio telep lengna ati wekra, pel dona cap, tonda gam keca popra ne karena tep, mesba deiki uku dongomna pel dona capda, kan cap, kan nyapu cap dipapu, sun dipu apel donkamrume. Ada, sun yuk nengdi men pel donkamnunge. Apelda, sun pel cadi, sun dipapu donkamrume. Deiyoda, sundi apel dona tep, ne kange dipapu sun tep, imam neng kepra deipsisi. Atep ware ngebo do yuma, nedi apel dona deiyonge tep, men karepsi ngebodi, er kange dipapu, “Neda apel dopkun’ tenen, akati neitamai wekredi, pel dopre ngeboda, er wenemna tep, sun Israel nengdi er popmengepa depkamre.

Israel nengdi karepmengepa, sun imam nengdi talepra kunkameng keca tep, pepu upu

8 Allah Yahwehdi Harun tep, “Angeda tamna gume. Pio tenepkamrume,” pepra deipu. Apeipu ngeda ake. “Ne Allah, ne si eremna tep, karena pio telep keca ketenepra kareryakankamneng keca yumada, kan Harun cap, kan nyapu capdi dopra, uku dongopkamrumnge yumada, nedi kan cap, kan nyapu cap atep, konum ketenepra deipsisi. Atep nengeda, ataru di dipra, doryankamre taru yuma peda, angepu doronkamrume. Ada, kan cap, kandi deipmempa, dadeipdanen bankamrum neng yumada, utopu kunkamrume. Nedi konum karepsena cadi, akecada pio sun mawa kecapu kunkamre. 9 Tonda, mesba deiki di uku dongomna gumnge, yuk ketenepra deipmengedi doupra, yakankameng ngeda, pio telep lengna jen keca cadi, ajen kecada, kan ngepu kunkamra tep, akeca yuma doronkamrume. Akareryakankameng jen keca yala-yala yuma neitamaida, pio telep lengna ngeda, ake. Konum dapra keteneipmange jen keca, gandum utopunge cap, mali kupmange nge daemna cap, yo pununa cap tep, doupra kareryankamengenge cap, tonda ‘Mali kupmapnge tep, tali lupra poptapsetu dinin, amali kupmapunge tep lyepropsetue’ tenen, doupra kareryankamengenge cap yumada, pio lengna jen keca cadi, kan Harun cap, kan nyapu cap, sunpu dopra jenkamrume. 10 ‘Akareryankamenge keca tep nengeda, ‘Angeda, pio telep lengna keca kurure,’ tenenkamrume. Angeda, sun pengepu kunkamre. Atep, sun nimi puda, alengna jen kecada dopra, bemumdi, mali kuna gumai, telepai dipapu bena deipra, jenkamrume. Tonda, ‘Ajen kecada, pio telep lengnangepu kurure’ tenen, dopra jenkamrume.

11 Israel yala nesaladi ne karena tep, yuknge ton ketenepra, ne dina damai urasin tarapu yana, erepra doupmengedi peterepnengedi duyakankamneng keca yumada, nedi konum karepsena cadi, akeca yala-yala yumada, sun imam-iman neng, sun kecapu kunkamre. Atep, akeca yumada, nedi dopra, kan Harun cap, kan nyapu sisa cap, sundi deiprumpa, dadeipdanen bankameng imam neng yuma tep, sun deikipu deipsene. Ada, kan cap, kan nyapu yuma cap, tonda, kan ner nyapu capda, ajen kecada dopra jenkamrume. Angeda, pio tep, sun tep konum ketenepra karepsena cadi, ataru di dipra, doryankamre taru yumada, pio akunapu kunkamrume. Ajen kecada, kan cap, kan nyapsilip neitamai di, nedi, ‘Angeda, mali keca cadi, men bepkamrume, tonda pio men talenkamrume,’ pepra, deipsisi mali keca ton, men kupmare ngebopu, tali lupra jenkamrure. Dinin, Israel nesaladi karenkamneng jen kecada, sun imam neng, kan nyapsilip dinin, mali keca tupa akapmare ngeboda, akeca pio men jenkamrure. 12 Israel nesaladi menmena weni keca yala-yala yuma, ‘Allah Yahweh, er si eremna tep karepkupe’ tenen, yuk ketenepra kareryakankamneng kecada, minyak saitun me cap, anggur me telepnge cap, gandum cap, tonda sun wa kin keca yala-yala yuma, pio telep weni ngeda, nedi dopra, kan cap, kan nyapu cap tep, pio tep karepsene. Ange yumada, sun mawange tepa. Atep nengeda, ataru di dipra doryankamre taruda, aketeng tamun, aketeng tamun yumada, angepu dopra jenkamrume.

13 Ne Allah Yahweh, ne si eremna tep doupra kareryakankamneng menmena mouramre keca, weni telep keca yala-yala yumada, kan ngepu kunkamrure. Dinino, kan nyapsilip kunkamruma neitamai di, nedi, ‘Angeda, mali keca cadi, pio men bepkamrume, tonda men talenkamrume,’ pepra, deiamsisi mali kun keca ton, pio men kupre ngebopu, apepman kecada dopra jenkamrure. Dinino, nedi ‘Angeda malinge,’ pepra deipsisinge, mali keca kwamre ngeboda, pio men jenkamrure. 14 Atep nengeda, Israel yala nesala, sun kunkameng mutu neitamai di, ne tep, ‘Angeda, Allah er mawange’ tenen, wepra derinkamneng keca yumada, ada ne Allah Yahweh, ne si eremna tep, yuk konum wepra ketenepra kareryakankamneng keca yala-yala yumada, sun Lewi yala nesaladi doronkamrume. Aketenepra kareryakankamneng keca yumada, kan cap, kan nyapsilip cap, sun ngepu kunkamrure.

15 Angetopu, Israel nesaladi, sun mi menmena weni deipkameng nyapuda, ne Allah Yahweh, ne si eremna tep, ketenepra kareryakankamnenge. Uda, ware yala keca do yumada, amutu nesala pe, tonda anesaladi peinung gam keca, yala-yala yuma peda, Israel nesaladi, ‘Allah Yahweh, er si eremna tep karenkamepe,’ tenepmenge ngeda, ne Allah tep ketenepra kareryakankamneng ngeda, kan cap, kan yala nesala, Lewi yala nesala yuma cap, sun ngepu kunkamrure. Dinino, sundi menmena weninge deipkameng sal nyapu yuma cap, tonda nimidi peinung keca menmena weni deipkameng gemnge dinin, nedi, ‘Ayala keca popra jena meme,’ pepra deipsisi kecada, pio tep men doronkamrume. Akeca akuretopu, er yo pununa tep, sun Israel nesaladi kunumna keca ton ketenepra deipmengedi, kan tep karenkamenge. Angeda, nimidi deipkameng weni nyapu cap, tonda gam kure keca weninge dinin, nedi, ‘Akecada, jena meme, ne gispal dona tep, men karenkamnerume,’ pepra, deiamsisi gam keca yumada, er weni mi yuma tep, karenkamkeng dinin, kange di tamupra akeca yuma yo pununa tep nengeda, co bopu dopra, kareryakankamkenunge. Konum karepkengopda, sun pedi, akeca tamupra dubenkamnunge.

16 Sun menmena weni deipkameng sal nyapu pe, nimidi peinung gam kure kecadi deipkameng weni jem nge peda, war tenpu konum kupre pangeda, sun Israel nesaladi, ‘Akeca tamupra dopropkamepe’ tenen, adipapu kunumna keca karenkamkenge. Ada, telep kupra kunumna tep, akeca yo pununa tep, kunumna telep keca ton dopra karenkamenge. Atelep kunumna keca nungna tep, menop taru di, ‘Akeca yo pununa tep, kunumna keca ukupra nukrumudi, angepu doupra duyakankamrume,’ pepra deiamsipa, ne si eremna ati neitamai timbang kepmengedi, kareramengenga utopu, ada kunumna weik gat keca, perak limapu lima (55) gram doupra kareryakankamrume. (Tenpu perak, er ikinda dua puluh gerah ^{▼▼gerah – Aupuda, menop taru Ibrani upu deiki di perami. Er deiyoda, ataru nun walwale dinin, menop taru seki ngeda akurura cadi, nun ton sekmepu.} kurure).

17 Dinino, weni deipkameng jem sapi cap, jem domba cap, jem kambing bisam cap yumada, mi weni menmena deipre ngeda, Israel nesaladi, ‘Nun mawa’ tenen, ka tamupra men dopropkamenge. Atep, ‘Ka tamupra dopropkamep’ tenen, akeca yo pununa tep, kunumna keca ton men kareryankamnunge. Deiyoda, akecada nyapu weni deipmenge ngeda, ne Allah, nengepu kunkamrura tepa. Nedi, ‘Angeda pio telep lengnange, ne mawangepu kurure,’ tenenuna cadi, akeca weninge tep, tamupra men dopropkamenge. Atep, akeca yo pununa tep, gel uang perak dopra men karenkamenge. Ada akecada, pio lengna jen keca cadi, sun imam nengdi, adipapu poprumupa, embankamre yapida dopra, mesba deiki bena gege peprapmumpa, mesba deiki palepkamre. Tonda akeca galeprumudi, sun meta yumada dopra, ne gispal dona tep, uku dongonkamrume. Ukupmumnyopda, uku di, ameta jepre pangeda, adeiki di, siltong telepnge weleprepa, ne Yahwehdi gekepnedi, ne kange derinkamne. 18 Asapi bisam do, domba bisam meta do, angeda, ne tep karenkamnerum dinino, apepmasen keca tuda, kan Harun cap, kan nyapsilip cap, sun yuk imam-imam neng cap, sun mawangepu kunkamra cadi, sun dipapu jenkamrume. Ada, menop taru di kumemnya utopu, ne tep yana karepmanenge domba bisamda, poprapmemdi, er yan dumsisi tarange cap, er taram cap, ketenepra dopmemdi, ne dina damai urasin tarapu yana, erepra doupmemdi peterepnememdi, dopra baramrem utopu kunkamrume.

19 Atep nengeda, sun Israel yala nesaladi, ayala-yala keca yuma, yuk ketenepra, ne si eremna tep doupra, kareryakankamneng keca yumada, nedi kan cap, kandi deipmum sal nyapu cap, ner nyapu cap, sun deikipu karepsene. ‘Aketenepra deipnedi karepsene,’ pepra, pedina upu konum peipsen ngeda, sun cap, sundi deipmumpa, dadeipdanen bankameng imam-imam neng yumada, angepu talepra kunkamrume. Angeda, pedina upu deiki di konum pepra deipman ngeda, sun cap, ne cap tupa tenena tep, pepra deipne. Ukupmantoda, garam uwa yu pio akuramretopu, apedina upu peda, pio akunkamre. Yuk nengdi men gum kupra deiptenge, pio tep kunkamre. Aupu konum pepmasena cadi, angeda men gum kupkamre.

Allah Yahwehdi, Harun tep pepu.

20 Allah Yahwehdi Harun tep aupu konum pepu dingeda, aupu ton cap dukdongopra pepu. “Kanda yuk keca cap, amutu tu cap karepkenepa, men talepra kunkamrume. Kan cap, sun Lewi yala imam-imam neng yuma cap tep, amutu tu ton bokra men karenkamsene. Ada, nedi sun tep, ‘Amutu karepkamsene,’ pepra, deiamsisi mutu bemem taruda, nedi kan tep, wa tu ton karepkenepa, men talepra kunkamreme. Yuk Israel nesala yala-yala yuma akungetopu, wa tu dopra talenkameng dinin, sun Lewi yala nesalada, wa tu men dopropkamrume. Sundi doronkamrum ngeda, ne pua. Ada, ne Allah dipapu, sun Lewi yala nesala yuma tep, pio kalengkamsene. Sun putan kecada, ne dipapu karenkamsene. Sun mawa kecada, nepu kunkamsene. Sundi ne tep, ‘Er dipapu nun putan keca tep, pio karenkamsere’ tenen, ne tepapu teka tenepra kunkamrume. Ne tepapu, pio tep talepra kunkamrume. Ada kan cap, kan nyapsilip cap, sun yuma tep pepsenengepu pio akunkamre,” Allahdi Harun tep pepu.

Allahdi, Lewi yala nengdi pel deiyo talepkamengnge tep, pepu upu

21 Allah Yahwehdi Harun tep pepu. “Sun Israel nesaladi, ne gispal dona tep karenkamneng keca yala-yala yumada, sun Lewi yala neng deiki karenkamsene. Ada, sun Israel nesaladi talenge keca yuma neitamai di bokra, sepuluh persen dopropmengedi, akeca-keca yuma kareryakankamnenge yumada, sun Lewi yala neng deiki karenkamne. Atep akecada, sun Lewi yala neng, sun mawa kecapu kunkamre. Nedi sun tep karepnepa, sundi akeca talepra kunkamrume. Ukupkamna deiyoda, sun Lewi yala nengdi, ne Allah cap, nimi cap, antamna tep, opkal bol di dodina tenda ati, ne si eremna tep ati dominge neitamai talepra, ne si eremna pel donkamruma tep, akeca yuma karenkamsene. 22 Ataru di dipra, doryankamre taru yumada, sun Lewi yala nengdi, ne si eremna ati damai yamemdi, ne si eremna pel donkamrume. Dinino, sun Israel nesala yuk-yuk yala neng yumada, ne si eremna tep, ne Allah cap, nimi cap, antamna tep, opkal bol di domi tenda ati damai ton, pio men yakankamnunge. Ange konum pepsa tep, amenda taru tali nesaladi, akati damai yangopda, adeiki di mali kupmengepa, sun anesala deiki wenemna tep, ikin keca deipnepa, sun yuma depkamenge, pepne.

23 Dinino, sun Lewi yala neng puda, ataru di gonga kepra, ne si eremna pel dona tep, ne Allah cap, nimi cap antamna tep, opkal bol di dodina ati ketenepra deiaminge neitamai pel donkamrume. Tonda, akati neitamai kunkamre pel yumada, sun Lewi yala neng dipapu, apel deiyo talepra donkamrume. Israel nesaladi akati tep, mali kweipmenge pangeda, sun Lewi yala nesala dipapu, kange di telep kemdina pelpu donkamnunge. Angeda, ataru di dipra, dorkunkamre taru neitamai yumada, sun cap, sundi deiprumpa, dadeipdanen bankameng Lewi nesala yumada, angepu talepra kunkamnunge. Tonda, sun Israel yala nesala, yala-yala yuma tep, amutu neitamai di bokra, wa tu ton karepnepa dopropkamenge. Dinino, sun Lewi yala nengda, Israel nesala kunkameng mutu neitamaida, sun wa pena tep tu ton, ne karepnepa, sundi wa tu talepra men kunkamrume.

24 Nedi Lewi yala nesala tep, wa tu ton men karepkamne deiyoda pepkusene. Ada, sun ayala neng talepra kuna tep nengeda, sun Israel nesala yala-yala yumadi talepra kunkameng kecada, neitamai di bokra, seper sepuluh ^{▼▼seper sepuluh – Aupu seper sepuluh penunga deiyoda, ake. Ada, ware keca do yuma, 10 akapyopda, tenpu ngepu (1) wepra derinunge. Angetopu, 100 akapyopda, 10 wepra derinunge. Angetopu, 1000 akapyopda, 100 wepra derinunge.} dopra (10%) ne Allah Yahweh, ne gispal dona tep kareryakankamnenge. Akarenkameng kecada, sun Lewi yala neng tep konum ketenepra karepsisi. Sun dipapu, akeca-keca yuma dopra talenkamrume. Adeiyo tep nengeda, nedi, ‘Israel yala nesala yuma, wa tu ton karenkamsen dinino, sun Lewi yala neng tep nengeda, yuk wa tu ton karepnepa, talepra men kunkamenge,’ pepra deipsene.” Allahdi Harun tep pepu.

Sun Israel nesala yala-yala yumadi talenkameng keca bokra, seper sepuluh (10%) ton dopra, Allah tep kareryakankamenge ngeda, Lewi yala nengdi akeca dopropkamenge, pepu upu

25 Allah er si Yahwehdi Musa tep pepu.

26 Apeipken upuda, kandi sun Lewi yala neng tep, bena pepkurume. Ukupkamrume. Israel yala nesala yumadi, sun talenkameng keca yala-yala yuma bokra, ne gispla dona tep, seper sepuluh kareryakankamneng ngeda, sun imam-imam nengdi doproprumudi, ange neitamai di ton bokra, seper sepuluh (10%) bokra ketenepra deipkamrume. Angeda, sundi ne Allah Yahweh, ne si eremna cap, gispal dona tep karenkamnerume. Ada, Israel neng yumadi, ayana karepkamneng keca, seper sepuluh karenkamnenge neitamai di bokra, sun imam-imam nengdi ange ton dopra, ne Allah Yahweh tep karenkamnerume. 27 Sun Lewi yala nengdi, akeca ketenepra yuk derinkamnerum ngeda, ukupmanto, sun Israel nesaladi, sun anggur me mokon ukupu nge cap, gandum yal keca ukupunge cap, wa pepra kouamenge keca, menmena weni keca cap dopra, ne Allah tep kareramnengtopu, ange peda, sun imam nengdi akeca dopra, ne tep karenkamnerume.

28 Ukunkamruma utopunge ton, ne Allah Yahweh, ne gispal dona tep nengeda, yuk telep keca ton bokra kareryakankamrume. Ada, sun Israel nesala yala-yala yumadi, menmena weni keca yala-yala yuma neitamai di, seper sepuluh (10%) bokra, yuk ketenepra ne Allah Yahweh tep kareryakankamneng ngeda, sun Lewi yala nengdi doronkamrume. Adoprumnge yala-yala yuma neitamaida, sundi ton wilipra seper sepuluh ton doproprumudi, ketenepra ne Allah Yahweh, ne gispal dona tep nengeda, ton bokraprumudi, sun deiyo ngebo imam Harun tep, bena karenkamrume.

29 Ada, ware yala keca yuma do, Israel nesaladi karepmengepa, adoproprumunge neitamaida, pio telep ngepu wilipra, ‘Akecada, nun nai Allah Yahweh, er mawangepu kurure’ tenen, doronkamrume. Doproprumudi, ne gispal dona tep kareryakankamnerume. Akeca neitamai di wilipra, pio telep ngeda, ‘Nun nai bo Allah Yahweh, er mawangepu kupkamrure’ tenen, ne gispal dona tep dinin, akeca dopra, Harun tep kareryakankamrume. 30 Kan Harundi, sun Lewi yala neng yuma tep upepkamrume. ‘Israel nesala yala-yala yumadi, sun menmena weni keca, pio telepnge bokra, ne Allah tep karepnengopda, sun Lewi yala nengdi ange konum doprorumudi, seper sepuluh (10%) ton bokra, ne Yahweh tep karepnemumyopda, nedi sun tep tenenkamsene. Ukupmantoda, wa peamre ngebodi, er wa pepra kouamre keca neitamai di, anggur me mokon cap, gandum yal keca cap, menmena ngeda kipra, ne Allah gispal dona tep kareneretopu, yuk Israel nesaladi weni keca kareramneng ngeda, sun Lewi yala neng peda, tamupra karepnenunge,’ tenimkamne. Ada, ne kangeda, ‘Sun Lewi yala neng, sun pe wa men kwapmar dinin, ukupmanto, akecada sun wa tu neitamai di dopra, ne tep karena utopu keca kunkamre,’ tenenkamsene.

31 Uda, apepmasentopu, seper sepuluhnge (10%) konum bokra karepnemum dingeda, ton tupa akapkamrenge yumada, sun pe dipapu dopra jenkamrume. Ada, dan taru do, dan cei do yuma, akeca yala-yala yumada, sun pe kange dipapu, ‘Ange dopra jepkupe,’ tenepmum dingeda, sun cap, sun nyapsilip capdi, akeca tali lupra jenapu kunkamrume. Deiyoda, sundi ne si eremna tep, ne Allah cap, sun nimi cap, antamdana tep, opkal bol di dodin tenda ati ketenepra deiaminge neitamai di pel doneruma tep, akecada sun kunumna utopu tep, akonum karepsene. Akecada, sun mawa kecapu kunkamrure. Sun Lewi nengdi, akeca dopra tali lupra jenkamrume. 32 Apepmasen keca dopra, tali dajepkamruma deiki di, mali men kweipdankamrume. Ada, sun Lewi yala neng yumadi, Israel yala nesala kareryakankameng keca neitamai di bokra, menmena weninge, pio telepnge, seper sepuluh ton dopra, ne Allah Yahweh, ne gispal dona tep konum karepkamneruma tep pepsene. Israel nesaladi ne tep kareryakanenung ngeda, pio telepnge, ne mawange utopu, jen kecapu kurur dinin, sundi menmena pio telepnge, seper sepuluhnge wilipra, dopropmumdi, ne Allah tep tamupra karenkamnerume. Ukunkamneruma deiki di, mali men kweipkankamrume. Tonda, Israel nesala yala-yala yumadi, kareryakankamneng keca ton, mali men kweipkamrume. Atep nengeda, ne peipmasenetopu tek sisi konum kupmum pangeda, ne upu men yanipkamneruma tep, men wenepra popsenedi, men depkamrume. Teleppu kunkamrume.

Allah Yahwehdi Harun tep pepu.