Num 27 | XteSC | STEP | Zelafehad er ner nyapu yumada, pamubari di deiamu. Aner nyapu sun sida ake. Mahla cap, Noa cap, Hokla cap, Milka cap, tonda Tirza cap deiamu. Zelafehad er nai boda Hefer. Hefer er nai sida, Gileat kuramu. Tonda, Gileat er nai sida Makhir. Makhir er nai boda, Manasye kuramu. Tonda, Manasye er nai boda, Yusuf kuramu.

Numbers 27

Zelafehaddi deiamu nerapu tep, pepu upu

1 Zelafehad er ner nyapu yumada, pamubari di deiamu. Aner nyapu sun sida ake. Mahla cap, Noa cap, Hokla cap, Milka cap, tonda Tirza cap deiamu. Zelafehad er nai boda Hefer. Hefer er nai sida, Gileat kuramu. Tonda, Gileat er nai sida Makhir. Makhir er nai boda, Manasye kuramu. Tonda, Manasye er nai boda, Yusuf kuramu. 2 Zelafehaddi deiamu pamubari nerapu yumada, Musa cap, imam Eliasar cap, tonda Israel yala nesala yuk-yuk kuramitopu, sun deiyo kepra kuna tep, wepra deiami neng cap, sun yuma bupra, Allah cap, nimi cap, antamna tep, opkal bol di dodina tenda ati buplan damai wekmaiyaipu, anerapu peda aceipu beidi, Musa cap, Eliasar cap, sun damai tekidi upepi. 3 “Nun nai bo sisada, jen keca pe, me pe pio men kwamu mutu, katawai di deamnga deiki di, sal nyapu ton men deiamnge. Ada, nun nai boda, Korahdi Allah Yahweh damai buluprapudi, ‘Allah er upu men gekenkamepe,’ pepra, mali upu penmaupa, yuk neng cap melipmanga deiki di, nun nai bo ton men melipu. Adeiki di men deamnge. Nun nai boda, er yuk mali kun keca kuramnga deiki di deamnge. Tonda, nun nai bo sisada, sal nyapu derina gum dipapu, deamnge.

4 Dinino, nun nai boda, Israel yala nesala, sun si sengderina tep buku neitamaida, men si sekeipserume. Deiyoda, sal nyapu ton men deiamnga tep kupserum do? Ware keca deiyo tep, nun nai bo si, gum kupkamser do? Atep, nun nai bo er yala neng, nun tara nesala, sun tep tu bokra derimemtopu, nun peda ton bokra deipkuserume,” pepra, bena moropi. 5 Upepra bena moropi pangeda, apepinge yumada, Musa gekepudi, Allah Yahweh tep, “Ware kuptene do?” pepra asipetepu.

6 Upepra asipetepu pangeda, Allah Yahwehdi tamupra Musa tep pepu. 7 “Zelafehad er ner nyapudi, kan damai yana pepmakeng upuda, tek sisi upu pepmakenga cadi, kandi apepmakengtopu kupkurume. Ada, sun kayapu neng ton akapmatutopu, aneng tep, awekumem mutu tu bokra, karemem taru dipapu, sun nai bo Zelafelet taleamu tuda, anerapu sun mal neng yo pununa tep, atu ton bokra, karepkurume. 8 Ukupmem dingeda, sun Israel nesala yuma tep, upepkurume. ‘Ukupmantoda, sun Israel nesalada, sun sal nyapu ton men deiamrumdi, ner nyapupu deiamka depmumnyopda, sun nai yapudi talerami kecada, sun ner nyapu tep, er tu bokra karenkamrume. Allahdi upeipmasere,’ pepra, sun gekenai bena, lap pepkurume,” pepu.

9 “Tonda, sal nyapu pe, ner nyapu pe, men deiamka depre ngeboda, sun nai taleamu tuda, angebo er mal neng cap, er du neng cap tep, karepkamrume. Ada, adepmare ngebo, er naidi deiamu neng tep kareprumupa, anengdi doronkamenge. 10 Tonda, er kabo sisa pe, gum ngebo dingeda, sun nai yapu karepkamrume. Agum dingeda, er nai yapu kankan, ton ngebo tep kareprumupa, doronkamrure. 11 Tonda angetopu, ukupmanto, sal nyapu pe, ner nyapu pe men deiamka depre ngeboda, er kabo sisapu atuda doronkamrure. Tonda, er kabo sisa pe gum dipapu depre ngeboda, sun nai sisa kan-kan, ton ngebopu doronkamrure. Apeda gum dingeda, sun kapu neng sisapu doronkamnunge. Ada, ‘Angeboda, tek sisi nun yala ngebo, nun damai ngebo ake,’ tenepmenge ngebodi, doproptue. Ange yumada, Allah Yahwehdi sun Israel nesala tep, ‘Angepu talepra kupbankaman’ tenen, Musa damai pepra deipupa, sun damai bena lap pepka cadi, angeda pio men tamkamrume. Sun Israel nesaladi, angepu pio talepra kunkamrume.” Allah Yahwehdi Musa tep peipu.

Allahdi Musa er yo pununa tep, Yosua wepra deipu upu

12 Allah er si Yahwehdi Musa tep pepu. “Kanda Abarim mutu deiki welepmemdi, Israel nesala karepkamne mutu, ortara dipetepkurume,” pepu. 13 “Akonum epmem dingeda, kan du bo Harun deputopu, kan peda depkamreme. Depmemnyopda, kan apu yapu depipa, peiamitopu, kan peda depmempa, peipkamkenge.

14 Deiyoda, mesum tep gume. Israel nesalada, me pio gum mutu, Sin mutu cap, Kades mutu cap kurami taruda, balila weik kupra, mali peramipa, Musa kan cap, Harun cap, sun butene mali kwamnererume. Ada, nedi, ‘Upu peprerumpa, agel neitamai di me pukra embankamre,’ peipsisi dinin, sundi ne upu yaniptaprerumdi, Musa kan maca doupra, agel deiki kweipmuma tep pepkene. Ukupreruma deiki di, sun Israel nesala epidi, ‘Allah erda pio puto weik kuredi, pio dumsisi ngebopu kurure,’ tenen, men kael kepnei. Kan cap, Harun cap, mali kupreruma deiki di, Israel neng dinmaiyai damai di, ne si men ereipnererume. Ne pepmaken mutuda, Meriba mutu dinin, me gum mutu neitamai Sin mutu tep pepne.” Allahdi Musa tep pepu.

15 Allahdi upepu pangeda, Musadi Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf ‘YHWH’ angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep moropu. 16 Moropudi aupu pepu. “Ne nai Allah, kanda Yahweh kureme. Kan dipapu, ‘Nesala gam kunkameng’ tenen, gam kuna deiyo keca dopra, nimi sambala gam kepman dongopsemumpa, adeiki nimi ban-ban yuma gam kununge. Kanda gam kuna deiyo keca dopra, nimi yuma karerum ngebo, nimi dipru neitamai dirum ngebodi, ‘Israel nesala talepra, sun nimi deiyo ngebo kepredi bankamre ngebo wepra deipkurum’ tenen, moropkene naio.

17 Atep kandi wepra deipmempa, angebodi menmena mepra barepa, sun Israel nesala epmengedi, er bere bisipu amenda benkamenge. Ange utopu er tamupra yarepane, sun epmengedi er amutara dipra tamupra yankamenge. Ada, erdi embere tarada, sun yuma melipra abisipu dombankamenge. ‘Ukupbankamre ngebo, wepra deipkuserem’ tenen, moropkene naio. Ato ngebo men wepra deipmempa, anesalada kandi tapmempa, domba bisam peina neng gum tep, sun domba talipu kungedi, ‘Dan mutu benkup do?’ tenen, tali-tali ayanap, orbenap kuramengtopu, Israel neng peda ukunkamenge.” Musadi Allah tep upepra moropu.

18 Upepra moropupa, Allah er si Yahwehdi Musa tep pepu. “Kandi nimi si, Nun er mi Yosua kongpepmempa yankurure. Yosuada, ne sambala konum karepsipa, er dipru neitam wekra dinipupa kurure. Er tep wepra deipkurema tep, kan buru er giso deiki deipmemdi weipkurume,” Allahdi pepu.

19 “Ne Allah er si eremna ati neitamai pel dona deiyo ngebo Eleasar, kandi er damai benkamrume. Ada, Yosua doupra, Eleasar damai tekeipkamreme. Eleasar cap, Israel nesala cap yuma, wekra dinmangai di, Yosua bena doupra, sun damai deipmemdi, ‘Yosuada, ne Musa yo pununa tep, wepra deipne. Ukupnepa, erdi sun Israel nesala yuma doupra benkamsera tep, weipsene,’ pepra, lap pepkamarume.

Ukupmemdi, kan buru Yosua er giso deiki deipkurume. Ukupkamrem taruda, sun Israel neng yuma epkamenge,” pepu. 20 “Upepra lap pepmem dingeda, ‘Israel nesala yumadi, er pere upu gekepmengedi, bouna di er amutara dombankameng’ tenen, ne karepkesi puto doupra, kandi, er deiki deipkurume.”

21 “Ataru di gonga kepra, doryankamre taru yumada, Yosua adipapu ne si eremna ati pumbon pel dona deiyo ngebo Eleasar damai bena tengkamre. Ukunkamra deiyoda, ake. Ada Imam Eleasardi, Yosua kupkamre keca lape pepkamra tepa. Eleasardi, Yosua amenda kupkamrenge kael kemna tep, ne karepsisi keca, er sida Urim cap, Tumim ^{▼▼Urim – Akeca buteneda, Urim cap, Tumi capda, ‘Gel do, wareto keca do?’ tenen, nun yumada walwalpu kunupe. Dinino, sun imam nengdi, ‘Allahdi, nun kunkamep ngeda lap pepkamser’ tenen, akeca butene dipeteramya deiki di, ‘E, Allahdi upepsere-upepsere, angepu kunkamepe,’ teneramidi, moupra kael keamidi, Israel nesala tep lap perami. Tonda, Ulangan 33:8; Keluaran 28:30 dinkurume.} cap doupra, ne damai yaredi, akeca butene dipetepredi, kael kepre dingeda, Yosua tep lape penkamre. Lap peprepane, Yosua gekepredi, Israel nesala tep, lap peprepa gekepmengedi, dombankamenge.

Ada Yosuadi, ‘Benkupe,’ pepyopda, bankamenge. Erdi, ‘Akunkupe, tonda tamupra benkamepe,’ pepyopda, angepu gekepra kunkamenge. Ada, ne Allah damai kurepa, nedi pepnenge upu gekepredi, Israel nesala tep, ‘Allahdi pedire upu ake,’ peprepa gekepmengedi, doupra bena yana kemkamre. ‘Ukupkamre’ tenen, Yosua wepra deiprume,” Allahdi Musa tep pepu.

22 Atep nengeda, Musadi Allah er si Yahweh peiputopu, Yosua dopra Imam ngebo Eleasar cap, Israel nesala cap yuma, sun dinmaiyaipu duyaudi, Allah peiputopu kupu. 23 Atep Allah er si Yahwehdi, “Ukupkurume,” peiputopu, Musadi er buru erepra, Yosua er giso deiki deipudi, “Yosuada ne yo pununa tep, sun deiyo ngebo kuredi, sun Israel nesala doupra bankamsere,” pepupa, sun yuma gekepra kael kepi.