Num 3 | XteSC | STEP | Allah Yahwehdi, Sinai mutu deiki di, Musa tep upu peipu taruda, Harun cap, Musa cap sun yuk-yuk dinin, sundi deiamreipa, dadeipdanen yakarami neng sida ake.

Numbers 3

Harun er nyapu tep, pepu upu

1 Allah Yahwehdi, Sinai mutu deiki di, Musa tep upu peipu taruda, Harun cap, Musa cap sun yuk-yuk dinin, sundi deiamreipa, dadeipdanen yakarami neng sida ake. 2 Menmenada, Harun er nyapu si nukupe. Harundi er nyapu dumbari deiamu. Sun aneng sida ake. Menmena deipu ngeboda, Nadab kuramu. Tonda, Abihu cap, Eliasar cap, Itamar cap deiamupa, sun dakurami. 3 Sun acei si pepmap nengda, Harundi, ‘Anengda, Allah cap, nimi cap, antamdana ati pumbon neitamai pel donkamnunga tep, imam neng kunkameng’ tenen, wepra deiamu. Aneng wepra deipu dingeda, ‘Sunda Allah cap, nimi cap, antamna ati pumbon pel dona tep, wepra deipmepe’ tenen, kael kemna tep, petenkemna kecada, minyak me sun giso deiki dikra deipu.

4 Dinino, Nadab cap Abihu capda, Sinai mutu katawai dipapu deprei. Ataruda, Allahdi, ‘Telepe uku karepnereso,’ men peipu dinin, sun pe kange deiki dipapu, ‘Gam kun keca popnemedi, Allah er si eremna tep uku sekra gam keca dongopkuneme,’ tenepreidi, uku sekra keteneprei. Ukuprei pangeda, Allahdi ila di wenepu. Aneng, sun wenemna tep, Allahdi uku bu karepupa, uku bu di sun butene jepropupa, sun adipapu deprei. Sun abutene nengda kapul mi ton men deipmareitopu deprei. Ataruda, Harun tupa gam kunmau cadi, er nyapu butene ton, Eliasar cap, Itamar cap, sun abutene nengda Allah ati pumbon pel melipra dona tep, wepra deipu.

Lewi yala nengda, imam pel melipra dona tep, wepra deipu upu

5 Allah Yahwehdi, Musa tep pepu.

6 Kandi sun Lewi yala neng tep, pepkurume. “Sun anengda, menmena Harun damai yangedi, ‘Nunda Harun kan cap melipra pel donkamep nengda, adano,’ pepkununge. 7 Sun anengda, ne Allah cap, nimi cap, antamdana tep, lyom opkal bol di dodin tenda ati kalengna neng kungedi, ne si eremna ati bura tara pel don neng kepmengdi, melipra pel donkamenge. Tonda, ne nyapu Israel nesala, ne si eremna ati melipra pel dona nengdi, sun melipra pel donkameng taruda, sun Israel nesala urasin dam tara dopmengepa, sun yumadi dinkamnunge. Atep, sun Lewi yala neng wepra deipmempa, sundi ne cap, nimi cap antamdana ati damai pel melipra donkamnunge. 8 Sun Lewi yala neng pel donada ake. Ne Allah Yahweh cap, nimi cap, antamdana tep, lyom opkal bol di dodin tenda ati pumbon kunkamre keca yumada, sun aneng dipapu talepmengedi, ketenemdinkamenge. Akunkameng ngeda, sun Israel yala nesala yuma, sun mali kuramenge keca kaukepnedi, gum kupra derina tep, sundi melipra pel donkamnenge.

9 Musa kandi Harun tep, sun Lewi yala neng yuma cap, sundi deipmengepa, dadeipdanen bankameng neng yuma cap dopra, Harun tep karenkamrume. Sun Lewi yala nengdi Harun tepapu, pel melimkamenge. Anengda, sun Israel yala neng kunung dinin, aneitamaida sun Lewi yala neng dipapu ne si eremna pel tep melipra pel donkamenge. Atep, sun anengda wepra deipkurume. Allahdi pepu.

10 Upepu dingeda, aupu ton pepu. Dinino, Harun cap, er nyapu yuma cap, sun anengdi deipmengepa, dadeipdanen bankameng neng cap, sun si sekra deipkurume. Deiyoda, sun anengda, ne Allah cap, nimi cap, antamdana ati pumbon pel dona tep wepra deipne. Sun anengda, ne si eremna ati pumbon talepra, pel dona deiyo neng kunkamenge. Yuk Israel yala neng yuma ton pio gume. Atep, sun yuk yala nengdi, ‘Apel ton doptepe,’ tenepmengedi, ne si eremna ati pel dopmengopda, sun apel dopmenge nengda, adipapu wenepra potamkamrume. Allahdi Musa tep pepu. 11 Upepu dingeda, Allah Yahwehdi Musa tep aupu ton pepu.

12 Ukutaru sun Lewi yala neng yumada, ne mawa nesala, ne nyapu sisa utopu kupra deipne. Sun Israel nesala yumadi menmena taru deipkameng nyapu, sun weni nyapu yuma yo pununa tep, sun Lewi yala neng dopra deipne. Sunda, ne nyapu sisapu kunkamnunge. 13 Angeda, tali tep men pepkene. Deiyoda, Israel nesaladi menmena derinkameng weni nyapu yumada, nengepu kunkamnunga tep pepne. Uda, Israel nesala sun Mesir mutu kuramrum taruda, nedi Mesir neng menmena sun weni nyapu yuma pomsi. Ukuamsi taruda, sun Israel nesaladi menmena weni deiyamrum nyapu cap, derinkamrum nyapu cap, uda, sun peiramrum gam kun keca yumadi, menmena derinkameng nyapu capda, ‘Ne mawangepu kunkamenge’ tenen, wepra deipsi. Ataruda, sun weni keca yuma men pomsi atep, sun Israel nesaladi menmena weni deipkamrum nyapu cap, gam keca yuma capda, ne ngepu kunkamre. Ne Allah Yahwehdi Lewi yala neng tep nengeda, ‘Nengepu kunkamenge,’ pepra doropsa atep, sunda, ne mawa neng kunkamenge. Neda sun nai bo Allah Yahweh kunune.

‘Lewi yala nengda denge ware kupra kunung do?’ tenen, nukpetepi upu

14 Allah Yahwehdi, Musa tep katawai mutu, Sinai mutu neitamai di yana pepu. “Kandi ukunkamrume,” peipu upuda ake. 15 “Lewi yala neng, sun co puna nengdi deipipa, dadeipdanen yakaramiyanen, ukutaru peda ataru akununga utopu, sun si yuk-yuk sekurume. Tonda, ataru peda, sun Lewi yala nengdi deipipa, deipdanen baramenge nesala yumada, sun si sekamrume. Ada, sun sal nyapu umur war tenpu konum kepmare nyapu, adinin deiki tara kunge nyapu yumada, nukrumudi, sun si yuk-yuk sekurume,” Allahdi Musa tep pepu. 16 Upeipka tep, Musadi Allah Yahwehdi peiputopu kupra apel dopu. Ada, Lewi yala nengdi deiami nyapu yuma nukrapudi, sun si sekamu.

17 Lewi yala neng gonga kepu deiyo ngebo, erdi deiamu nyapu sisada, weneri neng, sun sida, Gerson cap, Kehat cap, Merari cap, ukuprappu deiamu. Sun aneng sun co puna neng, sun si tupa tenena tep, asi atenpu si dopi. 18 Ange utopu, Gersondi sal nyapu butene deiamu. Anyapu sun sida, Lipni cap, tonda Simei cap pepra si domu. 19 Kehatda, nyapu dumbari deiamu. Anyapu sun sida, Amram cap, Yishar cap, Emron cap, tonda Usiel cap deiamu. 20 Tonda Merari erda, sal nyapu butene deiamu. Sun sida, Makli cap, ton ngebo er sida, Musi pepra deiamu. Asi si pepmap neng yumada, sun co puna ngebo Lewi kuramnga cadi, sun yala si perami sipu tenepra si dorami.

21 Gersondi deipupa, dadeipdanen bei neng sun sida, Lipni cap, ton ngebo er sida, Simei pepra si dopu. Sun si peramitopu, sundi deipreipa dadeipdanen barami neng peda, Lipni yala neng cap, Simei yala neng cap, ayala sipu pepra, si dorami. Sun co puna ngebo Gerson kuramnga cadi, er yala si perami sipu tenepra si dorami. 22 Ada, Gersondi deipupa, dadeipdanen bei nengdi deipi nyapu, sun umur war tenpunge konum kupman nyapu yuma cap, adinin deiki tara kupman nyapu yuma cap, sun anesala sun si konum sekinge yuma tapakra nungna dengeda, tujuh ribu lima ratus (7.500) nesala kurami.

23 – 24 Nimi si, Lael erdi deipu mi Elyasafdi, Gerson yala si dopidi kurami nesala talepra, sun nimi deiyo ngebo kuramu. Israel nesala, sun Allah si eremna cap, Allah cap, nimi cap antamdana tep, keana tep dodina ati dopra deiamyai, akati amnyo tarada, keteng dangban tarapu, aneng sun Gerson yala nengdi, sun ati peda, dopra acapu kurami. 25 Allah Yahweh er si eremna ati kuna tep, Gerson yala nengdi apel talepra dorami. Ada, Allah cap, nimi cap antamdana tep, lyom opkal bol di dodin tenda ati dopinge nong cap, akati er deiki tara kalengna tep derirami opkal cap, akati wengbaramyai dinin, bura tara ongopgenepra derirami opkal cap tep nengeda, ‘Tupa telep kupkamre’ tenen, apel dorami.

26 Ange utopu, Allah er si eremna ati damai dinin, bura tara derirami opkal cap, akati damai wengbana tep, buplan damai kemdongorami opkal cap, tonda Allah karena tep gel pala taplakra deiamidi uku dongonai, er si mesba damai ongopgenepra derirami opkal cap, akati gerengna tapu cap yuma tep nengeda, ‘Mali men kuptue, tupa telep kunkamre’ tenen, Gerson yala nengdi apel talepra dorami. Ukuramidi mambul kange doupra apel dorami.

27 Kehatdi deipupa dadeipdanen barami neng, sun sida, Amram cap, Yishar cap, tonda Usiel cap kurami. Sun si peramitopu, sundi deipipa dadeipdanen barami neng peda, Amram yala neng cap, Yishar yala neng cap, Usiel yala neng cap, ayala sipu pepra si dorami. Sun co puna ngebo Kohat kuramua cadi, er yala si perami sipu tenepra si dorami. 28 Ada, Kehatdi deipupa, dadeipdanen bei nengdi deipi nyapu, sun umur war tenpunge konum kupudi, deiki tara kepu nyapu yuma cap, sun anesala sun si konum sekinge yuma tapakra nungna dengeda, delapan ribu enam ratus (8.600) nesala kurami. Sun Kehat yala nengda, Allah er si eremna cap, er cap nimi cap antamdana tep, domi ati pumbon kwamu keca yumada, ‘Mali kuna gum di, tupa teleppu kunkamre’ tenen, sundi apel talepra dorami. 29 Sun Kehat yala nesala yuma, Allah Yahweh er si eremna ati damai dinin, sun anengda itara iknapi dam tara, Selatan tara ati dopra kurami. 30 Sun anengda, sun co puna ngebo Kehat kuramnga cadi, er yala sipu tenepra kurami. Sun deiyo kepra kuramu ngeboda, Usiel er mi Elisafandi taleamu.

31 Sun aneng pel dona ngeda ake. Allahdi pepra deiamupa, Musadi sekamu upu kipra deiami co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 39:35 dinkurume.} doupra embana cap, ange kalengna cap tep pel talepra dorami. Tonda, Allah si eremna ati pumbon kwamu co lase meja cap, upna lana tep deiamenge nge cap, Allah er karena tep, akati pumbon kwamupa, Imam nengdi talepra pel dorami keca cap, Allah karena tep mesba deriraminge yuma cap, ‘Akeca yuma teleppu kunkamre’ tenen, kalengami. Tonda lyom kain bol di nesala yuma tali wengna gum ati pio lengna ati pumbon wengbana tep, wilimami keca ketenepra derina deiyo neng kurami. Sun Kehat yala nengdi, akati pumbon kwamu keca yuma tep, mambul kange doupra apel talepra dorami.

32 Lewi yala neng neitamai dinin, ‘Sun deiyo neng kunkameng’ tenen, wepra deipi neng, sun deiki tara ila deiyo ngeboda, Eleasar kuramu. Eleasarda, Harun er mi kuramu cadi, Allah er si eremna ati pumbon, pio lengna ati tep, pel talepra dorami neng tep, ‘Anengda, pel telep kupra donkameng’ tenen, sun kalengna deiyo ngebo kuramu. 33 Meraridi deipupa, dadeipdanen barami neng, sun sida, Mahli cap, Musi cap, sun butene neng kuramrei. Sun si peramitopu, sundi deipipa dadeipdanen barami neng peda, Mahli yala neng cap, Musi yala neng cap, Merari yala sipu pepra si dorami. Sun co puna ngebo Merari kuramnga cadi, er yala si perami sipu tenepra si dorami. 34 Ada, Meraridi deipupa, dadeipdanen bei nengdi deipi nyapu, sun umur war tenpunge konum kupu nyapu di dipra itara nyapu yuma cap, sun anesala sun si konum sekinge yuma tapakra dengeda, enam ribu dua ratus (6.200) nesala kurami.

35 Sun anengda, sun co puna ngebo Merari kuramnga cadi, er yala sipu tenepra kurami. Sun deiyo kepra kuramu ngeboda, Abahil er mi Zurieldi taleamu. Sun Merari yala nesala yuma, Allah Yahweh er si eremna ati neitamai kupu dinin, sun anengda dapu tamna, bagian utara bena ati dopra kurami. 36 Sun Merari yala neng cap, Abahil erdi deipu mi Zurieldi deipupa, dadeipdanen benami yala neng cap, apel talepra dorami. Ada, Allah er si eremna cap, Allah cap nimi cap antamdana tep, dodina ati tekra derina tep, ayumnya ikra derirami co cap, aco adinin ordukdongopra derirami lyom kwadimna co cap, akati kolongna co cap, 37 tonda, akati opkal kamkotemna tep, udinin tekra derirami urasin telep co cap, aco cap, ingami co cap yuma amutara urasin telep kunumna weik keca emas di petupra aco deiyo deriraminge yuma cap, tonda akati dopkungedi, kunumpetena tep derina tapu cap, atapu gerekra tu pumbon ingami co cap tep, pel talepra dorami. Ada, akwamu keca yumada, ‘Mali men kuptue, tupa telep kunkamre’ tenen, sun abutene yala nengdi akeca yuma ketenemdina pel talepra dorami. Tonda akati yopra don taru kun keca yala-yala yuma ketenemdin neng kurami.

38 Musa cap, Harun cap, sun nyapu yumada, Allah cap, nimi cap, antamdana tep, lyom opkal bol di dodin tenda ati, er si eremna ati pumbon, neitamai dopra derirami dinin, akati urasin tara dipapu bena wekra keteng yakan tarapu bena, ati dopra kurami. Sun anengda, Israel nesala tep, Allah er si eremna cap, er gisal dona tep karerami keca pel don taru ketenemna deiyo neng kurami. Ada, Allah er pio telep lengna ati neitamai peten kemdina tep, pel dona neng kurami. Tonda, sun yuk tali dakuramne nengdi akati bo wekra bendi, ‘Sun kuramne keca eptene’ tenen, akati neitamai bena ngeboda, sun anengdi popnepa, denapu kurami.

39 Lewi yala nengdi derirami sal nyapu yuma, umur war tenpu konum kupne di, itara neng yuma kuramya tep, Allah Yahwehdi Musa tep, “Israel nesala nungkamrume,” pepra deiamnga utopu, nukrapudi, sun akurami nesala denge yumada, dua puluh dua ribu (22.000) nesalapu kurami.

Israel nesala sun menmena taru derirami weni nyapu tep, yo punupra kunumna tep, pepu upu

40 Allah Yahwehdi, Musa tep pepu. “Israel nesala, sun menmena deipi sal nyapu yumada, nukrapmemdi, sun si sengkamrume. Atep nengeda, sun Israel nesaladi deipmamum nyapuda, war tenpu konum kupya, itamna nyapuda, sun si sengnapu kunkurume. 41 Deiyoda, sun Israel nyapu yuma kunumna cap, yo pununa cap tep nengeda, Lewi yala neng yuma tep nengeda, nedi sun tep tenepne ngeda, ne nyapu sisa utopu keipne. Sunda ne mawa nesala kunkamnunge. Lewi yala neng deiki di, Israel nesala yala-yala yuma tep, kunupnedi sun yo punupkamne. Tonda, Israel nesala sun peinung gam keca yala-yala yuma kunumna cap, yo pununa cap tep, Lewi yala nengdi peinung gam keca yala-yala yumada, sun weni nyapu peda, nengepu kunkamnerure. Agam keca weni nyapu deiki di, Israel nesala peinung gam keca kunupnedi yo punupkamne. Neda, sun nai bo Allah Yahweh kunune.

42 Allah Yahwehdi Musa tep, “Kandi ukupkurume,” pepra deiamutopu kupra pel dopu. Ada, Musadi Israel nesala yala-yala yumadi menmena weni deipi nyapu yumada, sun si seku. 43 Ange konum kupu pangeda, anyapu sun umurda, ware tenpu konum kupungedi, dipdongopra itara kunge nyapu yuma nukra deipya dengeda, dua puluh dua ribu, dua ratus tujuh puluh tiga (22.273) neng kepu.

44 Ukupu pangeda, Allah Yahwehdi Musa tep pepu. 45 “Ange konum kupmem dingeda, sun Lewi yala neng tepapu ngeda, ne tep kumemdi, ‘Sun anengda, Allah er mawa nesala pio tep kunkamnunge’ tenen, wepra deipkurume. Ada, sun Israel nesaladi depi sal nyapu yuma tep, sun kunumna cap, yo pununa cap tep, wepra deipkurume. Tonda, Lewi yala nengdi peinung gam keca weni menmena derirurnge yuma tep nengeda, sun Lewi yala nengdi peinung gam keca yo punupkamrure. Atep, Lewi yala nengdi peinung gam keca menmena weni nyapuda, yuk wepra deipkurume, Ange yumada, sun Israel nesaladi peinung keca kunumna cap, pununa cap tep, wepra deipkurume. Neda sun nai bo Allah Yahweh kunune.

46 Ange tep nengeda, Israel nesala sun menmena deipi weni nyapu kupunge yuma dengeda, dua puluh dua ribu, dua ratus tujuh puluh tiga neng (22.273) kununge. Dinino, Lewi yala neng sun dengeda, yambul metekanun kununga cadi, sun dengeda, dua puluh dua ribu (22.000) nengpu kununge. Atep nengeda, Israel yala nengda, weikanun 273 neng kununge. Atep nengeda, sun Israel nesala, sun nyapu denge yambul weikanun kepne nyapu tep, sun kunumna cap, yo pununa cap tep nengeda, kunumna keca gel uang ton dopropkamrume. 47 Ukuprumudi, sun Israel nengdi deipi 273 nyapu yuk-yuk kunumna tep nengeda, gel uang er si syikal pamubari karepmengepa, doronkamrume. Agel uang er si syikal ngeda, “Ukupra-ukupra kunumkamepe,” pepra, ne si eremna tep, opkal bol di keana dodin tenda ati neitamai kunumrumtopu, angepu karenkamenge. Ada tenpu mi tep nengeda, gel du uang tenpu er sida syikal, pamubari (5) karepkamenge. Agel du uang er ikin ngeda, lima puluh tujuh (57) gram kurure. Ange nukra karepmenga deiki di, sun weni nyapu 273 ngeda, yuk-yuk dinin, yuma kunupra yo punupkamenge. 48 Ukupra agel uang Israel nyapu 273 sun kunumna cap, yo pununa cap tep konum karepmenge pangeda, kandi ange yuma dopra, Harun cap, er nyapu cap, sun tepapu karenkamrume,” Allahdi Musa tep pepu.

49 Ange yumada, Allah Yahwehdi, Musa tep, “Kandi ukunkamrume,” pepra deiamutopu kuramu. Agel du uang er si perak ngeda, sun Israel nesala sun weni nyapu 273 weikanun tapakra kurami ngeda, sun kunumna cap, yo pununa cap tep, Musadi dopropudi, sun Lewi yala neng tep karepu. 50 Musa erdi, sun Israel nesala sun weni nyapu 273 kurami ngeda, sun yuma kunumna tep, uang perak er si syikalda, denge weik seribu tiga ratus enam puluh lima (1.365) dopropudi, sun Lewi yala neng tep karepu. Agel uang perakda, yuk-yuk dinin, ange yuma ikinda, lima belas setengah (15.5) kilogram kupu. Ada Allah si eremna tep, opkal bol di keana dodin tenda ati neitamai nukra kareramitopu, angepu karepi. 51 Ukupra doropu dingeda, Israel nesala sun weni nyapu 273 neng sun kunumna cap, yo pununa cap tep nengeda, Musadi agel uang perak ngeda dopropudi, Harun cap, er nyapu cap tep, karepu.