Num 30 | XteSC | STEP | Allah Yahwehdi pepra deipu upuda, Musadi sun Israel yala nesala tep, yuk-yuk deiyo kepra taleami neng sun tep, “Allahdi, ‘Angeda ukupra-ukupra kunkamrume,’ pepra deipseu upuda ake,” pepra deipu.

Numbers 30

Israel nerapudi Allah Yahweh tep, pedina upu penkamenge tep, pepu upu

1 Allah Yahwehdi pepra deipu upuda, Musadi sun Israel yala nesala tep, yuk-yuk deiyo kepra taleami neng sun tep, “Allahdi, ‘Angeda ukupra-ukupra kunkamrume,’ pepra deipseu upuda ake,” pepra deipu. 2 Ukupmanto, nimi tenpu ngebo ton er pedina upu deiki di, “Tek sisi angeda mali men kupkamne. Neda, ne nai bo Allah er gispal dona tep, ukupra-ukupra pel donkamne,” pepra, pedina upu deiki di Allah Yahweh er damai pedinkamrure. Tonda ukupmanto ngeda, er pedi, er pe tepapu, puto upu deiki di, “Angeda tek sisi kupkamne ja, apepmantopu men tapkamne,” pepra deipkamre upu tep pepne. Ada, aupu pemya deiki di, er pepu tapu di koudongorameng utopu kupra kunkamrure. Tonda, angebo er pedina upuda, Allah damai di, “Angeda tek sisi kunkamne,” pepra deipmare upuda, apeiamretopu adipapu kunkamrure. Atep, apeiamre upuda, men yanitamkamrure. Tek sisi apeiramretopu, adipapu kunkamrure.

3 Uda, kaber nerapu tep nengeda ake. Ukupmanto, tenpu kaber ner ton er nai bo atipu tupa dakuramre tarupu dinin, Allah Yahweh tep, aner er pedina upu deiki, Allah damai di, “Angeda tek sisi mali men kunkamne, Allah er gispal dona tep, ange kunkamne ja,” pepra derire upu cap, er pedi, er pe tepapu, puto upu deiki di, “Angeda tek sisi kunkamne ja,” penmare upu capda, adipapu apepmare upu deiki di aner er pepu, tapu di koudongomameng utopu kudidankamre. 4 Ukuprepa, aner er nai bodi akaber ner pepmarenge gekepredi, ikin ton men kuprepa, sengdongon upu ton men pepyopda, anerdi Allah tep, “Ukunkamne,” pepra, pedina upu deiki di peiamre upu cap, puto upu deiki di, “Ukunkamne,” penmare upu capda, adipapu apepmare upupu moupra talenkamrure. Angeda pio men tapkamre.

5 Dinino, akaber nerdi, apepmare upu pepre tarupu, er nai bo gekepredi, dipru ikin kuprepa, sengdongon upu ton pepyopda, er ner midi, “Ukunkamne,” pepra derina upu pepmarya deiki di, tapu koudongomameng utopu kupmarya peda, apepmare upuda, tali tepapu petamkamre. “Ukupkamne,” pepmarenge, tek sisi men kunkamre. Atep Allah Yahwehdi ange gekepredi, er akaber nerdi pepmarenge tep, kaukepkamre. Ada, aner er nai bo dipru ikin kuprepa, “Angeda gume,” pepmare upu gekepredi, akaber ner tep kaukemkamrure.

6 Tonda, ukupmanto, akaber ner nimi dopmarya peda, kapul men domre taru di, “Ange ukupkamne,” pepra, pedina upu deiki di peiamrur upu cap, tonda, moupra tenena gum di, tali lupra, “Angeda kunkamne,” pepra, upu deiki dipapu peramre upu capda, tapu di koudongorameng utopu kunkamra tep, men gum kupkamre. Aupuda tupa akapkamre. 7 Ada, aner nimi dopyopda er nengeda, er nerdi pedina upu peiamrenge gekepre dinin, ikin men kuprepa, tamupra sengdongon upu ton men pepyopda, anerdi peiamre upuda, men gum kunkamre. Tupa akunkamre. Ada, apeipmare upu di tapu koudongorameng utopu kuamya tep, aupuda aner er damai tupa akunkamre. Men taptudi, tek sisi angepu kupkamre.

8 Dinino, aner er nengedi, er ner pedina upu deiki di, “Ange kunkamne,” peiamre upu gekepredi, “Angeda ukuna gume,” pepra, upu sekdongopyopda, apepya deiki di, aner pedina upu peiamrenge cap, er pedipapu moupra tenena gum di, “Ukunkamne,” pepra tali peiamrenge capda, adipu gum kupra derinkamre. Aupu peiamya deiki di, tapu koudongorameng utopu kuamya peda, adipu gum kunkamre. Tonda, anerdi aupu peiamrenge tapmarya peda, Allah Yahwehdi aner tep kaukemkamrure. Aner tep men wenepkamre. 9 Dinino, sun solu nerapu cap, nimi domreyanen, tamredi, tali kuramenge nerapu capda, sun pedina upu deiki di, “Tek sisi ange kunkamne,” pepra deiamyopda, apeiamre upu deiki di tapu koudongorameng utopu kourura cadi, anerapu sun damaipu aupuda tupa akapkamre. Sundi peiamenge upu tek sisi men taptenge. Angepu kunkamenge.

10 Uda, nimidi domenge nerapu tep, upu ton cap pepkune. Ada, ake. Ukupmanto, tenpu ner ton nimi dopra kure taru di, pedina upu deiki di, “Tek sisi ukunkamne,” pena do, puto upu deiki di, “Ukunkamne ja,” pena do, ange pepyopda, konum tapu di koudongona utopu kurure. 11 Tonda, anerdi, aupu pepre taruda, er domre ngebo dipru ikin men kuprepa, “Angeda gume, ange men kupkamreme,” pepra, sengdongon upu men pepyopda, konuma, anerdi apeiamre utopu kunkamrure. Aner er adipapu, konum tapu di koudongona utopu kurura cadi, aupu pepra deipretopu kupra kunkamrure. 12 Dinino, aner er nengedi, aupu peprepa gekepredi, “Gume ange men kupkureme,” pepra, upu sekdongopyopda, er ner apedina upu pepmarya peda, nong men kemkamre, tali upupu petamkamre. Tonda, ange kupya peda, Allah Yahwehdi kaukemkamre. Ada, er anerdi, ‘Ukuptene,’ tenepmarepane, er akabodi upu sekdongopmarura tepa. 13 Er nerdi, “Tek sisi angeda ukunkamne,” pepra, pedina upu deiki di pepkamrenge cap, tonda puto upu deiki di, “Ange kunkamne ja,” pepkamrenge cap yumada, er nengedi, “Angeda, kuna gume,” pepyopda, akupmarya peda, nong men kunkamre. Adipapu gum kunkamre. Tonda, er nengedi, “Angeda telepe,” pepyopda, adipapu telep kunkamre cadi, ange yuma deiyoda, er dopu ngebo ati pumbon kurura tep, er nengedi perur upu gekepra kunkamrure.

14 Dinino, ukupmanto, aner er domre ngebodi, er ner penmare upu yuma gekepredi, aupu penmare tumi di dipru ikin men kuprepa, “Angeda men kunkamrume,” pepra, sengdongon upu ton men pepyopda, er dim pepmarya deiki di, konum ‘Telepe akunkamrume,’ pena utopu kurure. Atep nengeda, anerdi pedina upu deiki pemre upu yumada, aner dipapu moupra talenkamrure. Tonda, er nengedi, er ner pedina upu deiki di, “Tek sisi ukunkamne,” pepmare ngeda, atumi dipapu er nenge dipru ikin men kupmarepa, sengdongon upu ton men pepmarura cadi, er nerdi tapu koudongona utopu kupkamre. Erdi apepmartopu men tapkamre dinin, angepu kunkamrure. 15 Dinino, anerdi pedina upu pepmarepa, er nengedi gekepre dinin, sengdongon upu pena gum dipapu, tali dakupbaramrenganen, amenda taruda, aner er nengedi, er ner pedina upu pepunge tep, upu sekdongoprepa, anerdi er peiamunge tapra men kupyopda, Allahdi er nenge weneprepa, er damai ikin keca yarepa doronkamre. Deiyoda, aner pedina upu pemrenge tep, er nengedi menmena upu men sekdongopka tepa.

16 Uda, aupu yumada, Allah Yahwehdi, “Ange-ange yuma kunkamrume,” pepra, Musa damai peipu. Ada pedina upu deiki di, kaber ner, er nai bo ati tupa kuramre taru di, “Angeda tek sisi kunkamne,” penkamre upu cap, tonda nimi domre nerdi, “Tek sisi angeda ukunkamne,” pepra, pedina upu deiki di penange cap tep, Allahdi Musa deiki pepra deipupa, Musadi Israel nesala tep, bena lap pepu.