Num 28 | XteSC | STEP | Allah Yahwehdi Musa tep pepu.

Numbers 28

“Allah si eremna tep, telep karen kecada, tupa-tupa pio karenkamrume,” pepu upu

1 Allah Yahwehdi Musa tep pepu.

2 “Kandi sun Israel nesala tep bena pepkurume. Ne Allah Yahweh si eremna cap, karena cap tep, sun adipapu jen keca yumada, yana karepmengepa, imam nengdi dopra uku dongopmengepa, uku di jeprepa, siltong telep ngeda, ket weleprepa, gekepnedi, ne kange derinkamne. Ange karenkamnenge ngeda, nedi, ‘Angeda, ataru karenkamnerume. Angeda, ataru ton karepkamnerume,’ pepra deipsisitopu, karepnengedi, pio moupra kalekmengedi, dinmangepapu uku jenkamrure. 3 Tonda, kan Musadi sun Israel nesala tep, upepkamrume. ‘Tenpu tumi Allah er si eremna cap, karena cap tep, doupra kareryakankamrum kecada, ake. Ada, keteng tamun tenpu kepmare jem domba bisam dinin, bol pio telep ngepu, butene doupra kareryakankamrume. Ange utopu, tumi-tumi yuma pio karenkamrume.’

4 Adoupra yankameng domba bisamda, bokrapmengedi, ton ngeda, ipna popra karenkamnunge. Ton tenpu ngeda, sintara kepre taru popra karenkamnunge. 5 Adomba doupra yana karepkunge taruda, gandum tepung er ikinda, tenpu liternge cap, tonda minyak saitun me tenpu liter ton gwepra, ange di tapakmange nge, pio telep ngepu, kikiman doupra kareryakankamenge. 6 Ange karenkamnungada, Sinai mutu deiki, ne Allah Yahwehdi, ‘Ne karena tep, akeca-keca ukupra yana, tupa-tupa kareprumupa, uku dongonkamnunge,’ pepra, menop taru di peiamsisi. Ukupmumpa, siltong telep ngeda, weleprepa, ne Allah gekepnedi, kange pio telep kunkamnere.” Allahdi Musa tep lap pepu.

7 Upepu dingeda, aupu ton dukdongopra pepu. “Domba bisam mi doupra kareryange taruda, anggur me ton gwepra karenkamenge. Ada, tenpu liter ton gwepmengedi, tenpu domba mi cap tapakra duyana karenkamnunge. Angeda, ipna taruda, imam nengdi anggur me gwepra, ne si eremna ati pumbon dikra derinkamnunge. Ukupmengedi, ne tep karenkamnunge. 8 Ange utopu, ton domba bisam mida, anggur me tenpu liter gwepra, abutene keca cap, tonda gandum tepung tenpu liter cap, tapakra sintara doupra yangenge peda, utopu kupra pel dopmengedi, ne Allah tep karenkamnenunge. Ukupmenga deiki di, uku dongopmengepa, uku jepredi, siltong telepnge weleprepa, ne Allah gekepnedi, kange telep kunkamnere,” Allahdi Musa tep lap pepu.

Tali pel dona gum tumi, Sabat tumi keprepa, doupra Allah kareryakana tep, pepu upu

9 Allahdi Musa tep pepu. “Israel nesalada, Sabat tumi konum kepyopda, keteng tamun tenpu keamre domba bisam, jemnge butene, bol pio telep ngepu doupra, ne si eremna tep, kareryakankamnenunge. Atarupu gandum tepung, er ikinda, liter butene deiki, minyak saitun cap tapakra ketenepmangedi, deipmangenge cap, tonda anggur me cap, kepra duyana karenkamnenunge. 10 Ne Allah tep yana karepkamnenge ngeda, Sabat tumi-tumi yuma, uku dongona pel donkamnunge. Angeda, Sabat tumi yumada, karena keca tapangdona tumi tep, apel donkamnunge. Asabat tumi-tumi yuma karenkamnenge keca, er tapangna tep karen kecada, anggur me tenpu liter ton gwepra, tapakra karenkamnenunge. Tumi-tumi yuma karenkamnenge ngeda, tupa akapkamre dinin, Sabat tumi yuma deiki di, apepmaken kecada, tapakra karenkamnenunge.” Allahdi Musa tep pepu.

Allah tep karen kecada, ware gawal dakredi, tenpu tumi keprepa, kareryakana tep pepu upu

11 Allahdi Musa tep pepu.

“Uda war-war yuma ton ukunkamrume. Ada war ton popredi, ukupu war tengyare taru, tanggal tenpunge keprepa, ne Allah tep yana karepmengepa, uku dongona tep nengeda, jem sapi bisam butene, ukupu nenmarenge cap, tonda jem domba bisam wisinge tenpu cap, tonda keteng tamun tenpu ukupu nenmange domba bisamda, yoneitam bari yumada, bol pio telepngepu, doupra yakankamnunge. 12 Tonda, tenpu sapi bisam tep, gandum tepung ngantan bari (6) liter cap, minyak saitun cap, tapakra keteneipmange ngepu, doupra kareryakankamrume. Tonda, jem domba bisam tenpu tep nengeda, er tapangnada, gandum tepung dumbari liter ketenepmengdi, ajem domba bisam cap karenkamnunge. 13 Tonda, domba bisam mi karenkamnung taruda, gandum tepung er ikinda, butene liter keteneipkamnunge. Domba bisam mi tenpu cap, tepung butene liter cap, doupra yakankamrume. Allah tep doupra kareryankameng jen kecada, autopu ngepu, doupra yangedi, tapakra karenkamnunge. Ukupmenga deiki di, uku dongopmengepa, uku jepredi, siltong telepnge weleprepa, ne Allah gekepnedi, kange telep kunkamnere.

14 Tonda, akeca doupra yangedi, uku dongopkunge taruda, anggur me doupra yakankamnunge. Anggur me er ikinda, liter butene keteneipkamnunge. Ange cap, tonda jem sapi tenpu cap, tapakra duyana karenkamnunge. Ukupmenga deiki di, anggur me er ikinda, 1.2 liter ton keteneipmengedi, domba mi tenpunge cap, tapakra karenkamnunge. Utopu ton, domba bisam mi karena tep nengeda, anggur me er ikinda, tenpu liter ton keteneipmengedi, domba mi tenpunge cap tapakra karenkamnunge. Angepu ukupmengedi, uku dongonkamnunge. Ange yumada, pio tep aketeng tamun, aketeng tamun yuma, war-war yuma, ton war popredi, ukupu war tengyare taruda, tanggal tenpunge kepre pangeda, apel ukupra donkamrume.

15 Apel dopyakaramenganen, tapangdona tep, tenpu tumida, kambing bisam jemnge tenpu cap, doupra kareryakankamnunge. Ange karenkamenge nge deiyoda, Israel nesala, sun mali kwamenge nge kaukemna tep, sun adipapu ange ton karenkamnunge. Ange cap, uda arup konum lap pepmanu karen keca cap, pio karenkamnunge. Angeda, uku sekmengedi, uku dongopkamnunge.” Ange yumada, Allahdi Musa tep lap pepu.

Ila tumi Kaplemne Kailya Kalemna tumi kepyopda, karenkamnung keca tep, lap pepu upu

16 Allahdi Musa tep lap pepu.

Allah er si eremna tep, Kaplemne Kailya Kalemna ^{▼▼Kaplemna kailya – Aupu deiyoda ake. Pumun taruda, Allahdi sun Israel nesala doupra, Mesir mutu neitamai di lyepra duyanamu taruda, Mesir mutu nesala yuma, sun weni nyapu poptapu dinin, Israel yala nesala, sun weni nyapu men popu. Allahdi peiamutopu, sun Israel nesaladi domba bisam mi popinge, er yapi doupra, sun ati bublan dana-dana tara cap, deiki tara cap, gege peprapidi, likra deipi. Ukupya tep, alukunda neitamai Allah er malaikatdi, ayapi epi dingeda, akati pumbon kunmai weni nyapu men poptapi. Aakati tapra, tali kaplepra, kirikra ortara atipu bena, yapi men kapu ati pumbon kunmai weni nyapu tep popi. Nyapu pon malaikatda, adomba bisa yapi epidi, akati tep tali kaplepra ortara benmaiya tep, akailyada, Kaplemne Kailya perami.} tep, atumi kepkamre tumida, war tenpunge deiki, tanggal empat belas (14) tumi kepre pangeda, ila kailya kalemkamrume. 17 Akaplemne kailya kalepropmamumnya, ambutumito tumi, tanggal lima belas (15) tumi konum kepre pangeda, ‘Ila kalemna taru, akonuma’ tenen, gonga kepkamrume. Ada, atumi di dipra, doryankamre tumi nukrumudi, yoneitam bari (7) tumi deiki di Nena Gum Roti Kailya kalemkamrume. Dinino, akailya taru neitamaida, nena gum roti kwanengpu jenkamrume. Ada, roti bun nena deiyo keca, er sida ragi, ange cap tapakra dana gum ngepu, gonga kepra daprumudi, yoneitam (7) tumi neitamai di, ange dapra jenkamrume. Ue yoneitam bari tumi neitamai yuma, nena gum rotipu jenkamrume. 18 Nena gum roti kwaneng dana tep, gonga kepkumum tumida, sun yuma adipapu bulupra, Allah er si ereprumudi, er upu gekepkurume. Atumi neitamai yumada, sundi ikin pel ton pio men donkamrume. Tali pel dona tep nengeda, atumida beipye peingna tumipu kupkamre.

19 Nena Gum Roti Kailya ^{▼▼Nena Gum Roti Kailya – Akailya deiyoda ake. Ada, Allah Yahwehdi, sun Israel nesala dopra, Mesir mutu neitamai ikin pio weik kuramiyai di loptapra dubenamu taruda, upepu. “Alukundada, roti kwaning yuk-yuk tumi yuma jerum ngeda, men dapra jepkamrume. Menmenada, Mesir mutu taprumudi, adipapu bendopkamaruma tep, nena gum rotipu dapra jenkamrume. Tonda, ‘Allahdi loptapseudi, Mesir mutu neitamai di dubenamseu lukundada, pio mambul taru tep, ange tupa tenenkamrum’ tenen, keteng tamun, keteng tamun yumada, awar er si Abib, tanggal 14 deiki di, ila kailya kalepra, nena gum rotipu dapra jenkamrume. Akailya er sida, Nena Gum Roti Kailya, pio tep perumudi jenkamrume,” Allahdi pepu. Atep nengeda, sun Israel nesaladi, akailya pio jeramitopu, tupa jenunge.} kalemna tumi tenpu ngeda, Allah Yahweh er si eremna tep, gam keca popra, uku dongonkamrume. Uku dongonkamrum kecada ake. Ada, jem sapi bisam ukupu nenmarenge butene cap, tonda, jem domba bisam konum ila nemunge tenpu cap, tonda jem domba bisam nyapu yoneitam bari, angeda keteng tamun tenpu keamrenge, doupra yakankamrume. Agam keca yala-yala yumada, bol pio telep ngepu wepra, duyana karenkamrume. 20 Tonda, tenpu sapi bisam tep, gandum tepung ngantan bari (6) liter cap, minyak saitun cap, tapakra keteneipmange ngepu, doupra kareryakankamrume. Tonda, jem domba bisam tenpu tep nengeda, er tapangnada, gandum tepung dumbari liter ketenepmengedi, ajem domba bisam cap, karenkamnunge. 21 Tonda, domba bisam nyapu karenkamnung taruda, gandum tepung er ikinda, butene liter keteneipkamnunge. Domba bisam mi tenpu cap, tepung butene liter cap, er minyak zaitun cap, tapakra keteneprumudi, ange doupra yakankamrume. Allah tep doupra kareryankameng jen kecada, autopungepu doupra yangedi, tapakra karenkamnunge.

22 Tonda, jem kambing bisam tenpu ketenepkamrume. Angeda, sun mali kun keca kaukemna tep, ajem kambing bisam tenpu, doupra kareryakankamrume. Akambing bisam popmum pangeda, sun mali kun keca tep, daepnedi yo punupkamsere. Ukupmumya deiki di, sun mali kun keca tep, Allahdi sun men popra gawal dakamsere. Sun mali kun keca kau kepseredi, telep kupra derinkamsere. 23 Uda, arup konum lap pepmanu karen keca cap, pio kareprumudi, uku dongonkamnunge. Angeda, uku sekmengedi, uku dongopkamnunge. Atumi-atumi yuma ipna taru uku dongonkamrum ngeda, akambing bisam tapangdona cap tep, uku dongonkamrume.

24 Ange yuma ukupra karepkamenge ngeda, ue yoneitam bari tumi deiki, uku dongona pel donkamrum ngeda, Allah Yahweh, er tepapu karenkamrume. Akunkamrum ngeda, atumi-tumi yuma uku dongona pel dopkumum taruda, anggur me cap tapakra, uku dongopkamrume. Ada tapangna tep, apel donkamrume. Ange kupmumnya deiki di, Allah gekepredi, kange telep kunkamre. 25 Ange kupbaramumnya sirya tumi, ada yoneitam bari tumida, ila pel dona gum di, sun yuma adipapu bulupra wekmumdi, Allah er sipu erepkamrume. Sun yuk tumi yuma tali pel dorumunge yumada, atumi peda pio utopu, men pel donkamrume. Beipye peingnapu kunkamrume. Ange yumada Allahdi peipu.

Weni keca yumne taru, Weni Keca Kailya kalemna tep, pepu upu

26 Allahdi pepu. “Kailya kalemamumnyanen, minggu yoneitam bari konum mapmumdi, ue tenpu tumi konum kepyopda, menmena Weni Keca ^{▼▼weni keca – Weni Keca peramya deiyoda ake. Allahdi, ‘Ukunkamrume,’ pepra deiputopu, sun Israel nesaladi akailya kalemami. Sundi, utenerami. ‘Nun wa pepmepepa, bolongamre keca yumada, nun nai bo Allah er puto deiki dipapu, akeca yala-yala yuma kareserura cadi, nun wa neitamai menmena taru bolongre keca kipmepedi, Allah teppu karenkamepe. Ada, er si eremna cap, ‘Telepe,’ pena cap tep, nun menmena taru kinkamep keca yumada, Allah tep kareryakankamepe,’ teneramidi ukurami.} tep Kalya kalemkamrume. Atumida, sun yuk tumi yuma ila pel dorumu ngeda, ange pel yumada dona gum di, sun yuma adipapu bulupra wekmumdi, Allah tep, ‘Telepe,’ pepra, er sipu eremkamrume. 27 Allah Yahweh er si eremna tep, gam keca popra, uku dongonkamrume. Ukupmumpa, uku di jepyopdi, ket weleprepa, siltong telep ngeda, kete welepya deiki, Allah gekepredi, er kange pio telep kunkamrure. Uku dongonkamrum kecada ake. Ada, jem sapi bisam ukupu nenmarenge butene cap, tonda, jem domba bisam konum ila di nemunge tenpu cap, tonda jem domba bisam nyapu yoneitam bari, angeda keteng tamun tenpu keamrenge, doupra yarumudi, karenkamrume. 28 Tonda, tenpu sapi bisam cap, gandum tepung ngantan bari (6) liter cap, minyak saitun cap, tapakra keteneipmange ngepu, doupra karenkamrume. Tonda, jem domba bisam tenpu tep nengeda, er tapangnada, gandum tepung dumbari liter ketenepmengedi, ajem domba bisam cap karenkamenge.

29 Tonda, domba bisam nyapu karenkamnung taruda, gandum tepung er ikinda, butene liter keteneipkamnunge. Domba bisam mi tenpu cap, tepung butene liter cap, er minyak zaitun cap, tapakra keteneprumudi, ange doupra karenkamrume. Allah tep doupra kareryankameng jen kecada, autopu ngepu doupra yangedi, tapakra karenkamnunge. 30 Tonda, jem kambing bisam tenpu ketenepkamrume. Angeda, sun mali kun keca kaukepra gum derina tep, ajem kambing bisam tenpu doupra, Allah tep karenkamrume. Akambing bisam popmum pangeda, sun mali kun keca tep, gum kupra deipseredi, yo punupkamsere. Ukupmumya deiki di, sun mali kun keca tep, Allahdi sun tep, men popra gawal dakamsere. Kaukepseredi, kange di ton cap telep kupra derinkamsere.

31 Uda, arup konum lap pepmanu karen keca cap, pio kareprumudi, Allahdi, ‘Angeda karepkamnerume,’ pepra deiputopu, ange tapangdona tep, uku sekmengedi, uku dongonkamnunge. Tonda, ataru dipapu, gandum tepung pio telepnge cap, anggur me mokon telepnge cap, Allahdi, ‘Angeda karepkamnerume,’ pepra deiputopu, akeca ketenepra, Allah tep karenkamrume. Agam keca yala-yala yumada, bol mali douna gum, pio bol telep ngepu wepra, duyana karepkamrume.” Ange yumada, Allahdi peipu.