Numbers 35

Lewi yala neng talepra kunkami mutu tep, pepu upu

1Moab mutu ban tara dinin, Yordan me pirmanai Yerikho mutu damai kunmai taruda, Allah Yahwehdi Musa tep pepu.

2Apeipkun upuda kandi, sun Israel nesala yuma gekenai tep, lap pepkurume. Ada, amenda taru sun Israel nesala yala-yala yuma, mutu tu dopropmengedi talepra kunkameng mutu neitamai di, tu ton bokra sun Lewi yala neng tep karepkamenge. Ada, ware kuprap mutu do yumada, aneitamai di, sundi ila ati arum dopkamrumnge kareprumupa, sun Lewi yala nengdi akati-akati dopra dakunkamenge. Tonda akati arum dana-dana tara damai dinin, bura tara mutmuta pio weik kunkamre mutu cap, sun yuk Israel yala nesala yala-yala yumadi, sun Lewi yala neng tep, tu ton bokra karepkamrume. Sun Lewi yala nengda, sun kan-kanpu kunkamenge. 3Amutu neitamai di sun Lewi yala neng tep, ati arum cap, mutmutai cap bokra karepmum pangeda, sunda amutupu talepra kunkamenge. Sundi dopkamrum ati arumda, sun Lewi yala neng tep karepmump, acapu kunkamenge. Tonda, amutu neitamai kupkamre mutmuta damaida, sun Lewi yala nesaladi peinkameng keca yala-yala yuma peinkamenge.

4Lewi yala nesala sun bisam peina tep atara-atara kapu mutu neitamai di sun tep bokra karepkamrum tuaida, ila ati arum ongopgenepra wipkamrum lyom gel beilya di dipra, ortara mutu go weik, kunumpetepra nukmumdi, 450 meter kepyaipu karepkamrume. Ada, aneitamaida mutmuta pio weik kamyaipu karepmumpa, sun Lewi yala nengdi peinkameng kecada acapu deipdongopra peinkamenge. 5Ange utopu, sun Lewi yala neng karena tep, ila ati arum dopkamrumai dinin, akati-akati dana-dana tara yuma, ongopgenepra wipkamrum lyom gel beilya di dipra, ortara mutu go weik, kunupetepra nukmumdi, 900 meter ton kepkamre. Ada keteng yakan tara cap, keteng dangban tara cap, iknapi arah utara cap, dapu tara arah selatan cap yumada, utopu kunumpetepra nukmumdi, 900 meter kupyopda, atu ton sun Lewi neng tep bokra karepkamrume. Tonda ukupre pangeda, sun Lewi yala nengda, amutu dana-dana kapya neitamai nukpetepra deipkamrum tuda, sun gam keca, sapi do, domba bisam do, kambing bisam do, akeca yuma acapu peinkamenge.

6Sun Israel nesaladi, ila ati arum ngantan bari (6) kota ton dopra keteneiprumudi, sun Lewi yala neng tep bokra karepkurume. Akarepkamrum ati arum ngantan barida, nimi men popmantoai kupkamre. Ange deiyoda ake. Ada, ware Israel nengdi do yuma, sun mankau di yuk neng tep popmengopda, ‘Sun apopmape neng, sun tara nengdi yana, tamupra nun ton popsenung’ tenen, akati arum neitamai sepdaro yanopda, yuk tara nengdi aca yana men popkamenge. Ada, akati arum ngantan bari neitamai bengeya deiki di, teleppu kunkamenge. Yuk tara nengdi, amutu wekra men poptenge. Atep, nimidi yuk neng mangkau di popmange nengda, sun telep kupra kuna tep mutu ketenepra dopmumnyopda, sun Lewi yala neng tep karepkamrume. Tonda, angepu gum dinin, sun Lewi yala neng tepapu, yuk ati arum ton, 42 kota ton ketenepra dopmum dingeda, karepkamrume. Sun Lewi yala neng cap, sun nyapsilip cap, akati-akati arum neitamaipu talepra kunkamenge. 7Sun Lewi yala neng tep karepkamrum ati arumda, empat puluh delapan (48) kota karepkamrume. Tonda, amutu yuma damaida, mutmuta kwamre mutu ton tapakra karepkamrume. Amutuda, sun Lewi yala nengdi talepra kunkamenge.

8Uda, sun Israel nesala yala-yala yuma, sundi talepra kunkamrum mutu neitamaida, ton ati arum doamrumnge wilipra, sun Lewi yala nesala tep bokra karepkamrume. Ukupkamrum taruda, Israel nesala kankan dinin, nimi pio weik kurum yalada, ati arum doamrumnge weik ton bokra Lewi yala neng tep karepkamrume. Ange utopu, Israel nesala kankan dinin, nimi metekanunpu kurum yalada, ati arum doamrumnge metekanunpu bokra Lewi yala neng tep karepkamrume. Ada, nimi weik do, metek do, akuruma utopu, tu cap, ati arum cap bokra karepkurume. Sun Israel yala yuma, mutu tu cap, ati arum cap dopropkamruma utopu kupra, sun Lewi yala neng tep bokra karepkamrume.

Ton nengdi, mankau di nimi popmenge nengda, yukai bena, teleppu kunkamnung mutu tep, pepu upu

9Allah Yahwehdi Musa tep pepu.

10Kandi Israel nesala tep aupu pepkurume. ‘Ada, sun yuma Yordan me goupra ortara keteng yakan tara di, Kaanan mutu tara bena kunkamrum taruda, ukupkamrume. 11Amutu neitamai bemumnyopda, Kanaan tara nesaladi doami ila ati arum ton dipeteprumudi, ange kankan neitamai di ton ati arum wepra deipkamrume. Deiyoda, ake. Ton nengdi, adipapu mankau dipapu, yuk neng ton popmange nengda, ‘Apopmap ngebo, er tara nengdi poryasenung’ tenen, sun teleppu kunkamtenge mutupu, ketenepra deipkurume. Ukupmumpa, mankau di nimi popmenge nengda, sundi wepra deipkamrum ati arum, amutu neitamaipu bena, telep kuprappu kunkamenge. Amutu neitamaida, yuk tara nengdi, nimi popmenge neng sun wenemna tep, men yana poptenge. Amutu neitamaida, nimi kwangdana ponada, pio meme. 12Aketenepra deipkamrum mutuda, mankaudi nimi popmange neng, amutu bena kungopda, popmangepa depmare ngebo, er tara nengdi, ‘Angebo kwadakra popkupe,’ tenepmenga peda, amutu neitamai bena kure pangeda, men popkamenge. Ada meme. Atep, akati arum neitamai di, angeboda teleppu kunkamre. Amenda taruda, animi popmai ngeda, ‘Ware deiyo tep kunmankap popmai do?’ tenen, upu lepsisingna deiyo nengdi aupu ton lepsisikamenge. Adeiyo nengdi, Israel nesala yuma sun gekenai di, aupu kapul men lepsisikmange taruda, animi popmenge nengda, wenemna gume.

13Ukupra telep kudinkamenga tep ati arumda, sun Israel nesaladi, sun Kanaan tara nesaladi doami ati arumda, dopra kunkamrum dinin, akati-akati kankan di, Lewi yala neng karena tep, ngangtan bari (6) mutupu wepra ketenepra deipkurume. 14Aketenepra deipkamrum ati arumda, Yodan me goupra keteng yakan tara ortara weneri kota ketenepkamrume. Tonda ange utopu, Kanaan tara ton utopu, Yordan me goupra orketengban ban tarada, ati arum weneri kota ton wepra keteneipkurume.

15Dipeteprumudi, akati arum yuma neitamai di, ngangtan bari ati arumda, wepra deipkurume. Ada, sun Israel nesala, mankaudi yuk neng popmenge neng bena kunkamenga tep mutu kapkamre. Ada, sun pe Israel neng sisa pe, nimi bo neng sun kankan kunkameng neng pe. Aneitamai di ware ngebo mankau di nimi popyopda, adipapu amutu neitamaipu wengbere pangeda, yuk tara neng yumadi, er tep ikin keca men karenkamenge. Er tep men popkamenge. Tonda, akati-akati arum peda, yuk karen mutu di yakankameng nimi bo neng do, tonda, sun Israel yala nesala cap kikiman kunkameng neng dinin, yuk yala neng do, mangkau di nimi popmengedi, kware kupredi, ‘Atara nengdi popsenung’ tenepmengopda, akati-akati arum wepra deipkamrumaipu, akati neitamaipu bena wekmengopda, teleppu kunkamtenge.

16– 17– 18Dinino, sun yumadi moupra tenenkamrume. Ukupmantoda, tenpu ngebodi besi keca di do, gat co di do, jen di do, ila gel di do, ato keca dopra er kabo poprepa depyopda, er autopu konum kupmare ngebo tep nengeda, ‘Erda nimi pon ngebo kurure,’ tenenkamrume. Deiyoda, er mankau di pona gum dinin, yu kupupa, er tenena deiki di yuk ngebo poptapka tepa. Atep nengeda, erda tek sisi ila mali kuna ngebo cadi, er menenga tep, sun adipapu tamupra wenepra popmumpa denkamrure. 19Popmarepa depmare ngebo, er tamna nengdi tamupra angeboda wenepra popmengepa adipapu denapu kunkamrure. Ada ukupmanto, er animi pon ngebo, er poptapmau ngebo, er tara nengdi, animi pona deiyo ngebo konum epmengopda, adipapu popmengepa depkamre.

20Ange utopu dinin, ukupmanto ton. Tenpu ngebodi yuk ngebo tep, ‘Ne songe,’ tenepredi tulum kuprepa, angebo talepra tema di poprepa depyopda, ada ‘Tek sisi nimi ponange,’ tenenkamrume. Angetopu, tenpu ngebodi yuk ngebo tep, ‘Erda popkun,’ tenen, inipredi, ware yala keca di do, ikin keca dopra dokoteprepa, angebo er nong bol deiki poprepa depyopda, ‘Angeda tek sisi nimi ponange,’ tenenkamrume. 21Ukupmantonge ton, tenpu ngebo er buru di getepredi, yuk ngebo poprepa depyopda, er buru di nimi popmare ngeboda, ‘Erda mali weik kupmar deiki, nimi pon ngebo kurure,’ tenenkamrume. Ange tep nengeda, angeboda adipapu wenepra popmumpa depkamre. Tonda, popmarepa depmare ngebo, er tamna nengdi tamupra angebo epmengopda, er menenga tep, sundi er wenepra popmengepa depkamre.

22Ange utopunge gum dinino, tenpu ngebo er yu tenena gum dipapu, mangkau di yuk ngebo tep tema di popyopda, tonda, inipmaryai di gum, tonda, ‘Angebo popkun’ tenena gum dipapu, ikin keca mankau di dokoteprepa, ton ngebo er nong bol deiki poprepa depyopda, ‘Angeboda nimi pona ngebo,’ men tenenkamrume. Deiyoda, mangkau di popmara tep pepsene. 23Ange utopu, tenpu ngebo er mankau di ikin gel dopredi, yuk neng ena gum dipapu, agel dopdenkap, er yu tenena gum ngebo poprepa depyopda, er tep nengeda, ‘Erda nimi pona ngebo,’ men tenenkamrume. Deiyoda, angebodi, ‘Angebo ne songe, erda popkune’ tenen, men tenepmaredi mankau di er yu tenena gum ngebo poprepa depkamra cadi, angebo tep nengeda, ‘Erda nimi pona ngebo,’ men tenenkamrume.

24Akunkamruma neitamai di, arup pepmasen keca, autopunge ton kupmumnyopda, sun akuramum Israel nesala yuma bulupra wekmum dingeda, ‘Nimi popmange ngeda, upu lepsisikra kupkamep’ tenen, upu talenkamrume. Nimi popmarepa depmare ngebo cap, nimi popmare deiyo ngebo cap, sun tara nesala yuma capdi, upu talepra ‘Ware kupkamep do?’ pepra, upu moupra talenkamnunge. 25Sun yuma bulupra yana wekmumdi upu talepra, mankau di nimi popmarepa depmare ngebo tep nengeda, ‘Depmare ngebo tamna nengdi ikin keca er deiki men derinkamenge,’ pepra lyepmengedi, angebo telepaipu deipkamnunge. Ada nimi men popmantoai, telep ati arum wepra deipkamruma neitama di angebo dopra deipmumpa, acapu kunkamrure. Angebo amutu beryopda, damutupu bena kuramrepanen, ataru imam ila deiyo keamre ngebo konum depyopda, angebo tamupra er pe mutupu yana kunkamrure.

26– 27Dinino, er angeboda adipapu doupra nimi men popmanto ati arum deipmumpa, dakuramreyanen, amenda taruda, er kange dipapu, akati tapra yukai berepa, er poprepa deamre ngebo, er tara nengdi, apona deiyo ngebo epmengedi, angebo kwangdana tep popmengepa depyopda, apopmenge neng tep, ‘Sunda ila mali keca kupmanga cadi, nimi pona neng kununge,’ men penkamrume. 28Deiyoda, mankau di nimi popmange nengda ‘Teleppu kunkamenge’ tenen, ‘Nimi men popmanto ati arum bena pio dakunkamenge. Dakuramengepanen, imam ila deiyo ngebo konum depyopda, animi popu ngeboda, er pe mutu tamupra benkamre’ tenen, keteneiamenge mutupu doupra derirbankamnunge. Atep, imam ila deiyo ngebo tek sisi konum depyopda, amankau di nimi popu ngeboda, er pe mutu tamupra bena kunkamre.

29Ange yumada, pio tep ukupra-ukupra kunkamrume. Dan mutu do yuma, sun kunkamrum mutu neitamai yumada, sun cap, sundi deipmumpa dadeipdanen bankameng nesala yuma capda, sun kunkameng mutu yuma cap, kunkamengai yuma capda, aupu utopupu talepra kunkamnunge. 30Nimi yuma kunkamenga neitamai di, ton ngebodi ton ngebo tep podana tep nengeda, tenpu ngebodi yu kuprepa, ‘Angebo popkun,’ tenepredi tek sisi popyopda, erdi nimi poptapunge, yuk nengdi epmengedi, sun pe upu deiki di, ‘Nun ton dinmape. Angeboda tek sisi mali weik kupmaudi, yuk ngebo popmaua cadi, erda nimi pona ngebo kurure,’ pepra, lap pepmengopda, sundi, ‘Angeda tek sisi kupmaue,’ tenepmumdi nimi popmare ngebo tep wenepra poptapkamrume. Dinino, ange peda utopu dinin, butene nengdi gum, tenpu ngebo dipapu, ‘Ne asuru di epmanupa, angebodi yuk ngebo popmaue,’ peptua peda, sundi, ‘Akonuma, angebodi nimi popmaua cadi, dawenepra poptapkupe,’ pio men tenenkamrume. Tenpu ngebo dipapu, ‘Ne ton epmanue,’ peptua peda, angebo men wenepra popkamrume. Butene do, weneri do, nimi weik ton, ‘Nun yumadi konum epmapa cadi, konuma,’ peptengopda, sun upu lepsisikra deiyo nengdi, ‘Tek sisi angeboda nimi pona ngebo kurure,’ tenenkamrume.

31Upu moupra taleprumudi, tek sisi tenpu ngebodi nimi tenpu ton poptapyopda, apopre ngebo tep adipapu wenepra ponkamrume. Yuk ton gume. Yuk nengdi, ‘Gume, nun kap pona gume. Er yo pununa tep, kunumna weik keca co bo weik karepmepepa, sundi er loptaptumpa, bendoptue,’ pepra, moropmenga peda, angeda gekena pio gume. Ange gum dinin, amali kupmaredi, nimi popmare ngebo tep, adipapu wenepra popmumpa depkamre. 32Ange utopu ton, ukupmantoda, nimi tenpu ngebo ton, beredi er kabo mankau di popredi, Kanaan mutu neitamai nimi men popmantoai beredi, dakuramreyanen, amenda taruda, angebodi, “Bul co bo ton karepsetenepa, ne pe mutu tamupra betene,” pepra moroptua peda, aupuda gekena pio gume. Deiyo ada, angebo nimi pomu taru, kuramu imam deiyo ngebo kapul men depmare taruda, nimi pona ngebodi, er pe mutu tamupra pio men benkamre. Dinin, erdi nimi pomu taru kuramu imam deiyo ngebo konum depyopda, nimi pona deiyo ngeboda, Kanaan mutu tapra, Israel tara neitamai tamupra yana kuna telepe.

33Sunda apepmasentopu, angepu kupmumnyopda, sun kunkamrum mutu tu neitamaida, mali men kupra derinkamrume. Tonda, nimi pona deiki di, sun mutu mali kupra derinkamrume. Atep, sun mutu neitamai di, nimi popmengepa, yapi embaryopda, sun mutu tu pio mali derinkamrume. Ukupmumnyopda, amutu kange di telep kupra derina tep nengeda, sundi tek sisi nimi popmare ngeboda, er peda adipapu wenepra ponkamrume. Gum dingeda, sun mutu tu tamupra telep men kuptue. 34Sun kunkamrum mutu neitamai yumada, mali kuna deiki di, sun mutu tu mali men derinkamrume. Deiyoda, ne Allah Yahweh, ne peda amutu neitamai kunkamna cadi, sundi amutu tu ton, mali men kupra derinkamrume. Ada, neda Allah Yahweh kunune. Tonda neda sun Israel nesala kumumnya neitamaida, ne ton akunune. Allah Yahwehdi sun Israel nesala tep pepu.