Num 21 | XteSC | STEP | Tenpu ila nimi deiyo ngebo, Arad mutu nesala talepra kuramu. Ada Kanaan tara neitamai dinin, Negeb mutu kuramu. Ton nengdi, ‘Israel nengda Atarim mutu bisi yakanmange,’ pepra lap pepipa, Arad mutu deiyo ngebo gekepudi, Israel neng tep porbeu. Ton nengda, bena popra tapu dinin, ton nengda tomopra wenemna ati doupra dongorbeu.

Numbers 21

Kanaan tara neitamai, Arad mutu kurami nesala yuma tep, Israel nengdi popbisipi upu

1 Tenpu ila nimi deiyo ngebo, Arad mutu nesala talepra kuramu. Ada Kanaan tara neitamai dinin, Negeb mutu kuramu. Ton nengdi, ‘Israel nengda Atarim mutu bisi yakanmange,’ pepra lap pepipa, Arad mutu deiyo ngebo gekepudi, Israel neng tep porbeu. Ton nengda, bena popra tapu dinin, ton nengda tomopra wenemna ati doupra dongorbeu.

2 Ukupua tep, Israel nesala yumadi, Allah er si Yahweh tep moropidi, pedina upu pepra deipi ngeda ake. “Naio, ‘Amutu neng popbisiptepe,’ tenenupa tep, ‘Kandi puto karepsemempa, amutu neng yuma popra taptepedi, bisiptepe’ tenen, moropkepe. Arad mutu neng popbisipmepedi, kan gispal dona cap, kan karena cap tep, sun domi ila ati arum yuma urupra taptepe. Sun keca yuma gum kupra deipkamepe. Sun ati cap, sun keca yuma cap, popra sikke utopu butapkamepe,” pepra moropidi, Allah tep pedina upu pepi.

3 Israel neng moropi ngeda, Allah er si Yahweh gekepudi, puto karepupa, Israel nesaladi, tamupra Kanaan tara nesala dinin, Arad mutu neng yuma popra gawal dakidi, sun domi ati arum yuma urupra tapi. Ukupi dingeda, sun Ibrani upu deiki di, amutu si peipi. Ada sun upu deiki di tenpu upu, Horma deiyoda, ‘Gum kupra derina’ tenena tep peramenge. Atep nengeda, Arad mutu si yo pununa tep si sipepi ngeda, ‘Amutuda Horma mutu,’ pepra si deipi.

Gat keca deiki di, nimi pon bale urasin utopu kupra, petupra deipi upu

4 Israel nesala Hor mutu tapra bei taruda, ‘Edom mutu neitam bisi men benkupa tep, amutu sirik bisipu bana telepe’ tenen, Bi Laut Mokon, er si ton Teberau mokon bana tep barami bisi bei. Abisi banmai taruda, Israel nesala yumadi, ‘Warya tep, amali mutu neitamaipu embanup do? Karen bisi banmap taru pepeda, ikine pio weik kupsere,’ tenepidi, mali kange doupidi, mali weik perami.

5 Ukupra mali kange douami taruda, Allah cap, Musa cap tep mali perami upuda ake. “Warya tep sundi Mesir mutu di doupra yanamsererum do? Ukuamsererumada, ‘Nimi cap, me cap, pio gum mutu neitamai di, sun yuma deptenge’ tenen, duyanamsererum do? Ada amutuda, telep jen kecada pio gume. Tonda jen meda pio gume. Tonda, Allahdi kareserur jenada, weika di tupa-tupa jenupa cadi, nun dabale weik kuserure,” pepra mali perami. 6 Uperami atep, Allah er si Yahwehdi, yu kupupa, nimi pon bal weika di Israel nesala kan-kan karepupa, sun abaldi nimi weik si topipa, nesala weik depi.

7 Adepi atep nengeda, Israel nesala ka moupra tenepidi, Musa damai yaidi Musa tep upepi. “Uo, nun tek sisi mali kunupe. Ada Musa kan cap, nun nai bo Allah cap, sun damai mali upu pepmepua di, mali kudisenupe. Atep Musa, kandi nun tep Allah tep moropsemempa, Allahdi nimi pon bal karepseu ngeda, dopra yukai donokamre. Akeca gum kupsetue,” pepra Musa damai moropi. Ukupra moropi atep, Musadi sun lyemna tep, Allah moropu.

8 Konum moropu pangeda, Allah er si Yahwehdi Musa tep pepu. “Gat keca deiki di nimi pon bal urasin utopu petueipmemdi keteneipkurume. Akonum kupmemnyopda, lyom co deiki ikra deipmempa, abal konum toprepa pu jere nesalada, alyom co deiki deipmem bal epmengedi, adipapu nedi kwetepra deipne pangeda, men depkameng dinin, adipapu gam bukamenge.” Allahdi pepu.

9 Musadi Allah pepmau utopu kupu. Ada, gat keca er sida, tembaga doprapudi, nimi pon bal urasin utopu petupra keteneipudi, lyom co deiki deipu pangeda, ware nesala do yuma, bal konum topi dinin, Musadi tembaga dopra petupra deipu bal, urasin utopu keca dinmai neng yumada, adipapu men depi, gam kurami.

Israel nesalada, Hor mutu di tapra, Moab ban mutu bisi bei upu

10 Israel nesalada, ila mokon er sida Teberau me damai, amutu di tapra bei. Bei dingeda, sun opkal bol di ke tep, dodin ati dorami tenda atida, Obot mutu bena deipi. 11 Obot mutu mapmaiya berekopda, Obot mutu di taprapidi, Moab mutu damai dinin, keteng yakan tara, katawai mutu sida, Abarim mutu damai, sun opkal bol di domi dodin atida, aca deipmaidi, acapu mapmai. Ada, nimi ati ton men kwamudi, walangpu kwamngai bena, keana tep, sun tenda ati abena deipidi, dakunmai. 12 Deipidi, mapmaiya, berekopda, aopkal bol di dodin tenda bol atida, urupdarapidi, amutuda tapra, bisi banmaiyanen, mutu si ton Zeret ban mutu bena, sun tenda atida, keana tep abena deipidi, dakunmai.

13 Aca dipu mapmaiya berekopda, sun tenda ati kange di urupdara bei. Urupra bei dingeda, bisi banmaiyanen, me ton embaramu me si ton, Arnon me pirmanai bena, sun tenda ati ketenepra deipidi mapmai. Uda, Arnon meda, embaramre me, ortara bukamu mutu neitamaida, sun Amori yala neng ton kurami. Arnon meda, Moab tara neng cap atara, Amori yala neng cap ortara, daneitamaida, Arnon me embarure. Ameda, sun dana-dana tara mutu bongdonai kuamu. 14 (Uda, ange tep nengeda, tenpu sengami buku er sida, ‘Allah Yahwehdi wenemna upu pemu nge,’ sekra deipi. Abuku neitamaida, aupu ton sekeipi.

“Sopa mutu ban tara neitamai dinin, yambul mutu tenpu ton, er sida, Waheb mutu bukamo. Amutu neitamaida, Arnon me embenamngaida ban mutu bukamodi, ame embaramu. 15 Tonda, ame duman mutu yuma cap, abukamu mutu-mutu ton, amutu pikil mutu di, ortara bisi benamnganen, yambul mutu ati arum sida, Ar mutu ton akurure. Amutuda, atara di dipra, ortara keteng yakan tarada, Moab tara neng kununge. Atep, ameda, sun mutu wilimdona tara embaramu.” Ada, mar porbana tep, lap pen buku neitamai aupu lap pepra sekeipi.

16 Israel nesalada, amutu keana tep mapmaiyanen, amutu di taprapidi, yukai Beer mutu bei. Beer mutu perami mutu damaida, tenpu me mokon ton kwamu. Abunkon mokon deiamu mutu tep nengeda, menop taru Allah Yahwehdi Musa tep, upu peiamu ngeda, ake. “Kandi sun Israel neng tep pepmempa, bupra bena wekmenge pangeda, nedi sun tep me karepkamne,” peiamu. 17 Amutu bei taruda, Israel nesala yumadi amut penmai. Apenmai mutda ake.

“Abunkon me tep, ‘Me bukra yaseo,’ penmaidi, meda pio bukra yakankamre ja. Yakarepa, nundi ame dopropmepedi, jenkamepe,” pepi. 18 Tonda, upenmai, “Abunkon paliami ngeda, amutu nesala sun ila deiyo neng cap, menmena gonga keamya deiyo neng cap, sun maca di, abunkon me palipra deiami. Tonda, sun deiyo taleami ngeda, petenkemna tep, lyom takke co ton douaminge di, abunkon me, tu paliamya damai bena, kunmai,” pepra, mut pepi.

Amut pepi dingeda, amutu katawaida tapra, bisi benmaiyanen, ortara katawai mutu ton bei. Amutu sida, Matahan mutu bena, keana dakunmaiyanen, amutu peda tapra bei. 19 Matahan mutu di gopra, Nahaliel mutu beidi, amutu di tapra, bisi banmaiyanen, Bamot mutu ton bena weki. 20 Bamot mutu keana mapmaiyanen, amutu di tapra, bisi banmaiyanen, Moab neng tara mutu banai bei. Amutuda, ila di bukamu mutu er sida, Pisga mutu dipapu welepnedi, ila pala katawai mutu ton dirami. Akatawai mutu neitamaida, nimi ton pio men kurami. Walangapu kuramu.

Nimi deiyo neng butene, Sihon cap, Hesybon cap, poptapi upu

21 Israel nesaladi nimi ton wepra depipa, Amori neng sun ila nimi deiyo ngebo, er sida Sihon, er damai benkoiya tep, upu pepra deipi. Deipipa, anengdi, upu lap perbei. Sundi pepra deipi upuda ake.

22 Naio, nun kan tep moropkepe. Nunda, kandi talepmum mutu tara neitamai di, tali lupra betepedi, yuk tara bendoptepe do? Kan mutu bisipu yapedi, nun embenkamep taru neitamai yumada, nun cap, nundi talepra peinup keca cap yankamepe. Yankamep dinin, nundi lerekra, yuk tara bisida, kan wa pen dam do, anggur wai dam do, tonda kan bunkon me mokon dam do, amutu-amutu damai yumada, pio men embenkamepe. Nunda dumsisi bisipu benmapyanen, ortara mutu bepe dingeda, kan kumem mutuda, taprapmepedi, benkamepe,” pepra deipi.

23 Upepra moropi dinin, amutu nimi deiyo ngebo Raja Sihondi, Israel neng, sun pepi upuda, pio men gekepudi, “Anesalada, ne bisi pio men embenkamenge,” pepu. Upepudi, erdi, ‘Israel nesalada, balila kupmengedi, ne tara mutu neitamai ton yakankamenge. Atep, ‘Sun popkup’ tenen, er jen talen neng yuma bulupra deipupa, katawai mutu bisi bei. Sun konum beiyopda, Israel nesala cap, Yahas mutu neitamai beipa, acapu podanmai. 24 Podanmai dinino, Israel nengdi Amori yala neng, sun jen talen neng yumada, amar podana deiki di, Amori yala neng yuma popra, gawal daki. Amori jen talen neng poptapi dingeda, aneng sun talepra kurami mutu yuma, Arnon me damai di dipdongopra, Yabok me damai tara yumada, sunpu dopropi. Dinino, Amori yala nengdi talerami mutu atara di dipra, ortarada sun Amon yala nengdi talerami mutu bukamu dinin, aneitamaida, wilimdongonai kwamu. Amori yala neng, sun taleami mutu tarada, aca. Sun Amon yala nengda, ortara mutu talerami. Tonda, sun Amon yala nengdi, ‘Gume, sun Israel yala nengdi nun mutu wekmengedi arapsenung’ tenen, amutu wilimdongonaida, sun jen talen nengda, puto pio, weika di talerami.

25 Amutu yuma puto di talerami dinino, sun Israel nesaladi, amutu bena dopropyopda, sun Israel nesaladi, Amori neng taleami mutu yuma bena arapi. Arapi mutuda, Hesybon mutu cap, tonda Hesybon mutu dana-dana tara, aneitamai, yambul ati arum doraminge yuma cap, bena dopropidi, Israel neng, sun pe mutupu kepi. 26 Uda, Hesybon perami mutuda, sun Amori ila nimi deiyo ngebo, Raja Sihon, erda amutu neitamai kuramu. Erda amutu kuramudi, pumun taruda, Moab mutu ila nimi deiyo kepra taleamu ngebo tep, porbaramu. Porbaramudi, Moab mutu nesala yuma poptapudi, Moab mutu yuma taleamu dinin, ortara embaramu me sida, Arnon me duman yumada, adinin dipdongopra, ortara mutuda er ton dalupra men dopropu. Arnon me di ortarada, Raja Sihon erdipu tupa taleramu. 27 Moupra tenepmengedi, pio telep pena sengna nengdi, tenepetepidi aupu seki.

“Dyo, sun yuma bulupra yarume. Ila nimi deiyo ngebo Raja Sihondi taleamu mutuda, ila ati arum doramyaida, Hesybon mutupu yakankurume. Hesybon mutuda, urupra tapidi, gawal daki dinino, yape dingeda, amutu ati arum yuma, kange di ton cap lepsisikra donkamepe.

28 Menop taruda, Hesybon mutu di, ila uku jeramu. Ada, Raja Sihondi taleamu mutu, Hesybon mutu neitamai di, ila uku jeramupa, nimi weik dirami. Auku di amutu yuma jeramu ngedi, belepudi Moab tara neitamai dinin, mutu si Ar mutu dorami ati arum yumada, uku jepra gawal daku. Tonda, Arnon me duman kapu dinin, adi deiki tara bukamu mutu buma yuma peda, aila uku puto di jepropudi, gawal daku. 29 Ange tep nengeda, ‘Uo, sun Moab tara mutu neitamai kurum nesala yumada, sun bicaue. Moab tara neitamai kurum nesaladi, Kamos isok sipu eremrum nesalada, Israel nesaladi konum poptapidi, gawal daki. Sun yuma konum popropseiye. Menop taruda, isok Kamosdi sun amutu nimi taleamu dinin, aneng yumada, Raja Sihondi konum dopra ateng kouprapudi, er pe tarapu dubenamsei. Ange utopu, aisok dipapu amutu nerapu taleamunge yumada, Raja Sihondi konum dopra ateng kouprapudi, er pe tarapu dubenamsei. Ada, Amori mutu kurami nesala yuma taleamu nimi deiyo ngebo, Raja Sihondi amutu nimi cap, nerapu cap tomopu.

30 Dinino, ukutaruda, nun Israel yala nesaladi, Raja Sihon cap, sun Amori nesaladi deipnepa, dadeipgerekdanen ban nesala cap yumada, konum popra gum kweipmape. Ada, itara mutu Hesibon mutu bisi banai di dipra, dutara mutu, Dibon mutu peda, amutu-amutu kunung nesalada, konum bisbisa kapra, popra gawal dakmape. Tonda, Nasim mutu di dipdongopra, Nopa mutu damai cap, Medeba mutu damai kunge nesala yuma cap, popra gawal dakmapudi, gum kweipmape,” pepi.

31 Ange yuma konum kupyopda, Amori yala neng kurami mutu yumada, sun Israel yala nesaladi, talepra kurami. 32 Tonda, akurami taruda, Musadi nimi ton wepra deipudi, Yaser mutu kunung nesalada, ‘ware kupra kunung do, ware kupra poptepe do?’ tenen, “Dirbenkurume,” pepra deipu. Ada, “Nun Israel nengdi, amutu neng popra, gawal dakmepedi, sun kunung mutu yuma dopropkamepe. Adeiki di, sun Amori neng, amutu neitamai kunung neng yumada, enepronkamepe,’ tenen kupu. Ukupupa, konum bena dipetepra yai pangeda, amenda taruda, sun Israel nesaladi, Yaser mutu damai neitamaida, nimi ton gonga keprapidi, bei dingeda, amutu-amutu kurami nesala yuma eneproi dingeda, sun peda amutu neitamai ati doprapidi dakurami. 33 Ange konum kupi dingeda, sun Israel nesalada, kange di tamupra yaidi, itara bukamu mutu, ‘Basan mutu damai benkamepe’ tenen, amutu ban bisipu banmai. Banmai dinin, ukupi taruda, Basan mutu taleamu nimi deiyo ngebo, er si Og, er jen talena neng cap, sun yumadi, Israel nesala Eterai mutu kunmaiya tep, ‘Warekra popkup’ tenen, Basan mutu tara di Eterai mutu yaidi, Israel nesala, sun jen talena neng tep popropi.

34 Ukupya tep nengeda, Allah Yahwehdi Musa tep pepu. “Sun kwar dangna gume. Nedi sun Israel jen talena neng tep, puto karepsenepa, angebo Raja Og cap, er jen talena neng capda, sun Israel yala nengdi, er tara neng popropkamarume. Ukupmum dingeda, er taleamu mutu yuma dopropkamarume. Tonda, erdi taleamu nesala yuma popra, gawal dakamarume. Ada menop taru, sundi nimi deiyo ngebo, Raja Sihon, Hesibon mutu talepra, kuramudi, Amori yala nesala taleamupa, pomrum utopu, Raja Og peda poptapkamarume,” pepu. 35 Uda, Allah Yahwehdi, Musa tep peiputopu, sun Israel nesaladi, Raja Og taleamu mutu kurami nesala yuma konum popra buluksingipidi, nimi deiyo ngebo Og cap, erdi deiamu nyapu cap, er jen talena neng cap, er mutu kurami nesala cap yumada, popra gawal daki. Tenpu ton pio men tapi. Israel yala nesaladi, ange yuma konum kupi dingeda, sun Israel nesaladi, amutu peda talepra dakurami.