Num 25 | XteSC | STEP | Israel nesala sun keana tep, Sitim ban mutu bena kunmai. Amutu bena kunmai taruda, Israel nimidi, Moab mutu nerapu, amutu neitamai kurami nerapu cap, tonpa antapra manada gonga kepi.

Numbers 25

Israel nesaladi isok si, Bahal-Peor, er si erepinge tep, seki upu

1 Israel nesala sun keana tep, Sitim ban mutu bena kunmai. Amutu bena kunmai taruda, Israel nimidi, Moab mutu nerapu, amutu neitamai kurami nerapu cap, tonpa antapra manada gonga kepi. 2 Anerapudi Israel nimi tep, “Sunda nun talepra si eremnup isok, er si Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} eremna tep, gam keca popra kalepmepedi, si eremameptopu, sun peda nun cap kikiman kupkupe,” pepra napropi. Upepra napropipa, sun Israel neng peda, amutu isok si eremna tep, kalemna jepidi, Moab mutu nesala si eremami isok sipu eremami. 3 Israel nesaladi amutu isok si Bahal-Peor ^{▼▼Bahal-Peor – Sun Moab tara kurami nesaladi, ‘Nun nai bo isok, er si Bahalda, Peor mutu dup kurura,’ teneramya cadi, er si tep nengeda, ‘Bahal-Peor’ perami.} si eremamya deiki di, pio mali weik kupya cadi, Allah Yahwehdi Israel nesala tep, yu kupupa derepudi, Musa tep pepu. 4 Allah Yahwehdi Musa tep pepu upuda ake. “Israel neng dinin, amutu isok si eremameng neng yumada, tomoprapmumdi, sun yuk Israel nesala yuma dinmangai dipapu popkurume. Keteng komuni popmumpa, Israel nesala yumadi epmengedi, kael kepkamenge. Ada, nedi Israel nesala yuma tep, tali lupra poptapnedi, gawal daktene dinin, Bahal isok si eremenge nesala popmumnya deiki di, ne yu tenepman ngeda, tapkamane,” pepra, Allahdi Musa tep peipu.

5 Allahdi Musa tep upepupa, Musadi Israel nesala sun mali kupmanpa upu lepsisikra bongdina deiyo neng tep pepu. “Telep ngeda ake. Sundi sun pe yala neng neitamai dinin, amutu isok si, Bahal-Peor si eremange neng yumada, tomoprumudi, adipapu popra gawal dakurume,” pepu. 6 Upepka tep, ataruda, Musa cap, sun yuk Israel nesala yuma cap, Allah Yahweh, er cap, nimi cap antamna tep, tonda er si eremna tep, opkal bol di dodin tenda ati dominge, akati buplan damai tengyaidi, engenmai. Aengenmai taruda, Israel ngebo tenpu ton, ‘Angeda mambul gume,’ tenepudi, amutu nerapu tenpu, ada Midian mutu nerapu douprapudi, Musa cap, Israel nesala cap, mali kange doupra engenmaiyaipu duyanmau. Ada, Allah er si eremna tep, domi dodin tenda ati buplan damai doupra yanmau. 7 Ataruda, imam Harundi deipu mi Eliasar, erdi deipu mida, Penehas erdi angebo cap, aisok si eremna ner cap epu. Epudi, er yu weik kupupa, abulupra wekmaiya neitamai dipu tapra beu. Beudi, lyom takke weik kwamu tombak co bena dopropu.

8 Ukupu dingeda, aner cap, angebo cap, sun wekmarei dodin tenda ati tep, epra beudi, bena weku. Ukupudi, aner cap, angebo cap tep, lukra popu. Aneng butene popka deiki di, Allahdi, ‘Israel nesala sun wenemna tep, ila mambul pu, ikin keca keteneipu ngeda, Israel nesala sun kankan gonga kepmau puda, adipapu pio gum kupu. 9 Atumi dipapu, ila kange mun pu gum kupu dinino, ataru apu di anesala deiki sakropudi, jenmaupa, popupa depi nesalada, sun dengeda, pio weik kuprap nesala depi. Ada, denge weik dua empat ribu (24,000) nesala depi.

10 Ukupka tep, Allah Yahwehdi Musa tep pepu. 11 Yahwehdi Musa tep peipupa, Musadi Pinehas tep pepu upuda ake.

“Yahwehdi pepkere. ‘Imam Harundi deipu ngebo Eliasardi deipu mi, er sida Pinehas, erdi ne Allah si eremna ati pumbon pel don ngeboda, telep kupmaua deiki di, nedi, ‘Israel nesala weika di poptapkamne,’ tenepsi ngeda, ukutaru tapne. Men poptapkamne. Pinehas aneng butene popmaua deiki di, ne yu tenepmanu ngeda, gum keipmanere. Tonda, adeiki di, ‘Israel nesala yuma tep popnedi, gum kweipkun,’ tenepmanu ngeda tapmane. Tonda, nedi, ‘Israel nesala yumada, mali kun keca pio gum dipapu, ne sipu pio eremkamnenge,’ tenenetopu, er Pinehas peda, ange utopu tenerure.

12 Atep nengeda, kan Musadi Pinehas tep, upepkurume. ‘Nedi er tep telep upu ton pepkunada, ‘Kan cap, ne cap telep kange deipra, telep kuprapu kikiman kunkamneme,’ pepra, pedina upu deiki di pepra, deipkukene. 13 Tonda, ‘Pinehas cap, erdi deiprepa, dadeipdanen bankameng neng cap tep nengeda, sun aneng dipapu, imam pel dona ngeda, moupra talepmengedi, pio tep pel dopbankamenge,’ peipne. Ange deiyoda, ake. Er Pinehasdi, ne Allah tep, ‘Erda ila mambul ngebo cadi, er sipu pio eremkamepe’ tenen, aneng butene popka di, telep pel dopra, telep kunmaudi, puto di pel doramaneua tep peipne. Tonda, Israel nengda, mali weik kupmangupnen, erdi, ‘Allahdi sun mali kunge kecada, daepkuser’ tenen, pio telep pel dopka deiki di, sun tep telep kupra deipmanue. Atep, er cap, ne cap pio telep kupra kikiman kunkamneme,” Allahdi pepu.

14 Uda, Israel ngebo er sida, Simridi, Midian mutu ner dopudi, kikiman dakuramreianen, sirya taruda, aner cap dopra yakareipa, Israel nesala dinmaiya kankan damai duyanmaupa, Musa cap, sun Israel nesala cap aner epi. Atep, aner cap, Simri cap tep, Israel ngebo er si Pinehasdi, sun butene popu. Apopu ngebo, er sida Simri. Ada, Saludi deiamu ngebo. Saluda, Simeon yala neng, sun ila nimi deiyo ngebo kepra taleamu. 15 Tonda, Simridi domu ner, Midian mutu nerda, er si Kosbi kuramu. Anerda, Midian mutu ner kuramnga cadi, Allah er si eremna ati damai yauopda, Pinehasdi lyom takke keca di, aner lukra popupa, depu. Dinino, aner er sida Kosbi. Kosbida, er nai bo sisa, Zur kuramu. Zurda, Midian mutu yala nesala, sun ila nimi deiyo ngebo kuramu.

16 Ataru dipapu, Allah er si Yahwehdi Musa tep, aupu ton pepra deipu.

17 “Midian mutu kunge nesala yuma tep nengeda, ‘Sunda nun podan neng utopu kusenunge,’ tenepra kunkamrume. Tonda, poptapra adipapu gum kupra deipkurume. Midian yala nesala yumada, popra gawal dakurume. 18 Ange ukupkamaruma deiyoda, sun Moab yala nesaladi, ‘Israel yala nesalada, nun podan neng utopu kununga cadi, sun deiki di, ikin keca deipkupe,’ tenepi. Tonda, ‘Sun Israel nesala tep, mali kupra derina tep ukupkamepe,’ tenepi. Ada, ‘Aner karepmepepa, sun Israel nesaladi, Bahal-Peor isok, er si ton erepkamenge,’ tenepidi, aMidian mutu ner tenpu, er sida Kosbi, karepipa, Simridi aner dopra, Allah er si eremna ati damai duyanmanga deiki di, pio mali kweipsei. Aner Kosbida, Midian mutu neng tep, sun ila deiyo keamu ngebo, er ner mi kuramnga tepa. Tonda, sun Israel nesaladi, isok si Bahal-Peor, er si eremamruma deiki di, ila kange mun pu karepsesipa, nimi weika di deprume. Atep, aner cap, er dopu ngebo Simri cap popmarumpa, deprei. Deiyoda, ‘Adepmare ner isok si eremamutopu, sun Israel nengdi, isok si ereprum’ tenen, Pinehasdi aner poptapu.