Num 26 | XteSC | STEP | Ila ikin pu, sun damai konum kupropkopda, nimi weika di deamya tep, Allah Yahwehdi Musa cap, imam Harun er mi Eliasar cap tep, aupu pepu.

Numbers 26

‘Israel nesala dengeda, ware kuprap kunung do?’ tenen, ubutene tarunge tep, nimi si seki upu

1 Ila ikin pu, sun damai konum kupropkopda, nimi weika di deamya tep, Allah Yahwehdi Musa cap, imam Harun er mi Eliasar cap tep, aupu pepu.

2 Ukutaruda, sundi, Israel nesala yala yuk-yuk akungetopu, ‘Sun dengeda, ware kupra kunung do?’ tenen, nukrumudi, sun si sengkamrume. Asi sekumum nengda, aneng sun nerapuda gum dinin, nimipu sun keteng tamunda, dua puluh (20) tahun itara nengpu, nukrumudi, sun si sekurume. Angeda, jen talen neng kemna tep, Israel neng sun kan-kan di wepra si sekurume. Sun yala cap, sun si cap yuma, sengkamrume,” pepu.

3 Upepupa, Musa cap, Elieser cap, sundi Allah peiputopu kuprei. Ada, sun Israel nesala yuma, Moab mutu tara, ila pala ban kwamu mutu kunmai taruda, anesala yuma nukterepidi, sun si sekra deipi. Ada, Yordan me goupra, ortara Yeriko mutu dinin, Moab mutu banai bulupra kunmaipa, Musa cap, Eliasar cap, sundi peprei. 4 “Abulupra wekmai nesalada, Israel nesala Mesir mutu di yanami nesala tep, nukpetepkurume. Allah Yahwehdi peipseutopu, sundi, umur dua puluh (20) tahun di itara neng dinin, nimipu yuma bulupmengepa, nukrumudi, sun si sekurume,” pepreipa, aneng yuma bulupipa nuki. Atep nengeda, sun apu bo Yakubdi deipupa, dadeipdanen yakarami neng yuma, Mesir mutu neitamai di yakarami neng dinin, gam tupa kunmai neng tep nuki.

5 Urbenda, Yakub er mi du ngebo, Rubendi deipu nengda ake. Ada, Henok erdi deipupa, dadeipdanen bei neng ton, sun Henok yala nesala kuramipa nuki. Tonda, Paludi deipupa, dadeipdanen baramidi, sun Palu yala nesala ton kuramipa nuki. 6 Tonda, Hesron yala ngebodi deipupa, dadeipdanen bei neng ton, er yala nengpu kuramitopu nuki. Tonda, Karmidi deipupa, dadeipdanen baramidi, sun Karmi yala neng ton kuramipa nuki. 7 Anengdi deipipa, deipdanen barami nengda, sun yumada, Urben yala nengpu kurami. Aneitamai di, nimipu wepra nukinge, sun dengeda, 43.730 kepu.

8 Ukupra nuki dinin, Paludi deipu ngebo Eliab kuramu. 9 Eliab er nyapuda, Nemuel cap, Datan cap, Abiram cap, kurami. Aneng buteneda, Datan cap, Abiram capda, Israel nesaladi, ‘Aneng buteneda, nun deiyo neng kunkamsereng’ tenen, wepra deipi dinin, sun aneng buteneda apel tapreidi, Kora er tamna kepropreidi, Musa cap, Harun cap, sun peprei upu men gekepreiya deiki di, Allah Yahweh erdi peipu upu tep, bisbisa kapreidi, yaniptaprei. 10 Ukupreiya tep, Allahdi yu weik kupka tep, er puto deiki di, dato-dato di tu dikda pepropupa, sun aneng butene cap, Kora er tamna kepropmai neng cap yumada, tu pumbon wekroipa, tu antinipdongopka deiki di, sun yuma depi. Ton yuk nengda, ataru dipapu, nimi dengda, 250 neng ton, Allahdi, ‘Aneng wenepra poptapkune,’ tenepudi, uku dokotepupa, uku di aneng yuma jepra gawal daku. Akupu ngeda, ‘Sun Israel neng ton, ange epra kael kepmengedi, ange tupa tenenkameng’ tenen, aneng popka deiki di, er puto petenkepu. 11 Ange yuma ukupu dinino, Kora erdi deiamu nyapu yumada, men depi.

12 Simeon yala ngebodi deiamu nengda ake. Nemueldi deipupa, dadeipdanen barami neng, sun Nemuel yala neng ton kurami. Tonda, Yamindi deipupa, deipdanen barami neng, sun Yamin yala neng ton kurami. Tonda, Yakhindi deipupa, deipdanen barami neng, sun Yakhin yala neng ton kurami. 13 Tonda, Zerah yala ngebodi deipupa, dadeipdanen barami neng, sun Zerah yala neng ton kurami. Tonda, Shauldi deipupa, deipdanen barami neng, sun Shaul yala neng ton kurami. 14 Simeon yala nengdi deipipa, dadeipdanen yakarami nesala, aneitamai di nimipu wepra nukpetepipa, sun dengeda, 22.200 neng kepu.

15 Tonda, Gad yala ngebodi deipupa, dadeipdanen barami neng, sun Gad yala neng ton kurami. Tonda, Sepondi deipupa, deipdanen barami neng, sun Sepon yala neng ton kurami. Tonda, Siunyidi deipupa, dadeipdanen barami nengda, sun Siunyi yala neng ton kurami. 16 Tonda, Areli yala ngebodi deipupa, dadeipdanen barami neng, sun Areli yala neng ton kurami. Tonda, Arotdi deipupa, deipdanen barami neng, sun Arot yala neng ton kurami. 17 Tonda, Osni yala ngebodi deipupa, dadeipdanen barami neng, sun Osni yala neng ton kurami. Tonda Arotdi deipupa, deipdanen barami neng, sun Arot yala neng ton kurami. 18 Sun Gad yala nengdi deipipa, dadeipdanen yakarami nesala, aneitamai di nimipu wepra nukpetepipa, sun dengeda, 40.500 neng kepu.

19 Tonda, Yehuda yala ngebodi deipu nengda, Her cap, Onan cap kurami. Dinino, Yehuda, er nyapu butene nengda, Her cap, Onan capda, Kanaan mutu neitamai dipu deamrei. 20 – 21 Sun Yehuda yala nengdi deipipa, dadeipdanen yakarami nesala, aneitamai di Syela cap, Peres cap, Zerah cap, Hezron cap, Hamul cap kurami. Sun yumada, yuk-yuk dinin, nyapu deipipa, dadeipdanen baramidi, sun sida sun akuramitopu, sun yala nesala peda dakurami. Ada Syela yala nesala cap, Peres yala nesala cap, Zerah yala nesala cap, Hezron yala nesala cap, Hamul yala nesala cap dakurami. 22 Yehuda yala nengdi deipipa, dadeipdanen yakarami nesala dakuramipa, nimipu wepra nukpetepipa, sun dengeda, 76.500 neng kepu.

23 Isakar yala ngebodi deipu nengda ake. Toladi deipupa, dadeipdanen barami neng, sun Tola yala neng ton kurami. Tonda, Puadi deipupa, dadeipdanen barami neng, sun Pua yala neng ton kurami. 24 Tonda, Yasubdi deipupa, dadeipdanen barami neng, sun Yasub yala neng ton kurami. Tonda, Simrondi deipupa, dadeipdanen barami neng, sun Simron yala neng ton kurami. 25 Sun Isakar yala nengdi deipipa, dadeipdanen yakarami nesala, aneitamai di nimipu wepra nukpetepya dengeda, 64.300 neng kepu.

26 Tonda, Zebulon yala ngebodi deipu nengda ake. Seretdi deipupa, dadeipdanen barami neng, sun Seret yala neng ton kurami. Tonda, Elondi deipupa, dadeipdanen barami neng, sun Elon yala neng ton kurami. Tonda, Yahleeldi deipupa, dadeipdanen barami neng, sun Yahleel yala neng ton kurami. 27 Sun Zebulon yala nengdi deipipa, dadeipdanen yakarami nesala, aneitamai di nimipu wepra, nukpetepya dengeda, 60.500 neng kepu.

28 Yusuf yala ngebodi deiamu neng butene, sun sida ake. Manasye cap, Efraim cap deipu. 29 Sun Manasye yala nengdi deipipa, dadeipdanen yakarami nengda ake. Manasye yala ngebodi deipu ngeboda, Makhir. Makhirdi deipupa, dadeipdanen barami neng, sun Makhir yala neng ton kurami. Tonda, Makirdi deipu ngeboda, Gilead. Gileaddi deipupa, dadeipdanen barami neng, sun Gilead yala neng ton kurami.

30 Tonda, Gileaddi deipupa, dadeipdanen barami nengda ake. Iezerdi, deipupa, dadeipdanen barami nengda, sun Iezer yala neng ton kurami. Utopu Helekdi, deipupa, dadeipdanen barami nengda, sun Helek yala neng ton kurami. 31 Tonda, Asrieldi deipupa, dadeipdanen barami nengda, sun Asriel yala neng ton kurami. Utopu, Sekemdi deipupa, dadeipdanen barami nengda, sun Sekem yala neng ton kurami. 32 Tonda, Semidi deipupa, dadeipdanen barami nengda, sun Semi yala neng ton kurami. Utopu, Eferdi deipupa, dadeipdanen barami nengda, sun Efer yala neng ton kurami. 33 Efer er mida, Zelafehad deiamu. Dinino, Zelafehad erda, sal nyapu ton men deiamu. Erda, ner nyapupu deiamu. Sun sida ake, Mala cap, Noa cap, Hogla cap, Milka cap, tonda Tirza cap deiamu. 34 Sun Manasye yala nengdi deipipa, deipdanen yakarami nesala, aneitamai di nimipu wepra nukpetepya dengeda, 52.700 neng kepu.

35 Efraim yala ngebodi deipupa, dadeipdanen yakarami nengda ake. Sutelahdi deipupa, dadeipdanen barami nengda, sun Sutelah yala neng ton kurami. Utopu, Bekherdi deipupa, dadeipdanen barami nengda, sun Bekher yala neng ton kurami. Utopu, Tahandi deipupa, dadeipdanen barami nengda, sun Tahan yala neng ton kurami. 36 Sutelahdi deipu ngeboda, Eran cadi, Ernandi deipupa dadeipdanen barami nengda, sun Eran yala neng ton kurami. Sun co puna ngeboda, Sutelah kuramu. 37 Atep nengeda, Efraimdi deipupa, dadeipdanen, yakarami nengda, sun si konum sekmapu. Sun nimipu si sekya dengeda, 32.500 neng kurami. Arup sekmapu neng yumada, sun co puna ngebo, Yusuf Kuramu.

38 Uda, Benyamin yala ngebodi deipupa, dadeipdanen yakarami neng sida ake. Beladi deipupa, dadeipdanen barami nengda, sun Bela yala neng ton kurami. Utopu, Ahiramdi deipupa, dadeipdanen barami nengda, sun Ahiram yala neng ton kurami. 39 Tonda, Sepupamdi deipupa, dadeipdanen barami nengda, sun Sepupam yala neng ton kurami. Utopu, Hufamdi deipupa, dadeipdanen barami nengda, sun Hufam yala neng ton kurami. 40 Tonda, Beladi deipu nyapu buteneda, Arad cap, Naaman cap kuramrei. Atep, Araddi deipupa, dadeipdanen barami nengda, sun Arad yala neng ton kurami. Utopu, Naamandi deipupa, dadeipdanen barami nengda, sun Naaman yala neng ton kurami. 41 Atep nengeda, Benjamindi deipupa dadeipdanen, yakarami nengda, sun si konum sekmapu. Sun nimipu si sekya dengeda 45.600 neng kurami. Acapu sekmapu neng yumada, sun co puna ngeboda, Benjamin Kuramu.

42 Tonda, Dandi deipu ngeboda tenpu pua. Angebo er sida Suam cadi, Suamdi deipupa, dadeipdanen barami nengda, sun Suam yala neng ton kurami. 43 Atep nengeda, Dandi deipupa, dadeipdanen, yakarami nengda, sun si konum sekmapu. Sun nimipu si sekya dengeda, 64.400 neng kurami. Acapu sekmapu neng yumada, sun co puna ngeboda, Dan kuramu.

44 Asyer yala ngebodi deipu nengda ake. Atep, Yimnadi deipupa, dadeipdanen barami nengda, sun Yimna yala neng ton kurami. Utopu, Yiswidi deipupa, dadeipdanen barami nengda, sun Yiswi yala neng ton kurami. Utopu, Beriadi deipupa, dadeipdanen barami nengda, sun Beria yala neng ton kurami. 45 Beriadi deipupa, dadeipdanen yakarami nengda ake. Heberdi deipupa, dadeipdanen barami nengda, sun Heber yala neng ton kurami. Utopu, Makieldi deipupa, dadeipdanen barami nengda, sun Makiel yala neng ton kurami. 46 Asyerda, ner mi ton deiamu. Er sida Sera kuramu. 47 Asyer yala nengdi deipipa, dadeipdanen yakarami nesala, aneitamai di nimipu wepra nukpetepipa, dengeda, 53.400 neng kepu.

48 Naftali yala ngebodi deipupa, dadeipdanen yakarami nengda ake. Yahzeeldi deipupa, dadeipdanen barami nengda, sun Yahzeel yala neng ton kurami. Utopu, Gunidi deipupa, dadeipdanen barami nengda, sun Guni yala neng ton kurami. 49 Tonda, Yezerdi deipupa, dadeipdanen barami nengda, sun Yezer yala neng ton kurami. Utopu, Syielemdi deipupa, dadeipdanen barami nengda, sun Syielem yala neng ton kurami. 50 Naftali yala nengdi deipipa, dadeipdanen yakarami nesala aneitamai di nimipu wepra nukpetepipa, dengeda 45.400 neng kepu. 51 Israel yala nesala yuma neitamai di, nimipu wepra nukyada, sun denge yumada, 601.730 neng kepu. 52 Ukupka tep nengeda, Allah Yahwehdi Musa tep pepu.

53 “Israel yala nesala, sun yala yuk-yuk dinin, akuramenga utopu dipetepmemdi, sun yala si akuramengtopu, amutu tu bokra karepkurume. 54 Ada, sun gung weik kuramenge yala nesalada, amutu tu weika di bokra karepkurume. Tonda, sun yala yambula di kuramenge nesalada, amutu tu yambula di bokra karepkurume. Ayala-ayala akuramenga utopu, tu bokra karepkamrume. 55 Aneng sun akungetopu, bokra karepkumem dingeda, ‘Dan yala aneng menmena wipkup do?’ tenen, kurpetena tep keca, er si undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} di dopmengedi, er akeca tuai saka dourbenapredi, sun yala si katuai kupretopu dopropkununge. Menmena belepkamre yala sida, ayala nengdi menmena tu dopropkamenge. Kange di ton cap, undi dopmengepa amenda taru katuai kupkamre yala sida, anengdi amenda tarupu tu dopropkamenge. Israel nesala yuma dinin, sun apu yapu neng si yuk-yuk akuretopu, yuk-yuk dopropkamenge. 56 ‘Menmena tu dopropkameng yala neng ake, amenda dopropkameng yala neng ake,’ tenena tep, kurpeten keca er si undi pel dopkamrum dinin, nimi weik kuramenge yala nengda, tu weik tara bokra karepkurume. Dinino, nimi weik men kuramengedi, nimi metekanunpu kunge yala nengda, tu yambul tarapu bokra karepkurume. Sun kaypu neng deiyo neng si akuretopu, bokra karepkamrume.

57 Tonda, Lewi yala ngebodi deipupa, dadeipdanen yakarami neng, sun sida ake. Ada, Gersondi deipupa, dadeipdanen barami nengda, sun Gerson yala neng ton kurami. Utopu, Kehatdi deipupa, dadeipdanen barami nengda, sun Kehat yala neng ton kurami. Utopu, Meraridi deipupa, dadeipdanen barami nengda, sun Merari yala neng ton kurami. 58 Sun Lewi yala nengdi deipipa, dadeipdanen barami nengda, Libni yala neng ton deiami. Tonda, Hepron yala neng ton kurami. Ton ngeda, Mahli yala neng ton deiami. Tonda, Musi yala neng ton deiami. Tonda, Korah yala neng ton deiami. Uda, Kehatda, Amram er nai bo kuramu. 59 Amramda, Lewi er ner mi Yokhebed domu. Yokhebedda, Mesir mutu kurami taruda, Lewidi aner mi deiamupa, dakuramnganen, Amramdi domu. Sun butene kikiman kuramreiyanen, Yokhebedda, er nyapu Harun cap, Musa cap, tonda sun mal ner tenpu, er sida Miryam cap deiamrei. 60 Amenda taruda, Harundi sal nyapu dumbari deiamu. Aneng sun sida ake. Adab cap, Abihu cap, Eliasar cap, tonda Itamar cap, deiamu. 61 Ukuamu dinin, Harun er nyapu butene Nadab cap, Abihu capda, mali weik kupreipa, Allahdi animi butene poptapu. Ada, Allah Yahwehdi, “Siltong telep keca uku dongona pelda, tek sisi ukupra donkamrume,” peiamunge utopu kupra, men dopreidi, sun pe kange dipapu tenepra, uku sekra, Allah tep karepreiya deiki di, Allah Yahwehda, sun tep, yu tenepudi, aneng poptapupa, deprei.

62 Uda, sun Lewi yala nengda, nimipu wepra si seki nengda, sun umur ware tenpu itara nengpu si seki. Asi seki neng, sun dengeda, 23.000 neng kepu. Sun aLewi yala nengda, amutu tu ton men dopropi. Sun kayapu neng, yuk Israel neng, yala-yala yuk-yuk akuramitopu dopropi dinin, Lewi yala neng cap, tonpa tapakra men si seki dinin, sun yuk ketenepra seki. Deiyoda, sun Lewi yala nengda, sun wa tu talepra kunange ton, men dopropya tepa.

63 Adeiki tara sekmapu neng, sun yala-yala neng sida, Musa cap, imam Eliasar cap, sun butenedi nimi yala yuk-yuk akuramitopu nukra, nimi si cap, yala si cap sengamrei. Ada Allahdi, “Ukupra nukamrerume,” peputopu kuprei. Israel nesaladi deipipa, dadeipdanen yakarami nesala, sun si sekrei taruda, ada Yordan me goupra, ortara benmai taru, Yerikho tamna dinin, Moab mutu banai di sekrei. 64 Tonda, men taru di, Musa cap, Harun cap, sun Sinai mutu katawai di, nimi men kurami mutu neitamai di, si sekamrei nengda, tenpu ngebo peda, tupa gam ton kunmaipa, men eprei. Aneng yumada, ada nimi kuna gum tep, katawai mutuda, Sinai mutu neitamai tupa kunmai taru di sekrei. Aneng yumada, konum deamidi, gawal dakami. Tenpu pe ton, gam men kurami. 65 Ange deiyoda ake. Ada, Allah Yahwehdi sun anesala yuma tep, konum pepra deiamu. Ada, “Sun mali weik kuramya cadi, sun ataru gam kunung neng yumada, Sinai mutu katawai dipu depkamenge. Ortara Kanaan tara pio men wekamenge,” pepra deiamnga tepa. Anesala yumada, konum depra gawal daki dinin, butene nengpu, tupa gam kuramrei. Ada, nimi si Yefune, er mi Kalep cap, tonda Nun er mi Yosua cap, sun butene puda, men deamrei tarupu, “Kanaan tara wekamrume,” peiamnga tep, sun butene puda, Yordan me goupra, ortara mutu wekrei.