Numbers 33

Israel nesala Mesir mutu di bisi baramyanen, Moab mutu bei upu

1Uda Israel nesala Mesir mutu kuramyanen taprapidi, bisi barami taruda, sun Israel yala nesala yuk-yuk akuramitopu yuk-yuk mutu weik embarami taru peda, agung-agung yuk-yuk dukdongopra bisi barami. Abarami taruda, Musa cap, Harun cap, sundi gonga kepreipa baramidi, amutu-amutu mapmananen kepbarami. 2Allah Yahwehdi Musa tep, “Ukupkurume, sun embankamrum mutu-mutu yumada sekra deipkurume,” peiputopu, sun Israel nesala bisi neitamai mapbarami mutu si yumada, Musadi yuk-yuk sekeipu. Atep, amutu-amutu embana tep, gonga kepra embaramyai mutu sida ake. 3Sun Israel nesala Mesir mutu kuaramyanen, tapra yai taruda, Kaplemna Kailya kalepra mapmaiya, ton tumi ada, ware tenpunge kepka deiki, tanggal 15 tumi neitamai di Mesir mutu tapra bei. Ataruda, Allah er ila puto deiki di kalekra melipupa, Mesir mutu nesala dinmayai dipapu, Israel nesalada, ila ati arum sida Rameses mutu kurami dinin, amutu taprapidi, tali lupra bei. 4Israel nesala Mesir mutu tapra kwerepkoteya bisi bei taruda, Mesir mutu yala nesala menmena deiami sal nyapu yumada, Allahdi sun wenemna tep popmaupa, anyapu yuma tupa peinmai tumipu, Israel nesala bei. Ange kupkada, Allah Yahwehdi, ‘Ange kupnepa, ne ila puto, sun yuma kael kepkameng’ tenen, kupu. Adeiki di, sun Mesir mutu nesala sun si eremami keca, tali keca dinin, sundi, ‘Nun nai yapu,’ tenen, allah-allah yuma si eremami keca yuma tep nengeda, Allahdi ikin keca weik, menenga tep karepu. Ada, Mesir mutu nesaladi, ‘Uo, er Allah Yahwehda, tek sisi ila puto ngebo kurure’ tenen, kael kemna tep kupu.

5Ange yuma konum kupu pangeda, Israel nesala Rameses mutu tapra beidi, Sukot mutu bena, tenda opkal bol di keana dodin ati bena deipidi mapi. 6Mapmai pangeda, sun yumada ka di Sukot mutu tapidi, Etam mutu bena, sun tenda opkal bol dodina ati ton cap dabena deipi. Etam mutuda, nimi pio gumai, ila katawai mutu damai kwamu. 7Etam mutu di taprapidi, tamupra Bahal-Sefon mutu atara dinin, keteng yakana tara ton, mutu si Pi-Hahirot mutu perami mutupu, amutu tamupra yai. Yaidi Mikdol mutu damai di, tenda opkal bol dodina ati yana deipi. 8Pi-Hahirot mutu apu dakunmaianen, amutu tapidi, Allah melipka deiki di, ila laut mokon, er sida Teberau Laut mokon gouprapidi, ortara nimi pio gumai katawai mutu tara, Etam mutupu yana weki. Ukupidi, ue weneri tumi deiki di bisipu banmaiyanen, Mara mutu beidi, sun tenda opkal bol dodina atida, amutu neitamaipu bena deipi. 9Mara mutu bena kunmaiyanen, amutu ton taprapidi, sun tenda opkal bol dodina atida, Elim mutu bena ati deipi. Amutuda, ila katawai mutu neitamai dinin, amutuda me bungnada 12 kwamnga cadi, tonda Korma co tujuh puluh (70) ton amutu tekamo.

10Kange di Elim mutu tapidi, sun atida ila laut mokon er si Teberau laut mokon pirmanaipu sun tenda opkal bol dodina ati bena deipi. 11Ila Laut mokon pirmanai bena tenda ati deipi dinin, kange di sun ati uruprapidi katawai mutuda mutu si Sin mutu bena sun tenda opkal bol dodina ati deipi. 12Ange utopu, acei di taprapidi, Dofka mutu damai bena, sun tenda opkal bol dodina ati deipi. 13Adininda, Dofka mutu tapidi, sun tenda atida, Alus mutupu bena, sun tenda opkal bol dodina ati deipi.

14Sun yuma Alus mutu di tapra, kange di mutu si ton Rafidim mutu bena sun tenda opkal bol dodina ati deipi. Dinino, Rafidim mutu neitamaida, nimi jepmanto me ton pio men kwamu. 15Ukuamnga cadi, sun adipapu Rafidim mutu tapi di, sun tenda atida katawai mutu dinin, mutu sida, Sinai mutu bena, sun tenda opkal bol dodina ati deipi. 16Ange utopu, sun yumada, Sinai mutu di tapidi, sun atida Kibrot-Taawa mutu bena, sun tenda opkal bol dodina ati deipi. 17Kibrot-Taawa mutu di tapra beidi, sun tenda atida, Hazerot mutu bena deipi. 18Azerot mutu ka taprapidi, acei di gopra, mutu si Ritma mutu bena, sun tenda opkal bol dodina ati deipi. 19Sun yumada, Ritma mutu di tapra bei dingeda, sun tenda atida, Rimon-Peros mutu bena, sun tenda opkal bol dodina ati deipi.

20Autopu, Rimon-Peros mutu peda, taprapi dingeda, mutu sida, Libna mutu bena, sun tenda opkal bol dodina ati deipi. 21Sun adipapu Libna mutu di tapidi, Risa mutu bena, sun tenda ati deipi. 22Utopu, Risa mutuda tapidi, banmaiyanen, Kehelata mutu bena, sun tenda opkal bol dodina ati deipi. 23Ange utopu, Kehelata mutu tapidi, Har-Syafer mutu bena, sun tenda opkal bol dodina ati deipi. 24Ka di Har-Syafer mutu tapra beidi, sun tenda atida, Harada mutu bena ati deipi. 25Harada, mutu tapra beidi, sun tenda atida, Makelot mutu damai bena deipi.

26Sun yumada, Makelot mutu tapi dingeda, amutu di goupra, Tahat mutu bena sun tenda opkal bol dodina ati deipi. 27Tahat mutu aca di tapra, Tara mutupu bena, sun tenda opkal bol dodina ati deipi. 28Tara mutu tapidi, sun yuma adipapu, Mitka mutu bena sun tenda ati deipi. 29Utopu, Mitka mutu taprapidi, Hasmona mutu bena sun tenda opkal bol dodina ati deipi. 30Hasmona mutuda, utopu tapidi, sun tenda atida, Moserot mutu bena deipi. 31Sun yumada, Moserot mutu tapra bei dingeda, Bene-Yaakan mutu bena, sun tenda opkal bol dodina ati deipi.

32Sun yuma kange di Bene-Yaakan mutu tapidi, sun tenda atida, Hor-Gibgad mutu bena tenda ati deipi. 33Ange utopu anesalada, Hor-Gidgad mutu tapidi, Yotbata mutu bena, sun tenda opkal bol dodina ati deipi. 34Yotbata mutu tapra beidi, banmaiyanen, Abrona mutu bena, sun tenda opkal bol dodina ati deipi. 35Adrona mutu dopra kunmaiyanen, kange di tapra beidi, sun tenda atida, Ezion-Geber mutu bena deipi. 36Sun yumada, Ezion-Geber mutu di tapidi, nimi pio gumai, Sin mutu katawai ada, Kades mutupu bena, sun tenda opkal bol dodina ati deipi. 37Sun yumada, Kades mutupu kunmaiyanen, acei di tapra, Hor mutu tara bei. Hor mutuda, Edom yala neng cap, sun tu wilimdonai bena, sun tenda opkal bol dodina ati deipi.

38Akunmai taruda, imam Harun tep, Allah Yahwehdi, “Hor mutu welepkurume,” peipupa, amutu welepu. Welepudi Harunda, amutu deikipu bena depu. Abena depu taruda, sun Israel nesalada Mesir mutu kuramyanen, tapra yanami keteng tamun 40 tahun kepupa, yanamitopu aketeng tamun utopu kepu ada, pamu war deiki, tanggal satu deiki di depu. Harun er gam kuramu keteng tamunda, seratus dua puluh tiga (123) tahun kepu pangeda, adipapu Hor mutu deikipu bena depu. 39Imam Harunda, er kupyakaramu keteng tamun yumada, denge pio weik, seratus dua puluh tiga (123) kupu pangeda, adipapu Hor mutu apu depu. 40Kanaan mutu dinin, iknapi dam tara, (arah selatan) ada, Negeb tara neitamai dinin, Arad mutu tep nimi deiyo kepra taleamu ngebo, erdi gekenmaupa, “Kan talepmum mutu tarada, sun Israel nesala yakanmange,” pepipa gekepu. 41Ataruda, sun Israel nesalada, Hor mutu di tapra, sun tenda atida, Salmona mutu bena deiprapidi, acapu kunmai.

42Sun tenda atida, Salmona mutu di taprapidi, Punon mutu bena, sun tenda opkal bol dodina ati deipi. 43Utopu, Punon mutu di tapra, sun atida, Obot mutupu bena, sun tenda opkal bol dodina ati deipi. 44Obot mutu akunmaiyanen, tapra Abarim ada, Moab mutu tara bena, sun tenda opkal bol dodina ati deipi. 45Sun yuma amutu di tapra, ati walang yo kuamu mutu, Dibon-Gad mutupu bena, sun tenda opkal bol dodina ati deipi. 46Dibon-Gad mutu bena, tenda ati deipra kunmaiyanen, amutu tapra Almon-Diblataim mutu bena, sun tenda ati deipi.

47Israel nesalada, Almon-Diblataim mutu di tapra, adinin Nebo mutu damai dinin, Abarim mutu damai bena, sun tenda opkal bol dodina ati deipi. 48Abarim mutu di tapra, Moab tara Yordan me pirman ada, Yeriko mutu damai bena, sun tenda opkal bol dodina ati deipi. 49Israel nesala sun tenda atida, Yordan me pirmanaipu dinin, mutu si ton Bet-Yesimot mutu di dipdongopra, Abel-Sitim mutu bena sun tenda opkal bol dodina ati deipi. Ada Moab mutu ban tara bena sun tenda opkal bol dodina ati deipi.

Israel nesala Yordan me goupra, ortara Kanaan mutu kapul men bei taru di, “Ange-ange yumada kunkamrume,” pepra, deipu upu

50Moab mutu tara, Yordan me pirmanaipu dinin, Yeriko mutu damai kunmai taruda, Allah Yahwehdi Musa tep, aupu yuma pepra deipu. 51“Apepra deipken upu yumada, kandi sun Israel nesala gekenai bena pepkurume. Ukupmantoda, sun Yordan me goupra, ortara Kanaan mutu bemum taruda, 52Sun Kanaan mutu bemumnyopda, sun amutu talepra kunge nesala yumada, adipapu enepronkamrume. Tonda, amutu kungedi, isok si eremenge nesala yumada, popra gum kupra deipkamrume. Sundi si eremenge kecada, gel cap, gat keca yuma cap deiki, nimidi petupra deipmengedi, ‘Nun nai bo aca’ tenen, si eremenge keca cap, tonda mutu gon deiki ati dopra, isok si eremna tep, gam keca popmengedi, dopra uku dongorbanungai capda, adipapu dakra uruptapmumdi, ange yumada, ukupu dongopra gawal dakamrume.

53Amutu tu yumada, nedi sun tep konum karepsisa cadi, sun adipapu amutu bena wekmumnyopda, amutupu talepra kunkamrume. Ada, nedi sun tep karepsisi mutu kurure. 54Tonda, sundi amutu bememudi sun Israel nesala yala yuk-yuk akurumya utopu kupra, ‘Ange kupkup do, ange do?’ tenen, kael kemna deiyo peten keca er si undi, pel dopmumpa, ayala nesala sun si katuai kupyopda, atu bokmumdi, talepra pio tep kunkamenge. Ada, ton yalada, nimi pio weik kuramenge nesalada, sun tep tu weik tara bokra karepkurume. Tonda nimi weik men kuramenge yalada, tu yambula dipapu bokra karepkurume. Ange dorona tep nengeda, kurpeten keca undi deiki dipapu pel dopmumdi, ayala ton, ayala ton sun si katuai kupyopda, adeiki di bokra karepmumpa, amutu tupu doronkamenge. Tonda, sun nai yapu, sun yala deiyo-deiyo neng akuramitopu, sun ataru kurum nesala peda, aneng sun si deiki doronkamrume. 55Dinino, sun men di amutu talepra kurami nesala, sundi mar porbemumdi, poptapra bisbisakapra men eneprorumnyopda, sun amutu kunung nesala yumadi, sun tep tamupra ikin keca deipsengepa, kange mun kunkamsere. Ukupmantoda, me wenenga di asuru wekseredi, pu jeserepa kange mun kuramser utopu, kudinkamsenge. Tonda, takke keca di yantang neitamai wekseredi, pu jeramser utopu kudinkamsenge. Utopu tonda, dortaruda sun anengdi tamupra mar peipkamsenge. 56Sundi amutu nesala men enepra donokmumnyopda, nedi sun amutu kunung nesala yuma tep, “Ukupra ikin keca karepkamsene,’ tenepsi ngeda, tamupra sun damaipu kupkamsene. Allahdi sun Israel nesala yuma tep pepu.