Num 32 | XteSC | STEP | Uda, sun Ruben yala nesala cap, Gad yala nesala capda, sundi talepra peirami gam kecada pio weike kwamu. Pio weik kupka tep, sundi Yaezer mutu cap, Gileat mutu cap, epidi utenepi. ‘Uo, amutu buteneda, sapi bisam peinai tep nengeda, amutuda pio telep mutu cadi, nundi peinup kecada, amutu neitamai di peitepe pangeda, pio telep kuptue,’ tenepi.

Numbers 32

Keteng yakan tara, Yordan me goupra ortara mutu ton bokra karepka tep, seki upu

1 Uda, sun Ruben yala nesala cap, Gad yala nesala capda, sundi talepra peirami gam kecada pio weike kwamu. Pio weik kupka tep, sundi Yaezer mutu cap, Gileat mutu cap, epidi utenepi. ‘Uo, amutu buteneda, sapi bisam peinai tep nengeda, amutuda pio telep mutu cadi, nundi peinup kecada, amutu neitamai di peitepe pangeda, pio telep kuptue,’ tenepi. 2 Utenepya tep, sun abutene yala nesala, sun deiyo nengdi, Musa cap, imam Elieser cap, tonda Israel nesala, sun deiyo talepra upu pena deiyo neng, yuk neng yuma cap tep, sun damai bena pepi. 3 – 4 “Uo nun nai yapu, atara dinmap mutu sida ake. Ada, Atarot mutu cap, Dibon mutu cap, Yaezer mutu cap, Nimra mutu cap, Hesybon mutu cap, Eleale mutu cap, Sebam mutu cap, Nebo mutu cap, tonda Deon mutu cap epmape. Asi pepmap mutu yumada, sapi bisam peinai tep nengeda, amutuda pio telep mutu kurure. Atep, nun tenepmapada ake. Nun nai bo Allah Yahwehdi meliamupa, nun Israel yala nesaladi, sun Midian mutu nesala yuma, amutu neitamai kurami neng yumada, konum poptapra bisbisa kapmepu. Dinino, amutu yumada, nundi peinup gam kecada, amutu dubetepe pangeda, tek sisi telep kupsetue. Deiyoda, nunda, sun amutara nesala kunup nengda, nundi peinup kecada, amutu neitamai di peiptepepa, pio weik kupsetue,” pepi.

5 Ange tep nengeda, nundi kan tep yana moropkepe. Kandi, nunda kan amutara kunup neng tep, ‘Sunda telep neng,’ tenepsetumopda, amutu tuda nun tep karepsemempa, telepra kunkamepe. Tonda, kandi nun tep, ‘Sunda atara mutu di tapra, Yordan me goupra, ortara beso,’ men pepkuserume. Acapu kunkamrume pepsetum’ tenen, moropkepe,” pepra, sun Ruben yala neng cap, Gad yala neng capdi ukupra moropi.

6 Upepya tep, Gaddi deiamupa, dadeipdanen yakarami yala neng cap, Rubendi deiamupa, dadeipdanen yakarami yala neng cap tep, Musadi tamupra pepu. “Gume sunda, ‘Amutupu kutepedi, pio teleppu kunkamepe,’ tenepmarumdi penmarum do? Dinino, sun kayapu neng, yuk Israel yala neng yumadi, ortara mutu bena, yuk mutu nesala tep mar porbetenge pangeda, nunda men melipra porbenkamepe’ tenen, penmarum do? 7 Tonda, ukupmumnya deiki di, sunda ware deiyo keca tep, sun kayapu neng, nun yuk Israel yala nesalada, ‘Yordan me goupra ortara men betepe,’ tenepmengedi, kwar kuprepa, dipru buluksakmanto kupnunga tepa. Warya tep utenepmarumdi peprum do? Tonda, warya tep, Allah Yahwehdi, nun Israel yala nesala yuma tep, ‘Ortara mutu tu yuma sun tep karepkamsene,’ pepra, pedina upu deiki di konum peamseu mutu, ‘Nun kayapu neng men benkameng’ tenen, pepmanerum do? 8 Tonda upepsene. Pumun taru, nedi Kades-Barnea mutu kunmapu taruda, sun nai yapu tep, ‘Ortara mutu yuma kamo dirbenkurume,’ pepra weipsipa, dirbei dinin, kware kupupa, ‘Uo, ware kuptepe do?’ tenen, pemi utopu, sun ataru peda utopu penmarume,” Musadi pepu.

9 Upepudi aupu ton dukdongopra pepu. “Sun ataru kurami nengda, ormutu dirbaramyanen, mutu si Eskol ban mutu beidi, amutu tuda konum emi. Emi dinin, anengda tamupra yanami deiyoda, “Uo, Allahdi, ‘Amutu karepkamsene,’ peiamseu mutuda, nun Israel nengda, nun puto gum tep, nun kwar cadi, amutu men wektepe,” teneramidi, pepya deiki di, sun kayapu neng, yuk Israel yala neng yuma gekepidi, sun dipru buluksakupa, kware weik kupu. 10 Kware kupupa, ‘Ortara mutu men wengbetepe,’ tenepya tep, ataruda Allah Yahweh er yu kupupa, erdi sun tep puto deiki di upepu.

11 “Pio tek sisi pepsene. Sunda, nedi, ‘Karepkamsene,’ pemsisi upu moupra men talepkurume. Sundi, ‘Men wengbetepe,’ tenepmarumdi, kware kupmasera tep nengeda, ne tek sisi pepsene, sun Mesir mutu neitamai kuramrumpa, nedi lyepsesidi doupra yanamsisi nengda, ortara mutu pio men dinkamrume. Ada, keteng tamun dua puluh tahun itara konum keamre neng yumada, nedi sun apu yapu Abraham cap, Isak cap, Yakub cap tep, ‘Atelep mutu karepkamsene,’ pepra, pedina upu peiamsi mutuda, sunda men wengkamrume. Ada tali tep gume. Deiyoda, sun aneng yumada, nedi pemsisi upu men gekepmengedi, men dombanunge. Ne tep yaniptapmanengdi, sun kange dipru yuma deiki di, ne pesene upu men gekepra kununga tepa. Atep, aneng yumada ortelep mutu men wekra kunkamenge. 12 Sun yuk neng yumada, ne pesene upu men gekenung dinino, Kenas mutu ngebo er si Yefene, erdi deiamu mi er si Kalep cap, tonda Nun erdi deiamu mi, er si Yosua cap, sun butenepu, ne Allahdi, ‘Ukupkurume,’ pepra deiamsisi upuda, moupra gekeprengedi, kurerunge. Sun kange dipru yuma deiki di, ne upu gekererunge.” Allahdi pepu.

13 Uda, sun Israel yala nesala weik tara kurami nengda, Allahdi anesala tep yu kupupa tamu. Ukuamupa, Israel nesala yumada, akeca-keca yuma men kwamu mutu, ila katuai mutu neitamaipu, keteng tamun empat puluh (40) tahun deiki di, amutupu tamutoramidi embarami. Ukuramya deiki di, Allah diramupa, erdi peiamu upu moupra men taleamidi, mali weik kurami nengda, ataru neitamai, adipapu sun yuma deprami. Tenpunge peda tupa gam men kurami. 14 Atep tek sisi pepsene. Sun ataru kurum neng utopu, pumun taru peda, sun nai yapudi, Allah peiamunge pio men gekerami utopu, sun Ruben yala neng cap, Gat yala neng cap, sun peda men gekeprume. Adeiki di, bisbisa kaprumdi Allah er upu yaniprumdi, pio mali weik kuprume. Atep sun peda, sun nai yapu mali kurami utopu sun peda ukunmarume. Adeiki di Allah Yahweh, er yuda yambul akapu dinin, ukutaruda er yuda weikanun ton cap kuprepa, sun Israel neng deiki ikin keca weik tupa-tupa kunmasere.

15 Angeda tali tep men pepsene. Ataru sun peda Allahdi peipseu upu yaniptapra amnyo kepmum pangeda, Allahdi sun tep, ‘Dakwapye, tali dadepkameng ja’ tenepredi, kaukepra tapserepa, sun Israel nesala yuma akeca-keca gum kwamre mutu, akatawai mutupu pio weiktonun tali-tali embanamumyanen, acapu damapkamrume. Tonda, sundi Allah er upu moupra men talepmumnya deiki di, sun kayapu yuk Israel nesala si benepmumnya deiki di, gum kupropkamre.” Ange yumada Musadi sun Ruben yala neng cap, Gat yala neng cap tep pepu.

16 Upepu pangeda, sun Ruben yala neng cap, Gad yala neng capdi, Musa damai yaidi upepi. “Telepe apepserema tep nengeda, nun domba bisam peinkamepai amutu neitamai dipu beilya wipdongopkamepe. Tonda nun nerapu cap, nun nyapu cap, kunkamengai yumada, telep ati arum dopmepedi, acapu kunkamepe. 17 Ukupmepyopda, nun adipapu ketenepropmepepa, nun kayapu neng cap, sun yuk yala Israel neng cap, tonpa mar podarbenkamepe. Tonda, nundi mar podarbana tep deiyo neng gonga kepmepedi, nun kayapu neng yumada, doupra melipmepya deiki, sun tep karepmum mutu doupra bena kunkamenge. Ukupkamep taruda, nun nerapu cap, metek nyapu cap yumada, beilya wipra ongopdongomepya neitamaipu kungedi, teleppu kunkamenge. Deiyoda, ‘Amutu neitamai talepra kurami nengdi, men yana popkameng’ tenen, kupkamapa tepa.

18 Ukupra kupmepedi, nun kayapu yuk Israel nesala yala-yala yumada, sundi dopropkameng mutu tu tenpu-tenpu di dopropkameng ja. Kapul men dopropmange taru neitamaida, nun adipapu tamupra, nun pe ati men benkamepe. Israel nesala yala-yala yuma, sun talepra kunkameng mutu kapul men dopropmange taruda, sun tep melipra kunkamepe. 19 Atep nengeda, nundi nun kayapu neng tep, Yordan me goupra ortara keteng dangban tara mutu tu ton karepkamremaida, atuda yambulanun peda, ton men dopropkamepe. Deiyoda, kandi nun talepra kuna tep tuda, Yordan me goupra atara, keteng yakan tara konum karepsemuma tep, acapu kunkamepe. Sun Ruben yala neng cap, Gat yala neng capdi, Musa tep pepi.

20 Upepi pangeda, Musadi tamupra sun tep pepu. “Tek sisi sundi uteneprumudi, konum keteneiprumyopda, sundi, ‘Ukupkamepe,’ pepra lap pepmanerum ngepu, tek sisi kupmumnyopda, teleppu kunkamrume. Atara mutu neitamai kuna telepe pua. Dinino, adipapu Allah Yahweh er dinmaserai dipapu, Yordan me goupra orketeng dangban tara nesala mar podarbana tep ketenepkurume. 21 Tonda, sun akurumu neng yumadi, Yordan me goupra ortara nesala mar porbana tep, menmena mar porbenkurume. Ataruda, Allahdi er mepra baredi, er ila puto di, er pe tep, ‘Nun songe,’ tenepmenge yala nesala cap, tonda, er mawa nesala tep podan neng yala-yala yuma cap tep, popredi, bisbisa kapra enepronkamre. Sun yuma yuk mutupu bendopkamenge.

22 Ukuprea deiki di, menop taru amutu tu taleami nesala yumada enepropkamre ja. Ukupyopda, nun Israel yala nesaladi, amutu yuma dopropkamepe. Ange yuma konum ukupmepyopda, ataru dipapu, sun adipapu tamupra sun pe mutupu tamupra bena kunkamrume. Ange kupmumyopda, Allah si deiki cap, sun kayapu neng yuk yala Israel nesala si deiki capdi, ‘Angepu tek sisi kupkamape,’ pepra pedina upu deiki pepmarum ngeda, konum kupkamrume. Tonda, ange konum kupmumdi gawal dakmumyopda, sundi ne tep moropmanerum mutu tuda, aketeng yakan tara mutu tuda, Allah Yahweh er dinmaryai di sundi, ‘Amutuda nun mutu sisa ake’ tenen, doronkamrume. Acapu amutu tu talepra pio akunkamrume.

23 Dinino, sundi, ‘Ukunkamepe,’ pepra, pedina upu deiki di pepmarum ngeda, tupa tenenkamrume. Sundi ange yumada men kupmumyopda, Allah er damai mali kunkamrume. Ange utopu mali kupmumyopda, tek sisi pepsene. Amali kupkamrumnya tep, menengada ikin keca weik doronkamrume. Allahdi wenepkamser ja pepsene. 24 Atep nengeda, sundi, ‘Gume ange yuma tek sisi ukupkamepe,’ pepra, pedina upu deiki konum pepmaruma cadi, ataruda sun nerapu cap, metek nyapu cap kunkamengai tep, adipapu bemumdi, ati arumda ila-ila atipu bena donkamrume. Tonda, sun domba bisam peina tep, lyom gel beilya bena wipdongopkamrume. Dinino, sundi, ‘Tek sisi ukunkamepe,’ pepra, pedina upu deiki di peprum ngeda, pio men lupronkamrume. Musadi sun Ruben yala neng cap, Gat yala neng cap tep pepu.

25 Upepu pangeda, sun Gat yala neng cap, Ruben yala neng capdi, Musa tep pepi. “Naio, nunda kan amutarapu kupedi, kan pelpu melipra donup neng cadi, kandi, ‘Ukupkurume,’ pepsememtopu, angepu nun nai bo, kan upupu gekepra kunkamepe. Kanda nun deiyo ngebo kurema tepa. 26 Atep, nun metek nyapu cap, nun nerapu cap, nun peinup gam kun keca, sapi bisam cap, domba capda, acapu deipkamepe. Ada acapu Gilead mutu neitamaipu, ati arum dopra deipmepepa, acapu pio kunkamenge. 27 Dinino, kandi pepsemumtopu, nun du neng yumada, mar podarbana tep, jen cap, mar cap yuma ketenepmepedi, nun nai bo kandi, ‘Ukupkurume,’ pepmaseremtopu, Allah Yahweh dinmaseryai di, Yordan me goupra, ortara mutu kunge nesala tep, mar porbenkamepe. Ada, nun deiyo ngebo kan Musadi, ‘Ukuprume,’ pepmaseremtopu kunkamepe. Kan amutara neng kupedi, kandi pepsememtopu kunkamepe.” Sun Gat yala neng cap, Ruben yala neng capdi upepi.

28 Upepya tep, apepi upuda, Musadi imam Elieser cap, nimi si Nun erdi deiamu ngebo Yosua cap, tonda Israel neng yala yuk-yuk, sun deiyo kepra taleami neng yuma tep, upepu. 29 “Uda sun gekepneso. Nun kayapu neng, sun Gat yala neng cap, Ruben yala neng cap, sunda, ‘Allahdi pepra deipu ngeda, angepu pio melipkupe,’ konum pepmange. Ada, sundi, ‘Dyo, nun cap melipmepepa, nun Israel yala neng yumadi, Yordan me goupra ortara mutu kunge nesala tep, mar podarbenkamape,’ pepmange atep, sundi melipsengepa bemumyopda, ortara kunge nesala popbisiprumudi, amutu tuda sun doropkamarume. Sun kayapu neng Gat yala neng cap, Ruben yala neng capdi, tek sisi konum melipsengopda, amenda taru sun aneng tep, Gilead tara mutu tuda, bokra karepkamrume. Ukupmumpa, sundi amutu yuma talepra kunkamenge. 30 Dinino, sun Gat yala neng cap, Ruben yala neng capdi, men melipsengepa, sun cap tonpa Yordan me goupra, ortara mutu kunge nesala tep, mar men porbemumnyopda, Gilead mutu men dopropkameng dinin, sun cap ortara mutu neitamaipu Kanaan tara mutu tuda, sun doropmaruma utopu, amutupu talepra kunkamenge.” Musadi pepu.

31 Musadi upepupa, sun Gat yala neng cap, Ruben yala neng capdi tamupra pepi. “Gume nun naio, nunda kan amutarapu kupedi, kan pelpu melipra donup neng cadi, ware keca do yumada, Allah Yahweh erdi, ‘Ukuprume,’ pepra deipseretopu, angepu gekepra kunkamepe. 32 Atep, Allah Yahwehdi dinmaserya di melipserepa, Yordan me goupra, ortara Kanaan mutu bepedi, ortara kunge nesala tep mar porbenkamepe. Dinino, nun tenepmapada, Yordan me atara keteng yakan tara mutuda, nun mutu sisa kepmepedi talepra acapu pio akunkamepe,” pepi.

33 Upepya tep, Musadi amutu tu yumada, Sun Gad yala neng cap, Ruben yala neng cap, tonda Yusupdi deiamu ngebo Manasye, er yala neng dinin, neitamai di bokra kurami neng cap tep, yambula di amutu tu ton bokra karepu. Akarepu mutu tu yumada, ake. Ada, Amori yala neng, sun ila deiyo ngebo Raja Sihondi taleamu mutu cap, tonda Basan mutu ila nimi deiyo ngebo Raja Ogdi taleamu mutu cap, bokra karepu. Ada, amutu tu yuma cap, amutu neitamai dorami ila ati arum doramyai yuma cap, akati arum dana-dana tara kwamu mutu tu capda, Musadi doropra karepupa, sun Gad yala neng cap, Ruben yala neng cap, Manasye, er yala neng dinin, neitamai di bokra kurami neng cap, sundi dopropi.

34 Amutu tu yuma konum karepu pangeda, sun Gad yala nengdi tamupra dorami mutu ati arumda ake. Ada, Dibon mutu cap, Ataror mutu cap, Aroer mutu cap, tonda, 35 Atarot-Sofan mutu cap, Yaezer mutu cap, Yokbeha mutu cap, 36 Bet-Nimra mutu cap, tonda Bet-Haran mutu capda, sun anengdi bena ila ati arum dorami. Adopi ati arum yumada, pio tep sun ati sisa kepra kuna tep, amutu buteneda, lyom gel beilya wipdongopidi, ongopgenepra deipi. Tonda, sun talepra pein keca sun domba kunai tep nengeda, gel beilya ton wipdongopidi, ketenepra deipi. 37 Ange utopu ton, Ruben yala nengdi, amutu neitamai ila ati arum doramidi kurami mutu ati arumda ake. Hesybon mutu cap, Eleale mutu cap, tonda Kiryataim mutu cap, 38 Nebo mutu cap, Bahal-Meon mutu cap, tonda Sebam mutu cap yumada, sun Ruben yala nengdi ati arum dorami. Ati arum dorami mutuda men di si perami ngeda, asi tapidi yuk si ton, si pepi.

39 Ataru neitamai di, Manasyedi deiamu ngebo, er si Mahir, sun ayala nengdi Gilead mutu beidi, bena amutu kurami nesala tep popbisipi. Bena popbisipi dingeda, sun Amori yala neng, amutu kurami neng yuma enepra donokidi, amutu tu yuma bena dopropi. 40 Ukupya tep, Musadi Gilead mutuda, Manasye erdi deiamu ngebo Mahir tep, amutu tu karepu. Ukupra karepupa, Mahir yala neng, sundi Gilead mutu yumada talepra kurami. 41 Tonda Manasye yala ngebodi deiamu ngebo ton, er si Yair, erdi amutu neitamai kurami nesaladi dorami yambul ati arum dopra kurami mutu neng yumada, sun damai bena popra sirya dakudi, amutu yumada, er bena doropu. Ukupudi, “Amutu sida, Yair mutu,” pepra, si sipepu. 42 Tonda tenpu ngebo er si Nobadi, Kenat mutu ati arum dopra kurami mutu bena, amutu nesala popra gawal dakudi, amutu tu yumada dopropu. Doropudi, amutu neitamai tep nengeda, “Amutuda, er si Noba mutu,” pepra si pepu. Ada, er pe si atem tepapu amutu sida dopu.