Num 31 | XteSC | STEP | Allah Yahwehdi Musa tep pepu.

Numbers 31

Allahdi peipupa, sun Israel nesaladi, Midian nesala tep, tamupra porbei upu

1 Allah Yahwehdi Musa tep pepu.

2 “Midian mutu nesaladi sun Israel nesala popbisiamsei atep, kwangdana tep sun Israel nesaladi Midian mutu nesala popbisipkurume. Ange yuma kandi konum kupmumnyopda, kan apu yapu deamidi benamitopu, Musa kan peda adipapu depkamrume,” Allahdi pepu. 3 Upepka tep, Musadi Israel nesala yuma tep pepu. “Sun adipapu jen talena neng cap, sun nimi pon keca cap ketenepra deipkurume. Ada sundi Midian nesala porbenkamruma tepa. Allah Yahwehdi Midian mutu kunge neng tep, yu tenepredi, er putoda sun Israel yala nesala deiki deipserepa, Midian mutu nesala yuma tep, bena popbisipkamrume. 4 Atep mar porbana tep nengeda, sun Israel yala nesala, sun yala yuk-yuk akumumtopu, yuk-yuk mar podarbana tep, jen talen nengda, nimi denge pio weik seribu (1.000) neng wepra, ayala yuk-yuk kumumtopu keteneipkurume,” pepu. 5 Upepupa, sun Israel nesala yala-yala yuk-yuk denge pio weik beribu-ribu neng akuramitopu, sun yala yuk-yuk dinin, ton yala yuk, ton yala yuk di, ‘Anengda mar porbenkameng’ tenen, aneitamai di gung yuk-yuk wepra deipinge dengeda, seribu (1.000) jen talena neng peda wepra deipi pangeda, ajen talena neng yuma dukdongopra nukra deipi ngeda, dua belas ribu (12.000) neng wepra keteneipi.

6 Musadi sun yala yuk-yuk akuramitopu, ton yala yuk, ton yala yuk dinin, “Sun yala neitamai di, seribu (1.000) neng wepra keteneipkurume,” peipupa, ukupi. Ada, “Sun Israel neng yala-yala yuk akurumutopu, seribu neng wepra deipkurume,” pepupa keteneipi. Sun Midian nesala porbana tep nengeda, imam ngebo, Eliasar er mi Pinehas cap, kikiman mar podarbana tep keteneipi. Ataruda, Pinehasdi Allah er Pio Telep Lengna Ati pumbon deiami keca cap, tonda, ‘Yuk mutu podan neng poryankunge’ pena tep, bung-bung pena keca, er si terompet cap doupu. Adoupu kecada, podarban taru peten pena kemna tep keca doupudi ketenepu. 7 Sun yuma konum ketenepi dingeda, Allahdi Musa tep, “Ukupkurume,” peipmautopu kupi. Ada, Israel nesaladi Midian mutu neitamai kurami nesala tep, aneitamai di nimi yumada bena popidi gawal daki. 8 Aponmai taru dipapu, Midian mutu nimi deiyo kepra taleami neng, sun pamubari ila neng peda popi. Aneng sun sida ake. Hewi cap, Rekem cap, Zur cap, Hur cap, tonda Reba cap popi. Atarupu Beor er mi Bileam peda, parang ya di popipa depu.

9 Aneng yuma konum popra seng pepi dingeda, Israel nengdi Midian mutu nerapu yuma cap, sun anerapudi deiami metek nyapu yuma cap, tomopra doupra yai. Tonda, sun Midian mutu nesaladi taleamidi peirami gam kun keca, sapi bisam cap, kambing yuma cap, tonda, sundi periami ayam ma utopunge yuma cap, sundi talepra kurami kunumna weik keca yuma capda, dalupra dopropi. 10 Ukupi dingeda, sundi talepra kurami mutu-mutu yuma cap, sun ati dopra kuramyai yuma cap, keana taru tep kurami tenda ati yuma capda, uku di dongopra gawal daki. 11 Ange yuma konum kupyopda, sun Israel nesaladi Midian mutu nesala taleami keca yumada, dalupra dopropmai. Akeca yala-yala yuma cap, ton tapmai pel melipra dona nesala yuma cap, sun peirami gam kun keca yuma cap, dalupra dopropi. Adopropi kecada, ada ake. Nerapu cap, nyapu cap yumada adipapu tomopi. Tonda, Midian nengdi peirami keca yala-yala yuma peda bena dopropi.

12 Adalupra dopropi keca yumada, Musa cap, imam ngebo er mi Eliasar cap, tonda Israel nesala sun nimi ila deiyo-deiyo kurami neng yuma cap, sun tali dakurami Israel nesala cap, sun yuma bulupra akunmaiya damaipu, sun dalupra dopropi keca yuma doupra yai. Ataruda, Israel nesala, sun dodin ati dopra kunmai mutuda, Moab mutu banai, Yordan me pirman dinin, Yeriko mutupu damai bena kunmai.

Israel jen talen neng nimi porbenamyanen, tamupra yai upu

13 Sun jen talena nengdi Moab ban mutu tamupra yakanmai pangeda, Musa cap, imam Eliasar cap, Israel nesala sun nimi deiyo kepra taleami ila neng cap, tonda Israel yala nesala, tali dakurami nesala yuma cap, sun tenda ati deipra akuramyai di tapra, sakotepra beidi, sun jen talen neng yakanmaiya tep, “Telepe,” pepra benmangka doupra yai. 14 Beidi acapu bulupra kunmai taruda, Musadi jen talena neng, sun ila deiyo neng cap, tonda ila gung yuk-yuk tep, deiyo kepra seribu (1.000) jen neng taleami deiyo neng cap, sun amutara deiyo keamidi, seratus (100) jen neng taleami deiyo neng yuma cap tep, Midian mutu nesala tep podarbenamya tamupra yakanmaipa, bena derepu. 15 Derepudi bena pepu upuda ake. “Sunda ware deiyo tep, Midian mutu nerapu yuma peda, tupa tapmarumpa gam kunmang do? Ware deiyo keca tep, anerapu peda men poptapmarum do?

16 Anerapudi mali kuramya deiki, Bileamdi, ‘Sunda ukupra-ukupra kunkamenge,’ pepupa, ataru kuramrum Israel nesala gekeprumdi, mali weik kuramumdi, sun nai bo Allah Yahweh tep, pio mali weik kuprume. Ataruda, sun Midian mutu nerapudi Israel nesala tep, sun taleami keca, er si isok Peor, ‘Er sipu eremkupe,’ pepra napropipa, Israel yala nesala mali weik kuramitopu, ataru peda, anerapudi men napropkamseng do? Gume, upepra napropseipa, ataruda, Allahdi sun menenga keca tep, ila kange mun pu kareamupa, Allah Yahweh erdi, ‘Ne mawa nesala kunkamenge’ tenen, wepra deiamu nesala dinin, apu sun deiki sakropupa, nimi weika di deami. Ange tep nengeda, aMidian mutu nerapu cap, sun cap kikiman kuramumyopda, mali upu pepra yana napropsenge pangeda, ataru peda Allah er si eremna tapmum pangeda, ikin keca sun damai yankamsere.

17 Uda, ange yuma tep nengeda, ‘Napropsengepa mali kupnup’ tenen, ataru dipapu, aMidian mutu nerapudi deiami sal nyapu, metek nyapu yuma cap, tonda nimidi doamipa, kikiman marami Midian mutu nerapu yuma peda, adipapu popkurume,” Musadi pepu. 18 Upepudi, aupu ton dukdongopra pepu. “Dinino sun Midian mutu kaber nerapu, nimi dona gum tep, nimi cap kapul men marami nerapu yumada, portamna gum dipapu, sun Israel nengdi akaber nerapu doropkurume.

19 Tonda, Midian mutu nesala podan taru neitamaida, sundi nimi konum popmarum neng cap, yuk nengdi nimi poptapipa depmai neng, sun nong bol bepmarum neng cap yumada, sun dopra kuramum ati neitamai di tapra, yambul karenai bura tara bemumdi, ue yoneitam bari tumi deiki di bena, yambul karenaipu dakunkamrume. Abena kunkamrum taruda, ue weneri tumi deiki cap, tonda ue yoneitam bari tumi deiki capda, sun pe cap, sundi tomopra yanmamumdi doropmamum nerapu cap, me kupra deipkamrume. Ada, ‘Kange di ton cap, telep kupra deipdankamepe’ tenen, me telep kupra kunkamrume. Sun yuma tep me kuna pel donkamrume. 20 Tonda, angetopu, sun opkal cap, sundi gam keca popra abol sekra wirum keca yala-yala yuma cap, tonda kambing bol cap, potong cap di deipra wiramrum opkal do, tonda co deiki di petupra deiamrum keca do, ange yala-yala yumada, pio telep kupra me kunkamrume,” Musadi pepu.

21 Tonda, nimi porbenamya tamupra yai neng tep, imam Eliasardi aupu pepu. “Ange yumada, Allah Yahwehdi, ‘Ukunkamnunge,’ pepra deiamu mem upu yumada, Musa damai peipu ngeda, erdi alap pepsere. 22 – 23 Ada, ukupmanto ngeda, uku dongopmengepa, uku jepredi, uku di men jepmanto kure kecada, pio gat kecada, ada emas do, perak do, tembaga do, besi do, yambul gat keca er si tima kurun nge do, miringe do yumada, ‘Mali keca gum kuprepa, kange di ton cap telep kupkamre’ tenen, uku deiki dipapu deipra kurpetenkurume. Uku deiki di kupmengedi betapra derinung keca yumada, me kudina pel dopmumnya deiki dipapu, telep kupra deipmumpa, mali kun keca ton men palenkamrure. Tonda, akeca yuma cap, uku deiki di men betamnung keca peda, utopu me kuna pel dopmumya deiki di, kange di ton cap telep kupra derinkamrume. 24 Uwe yoneitam bari tumi konum kepre pangeda, sun kenengamum opkal yala-yala yumada, adipapu me kunkamrume. Konum me kupmumyopda, adeiki di, sun opkal cap, sun pe nong cap tep, kange di ton cap telep kudinkamrume. Apel dopmumnyopda, ataru dipapu, sun kuna tep bura dodin atida tapra, tamupra sun tenda aik wengyakankamrume,” Musadi pepu.

Dalupra dopropmai keca bokinge tep upu

25 Allah er si Yahwehdi Musa tep pepu.

26 Kan cap, imam Eliasar cap, tonda, Israel yala nesala sun yala yuk-yuk akuramengtopu, ayala sun nimi deiyo neng yuk neng yuma cap, sun yumadi, sun Israel nengdi Midian mutu neng bisbisa kapmarumdi, dalupra dopropmarumdi, duyanmarum telep keca yumada, adipapu ‘Denge ware kuprap do?’ tenen, nukterepkamrume. Ada dalupra dopropmarum nesala cap, tonda sun Midian nesaladi peirami keca yala-yala yuma cap nukamrume. 27 Adalupra duyanmange keca yumada, konum nukrumu dingeda, adipapu sundi bokrapmumdi utotopu wilipra butene kupra deiki di deipkurume. Abokra deipmamum ngeda, ton tara ngeda, sun jen talen neng mar podanai benmange neng tep karepkurume. Utopu, ton tara ngeda, Israel nesala tali tupa sun ati damai dakunmange nesala tep karepkurume.

28 Tonda, ne Allah Yahweh, ne gispal dona tep nengeda, nenge tep ton yuknge wilipra ketenepra kareryankunerume. Ada sun jen talen neng tep, keteneipmarumunge yuma neitamaida, ton tarange bokra, ne tep karepkamnerume. Ada ware yala keca do yuma, lima ratus akapyopda, ange dinin, aneitamai di tenpu dopropmumdi, ne tep karepkamnerume. Ada dalupra duyanmarum nimi cap, sapi bisam cap, keledai bisam cap, domba bisam cap, tonda kambing bisam cap, tenpu-tenpu dopra, yukai ketenepra deipmumdi, ne tep karepkamnerume.

29 Sun jen talenan nengdi dopropkameng keca neitamai di, lima ratus akapyopda, tenpungepu bokra yukai keteneipmamumdi, ne tep karepkamnerume. Ange yumada, ne Allah Yahweh tep keteneipmamum dingeda, sun adipapu akeca dopra, imam Eliasar tep karepkurume. Ange yumada, ne Allah Yahweh, ne gispal dona tep, karepkamnerume. 30 Tonda, sun Israel nesala, sun ati damaipu dakunmai nesaladi dopropkameng keca neitamai di, yambulanun ton bokra deipmamumnge peda, lima puluh (50) akapyopda, aneitamai di tenpu ngepu dopropkurume. Ada Midian mutu nesala bisbisa kapmarumdi, sun telep keca dalupra duyanmarum nimi cap, sapi bisam cap, keledai bisam cap, domba bisam cap, tonda kambing bisam cap ketenepra deipkurume. Aketeneipmarumunge yumada, adipapu doprapmumdi, sun Lewi yala neng, ne Allah Yahweh, ne si eremna tep, opkal bol di keana dodin tenda ati neitamai di, pel dongedi, kalengnung neng tep, akeca bokra ketenepra Lewi yala neng tep karepkurume.

Allah Yahwehdi Musa tep upepra deipu.

31 Allahdi Musa damai peiputopu, imam Eliasar cap, Musa capdi angepu kuprei.

32 Uda, ange yuma konum kupi dingeda, Midian mutu nesala popra bisbisa kapidi, sun jen talen nengdi dalupra dopropmai keca, gawal tupa akapu ngeda, domba bisamda, denge pio weik, enam ratus tujuh puluh lima ribu (675.000) ekor kupu. 33 Tonda sapi bisam dengeda, pio weik tujuh puluh dua ribu (72.000) ekor ton kupupa dopropi. 34 Utopu ton, keledai bisam dengeda, pio weik enam puluh satu ribu (61.000) kupu. 35 Tonda, dalupra doupra yanmai nerapuda, ada nimi dona gum nerapu cadi nimi cap men marami nerapu, sun dengeda pio weik, tiga puluh dua ribu (32.000) nerapu dalupra dopra yai.

36 Ange yuma konum nukterepidi, akupyopda, dana tara ton tupa kapunge neitamai di, bokrapidi, sun jen talena neng mar podanai benmai neng tep karepi. Ada, kambing bisam cap, domba bisam cap dengeda, pio weik, tiga ratus tiga puluh tujuh ribu, lima ratus basam (337.500) kupu. 37 Ange neitamai di, Allah Yahweh er gispal dona tep karenange tep, ange yuma neitamai di, yuknge wepra keteneipi ngeda, domba bisam dengeda, enam ratus tujuh puluh lima (675) Allah tep karepi. 38 Tonda, sapi bisampu yuma nuki ngeda, denge pio weik, tiga puluh enam ribu (36.000) kepu. Ange neitamai di, Allah Yahweh er gispal dona tep karepi ngeda, aketeneipinge yuma dengeda, tujuh puluh dua (72) ekor kupu.

39 Utopu tonda, keledai bisam yuma nuki ngeda, denge pio weik tiga puluh ribu lima ratus (30.500) ekor kepu. Aneitamai di, Allah Yahweh er gispal dona tep, keteneipra karepinge yumada, enam puluh satu (61) ekor karepi. 40 Tonda kaber nerapu cap, kaber neng cap yuma nukinge dengeda, enam belas ribu (16.000) kepu. Aneitamai di Allah Yahweh er gispal dona tep karepi ngeda, yuk tiga puluh dua (32) nesala bokrapidi, ketenepra Allah tep karepi.

41 Aketenepra yana karepinge yumada, Musadi doroprapudi, Allah Yahweh er gispal dona tep, karepu. Ada Musadi, imam Eliasar, er deikipu karepu. Ada Allahdi, “Angeda ukupkurume,” pepra deiputopu, Musadi kupu.

42 Uda, ange kupudi tupa akapu ngeda, daneitamai di bokrapudi, sun jen talena neng mar porbenami neng tep karepu dinin, sun dopropinge neitamai di, ton dantamada, sun Israel nesala, Midian mutu nesala mar porbana gum di, tali ati damai tupa dakurami nesala tep karepu. 43 Atep, sun tali ati damai dakurami Israel nesala tep bokra karepu kecada, domba bisam dengeda, pio weik tiga ratus tiga puluh tujuh ribu lima ratus (337.500) ekor kupu. 44 Tonda, sapi bisam dengeda, pio weik tiga puluh enam ribu (36.000) ekor kupu. 45 Utopu, keledai bisam dengeda, pio weik tiga puluh ribu lima ratus (30.500) ekor kupu. 46 Tonda, dalupra doropmai nesala dengeda, pio weik enam belas ribu (16.000) nesala kupu.

47 Uda, mar porbana gum dinin, tali ati damai dakurami Israel nesala tep nengeda, Musadi karepmau ngeda, kange di ton tamupra dopropu. Ada nimi pe, tonda sundi peirami gam keca yala-yala yuma peda, ange di lima puluh (50) akapyopda, ange neitamai di, tenpungepu dopropu. Adopropunge yumada, Allah er si eremna tep, lyom opkal bol di keana dodin tenda ati deiamainge, akati pumbon pel dona deiyo neng, sun Lewi yala neng tep karepu. Angeda Allahdi Musa tep, “Ukupkurume,” peiputopu karepu. 48 Ange yuma konum kupu taruda, sun Israel jen talena deiyo neng yumada, Musa er damaipu yai. Ton deiyo nengda, sun amutarada jen talen neng denge weik seribu neng taleami. Ajen talena deiyo neng ton yai. Ton deiyo nengda, sun amutarada jen talen neng denge yambula di, seratus nengpu taleami. Ajen talena deiyo neng ton yai. 49 Sun jen talena deiyo-deiyo neng yaidi, sun kuraminge Musa tep yana lap pepi. “Naio, nunda kan amutara kupedi kan upupu gekepra pel donup nengda, nundi nun amutara kunge jen talena neng yuma ton nukpetepmapupa, akunupa neitamai di tenpu ngebo peda, ton men popsei. Gam tupa kununge. Atep nengeda, nun yumada, tupa gampu kunmape.

50 Ange tep nengeda, nun jen talenup nengda, sun Midian mutu nesala popbisimepudi, sun talerami telep keca, kunumna telep keca yala-yala yumada, dalupra dopropmepu. Ada, nun yuk-yuk dinin, akeca epmapudi, akeca akwamutopu dalupra dopropmepudi, kan damai duyana deipmapu. Ada, kunumna weik keca emas cap, tonda buru deiki deringe keca gelang cap, cincin cap, amul damai kenengna keca cap, kum damai gerekami keca cap yumada, dalupra dopropmepudi, kan damai duyana deipmepu. Ada, ‘Akeca yuma karepmepya deiki di, Allahdi nun mali kunup keca daepseredi, kange di ton cap telep kweipkamser’ tenen, akunumna weik keca dopra Allah tep karepmepu,” pepra, sun jen talena deiyo nengdi Musa tep lap pepi.

51 Upepra lap pepi pangeda, sun jen talena deiyo nengdi duyanmai keca, urasin telep kupra derina tep keca, emas cap, yuk yala telep karena keca yuma cap, Musa cap imam Eliasar capdi doroprei. 52 Sun jen talena deiyo neng dinin, seribu neng taleamidi upu perami deiyo neng cap, seratus jen neng taleamidi upu perami deiyo neng cap, ‘Allah Yahweh, er gispal dona tep karepkupe’ tenen, Musa cap, imam Eliasar cap tep karepi keca yumada, ada emas er ikinda, enam belas ribu, tujuh ratus lima puluh syikal (16.750) kepu. Angeda, seratus sembilan puluh (190) kilo emas kupu.

53 Akeca yumada, yala-yala weik, yuk-yuk akapu ngeda, sun jen talena nengdi, Midian mutu nesala bisbisa kapi taruda, sun yuk-yuk di akeca dalupra doropmai. Ataruda, sundi akeca yumada, sun pe kunkamya tep, ton wilipra dopropi dinin, amenda taruda, Allah Yahweh er gispal dona tep, Musa damai duyana karepi. 54 Ange konum karepi pangeda, Musa cap, imam Eliasar cap, sun butenedi ajen talena deiyo-deiyo neng yuma, seribu neng talerami deiyo neng cap, seratus neng talerami deiyo neng capdi karepmai kecada, doprapreidi Allah cap, nimi cap, antamna tep, opkal bol di keana dodin tenda ati deiaminge neitamai doupra berei. Ada, ‘Ange doupra benemepa, nun nai bo Allah Yahwehdi, nun Israel yala nesala yuma tep, tupa tenepseredi, pio melimkamser’ tenen, peten kemdina tep, akeca doupra bena, Allah er si eremna ati pumbon deiprei.