Numbers 20

Me gum kupka tep, Israel nesaladi mali upu pepra engepi upu

1Keteng tamun denge weik, 40 tahun konum kupupa, aketeng tamun neitamaida, sun Israel nesala embaramyane, me gumai, Sin mutu katuai mutu bei. Embaramianen, Sin mutu dinin, war tenpunge kepka deiki, sun Israel nesala Kades mutu bei. Kades mutuda, mo gum mutu cadi, nimi peda ton men kurami mutu dinin, sun Israel nesala amutu bena kurami. Kades mutu bena kurami taruda, Miryam depupa peipi.

2Uda, Kades mutuda, mo pio gum mutu cadi, sun me pio gum kupupa, Israel nesala yumadi bupra, Musa cap, Harun cap damai yaidi, balila di, ‘Aneng buteneda, nun deiyo neng tupa men kunkamserenge,’ tenen, mali upu pepra derepi. 3Sun anesaladi Musa damai yaidi, yan pepi upuda ake. “Orkatuai mutu embaramepu taru dipapu, Allah er si Yahwehdi, nun wenepra popsetupa deamtepe teptoda, amutu pio me gumai men yanmatepe. Nun kangeda, ‘Telep ngeda, adipapu nun kayapu neng poamu taruda, nun cap poamsetu ja.’ Ukutaru nun akunmap mutuda, pio mali mutu tepa,” pepra mali penmai.

4“Nunda, Allah er si Yahweh, er mawa nesala kunup dinin, warya tep kandi nun doupra, akatuai mutu duyanamsemum do? Ukupsemumpa, nun cap, nun peinup keca cap yumada, ‘Acapu depropkameng’ tenen, pio amali mutu duyanmaserem do? 5Ware keca deiyo tep, nun Mesir mutu kuramepupapu doupra, yakaramkapsemumdi, akeca-keca yuma pio gum mutu aduyana tapmaserem do? Amutuda, pio mali mutu cadi, akeca-keca yuma pio men kapu. Amutuda, du mouramre keca yala-yala yuma men kapu. Ada gandum cap, anggur tapu du cap, semangka cap, co du er si delima cap, tonda jena telep-telep keca yuma gum mutu. Ange utopu, amutuda me peda pio men kurure,” pepra mali perami.

6Upepi atep, Musa cap, Harun cap, adipapu Israel nesala kunmaiyai tapra, Allah er si eremna tep, tonda er cap, nimi cap, antamna ati, opkal bol di domi tenda ati ▼

▼tenda ati – Akeca gambar dina tep, Imamat 1:1 dinkurume.

buplan dam bereidi, ‘Nun nai Allahda, ila mambul ngebo’ tenen, tu deiki mapreidi, tu dipra Allah tep moroprei. Ukupreipa dato-dato di, Allah Yahweh, er pe dirine dokotepupa, er dirine katuai akapupa, eprei. 7Ukupu taruda, Allah er si Yahwehdi Musa tep pepu.

8“Musa kandi pumun taru akati bo deiamum macada, kan cap, kan du bo Harun cap, sundi amaca doupra bererumdi, sun Israel nesala yuma bupra gel tenpu katuaipu deiprerume. Ortarada, ila gel akapupa eptenge. Atep, Musa kandi agel damai tekmemdi, ‘Me yayo,’ pepmempa, adipapu me pukra yankamare. Ukupredi ameda, pio tep pukra embarepa, sun Israel nesala cap, sun sapi bisam cap, kambing cap, domba cap, sun peinung keca yala-yala yuma cap, ame gwepra jenkamenge.” Allahdi Musa tep pepu.

9Upepu pangeda, Musa gekepudi Allahdi peipmemeu utopu, Allah er si eremna ati bo dine, Allah er damai di, menop taru doamu maca bena doprapu. 10Beudi, Musa cap, Harun capdi, Israel nesala amutu gel damai bupra deiprei taruda, Musadi sun tep pepu. “Uda, sun balila kupra, mali-mali kurum nesalada, gekepneso. Nundi mambul pel dopnemepa, amutu gel neitamai di pukra yankur meda, sun jena tepa,” pepu. 11Upepudi, Musa er maca doprapudi, agel deiki ue butene kwepupa, me pukra saupa, Israel nesala cap, sun peirami keca cap, bisam yala-yala yuma cap, ame gwepra jepi.

12Ukupupa, sun yuma jepi dinin, Allahdi Musa cap, Harun cap tep wenepudi pepu. “Sundi ne tep teka men tenenererume. Ada nedi, ‘Agel damai upupu deiki dipu, me pukra yayo, pepmempa, yankamarure,’ pepsi. Upepkesi dinin, ne pepmakeneupapu, Musa kandi, ‘Upu dipapu me men karepsetue’ tenen, kan maca doprapmumdi, agel deiki kwepmumpa, me pukra yanmaue. Ukupmuma deiki di, kandi ne tep, teka tenepra gispal men dopmanerume. Neda, mali keca tenpunge peda, men kunerura cadi, pio Lek ngebo kunune. Nimi utopu ngebo gum dinin, pio dumsisi ngebo kunune.

Ne Allah pio dirine ngebo kunedi, pio dumsisipu kun ngebo peipmasenu upuda, autopu men kupmarerumdi, ne nyapu Israel nesala, sun damai mali kupra deipmarerume. Ada kandi yu kupupa, gel kwepmuma deiki di, Israel nesaladi ne puto kune keca betapra men kael kepneiya tep pepkene. Ange tep ngeda nedi, ‘Amutu karepkamsene,’ pepra teneramsidi, Israel neng tep pediramsisi mutuda, kandi aneng melipra men wengkamrerume,” Allahdi Musa cap, Harun cap tep wenepu.

13Ange yuma konum kupu pangeda, ame pukra yauai, er sida Meriba mutu pepi. Sun upu deiki di, Meriba peraminge deiyoda, ‘Yu upu di pedana mutu’ tenen, perami. Ada, Israel neng cap, Allah cap, me men kwapka tep, yu kange di pepdaiya tep, amutu si dopi. Sundi amutu me gum tep, sun cap, Allah cap pepdai. Pepdaipa, Allahdi er ila puto karepupa, sun yumadi, ‘Uo Allahda, pio yuk kurure. Erda ila Lek Ngebo, pio dumsisi ngebo kurure,’ tenepra kael kepi.

Israel neng bisi bana tep, Edom mutu deiyo ngebo tep moropi dinin, “Abisi embana gume,” pepu upu

14Kades mutu kunmai taruda, Musadi er nyapu peipupa, Edom mutu deiyo ngebo perbana tep, doproipupa er damai perbeidi, aupu pepi. “Nun kabo, kan kayapu nun Israel nesalada, nun ikin-ikin keca weik kuserurnge cap, kange mun kange doupmepunge cap, kan kaele. 15Pumun taru nun co puna neng, Mesir mutu kwerepidi, keteng tamun weik dakuramipane, Mesir mutu nesaladi, nun apu yapu cap, nun cap tep, ikin keca weik, nun nong deiki deriramseipa, ikin weik kuramseu.

16Ukuramepu pangeda, amenda taru Allah tep mororamepupa, gekepudi, Allah er im deiki pel don ngebo malaikat tenpu wepra deipupa, Mesir mutu neitamai di doupra duyanamseue. Ukuramseuane, ukutaruda, nunda Kades mutu konum yana kunmape. Ada nun kabo, kan taleamum mutu sirik, wilimdonai ayana kunmape,” pepra, Musa er nyapudi, Edom mutu taleamu deiyo ngebo damai bena lap pepi.

17Upepidi aupu ton pepi. “Kandi, ‘Telepe,’ pepsemempa, kan mutu neitamai bisi benkamepe. Bisipu benkamep dinin, kan wa pen dam bisai cap, kan anggur tapu du wai neitamai cap, men benkamepe. Tonda bunkwan me men gwepra jepkamepe. Ange yuma ton men kupkamkepe. Nunda tali bisi dumsisipu embenkamepe. Ada, kan Rajadi peipmumpa, paliamkei bisipipu, atara banap, ortara banap kemna gum dipapu, lupra benkamepe.

Bisi benkamep taruda, dumsisi tara cap, tebalal tara cap, neitamai bisi tapra, yukai men benkamepe. Bisi iriamu cap, deiki cap ton men diprepkamepe. Nun dumsisipu baramepyanen, nun tenepmepu mutu benkamepe. Yuk mutu ton men benkamepe. Atep, ‘Ange telepe,’ pepkuserem do, gum do?” pepra bena moropi. Ada, Musa er nyapudi, Edom mutu deiyo ngebo tep moropi.

18Upepra moropi dinino, Edom mutu deiyo ngebodi tamupra pepu. “Gume, nun mutu bisi sun embana gume. Sun yuk bisipu bena kurume. Nedi sun tep, ‘Abisi embana gume,’ pepmasenpane, balila di embenkurumtoda, nun amutu kunup nesala yumadi, ya doupra yapedi, sun popkamsepe,” pepu. 19Upepupa, Israel nengdi tamupra, pepi. “Gume, sun tara ila bisi yo bape taru, nun cap, nun bisam yala-yala yuma capdi, sun me ton jepmepyopda, tek sisi ame kunumna tep, kunumna co bo adipapu karepkamsepe. Atep, ‘Sun bisaida, yanipra betepe’ tenen, moropkepe, yuk keca ton gume,” pepi.

20Upepipane, Edom mutu deiyo ngebo cap, er amutara nesala capdi tamupra pepi. “Gume, nun bisida pio embana gume,” pepi. Upepi dingeda, Edom mutu nengdi, Israel nesala pona tep, jen talen neng, ila puto-puto neng weika di bupra, Israel nesala poryai. 21Ukupipa, Israel nesala epi dingeda, abisi tapra, ‘Yuk tara bisi di kepra benkamepe,’ tenepidi bei. Ada Edom mutu nesaladi, ‘Nun bisi embana telepe,’ men pepya tep kupye.

Harun depu upu

22Ataruda, Israel nesala yumadi, Kades mutu tapra, bisi banmaiyane, Hor mutu bena mapi. 23Hor mutu dinin, Edom tara cap wilimdona damai bei taruda, Musa cap, Harun cap tep, Allah er si Yahwehdi pepu.

24“Harunda amutu depkamare. Ukuprepa, er apu yapu depipa peiamitopu, peipkamrume. Israel nesala tep, ‘Amutu karepkamsene,’ pepra pediramsi mutuda, Harun men benkamre. Deiyoda, nedi Musa kan cap, Harun cap tep, ‘Angeda ukunkamrume. Sun Israel nesala bupra, tenpu gel damai deiprerumdi, agel damai, ‘Me pakra yayo,’ moropreruma yankamarure,’ peipmasisipapu, ne peipsisi upu gekena gum di, yanipnereruma tep, sundi agel balana di kwepmume. Ada ne peipmasitopu men kuamreruma tep, Harunda acapu depkamre. Meriba mutu me embenkou taruda, sundi ne tep mali kupra deipnererume.” Allahdi pepu.

25Upepu dingeda, aupu ton Allahdi Musa tep pepu. “Harun cap er mi Eleasar cap doupra, Hor mutu welepkurume. 26Ukupmem dingeda, Harun er deiki tara kemrur opkal kwiriprapmemdi, er mi Eleasar deiki deipkurume. Deiyoda, Harun konum depkamra taru kepka tep pepkene. Harun depre pangeda, er midi er yo punupkamre,” Allahdi pepu.

27Allah er si Yahwehdi peipua utopu, Musa cap, Harun cap, er mi Eleasar cap, Hor mutu dupai welepi. Sun welenmai taruda, Israel nesala yumadi bulupra dinmai. 28Konum welepi dingeda, Allah peipua utopu, Musadi Harun er deiki tara opkal kwiriprapudi, er mi Eleasar kenekra deipu pangeda, Harun Hor mutu dupai adipapu depupa peiprei. Ukupreidi, Musa cap, Eleasar cap, tamupra kwereprei. 29Kwerepreidi, “Harun konum depmare,” pepra yan lap pepreipa, ataruda Israel nesala yumadi, ue denge weneri, 30 tumi deiki di bupra wekamidi, weika di engerami.