Num 2 | XteSC | STEP | Allah Yahwehdi, Musa cap, Harun cap tep, pepu.

Numbers 2

Allahdi, Israel nesala tep, sun ati dopra derinai tep, “Ukunkamrume,” pepra deipu upu

1 Allah Yahwehdi, Musa cap, Harun cap tep, pepu.

2 Israel nesala sun kunkamyai tep, dodina ati deipkunge taruda, tenpu-tenpu neng sun adipapu, sun kun ati dopra, sun kunai tep peten kemdin keca, ‘Nunda, akeca deiyo neng kunupe,’ tenepmengedi, gerekotepmengai dana-danapu, ati dopra ongomdongonkamnunge. Akati donada, sun co puna nengdi akati dopyakaramitopu kupra, yala-yala yuk-yuk kuramenga utopu kupra dopbankamnunge. Adonkameng ati urasin tarada, ne Allah Yahweh cap, nimi cap, antamdana tep dodin tenda ati dopra deipkamenge. Akati er sirik dana-danapu ongopgenepra donkamnung dinin, sun pe ati urasin tarada, ne ati deipkamnunge. Ukunkameng dinin, pio meneng damaida, men donkamnunge dinin, yambul karenaipu donkamnunge.

3 Tonda, keteng yakan tarada, sun Yehuda yala neng, sundi gonga keprapmengedi, sun deiyo talena neng tepapu, gung yuk-yuk nukra petenkemna keca ikra deipmengedi, apeten kepra deipmengeai dana-danada, ati dopra ongomdongonkamnunge. Yehuda yala nesala, sun deiyo kemna ngeboda, nimi si Aminadab erdi deipu mi, er sida Nahason, erpu kunkamrure. 4 Angebo cap kikiman ati dopra kunkameng nesalada, nimi si nukra sekamitopu, denge weik tujuh puluh empat ribu, enam ratus (74.600) neng er damaipu kunkamnunge. 5 Tonda, Nahason damai kunkamnung nesalada, Isakar yala nesaladi, sun pe ati dopmengedi, acapu kunkamnunge. Isakar yala nesala, sun deiyo kemna ngeboda, nimi si Zuar erdi deipu mi, er sida, Netanel kunkamrure.

6 Angebo cap kikiman ati dopra kunkameng nesalada, nimi si nukra sekamitopu, denge pio weik lima puluh empat ribu, empat ratus (54.400) neng er damaipu kunkamnunge. 7 Angebo Netanel kunkamra damaida, Zebulon yala nesaladi, sun pe ati dopmengedi, acapu kunkamnunge. Zebulon yala nesala, sun deiyo kemna ngeboda, nimi si Helon erdi deipu mi, er si Eliab kunkamrure.

8 Angebo si Eliab cap, kikiman ati dopra kunkameng nesalada, nimi si nukra sekamitopu, denge weik seratus delapan puluh enam ribu, empat ratus (186.400) neng, er damaipu kunkamnunge.

Yala si	Deiyo Ngebo	Denge nukinge
Yehuda	Aminadab er mi Nahason	74.600
Isakar	Zuar er mi Netanel	54.400
Zebulon	Helon er mi Eliab	57.400

9 Atep, Yehuda yala nesala, sun gung pio weka di akunung nesalada, denge weik seratus delapan puluh enam ribu, empat ratus (186.400) neng kuramenga utopu kupra, Israel nesala gopra yuk mutu bena kunkameng taruda, sun Yehuda yala nesaladi menmena menepra bankamnunge. Yuk Israel yala nesalada, sun amnyo tarapu yankamnunge. 10 Uda, Allah cap, nimi cap, antamna tep, opkal bol di keana dodin tenda ati dopra deipkamengai dinin, akati di dipra utara Selatan tarada, Rubendi deipupa, dadeipdanen yakarami yala nengdi gonga kepmengepa, kunkameng nesala yumada, sun gonga keprapmengedi nukra, sun atida, utara selatan tara donkamnunge. Ruben yala nesala, sun deiyo kemna ngeboda, nimi si Zedurdi deipu mi, er si Elisur kunkamrure. 11 Angebo Elisur cap, kikiman ati dopra kunkameng nesalada, nimi si nukra sekamitopu, denge weik empat puluh enam ribu, lima ratus (46.500) neng, er damaipu kunkamnunge.

12 Angebo Elisur kunkamra damaida, Simeon yala nesaladi sun pe ati deipmengedi, acapu kunkamnunge. Simeon yala nesala, sun deiyo kemna ngeboda, nimi si Zurisadai erdi deipu mi, er si Selumiel kunkamrure. 13 Angebo Selumiel cap kikiman ati dopra kunkameng nesalada, nimi si nukra sekamitopu, denge weik lima puluh tiga ribu, tiga ratus (59.300) neng, er damaipu kunkamnunge. 14 Angebo Selumiel kunkamra damaida, Gad yala nesaladi sun pe ati dopmengedi, acapu kunkamnunge. Gad yala nesala, sun deiyo kemna ngeboda, nimi si Rehuel erdi deipu mi, er si Eliasap kunkamrure.

15 Angebo Eliasaf cap, kikiman ati dopra kunkameng nesalada, nimi sun sida konum nukra sekamitopu, denge weik empat puluh lima ribu, enam ratus lima puluh (45.650) nengda, er damaipu kunkamnunge.

Yala si	Deiyo ngebo	Denge nukinge
Ruben	Zedur er mi Elisur	46.500
Simeon	Zurisadai er mi Selumiel	59.300
Gad	Rehuel er mi Eliasaf	45.650

16 Atep, Ruben yala nesala, sun gung pio weka di akunung nesalada, denge weik seratus lima puluh satu ribu, empat ratus lima puluh (151.450) neng kunkamenge. Israel nesala gopra yuk mutu bena kunkameng taruda, sun Ruben yala nesaladi menmena menepra bankamnung dinin, ue butene bankamnung nesalada, sun Ruben yala nesala dukdongopra bankamnunge. Yuk Israel yala nesalada, sun amnyo tarapu yankamnunge.

17 Israel nesala yala yuk-yuk neng, sun konum menmena mepra bange pangeda, adi aneitamaida, sun Lewi yala neng, sun amenda dukdongopra bankamnunge. Ada, sun aLewi yala nengdi, Allah cap, nimi cap, antamdana tep dodin tenda atida, sun ayala neng dipapu doupra bankamnunge. Allahdi, “Sun Israel yala nesala ati-ati yuma doipkamrumai, daneitamaida, sun Lewi yala nesalapu, sun pe ati dopra deipmengedi, ne si eremna ati daneitamaipu doipkamnunge,” peiamutopu, angepu kurami. Tonda, sun bisi barami taruda, yuk-yuk ati doramitopu kuramidi, akati-akati yuma utopu doupra barami. Sun bisi ban taruda, sun gung yuk-yuk kuramitopu, sun petenkemna keca ikra deiaminge tepapu dipetepra baramidi, melipra dombarami.

18 Tonda, keteng wengban tarada, Efraim yala nesala, sun deiyo kepra talena neng tepapu, gung yuk-yuk nukra petenkemna keca ikra deipmengedi, apeten kepra deipmengai dana-danada, ati dopra ongomdongonkamnunge. Sun gungda nukra akuramitopu kupra, sun deiyo neng yuk kepra kurami. Akuramya utopu, sun ati peda yuk-yuk dorami. Sun deiyo kemna ngeboda, nimi si Amihud erdi deipu mi, er si Elisama kunkamrure. 19 Angebo Elisama cap kikiman ati dopra kunkameng nesalada, nimi si nukra sekamitopu, denge weik empat puluh ribu, lima ratus (40.500) neng er damaipu kunkamnunge.

20 Tonda, Elisama damai kunkameng nesalada, Manasye yala nesaladi, sun pe ati dopmengedi, acapu kunkamnunge. Manasye yala nesala, sun deiyo kemna ngeboda, nimi si Pedasur erdi deipu mi, er si Gamaliel kunkamrure. 21 Angebo Gamaliel cap, kikiman ati dopra kunkameng nesalada, nimi si nukra sekamitopu, denge weik tiga puluh dua ribu, dua ratus (32.200) neng er damaipu kunkamnunge. 22 Angebo Gamaliel cap kunkamra damaida, Benyamin yala nesaladi sun pe ati dopmengedi, acapu kunkamnunge. Benyamin yala nesala, sun deiyo kemna ngeboda, nimi si Gideoni erdi deipu mi, er si Abidan kunkamrure.

23 Angebo Abidan cap, kikiman ati dopra kunkameng nesalada, nimi si nukra sekamitopu, denge weik tiga puluh lima ribu, empat ratus (35.400) neng, er damaipu kunkamnunge.

Yala si	Deiyo ngebo	Denge nukinge
Efraim	Amihud er mi Elisama	40.500
Manasye	Pedasur er mi Gamaliel	32.200
Benyamin	Gideon er mi Abidan	35.400

24 Atep, Efraim yala nesala, sun gung pio weka di akunung nesalada, denge weik seratus delapan ribu, seratus (108.100) neng kuramenga utopu kupra, Israel nesala gopra yuk mutu bena kunkameng taruda, sun Yehuda yala nesaladi, menmena menepra bankamnung dinin, Efraim yala nesalada, ue weneri bankamnunge. Yuk Israel yala nesalada, sun amnyo tarapu yankamnunge. 25 Uda, Allah cap, nimi cap, antamna tep, opkal bol di keana dodin tenda ati deipkamengai dinin, akati di dipra, itara bagian utarada, Dandi deipupa, dadeipdanen yakarami yala nengdi gonga kepmengepa, kunkameng nesala yumada, sun gonga kepra kupmengedi nukra, sun atida, itara bagian utara, dapu tara donkamnunge. Dan yala nesala, sun deiyo kemna ngeboda, nimi si Amisyadai deipu mi, er si Ahieser kunkamrure.

26 Angebo Ahieser cap, kikiman ati dopra kunkameng nesalada, nimi si nukra sekamitopu, denge weik enam puluh dua ribu, tujuh ratus (62.700) neng, er damaipu kunkamnunge. 27 Angebo Ahieser kunkamra damaida, Aser yala nesaladi sun pe ati dopmengedi, acapu kunkamnunge. Aser yala nesala, sun deiyo kemna ngeboda, nimi si Okran erdi deipu mi, er si Pagiel kunkamrure. 28 Angebo Pagiel cap kikiman ati dopra kunkameng nesalada, nimi si nukra sekamitopu, denge weik empat puluh satu ribu, lima ratus (41.500) neng, er damaipu kunkamnunge.

29 Angebo Pagiel kunkamra damaida, Naftali yala nesaladi, sun pe ati dopmengedi, acapu kunkamnunge. Naftali yala nesala, sun deiyo kemna ngeboda, nimi si Enan erdi deipu mi, er si Ahira kunkamrure.

30 Angebo Ahira cap kikiman ati dopra kunkameng nesalada, nimi sida konum nukra sekamitopu, denge weik lima puluh tiga ribu, empat ratus (53.400) neng, er damaipu kunkamnunge.

Yala si	Deiyo ngebo	Denge nukinge
Dan	Amisyadai er mi Ahieser	62.700
Aser	Okran er mi Pagiel	41.500
Naftali	Enan er mi Ahira	53.400

31 Atep, Dan yala nesala, sun gung pio weka di akunung nesalada, denge weik seratus lima puluh tujuh ribu, enam ratus (157.600) neng kununge. Israel nesala gopra yuk mutu bena kunkameng taruda, sun Yehuda yala nesaladi menmena menepra bankamnung dinin, Dan yala nesala dakuamrepane, sun yuk yala nesala lyuma konum banmanganen, amenda taruda, sun dukdongopra bankamnunge.

32 Israel yala nesala sun gung yuk-yuk cap, sun co puna nengdi, ati dopra deiamitopu kupra, ati dopra kurami nesala, sun denge nukpetepidi, sun dengeda pio weik, enam ratus tiga ribu, lima puluh lima ribu (603.55) nesala kurami. 33 Angeda, Allah Yahwehdi Musa tep, “Ukupkamrume,” pepra deiamutopu, kurami. Atep, sun Lewi yala neng puda, Israel yala nesala si nukra sengami taruda, sun Lewi neng cap tapakra men nukra sekami.

34 Sun Israel yala nesala yumada, Allahdi Musa tep pepra deiamnga utopu kurami. Ada, sun co puna neng si akuramitopu, ayala-ayala yuk-yuk, sun gung kepra kuramitopu kupra, sun kuramyaida, petenkemna tep keca ikra deiamya amutarapu, ati dopra kurami. Allahdi peiamutopu, sun ati yuk-yuk derirami. Ukupra dakuramyanen, benkoi taru peda, sundi deipnepa, dadeipdanen barami nesala yuma cap, sun pe yala nesala cappu tapakropidi, gung pio weik kepra barami. Menmena menepra barami neng cap, dakuramyanen amenda taru barami neng cap, sun yumada, Allahdi peiamutopu kupra barami.