Num 4 | XteSC | STEP | Allah Yahwehdi, Musa cap, Harun cap tep, “Sundi ukupkururume,” peipu.

Numbers 4

Lewi yala nengpu dinin, Kehatdi deipu yala neng, sun pel dona deiyonge tep, karepu upu

1 Allah Yahwehdi, Musa cap, Harun cap tep, “Sundi ukupkururume,” peipu. 2 Sun Lewi yala nengpu dinin, Kehat yala neng ton, sun yuk nukurume. Ada, Kehatdi deipupa, dadeipdanen yakanung nesala, sun nyapsilip yuk-yuk kunungtopu, deiyo kepra talepipa, sun gung tenpu kepra kunung nesalada, ‘Sun denge yumada, ware kupra kunung do?’ tenen, kael kemna tep, sun si sengna tep pel dopkururume. Sun gung cap, sun co puna neng akuramitopu tenepmumdi, nukamrume. 3 Tonda, sun ayala neng yuma konum si sekrumu dingeda, nimipu, sun umur tiga puluh tahun keamre neng di dipra, itara umur lima puluh tahun (50) keamre nengda, sun si yuk ton sekurume. Sun anengda, Allah Yahweh cap, nimi cap, antamna tep dodin tenda ati neitamai pel yuk-yuk bokra dopmanto neng tep, sun si yuk bokra sekurume. 4 Asi sekmem neng, sun pel dona ngeda ake. Akati neitamai kuramre keca, pio telep lengna ngeda, sundi talepra pel dopbankamenge.

5 Tonda, Allahdi Musa tep, “Kandi Harun cap, er nyapu cap, sun yuma tep, ange-ange kunkamrume pepra, bena pepkurume,” peipu. Ada, ne cap, nimi cap antamna tep, dodina ati dopra kuramrumnyai urumna taru konum kupre pangeda, sun adipapu ne si eremna ati neitamai wekra bengedi, atara kupmare Telep Lengna Ati cap, ortara kupmare Pio Telep Lengna Ati cap, wilimna tep, daneitamai kapkoteprum lyom opkal, Pio Telep Lengna Ati wengbana tep buplan damai ngeda, sun aneng dipapu bena dang dokotemkamnunge. Aopkal dopropmengedi, ne upu pepra deipsisipa, sekrumdi kipra deiprum co bekin, er sida Peti Perjanian, ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 39:35 dinkurume.} er nong deiki tara aopkal di singipdongopkamenge. 6 Opkal di dopra, apeti co nong deiki konum singipdongopmengopda, ton cap apeti co deiki tara urasin dam tara singidongona tep nengeda, pio bol nunul keca di, aopkal cap, aco bekin cap, er nong deiki singidongonkamnunge. Ukupmenge dingeda, kera bol derin opkal im kalum daramra utopunge di, perekra deiki tara deipra kepdongopmenge dingeda, apeti co dubana tep, kup-kup dan-dana tara pela lyom co wipra apela co dongona tep, cicin utopu keca ketenepra deiaminge bon dongopra dubenkamenge.

7 Ukupmengopda, ‘Allah Yahwehda, nun damai akurure’ tenena tep, roti kwaneng deriryakana tep dopra derinung keca mejada, lyom kain er kamoda im kalum daramra utopu ngedi, bekra deipkamnunge. Ukupmengepa, telep kupre pangeda, siltong telep pena tep keca uku dongopra derina tep piring cap, me mau cap, cangkir cap, tonda anggur du di purupra derin me kipra derina tep, ame mau ton yuk-yuk ketenepra im kalum daramra utopu opkal deiki deipkamnunge. Tonda, Allah er karena tep jen me karena tep me mau cap, tonda jena tep ketenepra dapmarumu roti kwaneng cap ketenepra, im kalum daramra utopu opkal deiki deipkamnunge. Akeca-keca yumada, aopkal deiki ketenepra deipkamnunge. 8 Ange yuma konum kupmengopda, kemdongona tep nengeda, akati piring cap, me mau cap, yuk yambul pel don keca cap, jen roti kwaneng jen cap yumada, yapi bi opkal bol di akeca yuma singidongonkamnunge. Utopu, itara di singidongona tep nengeda, bol nunul kain di deipra singidongonkamnunge. Adopra deipmenge keca yuma doupra bana tep nengeda, Peti Perjanjian co lase pirmanai yuma, pela co dongona tep, cincin urasin utopu keca keteneipinge bon bisi, dongopra dubankamenge.

9 Ukupmengopda, sun adipapu upna lana er derina deiyonge cap, tonda, upna laramrenge minyak cap, upna uku tamdongona keca cap, ange yumada, opkal bol er kamuda, im kalum urasin douramra utopu ngedi, lelimdongonkamnunge. 10 Ukupmengedi upna lana tep, derirameng nge yumada, kain urasin telepnge utopunge, bol nulnul kain di getepra kemdongonkamnunge. Ukuramenganen, akeca dopra ban taru kuprepa, akeca erepra bana tep nengeda, pela co dopra deipmengedi, adipapu ketenemdinkamnunge. Adopra deipmenge keca yuma doupra bana tep nengeda, pela co dongona tep, Peti Perjanjian co lase pirmanai dana-dana tara yuma, cincin urasin utopu keca keteneipinge bon bisi, dongopra dubankamenge. 11 Ange konum kupmengopda, sun adipapu ukupkamnunge. Ada, ‘Allahdi nun mali kun keca yuma gum kupra deipkamser’ tenen, er yapi dopra, gege pepmengaida, akeca tep, yana karen keca er yapi derinai tep, emas di dopra deiamengaipu, telep opkal di singipdongopkamnunge. Ada, urasin pio telep opkal bol im kalum daramra utopunge di, dopra yana derinkamnunge. Ukuramenganen, adopra deipmenge keca yuma doupra bana tep nengeda, pela co dongona tep, Peti Perjanjian co lase pirmanai dana-dana tara yuma, cincin urasin utopu keca keteneipinge bon bisi, dongopra dubankamenge. Ange yuma adipapu ketenemdinkamnunge.

12 Ange utopu ton, Allah er si eremna cap, er karena cap tep dodina ati, Pio Telep Lengna Ati pumbon pel dona tep, urasin telep keca yala-yala yumada, akati neitamai kuna tep, metek pel don keca, alat yumada, sun adipapu opkal bol er kamuda, im kalum urasin douramra utopu ngepu doprapmengedi, getepra derinkamnunge. Ukupra deipmenge dingeda, akeca deiki singina tep nengeda, urasin telep bol nunul opkal dipapu singidongonkamnunge. Akeca yuma konum getepmengepa, adeipmenge keca doupra duban taru konum kuprepa, akeca yuma erepra bana tep nengeda, pela co dongona tep, pela co dongona tep, Peti Perjanjian co lase pirmanai dana-dana tara yuma, cincin urasin utopu keca keteneipinge bon bisi, dongopra dubankamenge. Ange yuma adipapu ketenemdinkamnunge.

13 Allah er si eremna tep keca, uku dongomna tep keteneipyai, er sida mesba, ange deiki sikke di lupra dopropmengedi, amesba ^{▼▼mesba – Akeca gambar dina tep, Keluaran 40:6 dinkurume.} deikida, opkal lyomnge er urasinda, im kalum urasin daramra utopunge dinin, pio telepnge, er urasinda ungu peramenge bekra, perekra deipmengepa, kemdongonkamnunge. 14 Tonda, amesba deikida, ungu kamu opkal di konum bekra deipmenge dingeda, Allah er si eremna tep, pel don taru kuna tep keca yala yumada, adeikipu dopra deriryakankamnunge. Ada, uku sengnai cap, kina lungna keca garpu, bela cap, lukra dorona keca cap, tonda jen keca lukra derina keca baskom cap yuma, ketenepra derinkamnunge. Ange yuma konum ketenepra deipmengopda, bol nunul pio telep opkalda, urasin pio telepnge dipapu, kepdongopra derinkamnunge. Tonda, adeipmenge keca doupra duban taru konum kuprepa, akeca yuma erepra bana tep nengeda, pela co dongona tep, pela co dongona tep, Peti Perjanjian co lase pirmanai dana-dana tara yuma, cincin urasin utopu keca keteneipinge bon bisi, dongopra dubankamenge. Ange yuma adipapu ketenemdinkamnunge.

15 Allah Yahwehdi, Musa cap, Harun cap tep pepu.

Ne Allah cap, nimi cap, antamdana tep, lyom opkal bol di dodin tenda ati uruptapra bankunge taruda, arup konum pepmasentopu, menmenada Harun cap, er nyapu capdi, ne si eremna ati bura tara keca cap, akati pumbon kure keca yuma cap, ketenepra deipmengedi, telep keca di singipdongopmengedi, getepkamnunge. Ukupmengopda, sun Israel nesala bisi bankunge taruda, Harun cap, er nyapu cap, sun adipapu akati neitamai derirameng keca yuma cap, tonda akati pumbon kuna tep, ketenepra deiamenge keca yuma capda, adipapu ketenepra deipmengedi, kemdongonkamnunge. Ukupmengedi konum ketenepra deipmengopda, sun Kehat yala neng yangedi, akeca yuma doupra banada, telepe. Ada Kehat yala neng sun pel tepa.

Dinino, sun Kehat yala nengdi, ‘Akecada, nun ton eptepe’ tenen, dirpetena cap, tonda akati pumbon derirameng keca damai bana cap, akeca bol bena capda, men kunkamnunge. Deiyoda, akeca yumada, ne Allah Yahweh ne kecapu kunkamre dinin, akeca sun aneng ton kael kepmengedi, ‘Nun ton ukuptepe,’ tenepmengopda, atenepmenge nengda, denapu kunkamenge.

16 Ila imam deiyo ngebo Harun, er mi Eleasar dipapu upu penkamrure. Ada, upna lana tep, minyak me likra derinkameng keca cap, tonda Allah morona tep, nintong telep keca uku dongoramenge keca cap, Allah karena tep gandum do, yuk yal keca do, Allah tep karena taru di pel doramenge nge cap, nimi deiyo kemna tep telep minyak me sun giso deiki dingdoramenge mokon cap, apel ton talepra donkamrure. Tonda, Allah cap, nimi cap antamdana tep, opkal bol di keana dodin ati derinung nge cap, akati pumbon neitamai derinung nge cap, akati neitamai di pel dona tep talenung keca yuma cap, akati neitamai kunkamre keca cap yuma tep nengeda, er angebo adipapu apel talepra donkamrure. 17 Allah Yahwehdi aupu pepu dingeda, Musa cap, Harun cap tep, aupu ton cap dukdongopra pepu.

18 Lewi yala neng kankan dinin, sundi derirami neng, sun Kehat yala neng tep pepkune. ‘Sun Kehat yala neng yuma depbanmanganen, amenda taru gum kupnup’ tenena tep, Kehat yala neng tep moupra kalengkamrume. 19 Sun Kehat yala nengda, men depkameng dinin, amenda taru pio gam kunkameng’ tenena tep nengeda, ukunkamrume. Sun Kehat yala nengdi, ne si eremna tep, dodin opkal ati pumbon wekmengedi, ‘Allah er mawa keca, pio telep lek keca getepra deipmasenge kecada, ange yuma dopra dubenkamepe,’ tenepmengedi, akati wekra, alek keca damai benge taruda, Harun cap, er nyapu cap, ataru dipapu akati wekmengedi, sun Kehat neng tenpu-tenpu tep, “Kanda akeca tenpu dopra dubenkamrume. Akeca ton dopra dubenkamrume,” pepra perameng utopu, aneng yuk-yuk dinin, akecapu dopra dubenkamenge. 20 Dinino, sun Kehat nengda, Allah er si eremna ati wekmenge taruda, ‘Nun ton aLek keca eptepe,’ tenepmengedi, akeca mening damai bena men epkamenge. Ue metek adipapu alek keca epmengopda, adipapu depnunga cadi, men dinkamnunge. Akeca damai dinada, pio meme.

Lewi yala neng dinin, Gerson deipu nengdi talepra pel dona tep, pepu upu

21 Aupu konum pepu dingeda, Allah Yahwehdi, Musa tep, “Kanda ukupkurume,” peipu. 22 Sun Lewi yala nengpu dinin, Gerson yala neng ton, sun yuk nukurume. Ada, ‘Sun gung ware kupra kunung do?’ tenen, kael kemna tep, sun si sengna pel dopkurume. Ada, Gersondi deipupa, dadeipdanen yakanung nesala, sun nyapsilip yuk-yuk kunungtopu, sun gung tenpu kepra kunung nesala cap, sun co puna nengdi deipipa, dadeipdanen yakarami neng akuramitopu, sun yala yuk-yuk akuramitopu nukmemdi, sun si sengkamrume. 23 Tonda, sun ayala neng yuma konum si sekmem dingeda, nimipu, sun umur tiga puluh (30) tahun keamre neng di dipra, itara umur lima puluh tahun (50) keamre nengda, sun si yuk ton wepra sekurume. Sun anengda, Allah Yahweh cap, nimi cap, antamna tep lyom opkal bol di dodin tenda ati neitamai pel puto di dopmanto nengpu, sun si yuma sekurume.

24 Asi sekmem neng, sun pel dona ngeda ake. Allah er si eremna ati bura tara kuramre keca, Israel nesala yuk mutu benkunge taruda, sun Gerson yala neng dipapu akeca yuma erepra dubana tep, apel talepra donkamenge. 25 Sundi dubankameng kecada, ake. Allah cap, nimi cap antamdana tep, lyom opkal bol di dodin tenda ati dela utopunge cap, akati deiki amnyabo utopunge, im kalumange cap, ange deiki tara pio telep sapi bol di singidongona tep opkal cap, tonda akati dopmenga, wengbana bisi buplan kemdongona tep opkal cap, akeca yuma doupra bana tep, sun Gerson yala neng si sekra deipkurume.

26 Tonda, Allah si eremna tep, opkal bol di dodina tenda ati dinin, bura tara dana-dana tara beilya utopunge tep, kemdongona lyom opkal cap, akati damai wengban bisi, kamkotena tep abuplan utopunge derinung opkal cap, Allah karena tep uku dongona tep, er si mesba ongomgenepra kamkotemna tep derinung opkal cap, tonda akati bura tara beilya utopu lyom opkal, petenkemna tep tapu di getepra koundongon keca cap, tonda akeca yuma pel dona tep talenung keca cap, sun Gerson yala neng dipapu donkamnunge. Israel nesala yuk mutu benkunge taruda, sun Gerson yala neng dipapu akeca yuma erepra dubankamnunge.

27 Musa kan cap, Harun cap sunda, sun aGerson yala neng pel donmange pangeda, moupra dirumudi, “Akecada ukupra douprumudi, bankamrume. Sun pelda ukupra donkamrume,” pepra, sun aneng tep betapra kalengkamrurume. Ada, Harun cap er nyapu cap, sundi Gerson yala neng tep, pel kareprumupa, sundi donkamenga tep pepsene. Tonda, sun anengdi doupra benmanto bung keca yumada, sun dipapu doupra bankamnunge. 28 Allah cap, nimi cap antamna tep, dodin tenda ati bura tara kuna keca yumada, arup pepmasentopu, ‘Sun Gerson yala neng dipapu, apel donkameng’ tenen, sun pel lap pepra karenkamrume. Cadi, apel dona tep deiyo kemna ngeboda, Imam neng, sun ila deiyo ngebo Harun, er mi Itamardi deiyo ngebo kunkamre.

Lewi yala neng dinin, Meraridi deipu nengdi, talepra pel dona tep, pepu upu

29 Allah Yahwehdi Musa tep pepu. Lewi yala neng dinin, Meraridi deipupa, adeipdanen yakangedi kunung yala nesalada, sun yuk-yuk kununga cadi, ‘Sun dengeda, ware kupra kunung do?’ tenen, kael kemna tep, nukmemdi, sun si moupra sekurume. Ada, Gersondi deipupa, dadeipdanen yakanung nesala, sun nyapsilip yuk-yuk kunungtopu, sun gung tenpu kepra kunung nesala cap, sun co puna nengdi deipipa, dadeipdanen yakarami neng kuramitopu, sun yala yuk-yuk dakuramitopu kunung neng nukmemdi, sun si sengkamrume. 30 Tonda, sun ayala neng yuma konum si sekmem dingeda, nimipu, sun umur tiga puluh (30) tahun keamre neng di dipra, itara umur lima puluh tahun (50) keamre nengda, sun si yuk-yuk sekurume. Sun anengda, Allah Yahweh cap, nimi cap, antamna tep, dodin tenda ati neitamai pel puto di dopmanto nengpu, sun si yuma wepra sekurume.

31 Sun anengda wepra deipmempa, Allah si eremna ati urupra deipmengepa doupra bankamnunge. Ada, akati ayumnya co cap, maringdina co cap, tonda tengdirameng ayumnya co cap, tabima dimna co cap, aco yuma amu tara deiyo derirameng gat keca cap, ange yumada, sun anengdi doupra bankamnunge. 32 Tonda, sun aneng dipapu, Allah si eremna ati dinin, bura tara beilya utopu tep, lyom opkal kamkotemna tep, ingne ayumnya co yuma cap, akayumnya barimna tep bungil dimne co cap, ayumnya ikunga tep, peten kamdina tep, gerengna tapu cap, akati dopmengepa ‘Longna gum, dim pepra tekamre’ tenen, kuna keca cap, ayumnyada, sun aneng dipapu doupra bankamnunge. Ada sun Merari yala nengdi akeca yuma bupra deipmengedi, kandi, “Ange doupkurume, angebodi angeda doupkurure,” pepmemtopu, sundi akecapu doupra dubankamnunge.

33 Merari yala nengdi talepra donkameng pelda ake. Allah cap, nimi cap antamna tep, dodin tenda ati bura tara co cap, derinung keca yala-yala yuma capda, Merari yala neng dipapu doupra dubankamenge. Apel dona tep deiyo kepkamre ngeboda, Imam neng sun deiyo ngebo Harun, er mi Itamardi gonga keprepa, donkamnunge.

Lewi yala neng sun si sengna pel dona tep, pepu upu

34 Allahdi aupu yuma upepra deiputopu, Musa cap, Harun cap, tonda Israel nesala talepra kurami deiyo neng yuma capdi, Lewi yala ngebodi deipu neng dinin, sun Kehatdi deipupa, adeipdanen yakangedi kurami yala nesalada, sun yuk-yuk kuramya cadi, ‘Sun dengeda, ware kupra kunung do?’ tenen, kael kemna tep, nukidi, sun si sekra deipi. Ada, Kehatdi deipupa, dadeipdanen yakarami nesala, sun nyapsilip yuk-yuk kuramitopu, sun gung tenpu kepra kurami nesala cap, sun co puna nengdi deipipa, dadeipdanen yakarami neng kuramitopu, sun yala yuk-yuk dakuramitopu nukidi, sun si sekra deipi. 35 Tonda, sun ayala neng yuma konum si seki dingeda, nimipu, sun umur tiga puluh (30) tahun keamu neng di dipra, itara umur lima puluh tahun (50) keamu nengda, sun si yuk-yuk seki. Sun anengda, Allah Yahweh cap, nimi cap, antamna tep dodin tenda ati neitamai pel puto di dopmanto nengpu, sun si yuma sekra deipi.

36 Sun ayala nesala sun dengeda, dua ribu tujuh ratus lima puluh (2.750) neng kurami. 37 Agungda, Allah cap, nimi cap, antamdana tep, opkal bol di dodin tenda ati tep, pel talepra dorami. Sunda Kehatdi deipupa dadeidanen yakarami yala neng kurami. Allah Yahwehdi Musa tep, “Ukupkurume,” pepra deiputopu, Musa cap, Harun capdi, sun Kehat yala neng tep, nukrapreidi, sun si sekrei.

38 Ange utopu dinin, Lewi yala ngebodi deipu neng dinin, sun Gersondi deipupa, adeipdanen yakangedi kurami yala nesalada, sun si sekra deipi. Ada, Gersondi deipupa, dadeipdanen yakarami nesala, sun nyapsilip yuk-yuk kuramitopu, sun gung tenpu kepra kurami nesala cap, sun co puna nengdi deipipa, dadeipdanen yakarami neng kuramitopu, sun yala yuk-yuk dakuramitopu nukidi, sun si sekra deipi. 39 Tonda, sun Gerson yala neng yuma konum si seki dingeda, nimipu, sun umur tiga puluh (30) tahun keamu neng di dipra, itara umur lima puluh tahun (50) keamu nengda, sun si yuk-yuk seki. Sun anengda, Allah Yahweh cap, nimi cap, antamna tep, opkal bol di domi dodina ati neitamai pel puto di dopmanto nengpu, sun si yuma wepra sekra deipi. 40 Sun Gerson yala nesala sun dengeda, dua ribu enam ratus tiga puluh (2.630) neng kurami.

41 Gerson yala neng gungda, Allah cap, nimi cap, antamdana tep opkal bol di keana dodin tenda ati derirami pel talepra dorami. Sunda Gersondi deipupa dadeipdanen yakarami yala neng kurami. Allah Yahwehdi Musa tep, “Ukupkurume,” pepra deiputopu, Musa cap, Harun capdi, sun Gerson yala neng tep, nukrapreidi, sun si yuma sekrei.

42 Ange utopu dinin, Lewi yala ngebodi deipu neng dinin, sun Meraridi deipupa, adeipdanen, yakangedi kurami yala nesalada, sun si sekra deipi. Ada, Meraridi deipupa, dadeipdanen yakarami nesala, sun nyapsilip yuk-yuk kuramitopu, sun gung tenpu kepra kurami nesala cap, sun co puna nengdi deipipa, dadeipdanen yakarami neng kuramitopu, sun yala yuk-yuk dakuramitopu nukidi, sun si sekra deipi. 43 Tonda, sun Merari yala neng yuma konum si seki dingeda, nimipu, sun umur tiga puluh (30) tahun keamre neng di dipra, itara umur lima puluh tahun (50) keamre nengda, sun si yuk-yuk seki. Sun anengda, Allah Yahweh cap, nimi cap, antamna tep, opkal bol di domi tenda ati neitamai pel puto di dopmanto nengpu, sun si yuma sekra deipi.

44 Sun Merari yala nesala sun dengeda, tiga ribu dua ratus (3.200) neng kurami. 45 Merari yala gungda, Allah cap, nimi cap antamdana tep opkal bol di derirami keana dodin tenda ati tep, pel talepra dorami. Sunda Meraridi deipupa dadeidanen yakarami yala neng kurami. Allah Yahwehdi Musa tep, “Ukupkurume,” pepra deiputopu, Musa cap, Harun capdi, sun Merari yala neng tep, nukrapreidi, sun si yuma sekrei. 46 Uda, Allahdi peiputopu, sun Musa cap, Harun cap, Israel nesala talepra deiyo tep keami neng capdi, Lewidi deipupa, dadeipdanen, yakarami neng tep nukrapidi, sun si seki. Sun Lewi yala neng, sun nyapsilip yuk-yuk kuramitopu, sun gung yuk-yuk kepra kurami nesala cap, sun co puna nengdi deipipa, dadeipdanen yakarami neng ton akuramitopu, sun yala yuk-yuk dakuramitopu nukrapidi, sun si sekra deipi.

47 Ada, sun Lewidi deipupa, dadeipdanen yakarami yala neng yuma, yuk-yuk dinin, sun yala si konum seki dingeda, nimipu, sun umur tiga puluh (30) tahun keamre neng di dipra, itara umur lima puluh tahun (50) keamre nengda, sun si yuk-yuk seki. Sun anengda, Allah Yahweh cap, nimi cap, antamna tep, opkal bol di domi dodina tenda ati tep, neitamai pel dona cap, akati bura tara derirami gat keca doupra bana cap tep, apel puto di dopmanto nengpu, sun si yuma sekra deipi. 48 Uda, sun anesala yuma tapakra dengeda, delapan ribu, lima ratus delapan puluh (8.580) nesala kurami. 49 Allah Yahwehdi Musa damai pepra deipudi, “Ukupkurume,” peiputopu kupra, aneng yuma, sun si yuk-yuk sekra derina pel dopi. Ada, ‘Sun anengdi talepra donkameng pelda ake’ tenen, ketenepra derina cap, ton ‘Sun anengdi doupra bankameng kecada ake’ tenen, ketenepra derina cap tep, apel dopidi ketenepra deipi.