Num 23 | XteSC | STEP | Ataruda, Bileamdi Balak tep pepu. “Ukutaru amutu neitamai ada, Allah er gispal dona tep, gam keca popra, uku dongomnai tep, pala gel taplakra yakeipkunerume. Ada akeca yoneitam bari di, ketenepra aca deipkunerume. Ukupmem dingeda, jem sapi bisam yoneitam bari cap, jem domba bisam yoneitam bari cap, keteneipkunerume.”

Numbers 23

Bileamdi Israel nesala tep, doryankamu taru kupkaminge tep, peipu upu

1 Ataruda, Bileamdi Balak tep pepu. “Ukutaru amutu neitamai ada, Allah er gispal dona tep, gam keca popra, uku dongomnai tep, pala gel taplakra yakeipkunerume. Ada akeca yoneitam bari di, ketenepra aca deipkunerume. Ukupmem dingeda, jem sapi bisam yoneitam bari cap, jem domba bisam yoneitam bari cap, keteneipkunerume.” 2 Bileamdi upepu pangeda, Balakdi Bileam peipmautopu kupu. Ukupupa, sun butene di jem sapi tenpu cap, jem domba tenpu cap, poprapreidi doupra, tenpu-tenpu di, apala gel taplakra yakra yoneitam bari deipra keteneipmaiyaipu, adeiki yana deipbanmareidi, uku dongopmarei.

3 Ukuprei dingeda, Bileamdi Balak tep pepu. “Kanda akeca uku dongona damaipu pio tekmarume. Neda ke taru tep, orbenapkune. Ada tali tep gume. ‘Allah er si Yahwehdi ne damai yarepa, epkaman do, gum do?’ tenen, kupkune. Ukupmanto, Allah cap antapdanemnyopda, erdi pepkamner upu yuma gekepnedi, lap peryankamakene,” pepu. Upepudi, Bileam adipapu er pepmo, amutu dupai welerbanmauanen, yuk neng ton men kunmaiyai, amutu dupai welepu.

4 Ukupu pangeda, Allah adipapu er damai yaupa, Bileam cap sun butene antapdarei. Antapdarei dingeda, Bileamdi Allah tep pepu. “Nedi peipmanpa, yoneitam bari yuk-yuk yakra deipmaidi keteneipipa, ayoneitam bari gel pala deiki di, nedi jem sapi tenpu cap, jem domba tenpu cap, akeca deiki tenpu-tenpu deipmane dinin, yuk-yuk deribanmanue,” pepu.

5 Upepupa, Allah er si Yahwehdi, Bileam er dipru neitamai tenepra pepkou upu tep, lap pepra deipu. Aupu pepu. “Akarepmaken upuda, Balak damai bena pepkurume,” pepupa, Bileamdi Allah peipmau upu, Balak tep lap perbeu. 6 Bileam tamupra yaudi yandinmaupa, Balakda Allah er karena tep, gam keca popra derinai damai tekmau. Tonda er cap, Moab mutu nimi deiyo kemna neng cap, akeca damai tekmaipa, Bileamdi epu.

7 Ataruda, Allahdi Bileam tep karepmau upu, dortara kupbenkamu upu tep pepu. Erdi pepu upuda ake.

“Keteng yakan tara, Aram mutu dinin, keteng yakan tara, timur tara orkuramsipane, Moab mutu nesala taleamu ngebo, ila nimi deiyo ngebo Balakdi upupneupa yasi. Ayasi pangeda, Balakdi ne tep upepneu. ‘Kan yamemdi, Yakubdi deipupa dadeipdanen yakaramyanen, ukutaru kunge Israel nesala yuma tep, mali kudina upu pepmempa, sun deiki wipdongopkamareme,’ pepneu.

8 Upepneu dinin, Allahdi, sun anesala tep, ton mali upu pepra, sun deiki deipudi men wipdongopu atep, ne tali ngebodi ware kupra mali upu peptenya deiki di wipdongoptene do? Ange utopu, Allah er si Yahwehdi, ‘Anesala mali neng pua,’ pepra, mali upu pepra, men wipdongopre nesala tep, ne tali ngebodi ware kupra mali upu peptenedi wipdongoptene do? Gume, ange men kuptene.

9 Israel nesalada, ne amutu dupai bena welepra ila gel deiki teknedi dinmanpa, sun Israel nesala ukunmangpa epne. Nedi epman ngeda, sun Israel nesalada, sun yuk kununge. Yuk mutu nesala cap wisipra kikiman men kununge. Israel nesala sun kangeda, ‘Nunda pio yuk nesala kunupa cadi, ban-ban yuma tali kunge nesala utopu men kunupe,’ tenenunga tep, sun pe yuk kununge. Ange yuma epmane.

10 Yakubdi deiamupa deipdanen, gerekdanen yakanung nesala, sunda men nukmanto denge pio weik kununge. Ukupmantoda, tu bisi bangepa, sikke but weleramrenge utopu kupra yakanunge. Atep, ware ngebodi anesala yuma nuktudi, lape peptu do? Gume sun nimi gungda, pio men nukmanto tepa. Ange utopu, aca tekmana di, sun Israel nesala yuma men eptene. Sun opkal bol di dodin ati deipmaiyai neitamai bokra, dumbari deipmaipane, amutu deiki di, tenpungepu eptene.

Israel nesala sun gungda, men nukmanto kununga tep, sun tek sisi mambul weike. Allahdi sun tep weika di meliamnga tep, ‘Sun dumsisi kungetopu, ne peda kutene’ tenen, putapnere. ‘Sun dumsisi kungetopu kunmanyane, amenda taru sun depkamengtopu, ne peda utopu deptene’ tenen, putanerure. Sunda pio telep nesala kununga tep, ne kangeda, ‘Sun kungetopu ne peda kutene,’ pepmana tep, anesala tep nengeda, ware mali upu peptenya guma.” Bileamdi pepu.

11 Upepu pangeda, Balak gekepudi tamupra Bileam tep pepu. “Uo, kanda ware ikin keca, ne nong deiki konum deipmanerem do? Nedi upupkesi deiyoda ake. Ada, ‘Bileamda, ne podan nesala mali kudina upu peiptupa, Israel nesala tep wipdongoptudi, mali kupra deipkamre. Ukupre pangeda, ikin weik kunkamenge’ tenen, duyanmakene. Utenena tep duyanmaken dinino, ware keca deiyo tep, sun anesala deiki mali upu pepra, men wipdongopmarem do? Ange men kupmareme. Kandi ne podan nesala tep, ‘Pio telep-telep kunkameng’ tenen, telep upu, sun tep pepmarema cadi, teleppu kunkamenge. Uo, kanda ware keca deiyo tep ange kupmarem do?” pepra, Balakdi Bileam tep wenepu.

12 Upepra wenepupa, Bileamdi tamupra pepu. “Gume, nedi penman upu yumada, ne nai Allah, er si Yahwehdi, ne lyemu talepneudi, peipneungepu penmakene. Nedi yuk upu pio men peptene,” pepu.

Bileamdi ue butene taru deiki, Israel nesala tep, amenda dorkupkamre taru kupkamenge tep, lap pepu upu

13 Upepupa, amenda taruda, Balakdi Bileam tep pepu. “Ukutaruda, kan cap, ne cap yukai benkuneme. Abenkunemai di, Israel nesala denge ton bena epkamreme. Sun gungda pio weike tep, sun yuma men epkamrem dinin, ton gungda epkureme. Atep, yukai bena welepneme dingeda, kandi ne meliprapnememdi, amutu di Israel nesala tep, mali kudina upu pepra wipdongopkamareme. Ukupmem pangeda, sunda ikin kunkamenge,” Balakdi pepu.

14 Upepu dingeda, Balakdi Bileam douprapudi, Pisga mutu deiki weleprei. Amutuda, nimi si Zopim er wai dam berei. Acada, gel pala taplakra yuk-yuk yangmaiyane, yoneitam bari ketenepra deiprei. Ukupreiaida, jem sapi bisam tenpu cap, jem domba tenpu cap, poprapreidi ayakra deipmayai yuma yuk-yuk tenpu-tenpu deipi. Ayoneitam pala gel taplakra yakeipmaiyai deiki, tenpu-tenpu uku sekdongopra banmaiya, uku sekdongopra deipbanmareipa, akeca yuma uku jenmau. 15 Ukupreiopda, Bileamdi Balak tep pepu. “Kanda kan keca keteneipmaremdi, pala gel taplakra yakeipmamemdi, adeiki deipmaremai apu tekamarume. Neda, ke taru Allah cap antapkamanema cadi, neda yambul ortara benapkune,” pepu.

16 Upepupa, Allah er si Yahwehdi Bileam tenepra pepkou upu, er kange dipru neitamai lap pepra deipudi upepu. “Akarepmaken upuda, Balak damai perbenkurume,” pepupa, Bileamdi Allah peipmau upu gekepudi, Balak tep yan pepu. 17 Bileam tamupra beudi dinmaupa, Balakda gam keca popra, pala gel taplakra yakra derinai damai tekmau. Tonda er cap, Moab mutu nimi deiyo kemna neng cap, akeca damaipu tekmaipa bena epu. Konum beupa, antapdarei dingeda, Balakdi Bileam tep asipetepu. “Allah Yahwehdi ware upu pepmaker do?” pepra asipetepu.

18 Asipetepupa, Allahdi Bileam er damai peipmau upupu lap pepra deipu. Er pepu upuda ake.

“Telepe nedi doryankamre taru kupkamrenge, lape pepkukene atep, Zipor er mi Balak, kanda yamemdi yana gekepneo,” pepu. 19 Allah erda, nun nimi kunupa utopu men kurura tep, mok upu tenpunge peda men perure. Tonda, nimidi er men deipmemeiya tep, er menmena di tenere keca yumada, akeca yuma adipapu kunupsek perure. Akeca tapra, ka di ton yuk keca men tenerure. Er tenepredi, ‘Ukupkamne,’ peretopu, angepu tenepra kurure. Er pere upu pio men tamrure. Nun nimi sisada, ‘Akeca kupkamasene,’ pepra, pediramnup dinin, taprapmepedi yuknge penupe. Ukunup utopu, Allah erda men pio men kurure.

20 Allahdi ne tep, ‘Kanda Israel nesala tep, telep upu peipmempa, nedi Israel neng tep telep kupra deipkamne,’ pepra karepneua tep, aupupu pepkune. Allahdi Israel nesala tep, ‘Telep kunkamenge’ tenen, telep upu konum peramu cadi, ne tali ngebodi er upu tapra, yuknge men peptene. Er pere upupu pepkune. Aupuda ake.

21 Yakubdi deipupa, dadeipdanen yakange nesalada, Allah tupa kange derirura cadi, sun tep mali kupra deiprepa, kange mun keca men doropkamenge. Ange utopu, Israel nesalada, Allah tupa kange derirura cadi, sun nong deiki ikin keca men deipkamre. Sunda ikin men kunkamenge. Atep Allah er si Yahwehda, Israel nesala sun damai pio kuredi melimrure. Tonda Allahda, sun ila nimi deiyo ngebo sun kan-kan kuramutopu, tupa kuredi melimrura tep, sun pingpinga di, kange deipra ila upu deiki di er si eremnunge.

22 Allahdi Israel nesala doupra, Mesir mutu neitamai di doupra yakaramu. Ukutaruda, bura bisam ^{▼▼bura bisam – Menop taruda ‘bura sapi bisam’ sekami dinin, akecada, nun mutu nengdi men dinunga cadi, nunda ‘bura bisam utopu’ sekmepu.} ila puto weik kuramretopu, sun puto pio weik nesala kununge.

23 Tonda, sun mali kurami neng cap, asuru kwa neng yuma cap, ila kael keami neng peda, sundi Yakub yala nesala tep, mali upu pepra widongomamya peda, Israel nesala tep men mali kemdongomami. Sunda teleppu kuramya utopu, tupa kunkamenge. Ange utopu ukutaru peda, mali nengdi isok puto deiki di, Israel neng tep mali men kweiptenge. Ukutaruda, nimi yumadi, sun Yakubdi deipupa dadeipdanen yakarami nesala tep, Israel yala nesala tep nengeda, upenkamenge. ‘Uo, sun yumada diso. Allahdi anesala damai melimrura cadi, sunda teleppu kununge. Sunda ila mambule,’ pepra penkamenge, pepu.

24 Israel nesalada, ner dumde kam puto weik kuramre utopu kunkamenge. ^{▼▼dumde kam – Menop taruda, ‘singa pus’ sekami dinin, akecada, nun mutu nengdi men dinunga cadi, nunda, akeca utopunge tep, ‘dumde kam utopu’ sekmepu.} Tonda jem dumde kam utopu ketenepra tengyakankamenge. Tenpuai men kuredi, embandaramre utopu kunkamenge. Ada, yu jem dumde kamdi, beipye peina gum dipapu, er popmare keca konum jepredi gawal dakre dipapu, beipye peingrure. Tonda, jem dumde kamdi, er poptapre keca yapi yuma jeredi gawal dangamretopu, sun Israel nesala peda utopu kunkamenge. Sun podan neng tep, popmengedi, bisbisa kapkamenge. Allahdi Bileam tep peiputopu, Bileamdi Israel nesala deiki pepu.

25 Upepupa, Balak gekepudi, tamupra Bileam tep pepu. “Aupuda pena yaptume. Akonuma, sun Israel nesala tep nengeda, mali upu pepra windongoptume. Dinin ukutaruda, mali upu pena pe, telep upu pena peda yaptumdi, dimpepnapu kunkurume. Ada kandi tumi-tumi yuma sun Israel nesala tep, telep upupu peruma tep pepkene,” pepu. 26 Upepu dinin, Bileamdi tamupra Balak tep pepu. “Gume, ne konum lap pepmakene. Allah er si Yahwehdi ne tep, ‘Upepkurume,’ peneretopu, angepu gekepra adipapu penune. Tali upupu men peptene,” Bileamdi pepu.

Dortaru kupkamunge tep, Bileamdi ue weneringe pepu upu

27 Amenda taruda, Balakdi Bileam tep pepu. “Ukutaruda, yakamempa, nedi yuk karenai debenkukene. Kan cap, ne cap yukai welepkuneme. Aca beneme dingeda, Israel nesala denge ton epkamreme cadi, yukai benkamanem taruda, kandi sun Israel nesala tep, mali upu pepra wipdongopkurume. Ne walwal dinin, Allahdi ne tep kange deipnetudi, Israel nesala tep, mali kudina upu, widongona upu peipkamker do, gum do? Dinino, ‘Ukupnetue’ tenen, putapnera tep, yukai welepnemdi dinkamaneme,” Balakdi pepu. 28 Ataru dipapu Balakdi Bileam doupdarapudi, mutu si Peor mutu deiki dubeu. Ukupupa dutara kuamu mutu, nimi gumai, pio katuai mutu urasin tara bena dinmarei.

29 Ataruda, Bileamdi Balak tep pepu. “Ukutaru amutu neitamai ada, gam keca popra, uku dongopra derinai tep, pala gel yuk-yuk taplakra yangmamemyane, yoneitam bari gel taplakra keteneipkunerume. Ukupmum dingeda, jem sapi bisam yoneitam bari cap, jem domba bisam yoneitam bari cap, keteneipkunerume,” pepu. 30 Upepu pangeda, Balakdi apeiputopu kupu. Ada Balakdi jem sapi yoneitam bari cap, jem domba yoneitam bari cap poprapudi, akeca uku dongona tep, pala gel taplakra yakeipmaiyai yan dopra deipra uku dongop embanmau.