Num 36 | XteSC | STEP | Gilead yala ngebodi deipupa, dadeidanen barami neng, sun ayala neng tep deiyo kepra taleami neng kurami. Sun anengda, Israel nesala sun apubo er si Yusufdi deiamu mi, er si Manasye dinin, erdi deiamu mi, er sida, Makirdi deiamu yala neng tep nengeda, Gilead yala neng perami. Uda aneng kankan dinin, sun si Gilead yala neng, sun deiyo talepra kurami neng yumada, buluprapidi Musa damai bena upu pepi. Tonda, Musa cap kikiman awekmai nengda, Israel yala nesala, sun deiyo kepra taleami neng yuma ton, aceipu tekmaidi weka aupu gekenmai.

Numbers 36

Nimi dopmenge nerapudi, sun nai yapu taleamenge keca dorona tep, pepu upu

1 Gilead yala ngebodi deipupa, dadeidanen barami neng, sun ayala neng tep deiyo kepra taleami neng kurami. Sun anengda, Israel nesala sun apubo er si Yusufdi deiamu mi, er si Manasye dinin, erdi deiamu mi, er sida, Makirdi deiamu yala neng tep nengeda, Gilead yala neng perami. Uda aneng kankan dinin, sun si Gilead yala neng, sun deiyo talepra kurami neng yumada, buluprapidi Musa damai bena upu pepi. Tonda, Musa cap kikiman awekmai nengda, Israel yala nesala, sun deiyo kepra taleami neng yuma ton, aceipu tekmaidi weka aupu gekenmai. 2 Sun anengdi, Musa tep pepi. “Allah er si Yahwehdi, nun deiyo ngebo Musa kan tep, ‘Israel yala nesala yuk-yuk kuramengtopu, sun kunkameng mutu tu yuk-yuk bokra karenkamrume. Amutu tu bokrapmemdi, deipkumem dingeda, ‘Allahdi nun kunkamep keca lap pepsetue’ tenen, mambul upu kael kemna tep, peten kemna deiyo keca, er si undi deiki di dopra, pel dopmemdi, ange epmemnyopda, atu bokra deipkamrume,’ pepra peiamkeu. Utopu tonda, Allahdi nun kabo Zelafehad, erdi deiamu ner nyapuda, sun kunkameng tu ton, yuk bokra karepkamrume, Allah Yahwehdi ukupra peiamkeutopu, ‘Ukupkusere’ tenen, moropkepe,” pepra bena lap pepi.

3 Dinino, kan moupra tenepkamremnge tep, ukupmantoda, Zelafehaddi deiamu ner nyapudi, nun Israel nengpu dinin, yuk yala nengdi deipi neng dopmengopda, tek sisi sun anerapu sun tuda, anerapu dopkameng nengpu atu dopropkamenge. Ange tep nengeda, tu konum bokra karepsemempa, anerapu dopkameng nengdi konum dopropmengopda, nun apu yapudi taleami tuda, yuk yala nengdi dana tara ton wilipra dopropmenga deiki di, nun yala nengdi taleami tuda yambul kupkamsere. 4 Yuk ikin kusere ngeda ake. Ada, nundi keana tep talepra kunup keca yuma tamupra karena keteng tamun er si Yobel tahun, ange konum kupre pangeda, nun yala nengdi gum dinin, anerapu dopmenge neng, sun yuk yala nengdi, nun tara neng taleami tu konum dopropkamenge. Ada, nun tara neng taleami tu dinin, aketeng tamun Yubel konum kupya tep, Zelafehaddi deiamu ner nyapudi dopropkameng tuda, anerapu sun dopmenge neng, yuk yala neng dipapu atu dopropkamsenge. Ukupsenga deiki di, nun yala neng tuda, yambul kepbankamsere,” pepra, sun Gilead yala deiyo nengdi, Musa tep pepi.

5 Upepi pangeda, Musadi Israel nesala gekenai aupu pepu. “Yusufdi deipupa, dadeipdanen yakange nengdi, ayan pepmeng upuda, tek sisi tu bongna tep, Allah Yahwehdi, “Tu bongna tep, ukunkamrume,” pepra deiamutopu, sun anengdi tek sisi yana pepmasenge. 6 Allah Yahwehdi, upeiamnga tep nengeda, Zelafehad erdi deipu ner nyapu yumada, sun pe apu bo, er tamna nesala kankan neitamai dipapu dinin, sun anerapudi, ‘Ayala nengdi deiami nengda, tali lupra dopkup,’ tenepmenge nengda, tali donkamnunge. Angeda telepe pua. 7 Dinino, ila mambul ngeda, ake. Tu bokra dorona tep nengeda, Israel nesala yala yuk-yuk bokra, sun co puna nengdi taleamenge ngeda, sun pe ayala nengpu pio talenkamnunge. Tonda, sun taleamenge tuda bokra, yuk yala neng ton dorona tep, karena gume. Israel nesala yala-yala yumada, sun co puna nengdi taleami tu, ayala neng dipapu pio tep talenkamnunge.

8 Ange tep nengeda, Israel mutu neitamai kunge nesaladi, derinkameng nerapu yumada, adipapu sun pe deipgerekropa tara nengpu donkamnunge. Adeiki di, sun co puna neng taleami tuda, sun pepu talepra kunkamenge. 9 Ange utopu tep nengeda, Israel nesala yala-yala yumada, sun co puna nengdi taleami ngeda, atuda sun yala sisinge cadi, ton bokra yuk yala neng tep karena gume. Deiyoda, Israel yala neng yuk-yuk bokra taleami tuda, yuk-yuk yala nesala tep bongdana gume. Sun pe men di ataleamitopu, yuk-yukpu talepra kunkameng tuda, sun pe tu sisipu kunkamre. Aupu yumada Musadi pepu.

10 Allah er si Yahwehdi, Musa damai tep, “Ange-ange yumada ukunkamrume,” peiputopu, Musadi lap peipupa, nimi si Zelafehaddi deipu ner nyapu, sun pamubari nerapu yumada, apeipunge utopu kupi. 11 Atep, Zelafehaddi deiamu nerapu sun sida, Mahla cap, Tirza cap, Hokla cap, Milka cap, tonda Noa cap, sun yumada, sun co puna ngebodi deiamupa, deipdanen yakarami yala nengdi deipi nengpu, tamupra dorami. 12 Sun anerapu dopi nengda, Yusupdi deipu ngebo ada, Manasye er yala nengdi deipipa, dadeipdanen barami nengpu dopi. Atep nengeda, sun nai bo Zelafehad taleamu tuda, sun ayala neng dipapu, sundi atu tupa talepbarami.

13 Aupu yumada, Allah er si Yahwehdi, Musa geken damai peipupa, Musadi sun Israel nesala yuma sun gekena tep, “Angepu ukupra-ukupra kunkamrume. Angeda pio men kunkamrume,” pepra lap pepu. Aupu peipu taru, sun Israel nesala yumada, ila ban mutu, er si Moab mutu tara neitamai dinin, Yordan me pirmanai, mutu si Yeriko mutu, ila ati arum doramidi kuramyai bena lap pepu.