Numbers 22

‘Israel nesaladi popsenung’ tenen, Moab mutu ila nimi deiyo ngebo Balakdi, Bileam tep moropu upu

1Israel nesala bisi baramyane, Kanaan tara neitamai dinin, Moab mutu neitamai ila banai bei. Ila banai beidi, sun keana dodin ati bena deipi. Amutuda, Yordan me atara, ada ila ati arum dorami mutu, er sida Yeriko mutu damai bena dopi. Yeriko mutu ortara, amutu bena, aneitamaida Yordan me pirman sun keana dodin ati bena dopi.

2Uda, Moab mutu ngebo Zipor, er mi Balakda, amutu ila nimi deiyo ngebo kuramu. Balakda, Israel nesaladi Amori yala nesala tep popbisipinge yuma, konum epra kael keamu. 3Tonda, Moab mutu neitamai kurami nesaladi, Israel nesala sun nimi denge weike kuramipa, nimi men nukmanto kuramipa eyamya tep, sun amutu nesala kware kupupa yo berber pepi. Ada meteka di gume. Tek sisi Moab mutu nesaladi, Israel nesalada nimi weik yakarai atep, ila kware kupu.

4Ange tep nengeda, sun mutu sirikai dutarada, Midian nesala kuramya cadi, sun Moab nesaladi, Midian mutu talepra kurami deiyo neng tep pepi. “Israel nesala pio weik yakanunga cadi, men tapkamsenge. Nun yuma popra gawal daksenge. Sun gung weik yangedi, nun mutu neitamai telep kure keca yumada, jepropkamsenge. Ukupmantoda, sapi bisam cap, domba bisam capdi, mutmuta yuma jepropmengepa, tu katuai kuramre utopu, sundi nun yuma popropsengepa, nun mutu nesala ton gum kunkamepe,” pepra mali perami. Uperameng ngeda, Zipor er mi Balak gekepu. Angeboda, Zipor, er mi Balak, Moab mutu ila deiyo konum gekepu. Aupu gekepu dingeda, ‘Tenpu ngebo er si Bileam tep, upu peipkamne’ tenen, er nyapu damai upu peipupa, kai perbei.

5Balakdi wepra deipu nengpu, nimi si Beor, er mi Bileam damai diman perbeidi, er tep kongpepi. Bileamda, er mutu sisa Petor mutu dinin, Efrat me damai kuramnga tep, acapu diman perbei. Ukupi taruda, Balakdi peipmau upu yuma, Bileam damai bena pepi. Aupuda ake. “Balakdi kan tep upepmakere. Kan gekepkurume. Tenpu yala nesala denge pio weik, sunda Mesir mutu neitamai kurami dinin tapra, bisi dakup yakaramyanen, ukutaruda ne kune mutu damai konum dodin ati yan dopra kunmange. ‘Anesalada, meteka dipu yanmanga,’ tenena gume. Sunda nimi men nukmanto cadi, nun mutu yangyopda, nun yuma popra gawal dakamsenge.

6Anesalada, pio puto weik nesala kununga tep, nedi popra gawal men daktene. Ange tep nengeda, Bileam kanda yamemdi, ‘Sun anesala yuma depkameng’ tenen, kandi sun deiki mali upu pepra wipdongopkamreme. Ukupmemnyopda, nedi anesala tep, ‘Popra gawal daktene do, gum do?’ tenen, diman peipmakenpa peryanmakenge. Dinapu kunkamepe. ‘Anesala popbisiptenyopda, anengda nun kunup mutu neitamai di enepropkamne,’ tenepne. Bileam kao, ne kael kepsi. Ware nesala do yuma, mali upu pepra sun damai wimdongorum nesalada, pio malipu kunkamenge. Tonda ikin weik kunkamenge. Dinin, kandi telep upu pepra, teleppu kweipkamrum nesalada, pio teleppu kununge. Atep aupu pemakene,” pepu. Balakdi, Bileam tep aupu peipupa, er amutara neng gekepidi, Bileam damai kai perbei.

7Nimi deiyo ngebo, Balakdi peipu upu gekepi dingeda, sun Moab deiyo neng cap, Midian mutu deiyo neng capdi, Bileam damai bei. Sun bei taruda, Balakdi karepu co bo ton kipra dubei. Ada amenda kupkamu keca lap pena deiyo ngebo Bileam karepkaminge tep, co bo kipra dubei. Beidi, Balakdi peipmau upu, Bileam damai bena pepi.

8Pepi pangeda, Bileamdi sun tep tamupra pepu. “Uda, tenpu lukunda acapu mapkurume. Ambutumida, nedi sun tep upu peipkamasene. Ada ne nai Allah, er si Yahwehdi peipkuner upu gekepnedi, aupupu ambutumi peipkamasene,” pepu. Upepka tep, sun Moab mutu deiyo neng cap, Midian mutu deiyo neng cap yumada, Bileam cap mapmai.

9Mapmaiya lukunda neitamai, Allahda Bileam damai yaudi asipetepu. “Kan damaida, ware mutu neng yana mapmangpa kikiman kunmarum do?” pepra asipetepu. 10Upepupa, Bileamdi tamupra pepu. “Gume, Zipor er mi Balak, ada Moab mutu ila nimi deiyo ngebodi, wepra deipmarpa yanmang neng cap kunmape. Tonda, Balakdi peipneu upuda ake.

11Mesir mutu neitamai di tapra, bisida kupyakanmange nesalada, pio weike yakanmange. Anesalada, gung yambula dipu men yanmange. Sunda mutu-mutu yuma dinipra arapropnen yakanunge. Ange tep nengeda, Bileam kanda yamemdi, ‘Anesala depropmengedi, gum kupkameng’ tenen, mali upu pepra, sun anesala deiki deipmemdi widongopkamareme. Ukupmempa, nedi sun anesala tep, popra gawal daktene do, gum do? ‘Popbisiptenyopda, nun kunup mutu neitamai di anesala dokotepkamne,’ tenepne. Dinin, ‘Men poptene do?’ tenen, peipmakene, Balakdi upepmanere,” Bileamdi Allah tep lap pepu.

12Upepu pangeda, Allahdi Bileam tep pepu. “Kandi er pepmaker upu gekepmemdi, kan damai yanmakeng neng cap melipra bana gume. Tonda, ‘Anesala mali kupkamenge’ tenen, mali upu pepra, sun damai wimna gume. Ne Allahdi anesala tep, konum wepra telep kupra deipsidi, adeiki sunda ne mawa nesala kununge. Sun damaida, ne akunune.” Allahdi pepu.

13Upepra mapmaiya bereku pangeda, Bileamdi Balak wepra deipupa, yanmai neng tep pepu. “Sun yuma daberume. Allah er si Yahwehdi ne tep, ‘Kanda sun aneng cap men benkurume,’ pepra, upu konum sekmanera tep, sun cap melipra men benkune. Atep, sun pe mutu tamupra dabenkamarume,” Bileamdi pepu. 14Upepka tep nengeda, Moab mutu deiyo neng tamupra, sun deiyo ngebo Balak damai beidi, ukupi dingeda gume. “Bileamdi peipmaser ngeda, ‘Sun cap melipra men benkune,’ pepmasere,” pepi.

15Upepra lap pepi pangeda, ataruda Balakdi, nimi pio ila eremna neng, weika di ton cap wepra dokotepu. Menmena dokotepmau nengda, yambul mambul neng dinin, ue butene dokotepu nengda, ila-ila neng wepra dokotepu. 16Doproipupa banmaiyanen, Bileam damai bei dingeda, sundi er tep pepi. “Zipor er mi Balakdi pepmakerada ake. ‘Adipapu ne damai yankurume. Ware keca do yuma, yuk deiyo deiki di, ‘Balak er damai men benkune’ tenenada, pio gume. Ne pio tek sisi peipne,’ pepmakere,” pepi. “Ukupmempa nun yuma benkamepe,” pepi.

17“Ada mesum tep gume. ‘Erda ne damai yaryopda, nedi er tep kunumna keca weika di karepkamane. Tonda, ware keca putapkamemer do, erdi pepre keca yumada karepkamemene,’ peipmakere. Atep, erda, ‘Ne damai yaredi, sun Israel nesala tep, mali kudina upu pepra, sun deiki deipra wipkamarure. Ukuprepa sun anesala yuma ne Balakdi popkamane,’ peipmakere,” pepi. “Ada mesum tep gume. ‘Kanda ne damai yamemnyopda, nedi kan tep kunumna keca weika di karepkamakene. Tonda, ware keca do yuma, putaprepa kandi pepmem keca yumada, angepu karepkamkene. Atep, kanda ne damai yamemdi, sun Israel nesala tep, mali kudina upu pepra, sun deiki deipra wipkamarume. Ukupmempa, sun anesala yuma, ne Balakdi popkamane,’ peipmakere,” pepi. “Balakdi upepmakere,” pepi.

18Upepra lap pepi dinin, Bileamdi tamupra, Balak er upu kai peryanmai neng tep pepu. “Gume, kunumna weik keca yuma, perak cap, emas cap, Balak er ila nimi deiyo ngebo ati neitamai pio weika di, deiptudi, karepnetua peda, men yankamne. Angeda mesum tep gume. Ne nai bo Allah er si Yahweh, erdi peipnere upupu gekepra kunkamne. Yuk keca ton men kupkamne. Ada meteknge pe, weiknge peda, Allahdi men peipnere kecada, pio men kunkamne. Erdi peipnere upu men yaninkamne.”

19“Dinin, sun kayapu menmena yanmai neng kupmaitopu, ne cap, sun cap, ne atipu tenpu lukunda ton, mapkamape. Ada tali tep guma. Allah er si Yahwehdi alukunda neitamai di, ‘Upu ton peipkamaner do, gum do?’ tenen, gekepterepkamane. Atep ton cap mapmepe ja, pepsene,” Bileamdi pepu. 20Alukunda neitamaida, Allahdi Bileam damai yaudi pepu. “Anengdi kan tep, ‘Yarume,’ pepra, lap peryanmakenge. Ukupmakengpa, kan bana tep, kan konum keteneipmareme. Atep sun cap kikiman benkurum dinino, nedi pepkamakentopu, kupkamareme. Yuknge ton kuna gume,” Allahdi Bileam tep upeipu.

Bileamdi bisi baupane, er keledai bisamdi, malaikat epudi kwarapu upu

21Bileam mapmaua bereku pangeda, er keledai bisam dopra, er bali deiki bukra benkoua tep, ketenepu. Ada er cap, Moab mutu deiyo neng cap, bisi benkorei atep ketenepu. 22Dinino, Allahdi Bileam er dipru neitamai tenepu ngeda, konum kael kepka cadi, yu kupupa Bileam er pe cap, er melimna neng butene cap, sun yuma bisi bai taruda, Bileamda, er keledai bisam deiki bukra banmaupa, Allah er im deiki pel dona ngebo malaikat dokotepupa, ‘Abisi men benkameng’ tenen, sun banmai bisi neitamai bena teku.

23Allah er si Yahwehdi dokotepmau malaikat, podan neng utopu kupra, er buruda parang ya doupra tekmaupa, akeledai bisam epudi, dupdup pea lukdaudi, tamupra wa peiami bisi pirimanaipu beu. ‘Amalaikat tekmar bisipu men benkun’ tenen, keledai bisamdi orwai dam beupa, Bileamdi, “Ware keca deiyo tep kunmanerem do?” peprapudi, ‘Telep bisipu benkuneme’ tenen, balana douprapudi, akeledai bisam bongopra popu. Ukupudi, akeledai bisam tamupra bisaipu gipra yau.

24Ukupudi, ‘Yambul bisi di benkun’ tenen, benmareiane, amenda taruda metek bisipu banmarei. Abisida, dana-danada anggur tapu wa peamya di, aneitamaida metek bisipu banmarei. Abisi dana-dana tarada, gel beilya wipra darapdongoami bisi bon cadi, yukai men benmanto tep, ametek bisipu banmarei. Banmareipane, ka di ton cap, Yahwehdi er im deiki pel don ngebo dokotepmau. Amalaikatda, bisi deknemdanai gel beilya wipra, darapdongoamyai yan tekra kepdongopmau.

25Ukunmaupa tuptopu, Yahwehdi dokotepmau malaikat, abisi neitamai tekmaupa, keledai bisam amalaikat epudi, gopra bisi pari tara tengbeu. Ukupupa, Bileam er yane gel beilya wiaminge di, yan giso dunuk pepudi popu. Ukupu pangeda, Bileamdi akeledai bisam tep, ton cap co balena di bongopra popu.

26Ange ukupu dingeda, Yahwehdi dokotepmau amalaikat gopra, Bileam benkou bisi deknemdanai, yuk bisi bon pio men benmantoaida, pio yambul bisiai bena tekapu. Acada yuk bisi ton pio gumai. 27Ukupmaupane, ton bisi bau pangeda, tuptopu Allahdi doproipmau malaikatda, bisi yan kepdongopra tekapupa epudi, akeledai bisamda, dupdup pea kwar daudi, acapu teim pera marbeu. Ukupupa, Bileamdi yu weike kupka tep pepu. “Kanda ware keca deiyo tep kupembanmanerem do?” peprapudi, Bileam er balana dopra, tuptopu akeledai bisam nong deiki bongopra popu.

28Popu pangeda, Allah er si Yahwehdi akeledai tep, ‘Nimi upu perameng utopu kupra, upu pepkur’ tenen, nimi upu pena deiyo keca karepupa, adipapu akeledai bisamda, nimi upu di peramengtopu kuprapudi, Bileam tep upepu. “Ware kupmana tep, tupa balena di bongopra ponmanerema do? Nedi duembakenepane, kandi ue weneri deiki popneremada, ue weneringe aponerem do?” pepra, asipetepu.

29Upepupa, Bileamdi tamupra akeledai tep pepu. “Kandi ne tep kamet pedina utopu kunmaneremada, warya tep do? Ali kupra deipmanerema tep nengeda, ne ya doupmatenetoda, kan adipapu kum ya yatupketenepa, acapu deptume,” pepu. 30Upepupa, akeledai bisamdi tamupra Bileam tep pepu. “Neda kan keledai bisam kunune. Aketeng tamun, aketeng tamun weika di, tumi-tumi yuma, nedi doupra embankenune cadi, atumi arup kupmanutopu, yuk taru yuma ton kununa taru yumada, akunmakena utopu kukenun do, gum do? Gume, ange utopu men kukenuna tep, ware keca deiyo tep balena di tupa ponmanerem do?” pepu. Upepupa, Bileamdi tamupra pepu, “Gume akupnerem utopu men kunerume,” pepu.

31Upepu pangeda, Allah er si Yahwehdi Bileam tep, ‘Malaikat jenek kupra deipnepa epkur’ tenen, jenek kupra deipudi, Bileam er asuru pakeipupa, Bileamdi amalaikat epu. Ada Yahwehdi dokotepmau malaikat, parang ya doupra tekmaupa epudi, Bileam adipapu lukdana beudi, genepdongopra, Allah tep gispal dona tep, tu deiki marbeu.

32Ukupu pangeda, Yahwehdi dokotepmau malaikatdi, Bileam tep asipetepu. “Kanda ware keca deiyo tep, akeledai bisamda u weneri co balana di bongopra popmarem do? Ne kangeda, kandi, ‘Balak damai benedi, ukupkamne,’ tenepmaremada, tek sisi mali kupkamempa, wenepmantonge cadi, ne yanmandi kan benmanto bisi yuma sengdongomakene. Abisi neitamai tekmana deiyoda, ‘Er bisi seknepa men benkure’ tenen, kupmakene. Mali kupmanto kupmarema deiki di, ne tep kurpetenmanereme.

33Tonda ne bisai tekmanupa, kan keledai bisamdi u weneri taru ne epmanudi gopra banmaue. Gum dingeda, kanda tek sisi konum popmaketene. Dinino, akeledai bisam puda, men popmatene. Er akeledai bisamda, men pokamanue. Deiyoda, mali kuna deiyo ngeboda, kan tenpua,” upepra, malaikatdi Bileam tep wenepu.

34Yahwehdi dokotepmau malaikatdi upepupa, Bileamdi tamupra pepu. “Uo, ne pio mali kupmane. Naio kanda, ne ban bisi neitamai tekmamumdi, dan-dana yuma sekdongopra kunmanumum ada, ‘Akunmanera deiyoda, ne mali kupmana tep kunmanere’ tenen, betapra men kael kepmanue. Ne mangkau kangepu doupra, kunmanudi mali kupmane. Dinino ukutaruda, kandi, ‘Er mali kupmare,’ tenepmaneremada, konum kael kepmana cadi, nati dam ban bisipu, ne tamupra benkamane,” Bileamdi pepu.

35Upepu dinin, Yahwehdi dokotepmau malaikatdi, tamupra Bileam tep pepu. “Gume, kanda sun aneng cap melipra benkurume. Dinino, nedi pepkamaken upupu pepkamrume. Kandi yuk upu ton pena gume,” Allah er malaikatdi Bileam tep pepu. Upepu pangeda, Bileam cap, Balak er upu kai peryanmai deiyo neng cap, sun kikiman bisipu banmai.

Moab mutu taleamu deiyo ngebo Balak cap, Bileam cap, antaprei upu

36Bileam cap, sun aneng cap yuma, ka yakanmai ngeda, yuk nengdi epra Balak damai lap pepipa, gekepudi bisi dirbeu. Ada Moab yala nesala kurami tara dinin, er taleamu wilimdonai, Arnon mutu damai, ila ati arum bena tekra dinmau. 37Dirbenmaua, sun yuma konum antapi dingeda, Balakdi Bileam tep pepu. “Nedi nimi dopra deipsidi, ‘Menmena yankurume,’ peipkesipane, ware keca deiyo tep menmena men yamum do? Tonda kandi, ‘Gume, kunumna keca weika di, tek sisi men karepkamnere,’ tenepmamuma tep, nemkaiya dipu yanamum do?” pepra, Balakdi Bileam tep asipetepudi wenepu.

38Upepupa, Bileamdi tamupra Balak tep pepu. “Ukutaruda ne akonum yane. Dinino, ne dipapu balila deipra, ne tenepne upupu men pepketene. Allahdi ne tep, ‘Ange pepkurume. Aupu ukupra pepkurume,’ peipkamner upupu pepketene. Yuk upu ton men pepketene.” Bileamdi Balak tep pepu.

39Upepdarei dingeda, Bileam cap, Balak cap, kikiman banmareiyanen, mutu si Kiryat-Usot mutu berei. 40Berei taruda, Balak er sapi bisam cap, domba cap popra duyaidi, sun aneng tep yan karepu. Ada, Bileam cap, Balak er nyapu, Bileam melipra yanmai deiyo neng cap, sun jena tep karepu. 41Mapmaiya bereku pangeda, Balakdi Bileam douprapudi, mutu si Bamot-Bahal mutu dupai weleprei. Bileam amutu dup di welya dinmaupa, utamnada sun Israel nesala pio weik kunmaipa epu.