Numbers 29

Yoneitam ware konum kupyopda, tanggal satu tumi deiki di kareryakana tep, pepu upu

1Uda, ware yoneitam bari deiki, tanggal satu konum kupyopda, sun yuma bulupmumdi, Allah er si eremna tep wengkamrume. Yuk tumi-tumi yuma, tali ikin pel dorumutopu, atumi deiki di apel ton men donkamrume. Beipye peikrumudi, Allah er sipu eremkamrume. Tonda atumida, ila tumi cadi, bung-bung pena keca, er si terompet deiki di, ila lelim penkamrume. 2Ataru adipapu, Allah Yahweh er si eremna tep, gam keca popra, uku dongomna pel dopkumum pangeda, uku jepropredi siltong telep ngeda, ket welepyopda, Allah Yahweh gekepredi, er kange pio telep kunkamrure. Allah tep karepkamrum kecada, ake. Jem sapi bisam, keteng tamun tenpupu nenmarenge cap, jem domba bisamda, wisinge tenpu cap, tonda jem domba bisam nyapu yoneitam bari, keteng tamun tenpu keamrenge cap, poprumudi, Allah tep karepkamrume. Ange yumada, nong bol pio telep ngepu, doupra yakankamrume. Adoupra yana karepkamenge ngeda, uku dongoprumupa, siltong telepnge welepre pangeda, Allah Yahweh gekepredi, er kange telep kunkamre. 3Sundi tamna gum adipapu, tapangdona tep ketenepra, Allah tep kareryakankamrum jen kecada, ake. Ada, tenpu sapi bisam tep, gandum tepung ngantan bari (6) liter cap, minyak saitun cap, tapakra keteneipmarumngepu, doupra karepkamrume. Tonda, jem domba bisam tenpu tep nengeda, er tapangnada, gandum tepung dumbari liter ketenepmengedi, ajem domba bisam cap karepkamnunge.

4Tonda, domba bisam nyapu karenkamrum taruda, gandum tepung er ikinda, butene liter ketenepkamrume. Domba bisam mi tenpu cap, tepung butene liter cap, er minyak zaitun cap, tapakra keteneprumudi, ange doupra karepkamrume. Allah tep doupra kareryankamrum jen kecada, autopu ngepu doupra yamumdi, tapakra karenkamrume. 5Tonda, jem kambing bisam tenpu ketenepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karenkamrume. Akambing bisam popmum pangeda, sun mali kun keca tep, yo punupkamsere. Ukupmumya deiki di, sun mali kun kecada, Allahdi sun tep men popra gawal dakamsere. Kaukepseredi, telep kupra derinkamsere.

6Ayana karepmarum ngeda, atumi-atumi yuma, ipna taru uku dongonkamrum ngeda, ayapi keca popmangenge cap, jen keca tepung keteneipmange nge cap, tapakra uku dongonkamrume. Ada war gawal dakredi, tanggal satu kepre pangeda, ange kunkamrume. Atenpu tumi konum kuprepa, yana karepmum ngeda, atumi-atumi keprepa, yapi keca yana popra karepmumdi, jen keca tepung keteneipmamumnge cap, jena keteneipmamumnge cap, tonda anggur me cap kareramrum ngeda, tapangna tep karenkamrume. Allahdi, ‘Ukupra karenkamrume,’ pepra deiputopu, Allah Yahweh tep karenkamrume. Ange ukupmum pangeda, siltong telep ngeda weleprepa, Allah gekepredi, kange telep kunkamre.

“Sun mali kun keca kaukemna tep, ila tumi kuprepa, kareryakankamrume,” pepu upu

7Allahdi upepu. Yoneitam war keprepa, tanggal sepuluh kepre tumida, angeda ila tumi cadi, sun yuma adipapu bulupra, Allah er si erepkamrume. Ukupmumdi, yuk tumi-tumi yuma, tali ikin pel doprumu pel dona gum di, atumi deiki di beipye peikrumudi, jen keca jena gum dipapu, jen si tepra kunkamrume. 8Ataru, Allah Yahweh er si eremna tep, uku dongomna pel ton dopkamrume. Ukupmumpa, ket weleprepa, siltong pio telepnge Allah gekepredi, kange derinkamsere. Allah er si eremna tep nengeda, jem sapi bisam ukupu nenmarenge tenpu cap, jem domba bisam tenpu wisinge cap, tonda jem domba bisam nyapu yoneitam bari, keteng tamun tenpu keamrenge cap ketenepra, Allah Yahweh tep karepkamrume. Agam keca yumada, sun bol pio telep ngepu, doupra yakankamrume. Adoupra yange ngeda, uku dongoprumupa, siltongda, Allah gekepredi, kange telep kunkamre. 9Sunda tamna gum, adipapu ketenepra, Allah Yahweh tep kareryakankamrum jen kecada, ake. Ada, gandum tepung cap, minyak saitun me cap tapakmange nge, er ikinda, ngantan bari (6) liter ketenepra derinkamrume. Tonda, domba bisam wisinge karenkamrum taruda, gandum tepung er ikinda, butene liter ketenepra karepkamrume.

10Tonda, domba bisam nyapu yoneitam bari dinin, tenpu-tenpu karepkamrum taruda, tepung butene liter cap, er minyak saitun cap, tapakra keteneprumdi, ange doupra karepkamrume. 11Tonda, jem kambing bisam tenpu ketenepra karepkamrume. Angeda, sun mali kun keca kaukemna cap, daemna cap tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca yuma tep, yo punupkamsere. Ukupmumya deiki, Allahdi sun mali kun keca tep, men popra gawal dakamsere. Kaukepseredi, kange di ton cap telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmenge ngeda, ange yuma tupa tapakra uku dongonkamrume.

Bura tara dodin tenda ati dopmengedi, ila tumi keprepa kareryakana tep, pepu upu

12Uda, ware yoneitam bari konum kupyopda, awa neitamai tanggal lima belas tumi konum kupyopda, sun yuma buluprumudi, Allah er si eremna tep wengkamrume. Atumida, yuk tumi-tumi yuma tali ikin pel dorumutopu, atumida apel ton men donkamrume. Atumi deiki di beipye peingna cap, kailya kalemna cap, angepu kunkamrume. Atep, atumi tanggal 15 deiki di gonga kepra, ue yoneitam bari tumi neitamai yumada, Allah Yahweh er si eremna tep, kalya kalemkamrume.

13Allah er si eremna tep gonga kemne tumida, gam keca poprumudi, uku dongonkamrume. Ukupmumnyopda, ket welepredi, siltong telepnge yuma doupra welepyopda, Allah Yahweh gekepredi, er kange derinkamrure. Agonga kemna tep karepkamrum ngeda, ake. Ukupu nenmare jem sapi bisamda, tiga belas cap, tonda, nepra wisi konum deiamu jem domba bisam butene cap, utopu ton keteng tamun tenpu mapmare domba nyapuda, empat belas (14) yuma, doupra karepkamrume. Adoupra kareryankamrum ngeda, popra uku dongoprumupa, siltong welepyopda, Allah Yahweh gekepredi, er kange telep kunkamre. Agam keca yumada, sun bol pio telep ngepu, doupra yakankamrume.

14Sunda tamna gum, adipapu ketenepra, Allah tep tapakra kareryakankamrum jen kecada ake. Ada, sapi bisa tiga belas dinin, asapi yuk-yuk karepkamrum taruda, sun tapangdona tep, gandum tepung cap, minyak saitun me cap tapakamrumnge nge, er ikinda, ngantan bari (6) liter ketenepra derinkamrume. Tonda, domba bisam wisinge tenpu-tenpu karenkamrum taruda, tenpu domba bisam tep, gandum tepung er ikinda, butene liter ketenepra karepkamrume. 15Tonda, domba bisam nyapu empat belas dinin, tenpu-tenpu karepkamrum taruda, tenpu domba bisam mi, er tapangdona tep, gandum tepung butene liter cap, er minyak saitun cap, tapakra ketenepmumdi, ange doupra karepkamrume.

16Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra uku dongonkamrume.

17Uda yoneitam war deiki di, ila kailya kalepra kunkamrum dinin, aminggu neitamai dinin, ue butene tumi keprepa, Allah tep doupra kareryakankamenge ngeda, ake. Ada, jem sapi bisam pio ukupu nenmare ngeda, dua belas (12) di doupra, yana karenkamnunge. Tonda, jem domba bisam wisinge butene doupra yakankamnunge. Utopu tonda, keteng tamun tenpu mapmare jem domba bisam nyapuda, nukra empat belas (14) di, doupra kareryakankamnunge. 18Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam do, er liter ukupra-ukupra tapangdona tep, ketenepra karenkamrume,” pepra deiputopu, akeca peda ketenepra kareryakankamenge.

19Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra, uku dongonkamrume.

20Uda yoneitam war deiki di, ila kailya kalepra kunkamrum dinin, aminggu neitamai dinin, ue weneri tumi keprepa, Allah tep doupra kareryakankamenge ngeda ake. Ada, jem sapi bisam pio ukupu nenmare ngeda, sebelas (11) di doupra, yana karenkamnunge. Tonda, jem domba bisam wisinge butene doupra yakankamnunge. Utopu tonda, keteng tamun tenpu mapmare jem domba bisam nyapuda, nukra empat belas (14) di, doupra kareryakankamnunge. Agam keca yumada, nong bol pio telep ngepu, wepra dekankamnunge. Bol mali ngeda, pio gume. 21Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam nyapu do, er liter ukupra-ukupra tapangdona tep, ketenepra karenkamrume,” pepra deiputopu, akeca peda atumi deiki di, ketenepra kareryakankamnunge.

22Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra, uku dongonkamrume.

23Uda yoneitam war neitamai di, ila kailya kalepra kunkamrum dinin, aminggu neitamai dinin, ue dumbari tumi keprepa, Allah tep doupra kareryakankamenge ngeda ake. Ada, jem sapi bisam, pio ukupu nenmare ngeda, sepuluh (10) di doupra, yana karenkamnunge. Tonda, jem domba bisam wisinge butene, doupra yakankamnunge. Utopu tonda, keteng tamun tenpu mapmare jem domba bisam nyapuda, nukra empat belas (14) di, doupra kareryakankamnunge. Agam keca yumada, nong bol pio telep ngepu, wepra dekankamnunge. Bol mali ngeda, pio meme.

24Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam nyapu do, er liter ukupra-ukupra tapangdona tep, ketenepra karenkamrume,” pepra deiputopu, akeca peda, atumi deiki di ketenepra kareryakankamnunge. 25Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra uku dongonkamrume.

26Uda yoneitam war neitamai di, ila kailya kalepra kunkamrum dinin, aminggu neitamai dinin, ue pamubari tumi keprepa, Allah tep doupra, kareryakankamenge ngeda ake. Ada, jem sapi bisam pio ukupu nenmare ngeda, topnebari (9) di doupra, yana karenkamnunge. Tonda, jem domba bisam wisinge butene doupra, yakankamnunge. Utopu tonda, keteng tamun tenpu mapmare jem domba bisam nyapuda, nukra empat belas (14) di, doupra kareryakankamnunge. Agam keca yumada, nong bol pio telep ngepu, wepra dekankamnunge. Bol mali ngeda, pio gume. 27Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam nyapu do, er liter ukupra-ukupra tapangdona tep, ketenepra karenkamrume,” pepra deiputopu, akeca peda, atumi deiki di, ketenepra kareryakankamnunge.

28Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmum ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa, tapakra uku dongonkamrume.

29Uda yoneitam (7) war neitamai di, ila kailya kalepra kunkamrum dinin, aminggu neitamai dinin, ue ngangtan bari (6) tumi konum kepre pangeda, atumi deiki di, ila kailya kalepra kunkamrum dinin, aminggu neitamai dinin, ue weneri tumi keprepa, Allah tep, doupra kareryakankamenge ngeda ake. Ada, jem sapi bisam pio ukupu nenmare ngeda, sebelas (11) di doupra, yana karenkamnunge. Tonda, jem domba bisam wisinge butene, doupra yakankamnunge. Utopu tonda, keteng tamun tenpu mapmare jem domba bisam nyapuda, nukra empat belas (14) di, doupra kareryakankamnunge. Agam keca yumada, nong bol pio telep ngepu, wepra dekankamnunge. Bol mali ngeda, pio gume. 30Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam nyapu do, er liter ukupra-ukupra tapangdona tep, ketenepra karenkamrume,” pepra deiputopu, akeca peda, atumi deiki di ketenepra kareryakankamnunge.

31Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, popra men gawal dakamsere. Kaukepseredi, telep kupra derinkamsere. Ayana karepmange ngeda, atumi-atumi yuma, kareramrumtopu, ange cap tupa karenkamrume. Ipna taru ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra uku dongonkamrume.

32“Ukunkamrume,” pepra deiamutopu, ue ngangtan bari tumi konum kupre pangeda, ngangtan baridi ukupu jem domba bisam nenmaunge doupra, Allah er gispal dona tep, ketenepra deiamyaipu, yana karepkamnunge. Tonda, domba bisam butene ukupu nemunge cap, utopu domba bisam nyapu denge empat belasda, keteng tamun tenpu deiki di nemre bisam nyapu cap, tonda sun abisam nyapu yumada, yuk-yuk pio sun yo gwalina cap, sun bol mali douna cap, pio gum domba bisam nyapupu, yuma doupra yana karenkamnunge.

33– 34Akeca yuma doupra, Allah tep gispal dona tep, yana kareramengtopu, yuk keca yala-yala yuma cap doupra karenungai, adoupra karenung keca yumada, sun men taru di putapupa, doupra duyana kareryanami kecapu karenkamnunge. Ada, aempat belas domba bisam nyapu ukupu keteng tamun tenpu neitamai di nenmainge, duyana karenungtopu, akeca yala-yala yumada, sun kikiman Allah er gispal dona tep, siltong telep keca dapra deipnedi, karebaramengaipu dubena, akeca yuma karenkamnunge.

35Uda, yoneitam (7) war neitamai di, ila kailya kalepra kunkamrum dinin, aminggu neitamai dinin, ue banbari (8) tumi konum kepre pangeda, atumi deiki di, tumi-tumi yuma tali ikin pel doprumutopu, pio men donkamrum dinin, beipye peikrumudi, kailya kalepra kunkamrume. 36Atumi deiki di, gam keca popra uku dongoprumupa, siltong telepnge welepyopda, Allah Yahweh gekepredi, er kange telep kunkamre. Ukunkamruma tep, ue banbari (8) tumi keprepa, Allah tep doupra kareryakankamenge ngeda, ake. Ada, jem sapi bisam pio ukupu nenmare ngeda, tenpupu doupra, yana karenkamnunge. Tonda, jem domba bisam wisinge tenpu, doupra yakankamnunge. Utopu tonda, keteng tamun tenpu mapmare jem domba bisam nyapuda, nukra yoneitam bari (7) di, doupra kareryakankamnunge. Agam keca yumada, nong bol pio telep ngepu wepra, dekankamnunge. Bol mali ngeda, dekana pio gume.

37Agam keca akarenkameng taruda, Allahdi, “Ukupra-ukupra jen keca gandum tepung cap, anggur me mokon cap, yapi keca sapi bisam do, kambing bisam do, domba bisam nyapu do, er liter ukupra-ukupra tapangdona tep, ketenepra karenkamrume,” pepra deiputopu, akeca peda, atumi deiki di ketenepra kareryakankamnunge. 38Tonda, jem kambing bisam tenpu ketenepra karepkamrume. Angeda, sun mali kun keca kaukemna tep, ajem kambing bisam tenpu doupra, Allah tep karepkamrume. Akambing bisam popmumya deiki di, sun mali kun keca tep, yo punupkamsere. Ukupmumya deiki, Allahdi sun mali kun keca tep, men popra gawal dakamsere. Kaukepseredi, telep kupra derinkamsere. Ayana karepkamenge ngeda, atumi-atumi yuma, kareramrumtopu, ange cap tupa karenkamrume. Ipna taru, ayapi keca popmengedi, uku dongonkamrum ngeda, jen keca gandum tepung cap, anggur me mokon cap, ketenepra karepmengepa, ange yuma tupa tapakra, uku dongonkamrume.

39Ange yuma popra, Allah Yahweh er si eremna tep, ‘Ila kailya kalemna tumida ake-ake,’ peipseutopu, uku dongona pel dona tep nengeda, apepmasentopu kunkamrume. Ada, keteneipmange jen keca cap, anggur me cap, tonda sun mali kupmarum ngeda, ‘Allah kaukepseredi lyepkamser’ tenen, kareryakan pel dona tepnge cap, tonda sun pe kange di, ‘Allah gispal dona tep, ukupkamne,’ pepra, pedina upu deiki di karenkamrum keca cap, tonda, ‘Allah cap, nun cap, telep kupra kikiman kunkamep’ tenen, karen keca cap, tonda yuk karen keca dopra, Allah tep, ‘Telepe,’ pena cap tep, karenkamrumnge cap, ange yumada, men di konum pepra deipseutopu kupra, kareryakankamrume. Musadi Israel nesala tep pepu.

40Atep nengeda, Allahdi Musa damai peipudi, “Kandi sun Israel nesala damai aupu yuma lap pepkamrume,” pepra, deipu upu yumada, aupu peiputopu, Musadi sun Israel nesala gekenai bena, lap pepupa, sundi ange yuma gekepi.