Numbers 19

Sapi bisam bol yapi bingepu uku dongona tep, pepu upu

1Allah Yahwehdi Musa cap, Harun cap tep, pepu upuda ake.

2Ne Allah Yahwehdi sun tep, “Angepu kunkamrume, angeda pio men kunkamrume,” pepra puto di deipsen upuda, sun butenedi Israel nesala yuma tep, lap pepkurume. Pepmumpa, sundi ner sapi bisamda, er bol yapi bingepu, telep kupra nenmarenge, tonda, nong bol yuma pio telepngepu ketenepkamenge. Tonda, asapi bisam, ‘Nun bung keca gipra dubenkamser’ tenen, er pel dona tep, asapi bisam, er kum dam deiki ikin keca deipmengedi, tapke getepra gipra baramrenge pio men kuramu sapi bisampu wepra duyankamnunge. 3Israel nengdi, asapi bisamda wepra duyangedi, sun tep karepsengopda, asapi doupra, imam ngebo er si Eliasar tep, yana karepkurume. Asapi bisam doupra, sun Israel nesala yuma, opkal bol di yambul dodin tenda ati deiaminge neitamai kunungai di doupra, pio bura tara dubengepa, imam Eliasar er damai di bena popkamrume.

4Yuk imam nengdi, asapi bisam konum popmengopda, imam Eliasardi asapi bisam, er yapi ton metekanun buru du deiki di likropyopda, Allah Yahweh cap, nimi cap antamna tep, ne si eremna tep, opkal bol di dodina tenda ati deiaminge urasin tara damai beredi, ue yoneitam bari deiki bena gege pepra deipkurure. 5Ukupre pangeda, yuk imam nengdi asapi bisam er nongda, uku dongonkamnunge. Uku dongopkamenge ngeda ake. Ada, asapi bisam bol cap, yapi cap, tu cap, deiplyu cap, ange yumada, uku dongopkamenge. Ukupmenge pangeda, imam ngebo Eleasardi dinmarepane, ange yuma uku jepra gawal dangkamrure.

6Ange yuma uku dongopmengepa, uku bo di tupa jenmare taruda, imam Elieserdi, ara co ton metekanun ton cap dopra, tonda yambul co bo paramrenge, er si hisop co teru tenpu cap, tonda alen wiramengtopu tapu, lyom bi tapu tenpu cap dopropredi, akeca yumada doprapredi, bi sapi bisam popra, uku dongopmangepa, uku jenmarya neitamaipu, yana uku dongopkurure. 7Ange-ange yuma konum kupre taruda, aimam ngebo Elieserda, er nong cap, er kenengamre opkal capda, adipapu me kudonkamrure. Ange yuma konum kupyopda, Israel nesaladi opkal bol di yambul dodin tenda ati deiamidi kuramengai neitamaida, kange di tamupra wengbankamrure. Dinino, me gengna cap, opkal me kuna cap, ange ukupmarya peda, ne kangeda, ‘Erda mali keca utopu ngeda, talepmaua cadi, akeca tupa akapmarepane, ne damai men yanmanto kunkamrure. Ukupra dakunmarepanen, atumida, keteng wengbankamre taruda, kange di ton cap, telep kupkamre,’ tenenkamne.

8Ange utopu ton, yuk imam ngebo dinin, erdi abi sapi bisam doupra, uku dongopkamre ngebo peda, er nong pe, er kenekmau opkal pe yumada, me kudonkamrure. Dinino, me gengna cap, opkal me kuna cap, ange ukupmarya peda, ne kangeda, ‘Er mali keca utopu ngeda, konum talepmaua cadi, akeca tupa akapmarepapu, ne damai men yanmanto kunkamrure. Dinino, atumida, keteng wengbankamre taruda, kange di ton cap, telep kupkamre,’ tenenkamne.

9Ne kange deiki di, tenpu ngebo tep, ‘Angeboda, mali kun keca men bepmare ngebo cadi, mali keca men kurura ngebo cadi, ne damai yatue,’ tenenun ngebo ton, asapi bisam uku dongopkamengai wekra yaredi, asapi nong yuma uku konum jeprapredi, sikke bukmarenge yuma lukrapredi asikke doupra, Israel nesala kunge dodin tenda ati deiamyai neitamai di, bura tara beredi, pio telepai ketenepra deiamengaipu bena, yamupra derinkamrure. Ukuamrepane, amenda taruda, sun Israel yala nesala, sun mali kuramenge nge yuma tep, ‘Nun malinge gum kupra deipmepedi, kange di ton cap telep kupmepedi, Allah damai bena kunkamep’ tenen, sun me kuna cap, telep kudina cap tep, me kuna pel ton dopkamnunge. Ukupkameng taruda, abi sapi bisam uku jeproprepa, sikke tapunge dopra, lungdonkamnunge. Ukupmengedi, akecada telepaipu mawa derinkamnunge. Amenda taruda, sun mali kunge keca daemna tep, telep me cap, asikke cap tapakra ketenepkamenge. Ketenepmengopda, sun telep kudina tep, me kuna pel ton donkamnunge. 10Uda arup akonum pepmanutopu, ‘Asapi bisam uku jepmare sikke bulupra, deipmare ngebo peda, er nong cap, er kenekre opkal capda, adipapu me kudonkamrure. Dinino, er mali keca utopu ngeda, tupa akapmarepapu, dakunmaryanen, atumipu dinin, keteng wengberyopda, ‘Angebo er mali kupmau ngeda, konum gum kupmare,’ tenenkamne. Aupu yuma pepra deipsen ngeda, tupa-tupa pio tep kupbankamrume. Ada, sun Israel yala nesala pe, sun nimi bo neng, sun mutu yan kunkameng nesala peda, angepu pio talepra kunkamrume. Allahdi Musa cap, Harun cap tep upepra deipu.

Konum depmange nesala bol bena tep, pepu upu

11Allah Yahwehdi, Musa cap, Harun cap tep pepu.

Ne Allahdi ne kangeda, ‘Konum depmenge neng bol bepre ngeboda, er nong deiki mali kweipdankamre. Atep, ue yoneitam bari (7) tumi neitamai yumada, mali kecada pio akaprepapu kunkamra cadi, ne damai ton men yatudi, ne si men erepnetue. 12Atep nengeda, ue weneri tumi konum keprepa, amali kweipdanmarenge telep kupra derina tep, adipapu er nong yuma, me kuna pel donkamrure. Tonda utopu, ue yoneitam (7) tumi konum kepyopda, utopu, er pe telep kundina tep, er nong yuma me kuna pel donkamrure. Ukupkamra deiki di, telep kudidankamre. Dinino, weneri tumi cap, yoneitam tumi cap, telep kudina tep, me kuna pel men dopyopda, mali kecada, er nong deiki tupa akwapkamrura cadi, ataru neitamaida, ne damai ton pio men yatudi, ne si men eremkamre.

13Ange tep nengeda, ware ngebo do yuma, konum depmare nesala, sun bol bepmare dinin, adipapu me kupra telep men kweipdaryopda, amali kun kecada, pio tupa sun deiki akwapkamre. Ada, ‘Amali keca gum kupkuner’ tenen, me gwepra dingdidan pel kapul men dopmenga tep, ne kangeda, ‘Sun mali kecada, sun nong deiki tupa akapkamra cadi, ne damai ton pio men yatenege,’ tenenune. Tonda, sun mali keca tupa akapmare deiki di, ‘Ne Allah Yahweh, ne si eremna dodin tenda ati, Pio Telep Lengna Ati mali kudinunga cadi, akati damai pio men yakankamenge,’ tenenune. Atep, ange utopu kure ngeboda, yuk Israel nesala wisipra, tonpa men kunkamrure. Er angebo dopra, pio bura tara enepra dokotepkamrume. Er cap, sun yuk Israel nesala cap, tonpa kuna pio gume. Deiyoda, er nong deiki mali kwapmare keca, kange di telep kupra derina tep, me kuna telep me ton, er nong deiki men diktapya cadi, ne kangeda, ‘Er tupa malipu kurure,’ tenenune.

14Nedi sun tep, ‘Angepu kunkamrume,’ pepra, tenpunge ton pepkusene. Ada ukupmantoda, tenpu ngebo ton, er kuna tep dodin tenda ati dopra kuramre ati neitamai di depyopda, ware neng do yuma, akati tonpa kunmange nesala pe, akati mangkau di yana wekameng nesala peda, depmare ngebo damai konum kupmangua cadi, sun nong deiki konum pio mali kweipdankamenge. Atep, autopu nesalada, ue yoneitam bari (7) tumi neitamai yumada, mali kun keca sun nong deiki tupa akapmarepapu kunkamenge. Ukupra kunge taru neitamai di, ne kangeda, ‘Aneng ne damai men yatenge,’ tenenune. 15Tonda, ken di me mau yuma cap, periuk me mau yuma cap, er buplan dengdongona gumnge, depmare ngebo er ati neitamai kapmarenge yumada, konum malipu kudinkamre. Akeca peda, depmare ngebo dam kupmaua cadi akeca dopra, ne damai men duyatenge.

16Ange utopu ton, ware neng do yuma, wa pen dam do, yuk bura tara do, kundenkap, yuk neng parang ya di poptapmangepa, depmare ngebo er nong bol acapu akapmarepa, sundi anong bepre ngeboda, konum mali kweipdanmare. Tonda utopu, wai dam tali er pedi depmare ngebo tep, er nong bol bepre ngebo ton, konum mali kweipdanmare. Tonda utopu, nimi peiramengai yana, akeca cap, atu cap yanipra bepmare ngebo pe, tonda deami nesala sun yo bepmare neng yuma peda, konum mali kweipdanmange. Atep, ne kangeda, sunda pio malipu kunmange. Atep, ue yoneitam bari (7) tumi neitamai yumada, mali keca akapmarepapu kunkamenga cadi, ne Allah damai pio men yakankamenge.

17Mangkau di konum depmare ngebo, er nong do, er yo keca do, bepmare ngeboda, ukupmaua deiki di, konum mali kweipdanmare. Ukupmara cadi, angeboda, ‘Adipapu kange di telep kupra deipdaptene’ tenen, me kuna pel dopkuryopda, er mali kupmarenge daemna tep, ukupkamrume. Ada, ner sapi bisam bol binge popra, uku dongomengepa, uku jepredi, sikke bukamrenge neitamai di, yambulanun di dopra, pio telep yo me ton adeiki dingdongokamenge. Asikke deiamenge nge metekanun ton, dopropkamre sikkeda, periuk me mau pumbon dongopkurure. Ukupyopda, embaramre telep yo me ton gwepra ame mau pumbonpu dikdongopkamre. Ukupredi, ame cap, asikke cap tapakamre.

18Ukupyopda, menmena kupkamre ngeda ake. Yuk ngebo, er mali keca men bepmare ngebo, tupa teleppu kuramre ngebo di, depmare ngebo er nong do, er ati do, er yo keca do konum bepmaupa, mali kweipdanmau ngebo damai benkamre. Beryopda, mali keca men kupmare ngebodi, yambul co teru, er si hisop co, teru tenpu doroprapredi, asikke cap, yo me cap tapakra ketenepra deipmaunge pumbon dongopra wipropyopda, konum mali kweipdanmau ngebo, er nong deiki cap, er kuna tep dodin tenda ati cap, atenda ati neitamai kapmare keca yuma cap, tonda atenda ati neitamai kunmange nesala yuma capda, sun deiki ame mokon gege pepra deipembankamrure.

Gege peprapmarepa, amali kweipdanmau ngebo cap, er ati cap, er ati pumbon kwampmare keca cap, er kikiman kunge nesala cap, ame cap, sikke cap tapakmau ngeda, akeca yuma deiki palepkamrure. Deiyoda ake. Ada ware nesala do yuma, konum depmare ngebo, er nong bol bepmare ngebo cap, er pein damai mangkau di benmau ngebo cap, er yo keca mangkau di bepmare ngebo cap, tali dakunmange nesala, sun mangkau di konum depmau ngebo er nong bepmare neng cap, yuk nengdi bura tara poptapmange ngebo, er nong mangkau di bepmare ngebo cap, sun yumada kange di telep kupra deipkamra tep, apel donkamrure. Ada, mali keca pio men kupmare ngebo, er dipapu atelep me cap, bi bol sapi bisam uku jepropupa, sikke tapunge cap, tapakra keteneipunge dopra, hisop co teru di yambula di wipropredi, aneng sun nong bol deiki gege pepmarepa, sun nong deiki akeca orbena palepyopda, konuma, sunda konum telep kweipdanmaua cadi, sunda telepepu kununge.

19Ada, mali keca pio men kure ngebo, mali keca mangkau di konum bepmau ngebo, kange di telep kupra derina tep nengeda, konum depmare ngebo er nong bepmau tumi di nukra, ue weneri tumi konum kupyopda, hisop co teru di asikke cap, yo me cap tapakra keteneipmau keca dopra, agege pena pel dopkamre. Ange utopu ton, dakunmangepane, ue yoneitam tumi ton konum kupyopda, kange di ton cap adipapu, me burupra gege pena pel ton cap pel donkamre. Amali kweipdanmange nesala, sun telep kudina tep, mali men kupmare ngebodi, me kun pelda ue weneri tumi cap, tonda yoneitam tumi cap deiki di, apel dopra gawal dakyopda, sun mali kwamre neng, sun nong cap, sun kenengamenge opkal cap, adipapu telep yo me di mekupdankamenge. Ukupmengedi, dakunmangepanen, ayoneitam tumi konum ipyopda, sunda konum telep kunmange. Ataru di dipra orkunkamre taruda, yuk Israel nesala cap, Allah cap, damai ton bena kunkamnunge. Apel dopkamenga deiki di, konum telep kweipdanmange.

20Dinino, mali kun keca mangkau di bol bepmange nesala yumada, arup pepmasentopu, telep kupra derina tep pel men dopmengepa, tupa malipu kapmare nengda, sun anesalada, tupa pio mali kuna nengpu kunkamenge. Ne Allah damai ton pio men yakankamnenge. Atep, sun yuk Israel nesala kununga neitamaida, mali keca tupa akapmarepa kunge nesalada, tonpa men kunkamenge. Sun anesalada dopra, bura tarapu enepra dokotepkamrume. Deiyoda, sun mali keca gum kupra derina tep pelda, kapul men kupmanga cadi, mali tupa kununge. Nedi, ‘Sun mali kunange daemna tep, ukupra-ukupra me kunkamrume,’ pepra deipsisinge utopu, kapul men kupmanga tepa. Tonda, sun mali kun keca tupa akupmarya deiki di, ne Allah Yahweh, ne si eremna ati pumbon, Pio Telep Lengna Ati damai men yakankamenge. Ada, mali keca tupa akapmarepapu, akati damai yangopda, akati pio mali kudinkamnunga tep pepne. Tonda, ange utopu kunge nesalada, ne Allahdi, ‘Sunda, ne damai pio men yatenge,’ tenenkamnune. Deiyoda, sun nong telep kudina tep, “Ukupra-ukupra me kupkamrume. Sapi bisam uku di jeproprepa, sikke bukamrenge cap, yo me cap tapakra deipmumyopda, hisop co teru di sun nong deiki gege peprapmumpa, sun nong deiki orbena palepkamre,” pepra deipsisi ngeda, kapul men kupmanaga tep pepne.

21Apepra deipmasene upuda, ataru di dipdongopra, pio dorkunkamre taru tep, sun Israel nesaladi, angepu kupbankamrume. Angeda pio men tapkamrume. Ada, mali keca bepmange nesala, konum mali kupmengopda, sun mali kun keca gum kupra derina tep, nedi, ‘Ukupkamrume,’ pepra deipsisitopu, me kuna pel donkamrume. Sun kange di telep kudina tep, pel dopmare ngebo, er nong pe, er kenekmare opkal peda, adipapu me kudongonapu kunkamrure. Tonda, me kupdaredi, tapkamre meda, ange ton bemna gume. Ware ngebo do yuma, ame ton bepkamre ngeboda, mali kweipdankamre. Ame bepyopda, mali keca bepmarura cadi, ataru di dipra, atumi neitamai yumada, malipu dakunmarepanen, atumi konum ipyopda, kange di teleppu kunkamre. 22Tonda, ange utopu ton, mali kun keca tupa akapmare ngebodi, bol bepkamre keca yala-yala yumada, akeca peda pio mali kecapu kunkamre. Tonda, yuk ngebo ton, amali kupmare keca mangkau di bol bepkamre ngebo peda, malipu kunkamre. Sun anesalada, ne damai ton men yakankamenge. Dinino, mali kunmangepanen, atumi konum ipmarepa keteng wengbaryopda, konuma, kange di telep kupkamnunge. Ambutumito tumida, teleppu kunkamnunge.

Allah Yahwehdi, Musa cap, Harun cap tep lap pepu.