Numbers 24

Bileamdi weneri taru pepu upu

1Ataruda, Bileam konum kael kepu. Ada, erdi sun Israel nesala tep, telep kudina upu penmaupa, Allah er si Yahwehdi kange deipupa, Bileam kael kepka cadi, er men di mali upu pepra wipdongoputopu, ka di ton cap men kupu. Ada Bileamdi, mali kwemdina upu ton men pepra deipu. Ange gum dinin, tekrapudi, Israel nesala kunmai tara, katuai mutu moupra dinmau. 2Atara dinmaupa, Israel nesalada, sun yala yuk-yuk kuramitopu kupra, sun opkal bol dodin ati yan dopmaiyai atara epu. Ataruda, Allah er Sambaladi, Bileam er dipru neitamai yan weku.

3Allah er Lek Sambala Bileam dipru neitamai yan weku pangeda, er puto deiki Bileamdi doryankamu taru, sun Israel yala nesaladi kupkaminge tep, lape pepra deipu. Aupu pepu, “Amenda ortara kunkamrenge tep peipkune. Neda Beor er mi Bileamdi pepne. Neda ne asuru di akeca-keca telep kupra dinuna tep, telep kupra epnedi, amenda kupkamre keca lap penun ngebodi pepkune.

4Tonda, Allahdi pepre upu gekenun ngeboda ne kunune. Allah erda, ila puto ngebo cadi, akeca-keca yuma talepra deiki tara kuredi, Ila Puto Deiyo Ngebo kurure. Atep, erdi kene mapnunga utopu kupnya deiki di, mambul upu yan lape penerepa, gekepra dinune. Allah er gispal dona tep, tu deiki dourbena mapnyopda ne asuru perekra dinepapu yan pedinerure. Ukunerepa dinune, tonda gekenune. Atep, aupu pepkusene.”

5Uo, Yakubdi deipupa dadeipdanen yakarami nesala, Israel nesalada, sun opkal bol keana dodin ati cap, sun kunkamengai capda pio telepe. Sun yala tenpua tep, Israel nesala yuma kunkamengai peda pio teleppu. 6Israel nesala yumada, sun gung pio weika di kununga cadi, sunda ila banai go weikai, pio telepai kunkamenge. Nimi weik kununga cadi, keana tep,’ dodin ati weik derinunge. Tonda me embare me pirman, nimidi wa pepra koupmengepa, pio telep kupra mouramretopu, sun Israel nesala peda, weik kupbankamenge.

Sun kunkamenge keca yumada, teleppu kunkamenge. Allahdi me pirman nintong telep co, er sida gaharu co utopu kupra deiprepa, pio telep mouramretopu, pio teleppu kunkamenge. Ange utopu, gat co er sida, aras co, me pirman koupmengepa, pio telep tengamre utopu, Allahdi puto karerepa, Israel nesala weik kupbangedi, telep kunkamenge. Ukupmengedi, puto cap, telep cap kunkamenge.

7Sun kunkamengai yumada, me weike kupkamra cadi, adeiki di me weika di gwepra jenkamenge. Ange tep nengeda, sun yal keca kounkamenga yumada, dingdina cap kungepa, pio telep kupra neredi, du moupkamre. Tonda sun talepkamre ngebo, ila nimi deiyo Rajada, ila puto di taleprepa, sun yuma puto weik cap, telep cap, kunkamenge. Pumun taru ila deiyo ngebo, er si Agag, erdi taleamngada, yambul mambul dinin, Israel nesala talepkamre deiyo ngebo Rajada, ila mambul puto ngebo kunkamre. Ukupkamra tep nengeda, er cap, sun Israel nesala capdi talepra kunkamenge nge yumada, yuk mutu nesala yumadi, ‘Uo, sunda pio telepe,’ pepra, gispal donkamenge.

8Tonda Israel nesalada, Mesir mutu kuramipane, sun nai bo Allahdi lyepra doupra yakaramu. Ukuramnga cadi, ukutaruda sun puto weike kununge. Ukupmanto ngeda, anesalada bura sapi bisam giso takke puto adi, boptopredi embaramre utopu kupra kununge. Puto weik kunkamenga cadi, sun podan neng yuma tep, popra gawal dakra tapronen, yakankamenge. Sundi, sun podan neng tep, sun yo yuma copra kelupra, sikna buktapnen yakankamenge. Tonda, Allahdi melipserepa, sundi sun podan neng tep, mar dopnepa gulukra kepyakanmengedi, sun podan neng tep popbisipkamenge.

9Israel nesalada, jem dumre kam cap, ner dumre kam capdi, yu weik kuramreng utopu kunkamenge. Ada, ukupmanto, ‘Yuk gam keca popra jepkuneme’ tenen, inipra bungamrenga utopu kununge. Atep, ware nesaladi sun damai bena duptenge do? Gume, popsenunga tep, sun damai bana pio gume. Israel nesala peda, ange utopu kununga tep, yuk mutu nengdi Israel neng tep, men popbisiptenge.

Ange tep nengeda, ware mutu nesala do yuma, sundi Israel nesala tep, ‘Telep kunkameng’ tenen, telep upu pepmengopda, Allahdi ayuk mutu neng tep, telep kupra derinkamre. Ange utopu, Israel nesala tep, ‘Ikin kuptupa, mali kange doupra kunkameng’ tenen, mali upu pepra wimdongomkameng nesalada, Allahdi ayuk mutu neng tep, wimdongomrepa, ikin weik kunkamenge,” Bileamdi aupu yumada, Israel nesala kunkaminge tep pepu.

Balakdi Bileam tep, yu kupupa pepu upu

10Upepupa, Balakdi Bileam tep, yu weik kupupa, mali kange doupudi, er pe buru getepra bongopdaudi, Bileam tep upepu. “Bileam kan upuamkesada, ‘Nun podan neng tep, mali upu pepra wipdongopkamar’ tenen, upupmakesa dinin, kandi u weneri taru di, sun Israel nesala tep, pio telep upupu sun deiki konum peipmareme,” pepu. 11“Ange tep nengeda, ukutaruda kan adipapu kan pe mutu tamupra beo. Nedi kan tep, ‘Menenga keca weika di karepkamkene,’ peamkesi dinino, Allahdi aupu peipmakerpa, telep upupu pepmarema deiki di, menenga karepkamken teneamkesi kecada, men karepkukene. Kunumna keca men dopropkamreme. Deiyoda Allah tepa,” Balakdi Bileam tep pepu.

12Upepu pangeda, Bileamdi tamupra Balak tep, “Kandi dokotepmum neng tep, ‘Allahdi ne tep karepkamner upu, aupupu pepkamne,’ men pepra deiamsi do? Gume, ange peramsisi. Angepu konum lap pepra peramsisi. 13Gume, nedi uperamsi. ‘Ila nimi deiyo ngebo Balak, er ila ati pumbon deiamu keca, akeca-keca yuma, emas cap, perak cap, kunumna telep keca weika di deipra, akati diniktengedi karepnetenga peda, ange men dopropkamne. Deiyoda, ne kange dipapu tenepra, ne pe upupu men peptene. Mali upu pe, telep upu peda, ne dipapu men peptene. Ange gum dinin, Allah er si Yahwehdi, ‘Upenkamrume,’ pepra deipnerenge puda, kan gekenai yana pepketene.’ Angeda konum lap pepsi,” pepra, Bileamdi Balak tep pepu.

14Upepkopda, Bileamdi aupu ton dukdongopra Balak tep pepu. “Ukutaruda, ne mutupu tamupra benkune. Dinin, ne mutu kapul men benkune taruda, Israel nesaladi, Balak kan talepmumpa kunge nesala tep, amenda taru ikin keca, sun nong deiki deipkameng kecada, lape pepkukene,” Bileamdi Balak tep pepu.

Bileamdi, ue dumbaringe dortaru kupkamu keca tep, lap pepu upu

15Upepu dingeda, Bileamdi amenda taru, Balakdi taleamu nesala kupkamu keca tep, aupu pepu.

“Nimi si Beor, er mi Bileamda, nedi pepne. Neda akeca-keca dina tep, asuru di telep kupra dinun ngebodi pepkune. Ne pe asuru di, dortaru kupkamre keca tep epnedi, kael kemna deiyo ngebo kununa cadi, akeca lape pena ngebo kununa di pepne. 16Tonda, Allahdi pedire upu gekenun ngeboda, ne akunune. Allahdi ila kael kemna deiyo keca kareneredi penerepa, gekepnedi lap penune. Allah erda, akeca-keca yuma talepra, pio deiki tara kuredi, Ila Puto Ngebo kuredi, kene mana deiki di, katuai penerepa gekepra dinune. Allah er gispal dona tep, tu deiki maipnepane, ne asuru laipnerepa telep kupra dinune. Atep, aupu pepkusene.” Bileamdi Balak tep lap pepu.

17Amenda taru yankamre ngeboda, nedi dinun dinin, ukutarupu men yankamre. Er yankamre ngeda, karena dipapu dinune. Angebo dinun dinin, mening damai men kurure. Ukutaru di kupkamra tep gume. Dinin, amenda dortaru, kuru ikredi dirine kuramretopu kupra, Yakub er yala nesala neitamai di, ila mambul ngebo tekredi yan kunkamre. Ange utopu, Israel yala nesala kan-kan di, ila nimi deiyo ngebo amutu yankamre. Er konum yaryopda, sun Moab tara nesala cap, Set yala nesala cap yumada, sun giso taikdongoprepa, er amutarapu kunkamenge. Set yala neng peda, angebodi popbisipra amu keptapkamre.

18Tonda, Edom mutu nesala yuma popbisipkamre. Tonda er podan nesala, sun si Seir mutu nesalada, dortaru yankamre ngebo, Israel nesala sun deiyo ngebodi popbisiprepa, sun Edom mutu nengda, er amutarapu kunkamrume. Edom mutu nengda, amu kunkamrum dinin, sun Israel nesalapuda, ila puto kupbangedi, eremna nesala kunkamenge. 19Ange utopu, Yakub er yala nesala neitamaida, tenpu ila nimi deiyo ngebo ton tekredi, sun Israel podandam nesala ati arum domrumai neitamai kunge nesala yuma popbisipkamre. Erdi peprepa, er tara nengdi, amutu podan neng yuma popra, gawal dakamre. Bileamdi Balak tep pepu.

Bileamdi doryankamu taru kupkamnga tep, siriknge lap pepu upu

20Bileamdi Amalek nesala kurami mutu dipetepudi, tapangdina tep, aupu ton cap pepu. “Amenda dortaru kupkamunge tep, upu ton cap dukdongopra pepkusene. Amutu-amutu yumada, sun Amalek nesala dipu talepra kurumdi, ila mambul nesala kurume. Dinin ukutaru akonuma, sirya taruda, sun popra enepronkamsenge. Ada tali tep gume. Amalek nesala popbisipmengepa, gum kupkamenge.” Bileamdi pepu.

21Ataru dipu Bileamdi, Keni yala nesala ton dipterepudi, aupu ton cap dukdongopra pepu. “Pumun taru di dipra, ukutaru peda, pio telepai dimpepra kurume. Metek madi, sun atida gel deiki palepra dopmengedi, kange deipra kuramengtopu, sun peda utopu kurume. Sunda, ‘Ware nesaladi yan popsetenge do, gume,’ tenemumdi, tali kange doupra kurume.

22Ukuramrum dinin, amenda taru, sun Asyur yala nengdi, sun Keni yala nesala yuma tep, popbisipkamsenge. Sik men kunmamumpapu, Asyur yala nengdi sun dopra, ateng kouprapsengedi, sun pe mutu, Asyur mutu tamupra dubenkamsenge.” Bileamdi pepu. 23Bileamdi aupu ton cap dukdongopra pepu. “Uo, sunda bicaue, Allahdi ange yuma konum kupkamre taruda, ware ngebo ton gam kuptu do? Gume yuma depkamenge.

24Tonda, ila laut mokon deiki di, ila gapung co er sida, kapal laut, Kitim mutu di yankamenge. Anengpu dinin, ton sida Siprus mutu neng penunge. Aneng yange dingeda, Asyur mutu nesala cap, Heber mutu nesala cap tep, popra gawal dakamenge. Ukupkameng dinin, amenda taru, sun Kitim mutu jen talena neng peda, gum kupkamenge. Ada dortaru sun Israel nesaladi, amutu neng yuma popra gawal dakmengedi, bisipkamenga tep pepkene,” Bileamdi pepu.

25Bileamdi aupu yuma penmauanen, pepropu pangeda, er pe mutu tamupra beu. Beu pangeda, ataru dipapu Balak peda, er pe mutu tamupra beu.